ويكيپيديا

تاريخ د لمغريب

(تحولات من التاريخ د المغرب)

تّاريخ د لمغريب تايرجع ل عصور قديمة بزاف قبل التاريخ، و تعاقبات عليه بزاف ديال الصناعات بحال لأشولينية، ولموستيرية، و لعاتيرية، و لإيبروموريزية، و لكارديالية، و لجرسية. لكتيشافات لأركيولوجية لي تلقاو ف لمغريب بحال لأتار ديال جبل إيغود ؤ تافوغالت ـ تايتبتو بلي تاريخ د لمغريب تايرجع لكتر من 400.000 عام، لكن تاريخ لي مسجل ديال لمغريب بدا معا ستعمار لفينيقيين لسواحل د لمغريب بين لقرن 6 ولقرن 8 قبل لميلاد، ؤ لي خلاو ف لمغريب بزاف ديال لأتار بحال لمدينة تاريخية ليكسوس، ف لوقت لي كان لمغريب عايشين فيه لأمازيغ لي هوما سكان لأصليين ديال هاد لمنطقة. بعد لفينيقيين ولقرطاجيين، تأسس ف لمغريب أول تنظيم سياسي من طرف سكان لأصليين، لي هو مملكة موريطانية و باقي لممالك لأمازيغية لقديمة، لي تعرضو معا لوقت ل لإستعمار الروماني، لي مزال لأتار ديالو كاينة ف لمغريب بحال لمدينة لأترية ديال واليلي.

فلوس رومانية من القرن الثالث تلقاو ف مدينة الصويرة.

ف لقرن 8 ميلادي، دولة لأموية قدرات تفتح لمغريب و دخل ليه لإسلام، ؤ بعد ما طاحت دولة لأموية بانت أول إمارة إسلامية مستقلة ف لمغريب لي هي إمارة نكور ف شمال د لمغريب، كيف ما بانو إمارات أخرين بحال بورغواطة ؤ سيجلماسة وغيرها. لكن أول دولة إسلامية مستقلة بانت ف لمغريب هي دولة لإدريسية، ؤ من بعد جاو سلالات مسلمة أمازيغية أخرى بحال لمرابطين ولموحدين ولمرينيين ولوطاسيين، لي حكموا زيادة على لمغريب، لبلاد د لأندلس. بعد هاد لفترة تولاو على لمغريب 2 دول مسلمة من أصل شريف، لي هوما سعديين و بعدهم لعلويين لي فوقتهم فرضات فرنسا لحماية على لمغريب، لي ستامرات تا لعام 1956 فاش خدا لمغريب لاستقلال بعد سنين من لمقاومة لمسلحة وسياسية لي رجعات لحوكم للعلويين لي مزال حاكمين لحدود ليوم على يد لماليك محمد ساديس.

لأتار لي تلقاو ف لمغريب بينو بلي هاد لمنطقة كانو عاشو فيها نّاس قبل 400.000 سنة عل لأقل. ولاكين تّاريخ لمسجل ديال لمغريب تيبدا معا ليستيطان لفينيقي لمحتمل لسّواحل المغربية مابين لقرن تّامن و تّاسع قبل لميلاد ولاكين لمنطقة عاشو فيها لأمازيغ شي ألاف د سنين قبل من لفينيقيين. وسعات مدينة قرطاج السيطرة ديالها على السواحل. وبقاو تما حتى لافان ديال القرن الثالث قبل الميلاد، من بعد ولاو الملوك الأصليين تايحكمو دوك المناطق. ومن القرن الثالث قبل الميلاد حتى للقرن الرابع بعد الميلاد كانت المنطقة تايحكموها الحكام لمحليين الأمازيغ بحال مملكة موريطانية الأمازيغية.

الفتح لإسلامي للمغريب ف لول ديال القرن الثامن الميلادي، ولكن انفصلت على لخلافة لأموية من بعد ما ناضت الثورة البربرية عام 740. من بعد نص قرن، تاسسات الدولة المغربية من طرف الأدارسة. وف لعهد ديال لمرابطين ؤ لموحدين لأمازيغية كان المغرب كايسيطر على لمغرب الكبير ؤ صبليون. أما السعديين لعّرب فحكمو المنطقة من عام 1549 حتال 1659، تبعوهوم العلويين ولاد عمام سعديين من 1667 حتى لدابا، لي مازالين تايحكمو المغرب لحد الساعة.

ف 1912 ومن بعد الازمة المغربية وأزمة أݣادير، تسنات لمعاهدة ديال فاس، وقسمات لمغريب مابين الحماية د لفرنسيس ولحماية د صبليون. وف 1956، ومن بعد 44 عام ديال الحكم الفرنساوي، خدا لمغريب ستيقلال ديالو من فرانسا. ومن بعد وقت قصير رجع أغلبية الأراضي لي كانو تحت السيطرة ديال صبانيا، بحال استيرجاع مدينة طرفاية سنة 1957 ؤ سيدي افني سنة 1969 ؤ استيرجاع الساقية لحمرا (العيون، السمارة) سنة 1975 ؤ استيرجاع واد الذهب سنة 1979(الداخلة، بوجدور)، بعدما خرجات موريتانيا بسبب الضغوطات والعسكر ديالها ضعيف وصلات بيها الدرجة مقدراتش تحمي العاصمة ديالها من مرتزقة البوليساريو.

المغرب ماقبل التاريخ بدل

بيينات الحفريات الأثرية بلي المغرب عاشو فيه لاسلاف ديال الهوموسابيينس، وحتى شي أنواع بشرية قديمة. ف عام 1971 تم ليكتيشاف ديال شي عظام متحجرة لواحد سلف بشري عمرو 400،000 عام في سلا.[1] ؤ ف عام 1991 تجبدات لعظام ديال بزاف د لأفراد د لهوموساپيان ف جبل إيغود، وملي تدار ليها لتأريخ ب تّقنيات لعصرية في عام 2017 تبين بلي لعمر ديالهم مكايقلش على 300000 عام، هادشي لي كايجعلها أقدم لعينات د الهوموسابيينس في لعالم.[2] فعام 2007، تم ليكتيشاف ديال شي حبات ديال صدف صغيرة مثقبة في تافوغالت كايوصل لعمر ديالها لشي 82000 عام، هادشي للي كيجعلها أقدم دليل تلقى على الزينة الشخصية فالعالم.[3]

ف العصور لحجرية الوسطى، ما بين 20،000 و5000 سنة، كانت لجغرافيا ديال لمغريب كاتشبه ل سّافانا كتر من لمناضير طّبيعية لقاحلة لي كاينة دابا.[4] واخا كانعرفو غير شوية على المستوطنات في المغرب فداك الوقت، ولكن الحفريات للي تدارو فبلايص خرين فالمنطقة المغاربية بيينات بللي كان فيها بزاف ديال الحيوانات والغابات مناسبة للصيادين والملتقطين ديال العصر الحجري الوسيط بحال دوك ديال لحضارة لقبصية.[5]

ف لفترة نّيوليتية (لفترة لحجرية جّديدة)، لي تبعات لفترة لحجرية لوسطانية، كانت سافانا كايحتلوها الصيادين والرعاة. زداهرات ثقافة ديال هاد الصيادين ورعاة ديال لفترة نّيوليتية حتى بدأت هاد المنطقة كاتجف بعد 5000 ق.م. بسباب التغيرات المناخية. كاتشتارك المناطق الساحلية ديال لمغرب الحالي في للول ديال لفترة نّيوليتية ف تّقافة ديال فخار لكارديوم لي كانت شايعة منطقة لبحر لمتوسط كلها. و بيينات لحفريات لأثرية بلي تدجين لبهايم و زراعة لمحاصيل طرات ف لمنطقة ف ديك لفترة. في فترة العصر النحاسي، وصلت حضارة القدور الجرسية للساحل الشمالي ديال لمغرب.

التاريخ القديم بدل

قرطاج (تقريبا 800 - 300 قبل الميلاد) بدل

 
واحد الصحن فينيقي مصبوغ بلحمر، من لقرن السابع قبل من لميلاد ، تلقا ف لجزيرة د موݣادور، الصويرة. لمتحف د سيدي محمد بن عبد الله.

لوصول د لفينيقيين ل الساحل لمغريبي كان دليل على أن الشمال د لمغريب غاتحكمو قوى برانية بزاف د لقرون. التجار لفينيقيين اخترقو لغرب د لبحر لأبيض لمتوسط قبل القرن الثامن قبل الميلاد، ومن بعد بناو ديبووات د لملحا ولخام على جنب الساحيل و على لأنهار ف لمغريب.[6] ومن بين المستوطنات لقديمة د لفينيقيين كاينا شالا وليكسوس وموݣادور.[7] ؤ موݣادور معروفة على أنها أقدم مستعمرة فينيقية من اللوول د لقرن السادس قبل من الميلاد.[8]

مللي دخل لقرن الخامس قبل الميلاد، وسعات لولاية د قرطاج السيطرة ديالها على أغلب الشمال د إفريقيا. ؤطورات قرطاج لعلاقات التجارية ديالها مع لقبائل لأمازيغية الداخلية، ووكانت كاتعطيهوم واحد الضريبة سنوية باش إضمنو التعاون ديالهم معاهوم ف لإستغلال د لمواد لخام[9]

موريطانية (تقريبا ما بين 300 قبل لميلاد - 430 بعد لميلاد) بدل

لمعلومات كثر: موريطانية و موريطانية طنجية
 
نقوش رومانية تلقاو ف اصويرة، لقرن التالت.

كانت موريطانية مملكة أمازيغية مستاقلة من لقرن التالت قبل لميلاد ك أقل تقدير، ف حين كاينين أدلة من مراجع قديمة كتوتق بلي مملكة موريطانية كانت موجودة ب لفعل ف لقرن السادس قبل لميلاد، ؤ ݣاع دخلت ف حرب معا قرطاج ف أواسط لقرن لخامس على حساب جستان.[ماواضحش] و ف أواخر نفس لقرن كيقول ديودوروس الصقلي بلي جيش قرطاج كان فيه جنود موريين و حنا عارفين بلي لماليك لقرطاجي حانون[ماواضحش] طلب معاونة عساكرية من الموريين على حساب ما قال جستان، و جغرافيا موريطانية هي لمنطقة لي ف شمال لمغريب دابا. كان أول ماليك معروف د موريطانية حسب كتابات تيتوس ليويوس هو لماليك باݣا. لبعض من التاريخ ديالها لمسجل كيتعلق ب لمستوطنات لفينيقية و لقرطاجية بحال ليكسوس ؤ شالا. حكمو لملوك لأمازيغ لمناطق دخلانية ؤكانو كايسايطرو على لمناطق لإستيطانية الساحلية د قرطاج ؤ روما، غالبا على أساس بلي تابعة ليهم، وسمحو ب تواجد د لحكم الروماني. ف عام 33 قبل الميلاد ولات عميلة للإمبراطورية الرومانية، من بعد تحولات ل إقليم كامل من بعد ما لإمبراطور كاليݣولا عدم آخر ماليك ديالها، لي هوا پطليموس لموري، (40 م).

سيطرات روما على لأراضي الشاسعة لي ما كانتش محددة، بالتحالفات اللي دارتها معا لقبائل بلاصت لإحتلال لعسكري، ؤ وسعات السيطرة ديالها غير على لمناطق لي كانت نافعة من الناحية لقتصادية ؤلا لي كانت يمكن تدافع عليها بلا ما تزيد لقوة لبشرية. وداكشي علاش، لإدارة الرومانية ما عمرها فاتت دوك لمناطق لمحصورة ف السهل الساحلي الشمالي و لويدان. شكلت هاد لمنطقة سّتراتيجية جزء من لإمبراطورية الرومانية، لي تحكمات تحت سميت موريطنية الطنجية، و كانت لعاصمة ديالها هي مدينة وليلي.

 
لبقايا الرومانية د وليلي

ف لفترة د لإمبراطور الروماني أوݣوسطوس قيصر، كانت موريطانية دولة تابعة، و كانو لحكام ديالها، بحال يوبا لموري، كايسيطرو على ݣاع لمناطق لي جات ف لجنوب د وليلي. ولكن السيطرة لفعالة د لفيلق الروماني وصلات ل حد منطقة سالا كولونيا (كاسطرا "Exploratio Ad Mercurios" جنوب شالا هي أقصى لجنوب لي تكتاشف حتال دابا). بعض المؤرخين كايعتاقدو بلي لحدود الرومانية وصلت حتا ل الدار البيضا، و لي كانت ديك ساعة معروفة بسميت أنفا، و لي ستاقرو فيها الرومان ك مرسا.

ف لعهد د يوبا لموري، أسس أوݣوسطوس ثلاثة د لمستعمرات، بمواطنين رومانيين، ف موريطانية حدا الساحل د لمحيط لأطلسي اللي هوما: يوليا كونسطانتيا زيليل، يوليا ڤالنتيا باناصا، ؤ يوليا كامپيستريس بابا. أوݣوسطوس غايأسس فاللخر 12 مستعمرة ف لمنطقة.[10] ف ديك لفترة، عرفات لمنطقة لي كاتسيطر عليها روما واحد التطور قتصادي كبير، بلفضل د الطرقان الرومانية اللي تبنات. فاللول مكانتش لمنطقة كاملها تحت السيطرة د روما، ؤغير ف لوسط د لقرن التاني فاش تبنا واحد ليميس ف لجنوب د سالا للي كبر وليلي. تقريبا ف عام 278 م حولو الرومان لعاصمة ديالهم لإقليمية ل طانجا ؤ وليلي بدات كاتفقد لأهمية ديالها.

دخلات لمسيحية ل لمنطقة ف لقرن التاني لميلادي، و تحولو ليها الناس ف لمدون من لعبيد و حتى من لفلاحين لأمازيغ. وف لافان د لقرن الرابع لميلادي، ولات لمناطق الرومانية مسيحية، وكانت غزوات على لقبائل لأمازيغية، لي تحولو بعض لمرات بشكل جماعي. كيما تطورات لحركات لإنشقاقية ولهراطقة، لي كانت غالبا واحد الشكل من شكال د لإحتجاجات السياسية. كان ف لمنطقة عدد كبير من السكان ليهود حتا هوما.

لمغريب لإسلامي لقديم (ما بين 700 ؤ 1000) بدل

 
لمغريب لكبير من بعد الثورة لأمازيغية

الفتح الإسلامي للمغرب (لقرن 8م) بدل

بدا الفتح الإسلامي للمغرب لكبير فوسط لقرن السابع لميلادي، ؤما كمل تال اللول د لقرن الثامن. ؤجاب معاه اللغة العربية ؤلإسلام. وخا كان لمغريب طرف من لإمبراطورية لإسلامية لكبيرة، كان فاللول غير إقليم تابع لإفريقية، ؤكانو لحكام كايعينهم لحاكم المسلم اللي كاين ف لقيروان.[11]

دخلات لقبايل لامازيغية ف لإسلام، ولاكينهم بقاو محافظين على لقوانين لعرفية ديالهم. كيما كانو كايخلصو الضرائب ولجيزية للحكام لمسلمين الجداد.[12]

الثورة لبربرية (740 - 743) بدل

ف عام 740 ميلادي، دارو لأمازيغ تورة ضد لخلافة لأموية لي كانت حاكمة، ؤ لي بداوها لخوارج. بد التمرد ما بين لقبائل لأمازيغية ف لغرب د لمغريب، و نتاشر بالزربة ف كامل لمنطقة. واخا وقف هاد التمرد ؤ تلاشى عام 742 م قبل ما يوصل للقيروان، ولاكين لحكام لأمويين ف دمشق ولا حتى لخولافا ديالهم لعباسيين ما عمرهم قدرو باقي يفرضو لحكم ديالهم على لمناطق اللي جات ف لغرب د إفريقية. خرج لمغريب من السيطرة لأموية و لعباسية، و تقسم ل بزاف ديال الدول أمازيغية صغيرة ؤمستاقلة بحال برغواطة وسيجيلماسة ونكور، وحتى تلمسان و تاهرت لي كانو ف لغرب د لجزائر.[13] ؤصاوبو لأمازيغ نسخة خاصة بيهم من لإسلام. شي وحدين منهم، بحال بنو يفرن، حافطو على علاقتهم بالطوائف لإسلامية لمتشددة ؤالراديكالية، وشي وحدين خرين، بحال برغواطة، صاوبو دين جديد سينكريتي ؤلا مخلط خاص بيهوم.[14][15]

برغواطة (744 – 1058) بدل

لبرغواطيين كانوا واحد لإتحاد د للمجموعات دلقبائل لأمازيغية اللي كانت كاتعيش جنب الساحل د لمحيط لأطلسي د لمغريب، لي كاينتاميو لقبيلة مصمودة لأمازيغية.[13] من بعد ما تحالفو معا التمرد ديال لخواريج الصفرية ف لمغرب ضد لأمويين، قدرو يأسسو دولة مستاقلة (744 - 1058) ف منطقة تامسنا جنب الساحل د لمحيط لأطلسي ما بين أسفي ؤسلا تحت لحكم د طريف لمطغري.

سيجيلماسة (700 – 1300) بدل

 
صونطر تجاري د سيجيلماسة على طول د طرݣان تجارية ف صحرا لكبيرة، c. 1000–1500. كارينات ذهب معلمين ب لقهوي لفاتح.

سيجيلماسة كانت مدينة مغريبية من لقرون الوسطى ومركز تجاري على لحافة الشمالية د الصحرا لكبرى. كاينين لأنقاض د لمدينة على جنب واد زيز ف واحة تافيلالت حدا مدينة الريصاني. تميز التاريخ د لمدينة ب بزاف د لغزوات من سلالات لأمازيغية. كانت حتال لقرن ربعطاش، لمحطة الشمالية د الطريق التجارية د الصحرا لكبيرة، ؤكانت وحدة من لمراكز التجارية لموهيمة ف لمغرب لكبير ف لعصور لوسطى.[16]

مملكة نكور (710 – 1019) بدل

كانت مملكة نكور واحد لإمارة متمركزة ف منطقة الريف ف لمغريب. كانت لعاصمة ديالها ف اللول ف تمسمان، من بعد نتاقلات ل نكور. تأسسات لمملكة ف عام 710 ميلادي و لي أسسها هو صالح بن منصور. ف لحكم ديالو، دخلات لقبائل لأمازيغية لمحلية ل لإسلام، ولكن طيحوه من بعد وبدلوه بواحد أخر من الزيديين من قبيلة نفزة. بدولو من بعد الري ديالهم وعاودو رجعو بن منصور. حكمات سلالة د بني صالح، من بعد حتى ل عام 1019.

ف عام 859، دخل ل لمملكة مجموعة من 62 د الباطوات من لڤايكينݣ، لي غلبو واحد لقوة مورية ف نكور لي حاولو يتدخلو ف النهب ديالهم ف لمنطقة. من بعد ما بقاو تمنية يام ف لمغريب، رجعو لڤايكينݣ ل سبانيا ؤمشاو معا الساحل الشرقي[17]

دولة د لأدارسة (789 – 974) بدل

 
مدرسة لقرويين ف فاس، أسستها فاطمة لفيهرية ف لفترة د لأدارسة فلقرن التاسع.

دولة د لأدارسة هي أول دولة إسلامية مستقلة ف لمغريب على حساب شي مؤرخين[18]، حكمات من عام 788 حتى لعام 974.[19] تسمات على سميت لمؤسس ديالها لي هو دريس للول، ولد حفيد لحسن بن علي.

 
لامتداد ديال دولة دلأدارسة فلمغريب (اللون لحمر)

ف عام 789م، تبنات دولة لإدريسية للي حكمات جزء كبير من لمغريب على يد ادريس بن عبد الله[20][21]، لي كان هرب من موقعة فخ عام 786م، وجا لمدينة وليلي وستقبلاتو لقبيلة لأمازيغية ديال أوربة لي بايعاتو فنس لمدينة باش يتكلف بلأمور دينية والسياسية ديالهم، بعد هاد لمبايعة، بايعوه قبايل أخرين بحال زناتة وغيرها، لي عطاه بزاف ديال لقوة باش يدير التوسوعات ديالو، حتى وصلات الدولة ديالو لتامسنا، فازاز وتلمسان، و أسسات بزاف ديال لمدون من غير فاس، بحال لبصرة ؤ تامدولت، و تبعو ليهم بزاف ديال لقبايل بحال مكناسة ؤ غمارة ؤ مصمودة، لكن واخا هكاك فشلوا لأدارسة فتوحيد ديال لمغريب، حيت فلعهد ديالهم كان لمغرب مقسم لبزاف ديال لإمارات، بحال إمارة نكور فشمال، و سجلماسة فشرق، و بروغواطة فلغرب.

كايتقال بلي هارون الرشيد صافط لي يقتل ادريس بن عبد الله بسم، من موراها شد ولدو ادريس التاني لحكم وهو باقي صغير عاد عندو 12 لعام. هاد دري ولا راجل وكبر لحكم ديالو، ؤ بنا مدينة فاس عام 808 م، و مهد للمرحلة دلقوة ديال هاد دولة، لي تبنا فيها جامع لقاراويين عام 859م، لي هو من أهم لمعالم تاريخية فلمغريب، و أقدم جامعة فلعالم زالة خدامة. بعد لمرحلة ديال لقوة، جات لمرحلة ديال ضعف لي طاحت فيها دولة عام791 م على يد يحيى رابع.

لأثار لي خلاوها لأدارسة هي مدينة فاس لي بناها دريس تاني و قسمها لعدوة ديال لأندلس و عدوة ديال لقرويين، و بنا فيها بزاف ديال لمعالم بحال جامع الأشياخ فلعدوة ديال لأندلس، ؤ جامع شرفاء فلعدوة ديال لقرويين، ؤ دور عليها سوار، و دار ليها لبيبان. فلوقت ديال لأدارسة، كانت لمدينة ديال فاس مشهورة بزاف فلعالم، حيت كانت من لمدون لقلال لي متحضرين، بحكم كانو فيها زناقي مبلطين بلحجر و تاينقيوهم بشكل دوري، و كانت لخزينة ديال دولة مرفحة حيت تادخل بزاف ديال ضرائب على تجارة لي تشهرات بيها هاد لمدينة، كيف ما دارو الأدارسة عملة خاصة بيهوم من لفضة. أهم لحوايج لي ميزات الحكم ديال لأدارسة عاود، هو جامع لقرويين، لي تايتعتابر أقدم جامعة مزال محلولة لحدود ليوم، هاد جامع لي بناتو فاطمة لفهرية عام 895 م، بلفلوس لي ورتاتهم على باها لي كان تاجر كبير جا لفاس من لقيراوان. لي خلى هاد جامع يتشهر قد هكا هو لعلوم لي تطورات ديك لوقت بلفضل ديالو، حيت كان بحال مدرسة ولا جامعة تايجيو ليها طلبة دلعلم من كل بلاصة باش يتعلمو لعلوم ديال دين و ديال لعقل، بحال طب ولمنطق وتفسير و غيرها، و كان هاد جامع تايوفر امكانية لناس باش يتعلمو نظريا ؤ تطبيقيا.[22]

لفاطميين و لأمويين ؤ دول زناتة (تقريبا 900 - 1060) بدل

ختل هاد التوازن ف لبدايات د 900، مللي وصلو لفاطميين للمغرب لكبير. من بعد ما ستولو على السلطة ف إفريقية بوقت قصير، غزاو لمغريب، ؤفتحو كل من فاس و سجيلماسة. كان لمغريب مقسم ديك ساعا، حيث كانو لحكام لفاطميين ولمجموعات لمتشددة الجديدة والتدخل من الأمويين د لأندلس كلهم كايتقاتلو على لمنطقة. لحكام لمحليين لإستغلاليين باعو ؤ عاودو باعو الدعم ديالهم ل أعلى مزايد. ف عام 965، غزا لخليفة لفاطمي لمعز المغريب مرة أخيرة ونجح ف تأسيس ديال واحد النظام. من بعد بوقت قصير، نقلو لفاطميين لإمبراطورية ديالهم للشرق ف مصر، بعاصمة جديدة ف لقاهرة.[مصدر؟]

عيينو الفاطميين الزيريين، اللي هما قبيلة من زناݣة متمركزة ف إفريقية، باش يراقبو لمناطق لقريبة لي كايسايطرو عليها. واخا هاكداك، الزيريين ما قدروش يمنعو لمغريب باش يخرج من السيطرة ديالهم وطاح بين يدين د مجموعة من مشايخ زناتة لأمازيغية لمحلية، وأغلبهم عومالا د لخليفة د قرطبة، بحال مغراوة ف منطقة فاس و لمنافسين ديالهم الرحل، بنو يفرن ف الشرق.[مصدر؟]

السلالات الأمازيغية (تقريبا 1060 – 1549) بدل

 
لمتداد ديال دولة لمرابطية

كان لمغيرب فأقوى لحالات ديالو مللي حكماتو واحد سلسلة من السلالات لأمازيغية، للي طلعات للحكم من لجنوب د جبال الأطلس ووسعات الحكم ديالها لجيهة شمال، وخداو بلاصت لحكام لمحليين.[مصدر؟] فلقرن حظاش وطناش، لمصلحين دينيين أسسو بزاف ديال سلالات لأمازيغية، كل سلالة منهوم كانت مبنية على كونفدرالية قبلية، ؤ لي قدرو يسيطرو على لمغريب لكبير ولأندلوس لكتر من 200 عام.[مصدر؟] هاد سلالات لأمازيغية (لمرابطين، لموحدين، لمرينيين، ؤلوطاسيين) قواو لهوية لجماعية ولوحدة سياسية ديال لأمازيغ.

دولة د لمرابطين ( 1060 – 1147) بدل

(مقال متعمق: لمرابطين)

 
قبة لباروديين لي بناوها لمرابطين ف مراكش

من ورا ما طاح لحوكم ديال لأدارسة، ومن عام 1060، بداو سلالات أمازيغية تايحكمو لمغريب، أول وحدة كانت هي دولة ديال لمرابطين للي لأصل ديالها من قبيلة لمتونة من صنهاجة. دولة دلمرابطين نجحات توحد لمغريب، ؤ توسعات فلأندلوس ؤ لمغريب حاليا، ؤ توسعات تا على شي بلايص من موريطانيا ومالي ولجزاير دابا، كيف ما كانت حاكمة طرقان ولمدون ديال تجارة ديك لوقت. تأسسات دولة دلمرابطين بعد 119 عام بعد ما طاحت دولة دلأدارسة، بضبط عام 1036 م على يد عبد الله بن ياسين، و دارت مراكش عاصمة ديالها، ونجحات تسيطر على بورغواطة، هاد دولة عرفات أحسن وقت ليها على يد يوسف بن تاشفين، و ماطاحتش تا لعام 1143 م على يد لموحدين. يوسف بن تاشفين، سميتو كاملة هي أبو يعقوب يوسف بن تاشفين بن إبراهيم اللمتوني الصنهاجي، تزاد عام 1009 و خدا لحكم عام 1065، و مات عام 1106 فمراكش و تدفن فيها، هو واحد من لحكام ديال دولة لمرابطية من أصل أمازيغي، (قبيلة لمثونة)، تلقب بأمير المؤمنين وناصر الدين، مراتو هي زينب نفزاوية، ؤ ولادو هوما علي بن يوسف بن تاشفين وتميمة بنت يوسف بن تاشفين.[23]

لأصل ديال لمرابطين من قبيلة لمتونا لأمازيغية اللي تابعة لصنهاجا. قدرو أنهم يوحدو لمغريب من بعد ما كان مقسم بين شحال من إمارة فتالي ديال لقرن عشرة، خصوصا فاش قضاو على لإمارة ديال سجلماسة وبرغواطة (تامسنا). لفترة دلحوكم ديال يوسف بن تاشفين، دعاو لأمراء ديال الطائفة المسلمة ف لأندلس لمرابطين باش إدافعو على لأراضي ديالهم من لمسيحيين، بعد ما تدخول لمرابطين عام 1086، حافظو على لأندالوس بعد ما كانت قريبة طيح، ؤ فعام 1090 رجع يوسف بن تاشفين للأندلس ؤ ضم أغلبية طوائف ديالها لدولة دلمرابطين.[24] بدات لقوة دلمرابطين كاتنقص من نص للول ديال لقرن طناش، حيث ضعافت دولة من بعد ما خسرو فمعركة أوريك بسبب تحريض ديال لموحدين. بعد ما دخلو لموحدين لمراكش عام1147، كان بحال إعلان على سقوط دلمرابطين، لكن واخا هاكاك، بقا لبعض منهم تايناضل، بحال (بنو غانية).

دول د لموحدين (1147–1248) بدل

 
لمراحل لي تسعات فيها دولة دلموحدين
 
لمسجد لأعظم فتينمل، لي بدات منو دعوة د لموحدين

دولة ديال لموحدين توسعات على لأندلوس وشمال دلمغريب وتونس ولجزاير دابا. كيف ما حكمو طرقان ولمدون ديال تجارة لمومهيمة ديك ساعة. دول لموحدية دخلات فحرب معا لمرابطين، بعد ما دارو دولة ديالهم عام 1120 م على يد محمد بن تومرت، و حكمو لعاصمة دلمغريب ديك ساعة لي هي مراكش، لي خلاوها عاصمة لدولة ديالهم، من بين سلاطين لي حاكموا يامات لعز ديال لموحدين كاين يعقوب لمنصور لي تزعم الكومبة ديال لأرك ضد لمملكة ديال قشتالة. دولة ديال لموحدين طاحت عام 1270 فاش مات سلطان أبي دبوس.[23]

لي أسس دولة ديال لموحدين هو محمد بن تومرت بن عبد الله بن يا مصال، من منطقة هرغة فسوس، تزاد عام 1077 ؤ مات عام 1130 فمنطقة تينمل و تدفن فيها فلمسجد لأعظم، هو قايد عسكري مسلم، ؤ كاتب ؤ سياسي، تشهر بلهتمام ديالو بلإسلام، ؤ قراو على يديه بزاف ديال ناس بحال عبد المؤمن بن علي، أهم كومبة دارها هي لكومبة ديال لبحيرة ضد لمرابطين لي تغلب فيها، ؤ أهم كتاب عندو هو كتاب "أعز ما يطلب".[23]

فلعهد ديال دولة دلموحدين، بانو بزاف ديال لعلماء، أشهر واحد فيهم هو بن رشد، لي تشهر بلعلوم لي كان تايبحث فيها بحال طب، لعلوم طبيعية ولفلسفة، ولأخلاق وسياسة ولفقه وللغة. كيف ما خلاو لموحدين بزاف ديال لأثار لي كاتعبر على لحضارة ديال هاد دولة، بحال صمعة دلكتبية فمراكش، وصمعة دحسان فرباط، وباب أڭناو فمراكش، وصومعة لخير اَلدا فإشبيلية.[23]

لموحدين كانو من سلالة أمازيغية أمازيغية تأسسات فلقرن طناش.[25][26][27]، بدات لحركة ديالهم من منطقة مصمودة ف لجنوب د لمغريب من طرف بن تومرت. ف اللول أسسو لموحدين دولة ف تينمل ف جبال لأطلس عام 1120 تقريباً.[25] وقدرو يطيحو لمرابطين من لحكم دلمغريب كيف ما ذكرنا قبل عام 1147، فاش غزا عبد المؤمن الغومي ( 1130-1163) مراكش وعلن راسو خليفة. من بعد وسعو سلطة ديالهم على لمغريب لكبير عام 1159. و تبعو ليه لأندلوس اللي ولات تحت لحكم د لموحدين من عام 1172.[28]

سلالة المرينيين (1248–1465) بدل

 
شفشاون أسسوها لموريسكيين لي تّنفاو من إيبيريا ف 1471.

كانت السلالة د المرينيين من المسلمين السنة[29] أصلهم من قبيلة زناتا الأمازيغية اللي حكمات المغرب الكبير من القرن تلطاش حتا للقرن خمسطاش.[30][31]

طييحو المرينيين سلالة الموحدين اللي سيطروا على المغرب عام 1244،[32] وسيطروا واحد الفترة قصيرة على المنطقة المغاربية كلها ف المنتصف د القرن ربعطاش. دعموا المملكة د غرناطة في الأندلس في القرن تلطاش وربعطاش. حاولو يلقاو ليهوم بلاصة ف الجانب الأوروبي من مضيق جبل طارق ولكن خسرو ف معركة ريو سالادو ف عام 1340 وسالات من بعد الغزو القشتالي للجزيرة الخضراء في عام 1344.[33]

سلالة الوطاسيين (1471–1549) بدل

كانو الوطاسييين واحد السلالة اللي حكمات لمغرب. أصلهم من زناتا الأمازيغية، بحال المرينيين.[34] كانو جوج د لعائلات قراب بيناتهم، وجندو المرينيون بزاف د الوزراء من الوطاسيين.[34]

سلالة السعديين (1549–1659) بدل

 
مدينة أيت بنحدو مصورة بالليل

ابتداء من عام 1549، لمغريب حكماتو مجموعة من السلالات اللي كانو كاينسبو راسهم للشرفا، وادَّعاو بأنهم من النسب ديال النبي محمد. أول وحدين من هاد الأنظمة السياسية كانو هوما السعديين لي كانت أصولهم عربية من ينبع وجدهم العاشر هو نفسو جد لعلويين داكشي علاش كتسماو ولاد العمام، وتم البيعة ديالهم فسوس لي بداو ليها محاربة المستعمر البرتغالي. اختارو فالبدية تارودانت عاصمة ليهم ومن يعد مادخلو لمراكش رجعوها عاصمتهم، حكمو المغرب من 1549 حتا ل 1659. من 1509 حتال 1549، كانو الحكام السعديين كايسيطرو غير على المناطق الجنوبية. وْمن جهة خرا كانو كايعتارفو بالحكم ديال الوطاسيين حتال 1528، بسبب تزايد القوة ديال السعديين هجمو عليهم الوطاسيين، ومن بعد واحد لمعركة بيناتهم، دارو معاهدة تادلة عتارفو فيها الوطاسيين بالحكم ديال السعديين على الجنوب د المغرب.[35]

ف عام 1659، تعلن على محمد الحاج بن أبو بكر الدلائي، شيخ الزاوية الدلائية،[36] كسلطان المغرب من بعد ما طاحت سلالة السعديين.[37]

سلالة العلويين (من 1666) بدل

  تقدر تزيد شوف بزاف د تّصاور و لمعلومات ديال Morocco ف ويكيميديا كومنز.

هي سلالة عربية من تافيلالت كتّنسب للشرفة، حكمات لمغريب من 1666، جدهم دخل ل لمغربب فالقرن 13م و هوا نفسو جد ولاد عمامهم سعديين، أول واحد ف سّلالة لي حكم منهوم هو مولاي شريف لي كان أمير د سجيلماسة، ؤ كيحكم منهوم لمغريب دابا لماليك محمد ساديس بن لحسن، لي تبناو لمذهب لمالكي ف لفيقه.[مصدر؟]

تميزات فترة السلطان سماعيل بن الشريف فاش أسس جيش عبيد البخاري لي مكون من العبيد عوازة (سود البشرة) ولي وصل عددهم بعد الموت ديال السلطان سماعيل كثر من 300 ألف جندي، وكان السلطان صارم فالقرارت ديالو حتى واحد مكيعارضو بحكم لقوة ديالو بين أوساط الشعب المغربي فديك الوقت.

وفعهد لعلوييين عرف المغرب انفتاح تجاري كبير على الخارج فعهد السلطان محمد بن عبد الله بن سماعيل ولي صنفوه المؤرخين من سلاطين المغرب الواعرين فمجال السياسة والاقتيصاد، حيت عتارف باستقلال دولة د ميريكان على نݣالزة، وبعد سينين علن عليهم الحرب بسبب مشاكل فالمحيط المتوسط.[ماواضحش] وفاش مات هاد السلطان وقعوا فالمغرب مشاكل بين ولادو على السلطة نفس الشيء لوقع مع جدو اسماعيل. و ولّا كل سلطان حاكم جهة بحال مولاي هشام و سليمان و اليزيد ومات منهم اليزيد لكانت عندو مشكلة مع الواليد ديالو محمد بن عبد الله فبكري.

وفالاخير وصل سليمان بن محمد ل لحكم ديال المغريب. وبسباب علاقتو بالدين الكبيرة قرر يخالف سياسة ديال باه فتسيير المغريب، لي كانت الانفتاح التجاري على ؤروپا، وقرر يحبس معاهم كل العلاقات وميريكان خافت من هاد سّياسة الانغلاقية، وقررات ترسل ليه وفود ورسائل وهدايا إلا أنه مدار معاهم والو بحال دّوال لوخرا. و فالعصر ديالو عرف المغريب وباء الطاعون والمجاعة سنة 1799-1800م ولي ماتو منو عشرات الالف ديال المغاربة، وسبق ليه وصاوه دپلوماسييين أوروپيين بحلول للمشكلة ديال المغريب ولاكين رفض.

ومن بعد عطا الحكم ل ولد خوه مولاي عبد الرحمن ولد هشام ولد محمد ولد عبد الله، لي عرف العصر ديالو احتلال الجزائر عام 1830م من طرف فرانسا، ولي دار تهديد مباشر للمغريب ودعم الأمير عبد القادر ديال الجزائر، لي تسببات فمعركة إيسلي سنة 1844م لي فقد لمغريب فيها أراضي شاسعة بحكم الأسلحة لمطورة لكانت عند فرانسا، حيت عبد القادر بايع السلطان المغربي عبد الرحمان معا سكان تلمسان المغربية على حساب وثائق تاريخية مغربية-فرانساوية.[مصدر؟]

ومر المغرب من عدة أزمات و أطماع إستعمارية ديال ؤروپا حيت بغاو يقسمو المغرب فعهد الحسن الاول بن محمد بن عبد الرحمن وكان تصدا ليهوم. ومن بعد عشرات السنوات وبسبب تمرد القبائل وضعف العلويين قرر السلطان مولاي عبد الحفيظ لي خلف خوه عبد العزيز بن الحسن، باش يوقع معاهدة فاس سنة 1912 و لي عطات لفرانسا كل الصلاحيات.

ومن بعد وصل مولاي يوسف ل حكم المغرب هو ولد الحسن وخو عبد الحفيظ، لي غادي يشهد عصرو مرحلة جديدة ف تاريخ لمغريب وهي تصميم علم لمغريب و فتتاح مسجد باريس ف فرنسا.

ومن بعد وصل محمد الخامس ل لحكم، وصل ل حكم المغرب وهو صغير، لي رجّع هيبة لعلويين بعد ما قاوم فرانسا ورفض القرارات ديالهم تم نفي ديالو معا عائلتو ل مدغشقر، وتم تنصيب ولد عمو محمد بن عرفة سلطان على المغريب من طرف فرانسا، لي زݣل لموت بسباب محاولة فاشلة د لغتيال.

وبعد سنوات قليلة رجع محمد الخامس من لمنفى ديال مدغشقر تحت ترحيب شعبي كبير، ومن بعد سنوات قليلة تم إعلان ستقلال المغريب على فرانسا و سبانيا. و كان محمد الخامس أول واحد غادي يتكلم بالعربية ف الامم الموتحدة، لكن وخا خدا الاستقلال بقا كيدعم الثورة الجزائرية ف الامم المتحدة شّي لي سرع الاستقلال. وكانت تفاقية بينو وبين الرئيس الجزائري المؤقت[ماواضحش] باش يسلم ليه الاراضي لي عطاتهم ليهم فرانسا أيام مولاي عبد الرحمن والاخير وافق بلي غادي يعطيه ليهم بعد لستقلال. لكن محمد الخامس مات سنة 1961م عام قبل ستقلال لجزائر.

ومن بعد وصل الحسن الثاني ل حكم المغريب وكمل على سياسة باه لكانت سترجاع لاراضي لمغريبية، لكن الجزائريين بداو كيديرو أعدار بحكم انهم دولة حديثة الاستقلال و النشأة و فالاخير رفضو. ونتجت عليها حرب رّمال لي غادي يتوغل فيها المغريب ف الغرب الجزائري ف بشار و تيندوف.[مصدر؟]

عيون لكلام بدل

  1. ^ Hublin، Jean Jacques (2010). "Northwestern African middle Pleistocene hominids and their bearing on the emergence of Homo Sapiens" (PDF). ف Barham، Lawrence؛ Robson-Brown، Kate (إيديتورات). Human Roots: Africa and Asia in the middle Pleistocene. Bristol, England: Western Academic and Specialist Press. مأرشيڤي من لأصل (PDF) ف 24 شتنبر 2015. تطّالع عليه ب تاريخ 14 يناير 2014.
  2. ^ Ghosh، Pallab (2017-06-07). "'First of our kind' found in Morocco". BBC News. مأرشيڤي من لأصل ف 26 ماي 2023.
  3. ^ "World's Oldest Manufactured Beads Are Older Than Previously Thought". Sciencedaily.com. 2009-05-07. مأرشيڤي من لأصل ف 2023-06-20. تطّالع عليه ب تاريخ 2013-11-22.
  4. ^ 1984 D. Lubell. Paleoenvironments and Epi Paleolithic economies in the Maghreb (ca. 20,000 to 5000 B.P.). In, J.D. Clark & S.A. Brandt (eds.), From Hunters to Farmers: The Causes and Consequences of Food Production in Africa. Berkeley: University of California Press, pp. 41-56.
  5. ^ D. Rubella, Environmentalism and Pi Paleolithic economies in the Maghreb (c. 20,000 to 5000 B.P.), in, J.D. Clark & S.A. Brandt (eds.), From Hunters to Farmers: Causes and Consequences of Food Production in Africa, Berkeley: University of California Press, pp. 41–56
  6. ^ Pennell 2003, p.5
  7. ^ "C. Michael Hogan, Mogador: Promontory Fort, The Megalithic Portal, ed. Andy Burnham". Megalithic.co.uk. مأرشيڤي من لأصل ف 10 أكتوبر 2017. تطّالع عليه ب تاريخ 2010-01-31.
  8. ^ Sabatino Moscati, The Phoenicians, Tauris,. ردمك 1-85043-533-2.
  9. ^ The Cambridge history of Africa. Vol. 2, From c.500 B.C. to A.D. 1050. Fage, J. D. Cambridge: Cambridge University Press. 1978. ص. 121. OCLC 316278357. ردمك 9781139054560.CS1 maint: others (link)
  10. ^ "Data and map of Roman Banasa". مأرشيڤي من لأصل ف 2014-08-10. تطّالع عليه ب تاريخ 2020-02-24.
  11. ^ Abun-Nasr 1987, p.33
  12. ^ Abun-Nasr 1987, pp.33-34
  13. ^ a b Georges Duby, Atlas Historique Mondial, Larousse Ed. (2000), pp.220 & 224 ( ). ردمك 2702828655.
  14. ^ Abun-Nasr 1987, p.42
  15. ^ G. Deverdun, "Bargẖawāṭa", Encyclopédie berbère, vol. 9, Edisud, 1991, pp.1360-1361
  16. ^ Lightfoot، Dale R.؛ Miller، James A. (1996)، "Sijilmassa: The rise and fall of a walled oasis in medieval Morocco" (PDF)، Annals of the Association of American Geographers، 86: 78–101، doi:10.1111/j.1467-8306.1996.tb01746.x، مأرشيڤي من لأصل (PDF) ف 2012-07-23، تطّالع عليه ب تاريخ 2016-10-10
  17. ^ "Northvegr - A History of the Vikings". مأرشيڤي من لأصل ف 2009-08-17. تطّالع عليه ب تاريخ 2016-10-10.
  18. ^ Moroccan dynastic shurfa’‐hood in two historical contexts: idrisid cult and ‘Alawid power in : The Journal of North African Studies Volume 6, Issue 2, 2001 [1]
  19. ^ Hodgson، Marshall (1961)، Venture of Islam، Chicago: University of Chicago Press، ص. 262
  20. ^ "Idrissid Kingdom of Maghrib al Aqsa (Maghrib al Aqsa)، Kingdom of the Far West, Morocco". Archived from the original on 2022-10-16. تطّالع عليه ب تاريخ 2022-10-15.CS1 maint: unfit url (link)
  21. ^ A History of the Maghrib in the Islamic Period, Jamil M. Abun-Nasr, 1987, p. 52
  22. ^ فضاء الاجتماعيات، أحمد معطلا، مطبعة المعارف الجديدية، إصادر 2004، طبعة 2021
  23. ^ a b c d أحمد معطلا (2004). فضاء الاجتماعيات. مطبعة المعارف الجديدة.
  24. ^ Maxime RODINSON, « ALMORAVIDES », Encyclopædia Universalis [en ligne], consulté le 23 octobre 2014. URL : http://www.universalis.fr/encyclopedie/almoravides/
  25. ^ a b "Almohads | Berber confederation". مأرشيڤي من لأصل ف 2015-05-16. تطّالع عليه ب تاريخ 2020-07-25.
  26. ^ Concise Encyclopaedia of World History, by Carlos Ramirez-Faria, pp.23&676 [2]
  27. ^ Bernard Lugan, Histoire du Maroc. ردمك 2-262-01644-5.
  28. ^ Buresi, Pascal, and Hicham El Aallaoui. Governing the Empire: Provincial Administration in the Almohad Caliphate (1224–1269). Studies in the History and Society of the Maghrib, 3. Leiden: Brill, 2012. https://books.google.com/books?id=jcn8ugAACAAJ.
  29. ^ Ira M. Lapidus, Islamic Societies to the Nineteenth Century: A Global History, (Cambridge University Press, 2012), 414.
  30. ^ "Marinid dynasty (Berber dynasty) – Encyclopædia Britannica". Britannica.com. مأرشيڤي من لأصل ف 2 يونيو 2015. تطّالع عليه ب تاريخ 24 فبراير 2014.
  31. ^ C.E. Bosworth, The New Islamic Dynasties, (Columbia University Press, 1996), 41–42.
  32. ^ (ب لفرانساوية) "Les Merinides" on Universalis
  33. ^ Niane, D.T. (1981). General History of Africa. IV. ص. 91. ردمك 9789231017100. مأرشيڤي من لأصل ف 2022-11-13. تطّالع عليه ب تاريخ 24 فبراير 2014.
  34. ^ a b C.E. Bosworth, The New Islamic Dynasties, (Columbia University Press, 1996), 48.
  35. ^ H. J. Kissling, Bertold Spuler, N. Barbour, J. S. Trimingham, F. R. C. Bagley, H. Braun, H. Hartel, The Last Great Muslim Empires, BRILL 1997, p.102 [3]
  36. ^ E. George H. Joffé, North Africa: nation, state, and region, Routledge 1993, p. 19
  37. ^ Michaël Peyron, « Dila‘ », in: Gabriel Camps (dir.), Encyclopédie berbère – Chp. XV. Édisud 1995, pp.2340–2345 ( ). ردمك 2-85744-808-2. External link in |title= (معاونة)

مزاود بدل

  • جوستان Justin ك.21.4.7 الصفحة 255 ف النسخة لفرانساوية.
  • ديودوروس الصقلي ك.13.80.3
  • جوستان Justin ك. 19.2.4

شوف تا بدل

مرجّعة من "https://ary.wikipedia.org/w/index.php?title=تاريخ_د_لمغريب&oldid=349553"