ويكيپيديا

وليلي (مدينة قديمة)

هادي مقالة على مدينة أترية. ل معاني وحدين خرين، شوف وليلي (توضيح).


وليلي ؤلا وليلة (ب لأمازيغية ⴰⵍⵉⵍⵉ، أليلي، ب لّاتينية لقديمة ؤ بزّاف د لّوغات لأوروپية Volubilis، نّطق ب لّاتينية لكلاسيكية وولوبيليس) ؤلا قصر فرعون، لّي هيّا سّمية لّي كانو لمغاربة كايسمّيو بيها لهديم ديالها، كانت مدينة أمازيغية قديمة تّبنات ف لقرن 3 ؤلا 4 قبل لميلاد، ؤ كانت واقيلا عاصمة غربية د مملكة موريطانية، ؤ كانت لعاصمة لّولة د دّولة لإدريسية. دابا هيّا موقع أركيولوجي كاين ف سّهل د سايس ف لجماعة لقروية د وليلي، إقليم مكناس.[1]

وليلي (مدينة قديمة)
وليلي
معلومات عامة
نوع د لموضع تجمع د بنادم، موقع أركيولوجي و مدينة قديمة
لبلاد لمغريب
تّقافة روما القديمة، أمازيغ و بونيقيين
تاريخ د لبني 400 قبل لميلاد
تاريخ فاش تهجرات 1710
عاصمة ديال أدارسة و موريطانية
مستوى تراتي موقع تراث عالمي و ترات تقافي ديال لمغريب
مساحة 42 هكطار
سّيت رّسمي sitedevolubilis.org


وخا لبني لّي بقا واقف ف وليلي كيرجع ف أغلبيتو ل لفترة لمورية لّخرة ؤ لفترة رّومانية (إقليم موريطانية طّنجية)، ؤ تّبنا ب سّتيل رّوماني، لمدينة د وليلي، عكس ما كيتروّج ليه بزاف ف لإعلام، هيّا ف لأصل ماشي مدينة رومانية، مي مدينة أمازيغية قديمة لّي بناوها سّكان لمحليين لأمازيغ، لّي معروفين ب سمية لمور.

سّمية بدل

سّمية د وليلي غالبا جات من واليلت ⵡⴰⵍⵉⵍⵜ لّي هيّا سّمية لأمازيغية ديال نبتة زهرية كتنبت ف نّواحي ديالها. هاد سّمية موتقة مزيان ف لكتوبا لقدام د تّاريخ، ؤ ف نّقيشات لّاتينية علا لحيوط ؤ ستيلات لّي تلقاو فيها.[2] هاد سّمية تقدر تكون عندها علاقة معا لقبيلة لأمازيغية لّي دكروها لمؤرخين رّومان ب سمية ؤلوبيليتاني.[3]

عدد د لباحتين لؤروپيين حاولو يلقاو معنى ل وولوبيليس ف لّوغة لّاتينية، ف إطار تجاهل تام ل بيئة تّقافية لمحلية لأمازيغية، شّي لّي كنلقاوه بزاف ف لأبحات لغربية علا تّاريخ لقديم د شمال إفريقيا.[3]

ف لقرن 16، لحسن لوزان كيدكر لموقع ب سميت "قصر فرعون"، ؤ هاد سّمية باقة معروفة عند سّكان د لمنطقة، لي كيقدرو يختاصروها حتا ب "لقصر".[4]

لموضع بدل

 
منضر عام د وليلي

مدينة وليلي جات ف وادي خصب ف جّنب ديال واد خومان ف جّيهة لغربية ؤ لجنوبية ديالها، ؤ كيدوز من جّيهة شّرقية ديالها واد فرطاسة،[5] علا سّفح ديال جبل زرهون، ف بلاصة ستراتيجية ساهل دّفاع عليها من هجومات عسكرية. ؤ كاينة علا بعد 3 كيلوميطر ف لغرب ديال مولاي دريس زرهون، 30 كيلوميطر من مدينة مكناس ؤ 63 كيلوميطر من فاس. سّهول لّي حداها فيها تربة مزيانة ل لفلاحة، ؤ كينبت فوق منها شجر ديال لفواكه، سيرتو زّيتون، لّي كانت ؤ مازال عندو أهمية قتيصادية كبيرة ف لمنطقة. لمساحة لّي شادة وليلي كتوصل ل 42 هكطار، لأغلبية ديالها باقا ماتستكشفاتش مزيان من طرف لعولاما د لأركيولوجيا.[2]

وليلي جات ف الجماعة لقروية د وليلي.

تّاريخ بدل

لفترة لقبلتاريخية بدل

ماكاين تا شي أتار باينة ديال تّواجد د بنادم ف وليلي ف لفترة لپاليوليتية ؤ قبل. على حساب لباحت لفرانساوي ريموند توڤنو، لمنطقة د وليلي ماكانتش مناسبة ل سّتيل د لحياة ديال لإنسان لپاليوليتي، لي كان معتامد على صّيد د لحيوانات لكبار، ؤ لي ماكانتش موجودة تماك. هادشي تبدل معا تّطور د زّراعة، لي كانت وليلي بلاصة سطراتيجية ل لممارسة ديالها.[6]

أقدم لآتار ديال لبشري لّي تّلقاو ف وليلي كيرجعو ل لفترة نيوليتية، 3000 عام قبل لميلاد، لي هيّا فترة معطلة يلا قارناها معا بلايص خرين ف لمغريب.[7] أغلبية د هاد لآتار علا شكل مّاعن د لفخّار ؤ أدوات بسيطة بحال فيسان مصاوبين من لحجر لبركاني لكحل. طّبقة د لأرض فين كاينين هاد لآتار باقا ماتحفراتش مزيان، ضونك ف لغالب كاينين معلومات كتيرة غادي يكتاشفوها لعولاما ف سّنوات جّاية. تّحليل لجيني ديال عينات د لݣمح ف نّواحي د وليلي بيّن بلي راه من نفس نّوع لّي كان منتاشر ف لعصر نّيوليتي ف شرق لأوسط ؤ شمال إفريقيا.[8] ولاكين ماشي واضح واش زّراعة د لݣمح وصلات ل وليلي ف نفس لفترة فاش نتاشرات ف بلايص خرين ف لعالم، ؤلا ف فترة معطلة، علا طريق إيبيريا. ف جميع لحوال، لعينات د لݣمح لّي تّلقاو تأرخو ب لكربون 14 ل عام 1000 قبل لميلاد علا أقصا تقدير.[9] لبحت ف طّبقات لقديمة بيّن حتا نواع خرين د لمزروعات بحال لفول، لعدس، لعنب ؤ لكرموص.[8]

لفترة لقبلمورية بدل

ما بين لمجي د لفينيقيين، لّي كانو بحارة ؤ تجار من سّاحل لّي دابا كاين ف لبنان ؤ شمال سوريا، تال تّأسيس د مملكة موريطانية، ماكانعرفوش بزاف علا لمغريب ؤ نضام سّياسي ؤ لجتيماعي لّي كان فيه. لفينيقيين كانو ديجا وصلو ل سّواحل د لمغريب ف لقرن سّابع ؤ لقرن سّات قبل لميلاد، ؤ لّوغة ؤ تّقافة ديالهم نتاشرات ؤ وصلات حتال وليلي فين كنلقاو نقيشات ب لّوغة لبونيقية. ماشي مستبعد تكون وليلي، لّي تقدر تكون بدات كا قرية نيوليتية، كانت ديجا ديك سّاعة تجمّع سكّاني مابيهش. واحد من لمعابد لّي كشفو عليهم لعولاما د لأركيولوجيا، تم تّأريخ ديالو ما بين 1000 ؤ 300 ق.م، ولاكين باقي خاص لمزيد د لأبحات باش نعرفو كتر علا هاد لفترة.[8]

لفترة لمورية بدل

واحد من أهم شّواهد لّي كيدلو علا لقدومية ديال وليلي كا مجتمع حضري، واحد سّتيلة تلقات ف لفترة ديال لستيعمار، ؤ درسها لباحت لفرانساوي جيمس فيڤريي، ؤ نشر ورقة د لبحت ديالو ف 1963. هاد سّتيلة كترجع ل لقرن لّول قبل لميلاد، ؤ مكتوب عليها ب لحروف د لّوغة لبونيقية سّميات ديال شخصيات من نفس سّلالة شغلو لمنصب ديال شوفيط، لّي هو منصب عسكري ؤ سياسي كبير، ؤ أقدم جد كان شاد هاد لمنصب كان ف نّص تّاني ديال لقرن رّابع قبل لميلاد، لّي هيّا فترة سابقة ب 100 عام لفترة ديال لماليك باݣا، لّي هوّا أقدم ماليك موري متوكد تاريخيا. من غير جد واحد لّي عندو سمية بونيقية، لوخرين كاملين عندهم سميّات أمازيغية.[10]

 
ستيلة ݣنايزية تّلقات ف وليلي مكتوب فوق منها ب حروف بونيقية: ستيلة كيديدييها [..] ولد [..] لّي كان شوفيط، ؤ مات سعيد علا 90 عام، لأصل ديالو من ق ف ݣ و د

وليلي ضونك كانت ديجا موجودة كا مدينة من لقرن رّابع ؤلا تّالت قبل لميلاد، شّي لّي كيجعلها بدات معا ؤلا شوية مورا تأسيس ديال مملكة موريطانية، ؤ كانت عندها أهمية قتيصادية ؤ سياسية كبيرة عند لمور. لبني لقديم ديالها كان ب سّتيل ليوناني ؤ لبونيقي ؤ لمساحة ديالها غالبا ماكانتش فايتة 12 هكطار.[11] من بين لمباني لّي دّارت ب سّتيل لبونيقي، ؤ لّي قدرو لباحتين يكشفو عليها، كاين معبد كيرجع ل لقرن تّاني قبل لميلاد، ؤ معابد خرين تّبناو ف نّص ديال لقرن لّول قبل لميلاد، ب لإضافة ل ديور د سّكنى، حيوطا ؤ فرّان، كولهوم كيرجعو ل لفترة قبل رّومانية.[3] كاين حتا سور دفاعي قديم تّبنا ف هاد لفترة مي ما مأرخش مزيان ل إينا فترة د حكم ماليك موري فاش دّار.[12]

معا تّزايد ديال تّأتير رّوماني ف شمال إفريقيا، سيرتو مورا ما مات لماليك بوكوس تّاني، ؤ تولا لحكم يوبا لموري، لّي كان تربا ف روما، غادي يوليو لبني ؤ لفن د نّحت ؤ لفسيفسا غاديين معا سّتيل رّوماني. وليلي ف لغالب ماكانتش هيّا لعاصمة د موريطانية ف هاد لفترة، مي كانت من أهم لمدون ديالها. ف لعهد ديال لماليك يوبا لموري ؤ ولدو پطليموس، غادي توصل وليلي ل لأوج ديال لزديهار ديالها. هادشي كيشهد عليه تّوسع لعمراني لكبير ديال لمدينة ف ديك لفترة، ؤ لجمالية د لمعمار ديالها.[3]

لفترة رّومانية بدل

لمؤرخين رّومان عطاونا معلومات شوية محدودة، ؤ شي مرات غالطة علا وليلي. پومپونيوس ميلا ݣال بلي وليلي "مدينة متواضعة ف لحجم" وخا ماعمرو زارها براسو.[12] لوتيقة د تسافيرة أنطونينوس، دكرات بلي وليلي بعيدة علا طانجا ب 144 ميل روماني، ؤ ب 4 ميال رومانية علا قرية طوكولوسيدا، لّي كانت أبعد بلاصة ف لجنوب تحت سّلطة د رّومان.[11]

 
قوس نّصر ف وليلي، تبنى علا شرف لإمبراطور كاراكالّا

ف 40 ميلادية، لإمبراطور رّوماني كاليݣولا غايأمر لغتيال ديال لماليك پطليموس لموري، ؤ هوّا ف طّريق ديالو ل لوݣدونوم لّي لموضع ديالها كاين دابا ف ليون ف فرانسا. سّباب ديال لغتيال مامعروفاش، مي تقدر تكون سباب شخصي بحال لغيرة من تّروة لكبيرة ؤ لجاه ؤ نّسب ديال پطليموس لّي من جيهت لفاميلة د مّو، كليوپاطرا سيليني، كانت عندو إمكانية وخا قليلة، باش يشد لحكم ديال روما. هادشي غادي يشعل تورات ؤ حروب ضد رّومان ف مملكة موريطانية كاملة، منها تّورة د إيديمون، لّي ستامرات ربع سنين تقريبا، ؤ كانت متمركزة سيرتو ف وليلي.[13]

من بعد ما هداو تّورات، وليلي غادي تولّي مونيكيپيوم ؤ غالبا عاصمة ديال إقليم موريطانية طّنجية (ؤلا تقدر تكون طنجة هيّا لّي كانت عاصمة) ل كتر من جوج قرون. رّومان غادي يستاغلّو لموارد لفلاحية د وليلي ؤ نّواحي ديالها، ف لإنتاج ديال زّيتون ؤ لݣمح، ب لإضافة ل تصدير لحيوانات علا ود لمتعة، بحال سّبوعا ف لمدابزات ديال لݣلادياتورات ف لكولوسيوم.[8] بلا لأمازيغ مّالين لبلاد، عدد د لمهاجرين، يهود، إيبيريين ؤ سوريين جاو ستاقرو فيها.[12]

ف لعهد ديال لإمبراطور ماركوس أوريليوس، غادي يتّبنا حيط جديد ضاير علا لمدينة، ب 8 د لبوّابات. ؤ ف لوقت ديال سيپتيميوس سيويروس ؤ ولدو كاراكالّا صونطر د لمدينة غادي يعاود يتّبنا ؤ غادي تولي فيه باسيليكا ؤ كاپيطول. هادشي ماكانش غادي يوقع كون كاراكالّا مادارش قرار باش يحيد ضّرايب، ؤلا عل أقل واحد نّوع منها، ؤ كا حتيفال ب هاد لحدت غادي يتّبنا قوس نصر ب سميتو.[12]

هادشي كولو طرا قبل ما يتخلّاو رّومان علا وليلي ف عام 258 ل سباب باقا مامعروفاش مزيان، ؤ ينساحبو لإدارة ؤ لعسكر رّومانيين باش يبقاو شادّين غير سّاحل لغربي د موريطانية من ليكسوس ل طنجة. هنا وليلي غادي تدخل ف فترة مضلّمة لّي ماكانعرفوش عليها بزاف ب سباب قلة لوتايق تّاريخية، ؤ ضعف لبحت لأركيولوجي ل حد سّاعة.[11] كاينين أدلة كتشير بلي نّاس د وليلي ف هاد لفترة أسسو مملكة حاكمة راسها، سميتها مملكة وليلي.

لعصور لقديمة لّخرة بدل

 
فسيفسا كتمتل حيوانات

فاش خرج لحكم رّوماني، ف لغالب ضعاف لقتيصاد ديال وليلي، ؤ مابقاوش سّكّان قادّين يحافضو علا لمدينة كيفما كانت. ف هاد لفترة أغلبية ديالهم كانو من قبيلة لبكوات. مورا ماتهرسو لقنوات د لما لّي كانو كيجيبو لما ل لمدينة من واد خومان، لْوليليين غادي يتحوّلو ل لغرب ديال قوس نّصر، ؤ غادي يبنيو حي جديد تماك قريب ل لواد، باش يكون عندهوم أكصي ل لما. هاد لحي ولّا مصيپاري علا باقي لمدينة ب حيط ديفاعي جديد، لّي كان واصل حتال عند لواد. حدا قوس نّصر دارو مقبرة.

ربعة د نّقيشات تأرخو ل ما بين 599 ؤ 655، كيبينو بلي سّكان كانو ديجا مسيحيين، ؤ بلي لمؤسسات لمدنية ف لمدينة، لّي كانت ف لفترة رّومانية، كانت باقة خدامة عادي.[12] لآتار ديال لمّاعن د لفخار ؤ لأدوات، كيبينو بلي وليلي كانت عندها علاقات تجارية معا بلايص خرين ف لبحر دّخلاني ؤ ف شمال إفريقيا، منها منتوجات مستوردة من تونس. هادشي كيدل بلي تكونات سلطة سياسية قوية، لّي كانت كتحكم ف شّؤون لإدارية ؤ لقتيصادية ؤ لعسكرية د لمدينة (حيت أمرات لبني د حيط ديفاعي جديد ف لقرن سّات)، ؤ لّي تسمات مملكة وليلي. لّي كيزيد كدعم هادشي، هوّا شاهد ديال قبر ديال واحد سّيدة مسيحية سميتها يوليا روݣاتيڤا، لّي كيݣول بلي أصلها من مدينة ألطاڤا، لّي لموضع ديالها كاين دابا حدا تلمسان ف دزاير، ؤ بلي كانت أسيرة حرب. سّلطة د مملكة وليلي ضونك تقدر تكون دارت تدخّل عسكري ف ألطاڤا، لّي شدّو فيه أسرى ؤ رجعو بيهم ل لمدينة.[14]

لقرون لوسطانية بدل

علا حساب لأدلة د لوتايق ؤ لعملات، سّكان د وليلي كانو ديجا تحولو ل لإسلام قبل ما يجي لمولى إدريس،[2] لّي علا حساب رّوايات هوّا لمؤسس ديال دّولة لإدريسية. وليلي غادي تكون لعاصمة ديالو واحد لمدة، قبل ما يموت ؤ يأسس ولدو إدريس تّاني مدينة فاس ف 809 ؤ يردها لعاصمة ديال لأدارسة.[1][15] هنا وليلي بدات كاتفقد لأهمية ديالها، ؤ تّنسا من سّجلات د تّاريخ.[4] طرف من سّاكنة د وليلي تحوّلات ل فاس معا إدريس تّاني، مي بقات لحياة تماك مستامرة حتال مابين لقرن 14 ؤ 17 فاش هجروها نّاس ب شكل نيهائي. ما بين لهجومات ديال لمرابطين ف لقرن 11، ؤ لفترة فاش خرجو نّاس من لمدينة، يقدرو يكونو وقعو هجرات تدريجية ل فاس ؤلا ل مولاي دريس زرهون لّي قريبة.[8]

ف لّخر د لقرن سبعطاش، سّلطان مولاي سماعيل دمر طرف من لبني د وليلي باش ياخد لحجر يبني بيه لقصر ديالو ف مكناس.[8]

 
رسمة ديال ويندوس ل قوس نّصر ف وليلي

لقرن 18 تال دابا بدل

لموقع د وليلي جبد لنتيباه ديال لؤروپيين لمرة لولة، ف خيلال لبعتة نݣليزية ل سّلطان مولاي سماعيل ف 1721. لباحت نّݣليزي دجون ويندوس لّي كان ف لبعتة غادي يرسم لباسيليكا، قوس نّصر، ؤ لباب لّي كاين ف شّمال شّرقي د لمدينة.[3] ويندوس دكر بلّي سّكان د لمنطقة كيسمّيو لهديم ديال وليلي ب قصر فرعون.[3][11] ف 1755، زّلزال لّي دمر لشبونة ف لبرطقيز، دمر لمباني لعاليين د وليلي.[12] لموقارنة مابين رّوسومات ديال ويندوس، معا لي دار لبارون لوطريشي فون ؤݣوستين ف 1830 كاتبين لأتر لي خلا زّلزال.[4] دّيپلوماسي ؤ عاليم د لأركيولوجيا لفرانساوي شارل تيسو، لّي كان زار وليلي ف 1878، هوّا لباحت لول لي بين بلي وليلي ؤ قصر فرعون هوما جوج سميات ديال نفس لموضع.[3][16]

تنقيبات لولة لّي دّارو ف وليلي بداهم لباحت لفرانساوي هنري دو لا مارتينيير ما بين 1887 ؤ 1892، ؤ كتاشف فيها سور حساب ليه بلي سور بيزنطي.[3][17]

ف 1915، بداو لفرانسيس لحفير ف وليلي علا ود لبحت لأركيولوجي، ب لقيادة ديال لعاليم د لأركيولوجيا لويس شاطلان. هاد لحملة ستامرات 15 عام، ؤ كان لهدف ديالها لكشف على مكوّنات د لمدينة، ؤ تحياد تّراب ؤ لحجر لي كان مغطي لمعلمات ديالها. تّركيز ف لبدية كان كبر على لفوروم ؤ لمنطقة لجنوبية ديالو، ؤ رّاپور ديال 1931 ليستا مجموعة د لكتيشافات بحال نقيشات، تماتيل، ؤ عناصر معمارية.[18] لمحابسية د لحرب لألمانيين ديال لحرب لعالامية لّولة عاونو ف لعمليات د لحفير.[19]

لحملات د لحفير ؤ لبحت ستامرو ف لعهد د لستيعمار لفرانساوي حتال 1941، من طرف باحتين بحال ريموند توڤنو، أرموند لوكي ؤ موريس ؤزينا. لهدف لأساسي ديال هاد لباحتين كان هوّا يلقاو آتار ديال لحضارة رّومانية، حيت لفرانسيس كانو كيعتابرو راسهم ورتة شرعيين ديال رّومان. وخا داكشي كانو شي أبحات محدودة علا لفترة لمورية لّي سبقاتها.[3]

هاد لبحت مستامر حتال دابا بشكل تدريجي. كتر من 50% من لمدينة باقي ماتحفرش ؤ مخبي لكنوز ديالو، سيرتو لحي لّي سكنوه نّاس ف لقرون مورا لحتيلال رّوماني ؤ قبل لإسلام.[11]

ضّاهير ديال 19 نونبر 1920 عطا حماية ل لمنطقة لّي كتشمل مولاي دريس زرهون ؤ وليلي، ؤ لمساحة لّي بيناتهم. ضّاهير ديال 14 نونبر 1921، زاد خصّص وليلي ب عتيبارها منطقة محمية من طرف دّولة.[12]

ف دجنبر 1997 ولّات وليلي موقع د تّرات لعالمي علا حساب لقرار ديال لمنضمة د ليونيسكو.[12]

ف أبريل 2021، لويزارة د تقافة خصصات ميزانية د 10 د لملاير د درهم باش يتبدا واحد لمشروع رقمي ف واليلي ب تقنية د لواقع لمزيود فيه[20]؛ لمشروع حبس واحد لوقيتة، قبل مايعاودو يردوه.[21][22]

ف نونبر 2022، فرقة ديال لأركيولوجيين مغريبية-پولونية كتاشفات برج ديال لمراقبة ف لحدود لجانوبية ديال وليلي.[23]

لقتيصاد ؤ لموارد بدل

 
معصرة د زّيتون ف وليلي

وليلي جات ف منطقة خصبة صالحة ل زّراعة من عصور قديمة، داكشي علاش جبدات لنتيباه د لبشري ف لعصر نّيوليتي، باش يستاقرّو فيها ؤ يستاغلو لأراضي ديالها علا ود لفلاحة. من بين لمزروعات لقديمة لّي تّلقاو لآتار ديالها كاين لݣمح، لفول، لعدس، لعنب ؤ لكرموص. لباحتين لقاو حتا آتار ديال ببوش لّي كانو ؤ مازالو لمغاربة ب شكل عام كياكلوه.[8]

تّصدير ديال لݣمح ؤ زّيتون ؤ زيت زّيتون، ب لإضافة ل لحيوانات د لمتعة ؤ لمدابزات (بحال سّبوعا)، من بين أهم نّشاطات لقتيصادية ديال وليلي، سيرتو ف لفترة لمورية لّخرة ؤ لفترة رّومانية. 57 معصرات د زّيتون تّلقاو فيها، مأرخين ل هادي 2000 عام تقريبا.[8]

لمعمار بدل

ماعندنا حتا شي فيكرة كيفاش كان سّتيل د لبني ف لفترة لقبلمورية يلا فتارضنا بلي لمدينة كانت ديجا موجودة ف ديك لوقت. ف لفترة لمورية حتال لّخّر ديال لقرن لّول قبل لميلاد، كان تّخطيط د لمدينة ؤ سّتيل د لبني يوناني بونيقي.

ف لفترة لمورية لّخرة (25 ق.م. حتال 40 ميلادية) ؤ ف لفترة رّومانية كان لبني غادي معا سّتيل رّوماني. هاد لفترة عرفات لأوج ديال لحركة د لبني ؤ تّوسع د لمدينة.[12]

أغلبية د لبني ديال وليلي تصاوب ب حجر د جّير لونو رمادي كيميل ل زّروقية، لّي تّخاد قريب من جبل زرهون. وليلي كتميّز ب عدد كبير ديال لفسيفسات لّي باقين ف بلاصتهم، ؤ كيتناولو مواضيع حقيقية (بحال لحيوانات) ؤ ميطولوجية مختالفة.[12]

أهم لمعلمات ف لمدينة بدل

لأسوار ؤ لبيبان بدل

سّور لي ضاير ب لمدينة فيه بزاف د لأبراج تقريبا على كلا 50 ميترو. لغلض ديالو كيتراوح مابين 1,5 ؤ 1,8 ميترو، ضونك نقدو نقدّرو لعلو لأصلي ديالو ب 5 تال 6 ميترو. طّول ديالو واصل ل 2 كيلوميطر ؤ 600 ميترو ضايرين على 40 هيكطار. سّور ف لغالب مابدا كيتّبنا تال لفترة ديال لإمبارطور ماركوس أوريليوس (مابين عام 161 ؤ 180)، ؤ كان ف لبدية شاد غير على جّيهة لجنوبية ؤ لغربية د لمدينة قبل مايكمل على جميع جّوايه. لمصاوبة ديالو ماشي متقونة مزيان ؤ تدارت بشكل زربان، باش تطاكي على لهجمات د لقبايل لمورية لي شتدات ؤ كانت واصلة تال إيبيريا.[6]

كاينين فيه سبعة د لبيبان كبار، ؤ جوج صغار.[5] من بين هاد لبيبان:

  • باب طانجا: كان رسمو ويندوس ف 1722. تم تّرميم ديالو ف 1967.
  • لباب شّمالي
  • لباب لجنوبي

قوس نصر بدل

قوس النصر د كاراكالا: جا علا عرض دّيكومانوس ماكسيموس (شّاريع رّئيسي)، ؤ كيفصل ما بين طّرف لقديم د لمدينة لّي تّبنا ب سّتيل ليوناني لبونيقي، ؤ لحي لّي تّبنا ب سّتيل رّوماني. بناوه لوليليين كا تكريم ل لإمبراطور كاراكالا، بعدما عفاهوم من ضّرائب، ؤ ف لقديم كان مزوّق ب تّماتيل ديال لفصول رّبعة ؤ تمتال ديال كاراكالّا راكب علا كرويلة مدهّبة ؤ كيجرّوها ستة د لعودانات.

لقوس تم تّرميم ديالو ما بين 1930 ؤ 1934.[12]

لمؤسسات بدل

 
لخريطة ديال وليلي ؤ لبني لّي فيها
  • لباسيليكا: كانت كتلعب دّور ديال محكامة. عندها مساحة كبيرة ؤ قاسمينها 4 د صّفوفا ديال سّاريات ل 5 د لكولوارات كيتسالا كولّا واحد منها ب سدّة مقوسة. تم تّرميم ديالها ما بين 1965 ؤ 1967.[12]
  • لكاپيطول: كاين ف لجنوب د لباسيليكا. تّبنا ف لوقت ديال لإمبراطور ماكرينوس ف عام 217، ف نفس لبلاصة ديال لفوروم لقديم. تم تّرميم ديالو ف 1962.[12]
  • لفوروم
  • لمؤسسات لعمومية
  •  
    لباسيليكا من برّة
  •  
    لباسيليكا من لداخل
  •  
    لمعبد لكاپيطولي

دّيور د سّكنى ؤ لحوانت بدل

أغلبية د دّيور دياول نّاس لمرفّحين د وليلي كانو علا دّيكومانوس ماكسيموس، لّي هوّا شّاريع رّئيسي ف لمدون لمبنية علا سّتيل رّوماني.[12]

  • دار ؤرفيوس: تّكتاشفات ف تنقيبات معطّلة (مورا 1941)، ؤ تسمّات على فسيفيسا تّلقات فيها لي كامتّل شخصية ؤسطورية ديال ؤرفيوس كيتحكم ف لحيوانات ب لموسيقا ديالو. دّار عندها قلدة معقّدة، شّي لي كيبيّن بلي، على حساب لباحتين، تدارت من دّمج ديال عاداد د دّيور بيناتهوم. دّار د ؤرفيوس كان كيوصلها لما من لقانالات نيشان ل خصة كاينة فيها ؤ ل لحمامات ديالها. دّار فيها فسيفيسات خرين بحال وحدة كاتمتّل دلافين، ؤ وحدة خرة فيها كائنات بحرية.[18]
  • دار ديسولطور: جات حدا قوس نّصر د كاراكالا، ؤ تسمّات على فسيفيسا ديال لعّاب د لخفة راكب على حمار ب لمقلوب (ب لّاتينية desultor = لعّاب د لخفة).[18]
  • دار ڤينوس
  • دار لعطاشات د هرقل
  • قصر ݣورديان
  • دار لعزري
  • دار سّاريات

لحمّامات بدل

  • حمّامات لفوروم
  • حمّامات ݣاليينوس

معابد بدل

  • معبد ساتورن: معبد ديال لإلاه رّوماني ساتورن. لآتار لّي فيه قدم بزاف من لفترة رّومانية، ؤ تّلقاو فيه كتر من 600 ستيلات ؤ طراف ديال حوايج منحوتين ؤ مصبوغين كيرجعو ل لقرن تّاني ؤلا تالت قبل لميلاد، شّي لّي كيبيّن بلي كان معبد قديم كانو كيتعبدو فيه آلهة محلية، ؤ بلي دّيانة رّومانية ستوعبات ؤ تقبلات لمعبودات لأمازيغية لقديمة.[12]

تّقافة بدل

دّين بدل

لمعابد ؤ نّقيشات ؤ لوتايق، كيدلو علا لممارسة د طّقوس ديال دّيانة رّومانية ف وليلي. دّيانة لأمازيغية لقديمة حتا هيا كانت كاتمارس تماك، ؤ كاينة نقيشة تّلقات لي تقدر تكون كاتشير ل لعيبادة د رّب ديال قبيلة لواتة ݣورزيل.

ماتّلقاو تا شي أتار ديال لعيبادة د لأرباب د لمور ف وليلي، لي كانت ديانة قروية أمازيغية واصلة تال إقليم أفريكا (تونس دابا).

كاينين أتار ديال عيبادة أرباب مشرقية ديال لفينقيين ؤ لمصريين.

لّوغات بدل

نقيشات ؤ شقفات د لفلوس ب شحال من لوغة تّلقاو ف لموضع، منهوم لأمازيغية لقديمة، ليونانية، لعبرية، لبونيقية، لّاتينية، ؤ لعربية.

عيون لكلام بدل

  1. ^ a b "Archaeological Site of Volubilis". ليونيسكو (ب نڭليزية). مأرشيڤي من لأصل ف 2023-09-13. تطّالع عليه ب تاريخ 2020-09-16.
  2. ^ a b c "African World Heritage Fund, ARCHAEOLOGICAL SITE OF VOLUBILIS" (ب نڭليزية). مأرشيڤي من لأصل ف 20 أكتوبر 2013.
  3. ^ a b c d e f g h i "مجلة زمان، وليلي أو قصر فرعون" (ب لعربية). 20 مارس 2015. مأرشيڤي من لأصل ف 10 يونيو 2020.
  4. ^ a b c "وصف ديال لمدينة ف لقرون لوسطانية، من متحف وليلي".
  5. ^ a b "موختصر ديال تاريخ وليلي، من دّخلة د لمدينة لأترية".
  6. ^ a b ريموند توڤنو (1949). Volubilis [وليلي] (ب لفرانساوية). مكتبة دار الأمان (منشور 2014). ردمك 978-9954-561-94-2.
  7. ^ "Volubilis began its story in Neolithic times" (ب نڭليزية). مأرشيڤي من لأصل ف 2022-12-26. تطّالع عليه ب تاريخ 2021-05-07.
  8. ^ a b c d e f g h "Volubilis - Ancient Village or Settlement in Morocco" (ب نڭليزية). مأرشيڤي من لأصل ف 2023-02-04. تطّالع عليه ب تاريخ 2021-05-09.
  9. ^ ماريا زاهارييڤا، نيݣاش ݣيليتا أيانا، أمين الحكيمي، ساتيش س. ميسرا، فيليپ مونوڤو. "Cultivated emmer wheat (Triticum dicoccon Schrank), an old crop with promising future: a review" (ب نڭليزية). doi:10.1007/s10722-010-9572-6. Cite journal requires |journal= (معاونة)CS1 maint: uses authors parameter (link)
  10. ^ "Inscriptions puniques et néopuniques [نّقيشات لبونيقية ؤ نّيوبونيقية]" (ب لفرانساوية). مأرشيڤي من لأصل ف 2023-01-07. تطّالع عليه ب تاريخ 2021-05-07.
  11. ^ a b c d e "History of Volubilis" (ب نڭليزية). مأرشيڤي من لأصل ف 24 أبريل 2012.
  12. ^ a b c d e f g h i j k l m n o "World Heritage List, Volubilis, Morocco, N 836". ليونيسكو (ب نڭليزية). مأرشيڤي من لأصل ف 2023-06-17. تطّالع عليه ب تاريخ 2021-05-09.
  13. ^ "A rebellion lead by Aedemon a freedman loyal to Ptolemy followed which took four years to put down" (ب نڭليزية). مأرشيڤي من لأصل ف 3 أبريل 2007.
  14. ^ "Walīlā aux Moyen Age : les données de la fouille" (ب لفرانساوية). نونبر 2018. مأرشيڤي من لأصل ف 2021-05-09. تطّالع عليه ب تاريخ 2021-05-09.
  15. ^ "Les chemins de l'écriture". doi:10.3406/horma.1998.1638. Cite journal requires |journal= (معاونة)
  16. ^ "Volubilis - Geschichte" (ب لالمانية). مأرشيڤي من لأصل ف 2023-08-17. تطّالع عليه ب تاريخ 2021-05-08.
  17. ^ "Henri Poisson of La Martinière, France, 1859-1922" (ب نڭليزية). مأرشيڤي من لأصل ف 2022-06-28. تطّالع عليه ب تاريخ 2021-05-10.
  18. ^ a b c "Volubilis: Houses". مأرشيڤي من لأصل ف 2022-11-30. تطّالع عليه ب تاريخ 2022-07-25.
  19. ^ "Prisoners leaving work in the Roman ruins of the camp (ICRC, France, n°87)" (ب نڭليزية). مأرشيڤي من لأصل ف 2022-12-15. تطّالع عليه ب تاريخ 2021-05-13.
  20. ^ Mehdi Idrissi (2021-04-25). "Meknès : 10 MDH pour la digitalisation du site de Volubilis". leseco.ma (ب لفرانساوية). مأرشيڤي من لأصل ف 2022-07-07. تطّالع عليه ب تاريخ 2021-05-10.
  21. ^ Soufiane Sbiti (2021-04-21). "Faux départ pour le projet de réalité augmentée de Volubilis vanté par El Ferdaous". لوديسك (ب لفرانساوية). مأرشيڤي من لأصل ف 2021-12-06. تطّالع عليه ب تاريخ 2021-05-10.
  22. ^ Soufiane Sbiti (2021-04-30). "Réalité augmentée du site Volubilis: El Ferdaous relance l'appel d'offres malgré les critiques". لوديسك (ب لفرانساوية). مأرشيڤي من لأصل ف 2022-05-22. تطّالع عليه ب تاريخ 2021-05-10.
  23. ^ Büyükyıldırım، Oğuz (2022-11-06). "Archaeologists find a Roman military watchtower in Morocco for the first time". Arkeonews (ب نڭليزية). مأرشيڤي من لأصل ف 2023-03-31. تطّالع عليه ب تاريخ 2022-11-12.

مزاود بدل

شوف تا بدل

لمزاود بدل

  تقدر تزيد شوف بزاف د تّصاور و لمعلومات ديال Volubilis ف ويكيميديا كومنز.
مرجّعة من "https://ary.wikipedia.org/w/index.php?title=وليلي_(مدينة_قديمة)&oldid=350822"