لمعبد لكاپيطولي (وليلي)
لمعبد لكاپيطولي (وليلي)
| ||
| ||
| معلومات عامة | ||
| نوع | مبنى، معبد و موقع أركيولوجي | |
| لبلاد | لمغريب | |
| لموضع | وليلي | |
| تاريخ د لبني | 217 | |
| لخريطة | ||
| ||
لمعبد لكاپيطولي ؤلا لكاپيطول معلمة تاريخية كاينة ف مدينة وليلي، جهة فاس مكناس. لمعبد كيرجع التأسيس اللخراني ديالو ل لبدية ديال فترة حكم لإمبراطور الروماني ماكرينوس ف 217 ميلادية، مي على حساب لأركيولوجي لفرانساوي ريموند توڤنو، يقدر يكون تّبنى فوق كاپيطول أخور قدم منو، لي كان تّدار ف لقرن اللول، بعدما ولّات وليلي تابعة ل الرومان.[1][2]
لمبنى جا ف الجنوب ديال لباسيليكا،[1] و تدار ب تصميم معماري كيتسمى "طيتراستيل" tetrastyle (پورتيك ؤلا رواق ب ربعة د لعمايد ف الدخلة) لي كيرجع لأصل ديالو ل لحضارة لإتروكسية و لحضارة ليونانية.[3] و لمعبد كان مخصص ل التلاتي د لأرباب د الرومان، جوپيتر، يونو، و مينيرڤا.[4] على حساب روجرسون، كان واحد لمجلس كيتلاقى ف لتحت ديال لكاپيطول باش يدير إعلان د لحرب، و من بعد كيعاود يتّجمع ف نفس لموضع ب لغنيمة ديال ديك لحرب.
لخدمة على لمعاودة د تشييد لكاپيطول بدات من لعهد ديال لإمبراطور كاراكالا، بحال بزاف لمباني الرسميين لخرين. هاد لمعبد لي كان مهدم فاش لقاوه و بحتو فيه لأركيولوجيين، تدار ليه ترميم ف عام 1962.[5]
الرومان بناو بزاف د لمعابد ب نفس السمية ف مواقع خرين ف لإمبراطورية الرومانية.
وصف
بدلهاد لمعبد، لي كان ف لغالب غني ب لمحتويات التمينة، و بحال لبقية د لمدينة، تعرض ل النهب بشكل كامل من عند لبقشاشا على لكنوز و على لماطيرييل د لبني، ف لقرون لي تلاو لهجرة د السكان من وليلي، و مابقاو منو غير الساس ديالو و لعمايد ديال الدخلة. كيتڭال بلي كانو فيه صفوفا د لعمايد زوينين و متقونين ف الصنعة، و بلي كان مزوق ب الرخام. قدّامو كان لموضع ديال دبيح لقرابين لي باقين لأتار ديالو باينين.[1]
ف الجناب ديالو، كانو رواقات كيدّيو ل صالات مختالفين، لبعض منهوم واقيلا كانو كيتخدمو ف التجمعات ديال لفرايليا (رجال الدين)، و لبعض لاخور كان مخصص ل لعبادة ديال أرباب د الرومان بحال ڤينوس، ؤلا أرباب خرين لي كانو معبودين من بزاف د الشعوب ف منطقة لبحر الشامي بحال إزيس لمصرية، لي كانت عندها شعبية كبيرة ف وليلي، ولاكين ماكانش مقبول باش يتدارو الطقوس ديالها ف لمعبد براسو. ف الجيهة ديال لباسيليكا (لمحكامة) كانو حمامات و طواليطات عمومية. لبيوتا لخرين مامعروفش لاش كانو مخدمين، ولاكين يمكن كانو مستعملين ل أغراض إدارية.[1]
لكاپيطول كانو عندو 4 د الدخلات، وحدة رئيسية متاصلة معا لفوروم (الساحة لعمومية)، و جوج دخلات من الجناب متاصلين ب الشوارع. الدخلة الرابعة كانت كاتجيب نيشان من لباسيليكا براسها، و كانت مخصصة ل لأعيان باش مايتخلطوش معا لعامة د الناس.
مابين لكاپيطول و لحمامات، كاين واحد لمعبد صغير لي كيبان بلي كان مديور على ود لعبادة ديال لأرباب د لبيوتا و الطرقان (لاتينية: lares compitales)، لي لعبادة ديالهوم كان طقس عائلي مهم عند السكان د لإمبراطورية، سيرتو ف روما. لموضع ديال هاد لمعبد الصغير تدار باش مايحبسش الطريق، و ف نفس لوقت كان جزء من لحياة ليومية د السكان لي كانو كيدوزو عليه كلا نهار.[1]
عيون لكلام
بدل- ^ a b c d e ريموند توڤنو (1949). Volubilis (ب لفرانساوية). الرباط (منشور 2014). pp. 37–39.
- ^ "من بلاكات د الشرح ف متحف وليلي(1)".
- ^ C.M. Hogan, 2007
- ^ B. Rogerson, 2000
- ^ "World Heritage List, Volubilis, Morocco, N 836". ليونيسكو (ب نڭليزية). مأرشيڤي من لأصل ف 2023-06-17. تطّالع عليه ب تاريخ 2023-06-17.
شوف تا
بدلمزاود
بدل- C. Michael Hogan, Volubilis, The Megalithic Portal (وليلي، لبوابة الميڭاليطية), ed. Andy Burnham (2007)
- Barnaby Rogerson (2000) Marrakesh, Fez and Rabat, New Holland Publishers, الصفحات 290