كليوپاطرا سيليني التانية

ميّز على كليوپاطرا سيليني د سوريا.

كليوپاطرا سيليني (ليونانية لبالية: Κλεοπάτρα Σελήνη) لي سمّاوها التوارخيا ب "التانية" باش يميزوها على ماليكة د سوريا من نفس السلالة، مزيودة ف جوايه 40 ق.م، توفات ف جوايه 5 ميلادية، هيّا أميرة مصرية پطليمية، لي كانت ماليكة ديال برقة (دابا منطقة ف ليبيا) مابين 34 و 30 ق.م، ديال مملكة نوميديا ل مدة قصيرة ف 25 ق.م، و ديال مملكة موريطانية من 25 ق.م تال لوفاة ديالها. كانت بنت لماليكة كليوپاطرا السابعة (أشهر كليوپاطرا ف التاريخ) و الجينيرال الروماني ماركوس أنطونيوس، و تجوّجات ب لماليك لأمازيغي يوبا التاني، و هيّا لم ديال پطوليمايوس لموري لي غادي يكون لماليك اللخراني د موريطانية.

كليوپاطرا سيليني التانية
معلومات عامة
زيادة	25 دجنبر 40 قبل لميلاد لإسكندرية
لموت	5 (43/44 عام) شرشال
لحرفة	عاهل
لّوغات لي كيعرف	لإغريقية
لفاميلة
لواليد	مارك أنطوني
لواليدة	كليوباترا
خوت	Antonia، ماركوس أنطونيوس أنتيلوس، Iullus Antonius، أنطونيا الكبرى، أنطونيا الصغرى، الأسكندر هيليوس، بطليموس فيلادلفوس و بطليموس الخامس عشر
شريك	يوبا التاني
لولاد	پطوليمايوس لموري دروسيلا الموريطنية الكبرى Cleopatra of Mauretania

بعدما نتاصر ؤكطاڤيوس على بّاها ف معراكة أكتيوم، هاد اللخر هوّا و مّها كليوپاطرا نتاحرو، و كليوپاطرا سيليني و خوتها تصيفطو ل روما باش يتربّاو تماك عند خت ؤكطاڤيوس، ؤكطاڤيا الصغيرة، لي كانت مرات بّاها واحد لوقت. بعدما تجوجات ب لماليك يوبا، كان عندها تأتير كبير على السياسات د موريطانية، سيرتو ف التجارة و لمشاريع د لبني. لأحفاد ديال كليوپاطرا سيليني و يوبا بقاو ل أجيال كيتجوّجو من لأرستقراطية الرومانية.

التاريخ د لموت ديالها، وخا أغلبية كيتحط ف 5 ميلادية، كاين فيه شك، و كاينين أدلة بلي تقدر تكون عاشت تال 17 ميلادية علّاقل.

حياتها

صغرها

كليوپاطرا سيليني تولدات هيّا و خوها التويّم أليكساندر هيليوص ف مصر ف جوايه 40 قبل لميلاد. سميتها التانية "سيليني" كاتعني "لقامار" ب ليونانية، و خوها أليكساندر هيليوص Ἀλέξανδρος Ἥλιος سميتو التانية كاتعني "الشمش". مّهوم كانت هيّا لماليكة كليوپاطرا السابعة، و بّاهوم هوّا عشيقها ماركوس أنطونيوس لي كان سياسي و جينيرال روماني، لي لعب دور كبير ف التحول من لجمهورية الرومانية لي كانت جمهورية دستورية، ل لإمبراطورية الرومانية لي كيحكمها إمبراطور عندو سلطة مطلقة. ف عام 37 قبل لميلاد، بّاها عتارف بيها و ب خوتها بشكل رسمي. سيليني عندها علّاقل 6 د لخوت خرين، هوما قايصاريون خوها لكبير ماشي شقيق، لي يقدر يكون ولد يوليوس قيصر معا مّها كليوپاطرا، خوها الصغير پطوليمايوص فيلاديلفوص لي كان صغر منها و من ألكيساندر هيليوص ب عام، و جوج خوت خرين ماشي شقاق من بّاها هوما أنتيلوس و إيولوس و جوج نص خواتات بجوجهوم سميتهوم أنطونيا.

سيليني كبرات ف مدينة لإسكندرية، و تلقّات تعليم ب جودة عالية كيتناسب معا لمستوى لإجتماعي ديالها كا أميرة د مصر. ماركوس أنطونيوس ستعمل السلطة ديالو باش يعطي نفود كبير ل كليوپاطرا و ولادها، و ف 34 قبل لميلاد (سيليني ديك الساع ف عمرها 6 سنين ؤلا 7 سنين) علن ف مجمع عام بلي كليوپاطرا هيّا لماليكة د لملوك، قايصاريون هوّا ماليك مصر (ب لقب ديال پطوليمايوس خمسطاش)، و لخوت لخرين كلا واحد تعطاتلو مملكة، منهوم سيليني لي ولّات ماليكة د برقة. هاد لإعلان، ب لإضافة ل طلاق أنطونيوس من مراتو اللولة ؤكطاڤيا الصغيرة، و جواجو من كليوپاطرا، كانت من بين لأسباب لي أدّات ل لحرب اللخرة ديال لجمهورية الرومانية، لي كاتسمّا تا حرب د أكتيوم.

ف معراكة أكتيوم ف 31 قبل لميلاد، خسرو أنطونيوس و كليوپاطرا، و صيفطو ولادهوم بعيد قبل مايوصل ؤكطاڤيوس (لي ولّا لإمبراطور أوݣوستوس قيصر) ل مصر ف 30 ق.م. قايصاريون مشا جيهت لهند، ولاكين تعرّضو ليه عساكريا رومان ف الطريق، ب خيانة ديال لأستاد ديالو لي بيّع ب لموضع ديالو، و بهادشي تّقتل لماليك اللخراني ديال السلالة لپطليمية لي كان حاكم مصر. سيليني و خوتها لخرين تصيفطو ل مدينة طيبا ف لجنوب د مصر. بعدما نتاحرو واليديهوم، سيليني و خوها هيليوص ولّاو إسمياً حاكمين مصر ل مدة د جوج سيمانات، تا ردّوها الرومان إقليم تابع ليهوم. واحد من لخوت لخرين، أنتيلوس، حكم عليه ؤكطاڤيوس ب لإعدام حيت كان لوريت الشرعي ديال ماركوس أنطونيوس و كان ف عمرو 17 عام. لباقي عفا عليهوم ؤكطاڤيوس.

لأسر و لحياة ف روما

ؤكطاڤيوس قدر يلقي لقبض على سيليني و خوتها، و صيفطهوم ل روما. ف لحتيفال د النصر (حتيفال كانو الرومان كيدوّرو فيه لأسرى د لحرب ف شوارع روما و كيضحكو و كينكّلو بيهوم، و شي مرات كيقتلوهوم ف اللخر)، التوام لبّسوهوم لباس تنكري بحال لقمر و الشمش ب سلاسل د الدهب، قدّام مونيكا كاتمتّل مّهوم كليوپاطرا شادة لفعة. السلاسل كانو تقال ل درجة بلي الدراري ماقدّوش يتمشاو بيهوم، و هادشي خلا الناس د روما يتعاطفو معا سيليني و خوتها، عكس ماكان متوقع.

بعدما ولّات ميصرا إقليم تابع ل الرومان، تطرح السؤال ديال لمصير د سيليني، هيليوس و فيلاديلفوص. و حيت ماكانش عندهوم تا شي قريب ف لعائلة باقي حي، الرعاية ديالهوم رجعات ل ؤكطاڤيوس (أوݣوستوس قيصر)، لي عطاهوم ل ختو ؤكطاڤيا الصغيرة باش تربّيهوم.

سيليني كبرات معا خوتها و ولاد ؤكطاڤيا ف دارها على لكدية د پالاتينوس (وحدة من لكديات السبعة د روما). خوتها أليكساندر هيليوس و فيلاديلفوص ماعاود دكرهوم تا شي مصدر تاريخي، و بزاف د التوارخيا كيعتاقدو بلي ماتو ب مرض ؤلا ف عملية غتيال. شّي لي مأكد هوّا بلي ف شي فترة مابين عوام 26 و 20 ق.م، سيليني كانت آخر شخص من السلالة لپطليمية لمباشرة لي باقة حية.

الجواج ب يوبا

لمربية ديال سيليني، ؤكطاڤيا، هيّا لي رتّبات ل الجواج ديالها ب يوبا التاني، لماليك د نوميديا و من بعد د موريطانية، و لي كان معروف بلي كان راجل مطّالع و متقّف، و عندو مؤلفات ف التاريخ و لجغرافيا و لأداب. لبّات د يوبا التاني، يوبا اللول كان نتاحر ف 46 قبل لميلاد، مورما خسر لحرب ديالو ضد يوليوس قيصر، و ولدو يوبا تربّا ف روما، تحت الرعاية ديال يوليوس قيصر، و من بعد ديال ؤكطاڤيوس. لحفلة د الجواج طرات ف 25 ق.م، و تم التخليد ديالها ف نص قصير لي بقا تال دابا و كايݣول:

جوج مناطق د لعالم عضام و متجاورين، لي كيقسمهوم واد النيل، لي كيعمر من بلاد إتيوپيا لكحلة، خلقتي ملوك متشاركين ليهوم بجوج ب الجواج، و رديتي لمصريين و الليبيين عرق واحد، خلي ولاد لملوك ب دورهوم ياخدو من بّاواتهوم حكم قوي على لبلدان بجوج

لكوپل ولدو جوج ولاد هوما:

• پطوليمايوس لموري: لي تسما على عمو و لخو الصغير د مّو، پطوليمايوس فيلاديلفوص. هاد لمسألة براسها كاتبيّن بلي سيليني كانت عندها سلطة و نفود كبير، و ماكانش ماليكة غير ب السمية.
• بنت لي سميتها مامعروفاش بشكل مأكّد، ولاكين كاين لي كيݣول بلي سميتها كانت يوليا ؤلا دروسيلا.

حيت يوبا التاني تجوج مرا خرة، لي هيّا أميرة أناضولية سميتها ݣلافيرا ف جوايه 6 ميلادية، كاين فتيراض قوي بلي كليوپاطرا سيليني غادي تكون ماتت ديك الساع. السبب هوّا بلي الرومان ماكانوش كيتجوجو كتر من مرا وحدة ف نفس لوقت، و يوبا غالباً غادي يكون تبع نفس لعادة حيت تربّا ف روما. ب لموقابيل، ب عتيبارو أمازيغي، ماشي مستبعد باش يكون تبّع لعادات لمحلية ديال جدودو و تجوج كتر من مرا. يلا كان هادشي لي طرا، ف لغالب سيليني و يوبا كانو مخاصمين و مفارقين واحد لمدة، لي تجوج فيها يوبا، تا عاود طلّق ݣلافيرا ف 7 ميلادية. كاينين شقفات د لفلوس تأرّخو ل 17 ميلادية لي فيهوم لوجه د كليوپاطرا سيليني، و ماشي بعيد باش تكون كانت عايشة ف لوقت فاش تسكّو (ؤلا تسكو ب أمر من يوبا كا تدكار ل مراتو اللولة يلا كانت ديجا توفات).

عيون لكلام

هادي زريعة ديال مقالة علا موضوع عندو علاقة ب شخصيات د لمغريب خاصها تّوسع. تقدر تشارك ف لكتبة ديالها.