اللوغات لأمازيغية

اللوغات لأمازيغية
النوع	أسرة لغات
تخدام
اللي كبرو بيها	17,000,000
لفاميلة داللوغات
لوغة د بنادم لوغات أفرو-أسيوية
لخاريطة
لكواض لي كايعرّفو اللوغة
إيزو 639-2	ber
إيزو 639-5	ber
ڭلوطولوڭ	berb1260
لينڭواسفير	10
ليستة د Linguist List	berb

لأمازيغية ؤلا تمازيغت (ⵜⴰⵎⴰⵣⵉⵖⵜ)، هي لوغة لأصلية د شمال إفريقيا، ؤ لي هي فرع من لعائلة د لوغات الأفرو-آسياوية. لأمازيغية لوغة رسمية ف لمغريب ؤ لجزائر ؤ مليلية، ؤ لوغة وطنية ف نيجر ؤ مالي، وتاتهضر فبزاف د لبدان آخرين لي هوما: تونس، ليبيا، موريتانيا، مصر، مالي، نيجر، بوركينا فاصًو، جزر الكناري ؤ حتا ف شي بلدان بحال فرانسا و صبليون و هولاندا...

لبلايص لي كتهضر فيهم لأمازيغية

لكلمة ديال تامزغا مكتوبة بحرف نيو-تيفيناغ

لبلايص لي كتهضر فيهم لأمازيغية فلمغريب ؤ لهجات ديالها

مغريبي تيهضر الرًيفية

مغريبي تيهضر الشًلحة

ماكاينش إحصائيات رسمية ديال شحال د نّاس تيهضرو لوغة لأمازيغية، ولكن تقديرات تاتكول بلي مابين 25 تال 30 مليون واحد ف لعالم تيهضرو على لأقل وحدا من لهجات لأمازيغية. على حساب لإحصا د 2014، كاين تقريبا 16 د لمليون د الناس لي كيهضرو لأمازيغية غي ف لمغريب بوحدو .

تاريخ

تّاريخ نتاع اللغات الأمازيغية قديم بزاف، و ݣاع لعولاما د اللسانيات متافقين بلي ݣاع هاد اللغات الأمازيغية لي منتاشرة دبا فشمال إفريقيا كترجع للوغة وحدة، كيسميوها لأمازيغية لبدائية (ب نّݣليزية Proto-Berber)، وخا كاين خلاف على تأريخ هاد اللغة و لكن كاين إجماع بلي نفيصال هاد لّوغة على لفروع لأفروآسيوية لاخرين، كيرجع لشي 9000 عام تال 10000 عام قبل دابا، ب جانب هادشي فا هاد اللوغة عرفات جوج مراحل ف التطور نتاعها لي هوما:

• لأمازيغية لبدائية1 PB1 كترجع لحوالي 7000 عام هادي
• لأمازيغية لبدائية2 PB2 هادي هي السلف المباشر ل ݣاع اللوغات و اللهجات و التنوعات لأمازيغية لحالية.

واخا الدراسات متعارضة ف هاد لموضوع و لكن لحاجة لي حنايا متأكدين منها هي بلي ف لألفية التالتة قبل لميلاد هاد اللوغة كانت حية و كتستعمل ف لأراضي لي كيمتدو من غرب النيل حتال لمغريب و ݣزاير لكاناري.

و مننساوش حتا بلي كاينين خوبارا كيدعمو فرضية تطور لأمازيغية لبدائية بشكل داتي و منعازل، يعني ضد فرضية التفرع على اللوغة الأفروآسيوية.

لأمازيغية ف تّاريخ لقديم

لمؤرخين كيتافقو بلي اللوغات الأمازيغية كانو كيهضروها سكان شمال إفريقيا ف تّاريخ لقديم و كثر من هادشي كانت هي لّوغة الرسمية فبزاف تاع الممالك. لوغة لأمازيغية فتّاريخ القديم كتعرف علميا بلّوغة الليبية و بشكل عام السلف نتاع ݣاع التنوعات الأمازيغية الحالية هي البروتو-بربرية و كانت لغة منتشرة على الأقل قبل 2000 عام هادي، و غادي تنقاسم من بعد باش تعطينا بزاف د لوغات على الشكل التالي:

• 2000 ق.م: تفرقات البروتو-بربرية لجوج فروع زناݣة و الپروطو-أمازيغية.
• 1000 ق.م:زناݣة نعازلات و حبسات التطور، و لپروطو-أمازيغية غادي تعطينا جوج فروع هوما لغة القبايل و الأمازيغية البدائية شرق-غرب.
• 600 ق.م: نعزالات لغة القبايل معا لبدية تاع تكون لممالك لأمازيغية لمبكرة ولاكين لأمازيغية شرق-غرب غادي تكمل التحور تاعها وغاتعطينا لوغات:الأمازيغية الزناتية و تاشلحيت، نفوسة ،غدامس، أوجيلة و لغة سيوة و بروتو-توارݣ.
• 400 ميلادية: كاع لوغات تقريبا غايبقاو ثابتين إلا لأمازيغية الزناتية غادي تنقاسم لأمازيغية غربية-وسطية و لوغة واسيس البدائية و لوغة الشاوية.
• 1100 ميلادية: لأمازيغية غرب-وسط غادي تنقاسم و غاتعطي: لوغة تامازيغت، الريفية، لوغة صنهاجة، لوغة بني سنوس و لوغة شنوا، أما السلف الأصغر واسيس غادي يعطي جوج تنوعات هوما لوغة ورݣلة و لمزابية.
• بعد 1100 ميلادية: هدا هو تاريخ آخور تفرع معروف ف شجرة لّوغات لأمازيغية و فيه غادي تنقاسم لپروطو-توارݣية و غادي تعطي لوغة غات و لوغة لهݣار.

التنوع اللساني ݣوانش مازال ماكاينش تقدير تاريخ نّفيصال تاعو بسباب قلة لمعلومات لي عارفينها عليه و لكن مومكين يترشح يكون نفاصل هادي 2000 عام حسب علم لإيپيݣرافيا.

علا حساب لباحيتة نّݣليزية دجوزيفين كوين، لأمازيغية لقديمة ديال لمناطق شّمالية (نوميدية ؤ مورية) تقدر تكون نقارضات ؤلا قرّبات تنقارض ف لعصور لقديمة لّخرة، بسباب نّتيشار ديال لّاتينية ؤ لبونيقية، ؤ تّأتير ديال لأمازيغ د صّحرا (لݣيتوليين، تّوارݣ) هوّا لي عاود حياها من جديد. دّاليل علا هادشي جاي من تّحليل لإحصائي ديال لّهجات لأمازيغية ديال دابا، لي كيبيّن بلي أغلبيتها عندها رتيباط ضعيف ب لّوغة لي مخدّمة ف لكتابات لّيبية لقديمة، ؤ ب لموقابيل كاتشابه كتر معا تّوارݣية.

تقسيم لجغرافي

لمغريب

كاين تلاتة د للهجات معروفين و كبار لأمازيغية فمغريب لي جات من للغة لأمازيغية، بحال:

• ريفية (ريف وكيدخل ضمنها لهجات مختلفة عنها فالنطق ديال الحروف بحال لهجة كبدانة ولهجة بني يزناسن)
• تمازيغت (لأطلس لمتوسط ,أغلب مناطق أسامر)
• تاشلحيت (سوس ، الحوز، إحاحان، أيت باعمران و النواحي) .

اكاديميا كنسميو لهجة رّيف ب أمازيغية زناتة ؤ لهجة تاشلحيت ؤ تمازيغت د لأطلس لمتوسط ب أمازيغية صنهاجة و مصمودة.

من 2011، ولاًت لأمازيغية لغة رسمية فالدستور د لمغريب (هي ولعربية)، وكاين واحد لعدد د لمداريس ديال الدولة لي تيقرًيوها من 2001 .

لأمازيغية لفصحى (لي معيرها لمعهد لملكي د ثّقافة لأمازيغية فالرباط) تاتًكتب بحرف تيفيناغ وكتجمع بين كاع لمتغيرات لسانية دالامازيغية ؤ هي لي تاتقرًا فلمدارس د لمغريب ؤ كيتكبو بيها لبلايك ف شارع ؤ لموسسات، ؤ كيتنشرو بها لكتوب ؤ لمؤلفات.

دزاير

كاين بزاف د اللهجات لأمازيغية فالدزاير, منهم: لقبايلية, الشاوية, لمزابية و لأمازيغة ديال التوارݣ د الصحرا وكتعتبر من أبعد اللهجات د لأمازيغية وبعض المختصين كيصنفوها على أنها لغة بوحدها.

ف 2002 رجعات لأمازيغية ف الدزاير لغة وطنية, و ف 2016 بدًلات الدستور و ردًاتها لغة رسمية هي و لعربية.

بزاف د الناس فلجزائر (خاصة لقبايل) تيكتبو لأمازيغية بلحرف اللاتيني وكتكب بتفيناغ عند الشاوين.

ليبيا

لأمازيغية ف ليبيا مشي لغة رسمية، ولكن المجلس الاعلى لأمازيغ ليبيا علن بأن لأمازيغية رسمية فلمناطق ؤ لمدن لي كيسكنوها لأمازيغ، فعام 2011 من بعد ما طاح نظام لقذافي لأمازيغية دخلات للمدراس د ليبيا، لأمازيغ د ليبيا كيعتمدو أساسا إصدارات المعهد الملكي للثقافة لأمازيغية بالمغرب كمرجع لتدريس لأمازيغية بحرف تيفيناغ، لأمازيغية فليبيا كتواجد اساسا فزوارة ؤ نفوسة ؤ جنوب (توراق).

صبانيا

• مدينة مليلية
• جزر لكناري

تأتير د لأمازيغية على لوغات خرين

لغة لأمازيغية عندها تأثير كبير على لوغات لمغاربية بحال الدارجة المغربية لي كتشكل الصانطاكس و لفونولوجي ديالها بشكل اساسي كما ان جزء كبير من لمفردات ديال لدارجة جاي منها، لأمازيغية أثرات بزاف على لنطق د لحروف عند بنادم لي كيتكلم ب للغات مغاربية.

للغة لأمازيغية عندها كذلك تأثير كبير على لغة الهوسا لمنتشرة فدولة نيجر ونيجريا.

شوف تا

• تايزناسنيت
• دارجة
• لعربية
• لينݣليزية
• تمازيغت (وسط لمغريب)

تقدر تزيد شوف بزاف د تّصاور و لمعلومات ديال Berber ف ويكيميديا كومنز.