نݣليزية
لينݣليزية ولا نّݣليزية ؤلا لونݣلي (ب نّݣليزية English) هيّا لوغة هندوؤروپية، ؤ ب ضبط جرمانية غربية لي لأصل ديالها من نّݣليز. تاتًهضر نّݣليزية ف ݣاع لقارّات د لعالم ؤ تاتعتابر حاليا هي لّوغة لّولة ف لعالم من ناحية د لينتاج لعلمي. تقريبا مليار ؤ نص د ناس ف لعالم تيهضرو نّݣليزية، منهم مابين 360 و 400 مليون لي هي لّوغة د لم ديالهم.[1][2]
.jpg)
.svg)
نّݣليزية هي واحد لّوغة جرمانية. هي تالت أكتر لوغة كيهضرو بها ناس ف لعالم كا لوغة د لم أما أكتر لوغة كيهضرو بيها هي شينوية ؤ تابعاها صبليونية.[3]
نتاشرات لينݣليزية ف لعالم من بعد لقرن 17، مع لإمبراطورية لبريطانية ؤ لميريكان. مورا لحرب لعالمية التانية، ؤ حيث ولات لميريكان قوة عوضما، فرضات لينݣليزية راسها كا لوغة عالمية، ؤ ولات هي لوغة لولة ف لعالم ف بزاف د لينتاجات ؤ ضّومينات. لينݣليزية هي لوغة رسمية ف بزاف د لهيئات ؤ لمؤسسات ف لعالم بحال لأمم لمتًحدة ؤ ليتيحاد لؤروپي.[4] نݣليزية هي لوغة رسمية ف 67 بلاد. ؤ هيّا لّولة من حيت تّعلام ديالها كا لوغة تانية.
ماكاينش شي فرق كبير ما بين لينݣليزية ديال ميريكان و لينݣليزية ديال بريطانيا ف لمفردات ؤ لقواعد. كاينين شلة ديال لّهجات ؤ لّكنات ديال نّݣليزية، ف بزاف د لبلدان ؤ لمناطق، لّي كتختالف بيناتها ف لفونولوجيا ؤ صّوتيات، ؤ شي مرات حتا ف لموعجام، لإيديومات، لݣرامير، ؤ طّريقة د لكتبة، ولاكين ب شكل عام كيتفاهمو بيناتهم، من غير شي حالات فاش كيكونو جوج لهجات متباعدين بزاف جغرافيّان. شّخص نّاطق ب نّݣليزية كيتسما أنݣلوفوني.
لينݣليزية هي لوغة لأجنبية تانية من حيت عدد ناس لي تيهضروها ف لمغريب، من بعد لفرانساوية. تقريبا 6 د لمليون د لمغاربة قالو علا راسهم بلي تيهضرو نّݣليزية ف إحصائيات د 2014.[5]
تّصنيف لّوغاويعدل
نّݣليزية لوغة هندوؤروپية، ؤ ب تّحديد كتنتامي ل لفرع ديال لّوغات لجرمانية لغربية. نّݣليزية لقديمة جات من ستيمرارية لوغاوية كتمتّل مجموعة د لّهجات ؤ لّوغات لّي كانو كيهضرو قبايل جرمانية علا شّط ديال لبحر شّمالي ف لمنطقة د فريزيا. هاد لّوغات تطورو ب شكل تدريجي ل تلاتة د مجموعات، هوما لّوغات لأنݣلية ف لجزر د بريطانيا، لّوغات لفريزية، ؤ لألمانية سّهلية.
لّوغات لأنݣلية ؤ لوغات لفريزية كيتجمعو عادة ف فاميلة وحدة د لّوغات لأنݣلوفريزية، لّي كتمتل مجموعة د لّوغات كاتعتابر أقرب وحدين ل نّݣليزية. ؤ هاد لفاميلة بدورها كتّجمع معا لألمانية سّهلية ف فاميلة كتسمّا لّوغات لإنݣڤايونية ؤلا لّوغات لجرمانية د لبحر شّمالي، مي كاينين عولاما د لّيسانيات كيعارضو هاد تّصنيف لّخر.
نّݣليزية لقديمة من بعد غادي تطور ل نّݣليزية لوسطانية، لّي حتا هيّا غادي تطور ل نّݣليزية لّي كنعرفو دابا. نّݣليزية كتبان مختالفة علا لّوغات لجرمانية لوخرة، حيت عزلها لبحر علا خواتاتها ل مدة طويلة، ؤ من بعد غادي تأتر ب نّوردية لقديمة ؤ لفرانساوية. واحد نّيسبة كبيرة ديال لموعجام د نّݣليزية جاي من لفرانساوية.[6]
نّݣليزية كتّعتابر لوغة جرمانية حيت كتّشارك معا لّوغات لجرمانية لوخرة ف تغييرات ؤ زيادات لّي ماكانلقاوش ف لوغات خرين. هادشي كيدل بلي هاد لّوغات منحادرة من شي لوغة قديمة كتسما لپروطوجرمانية لّي كانت كتّهضر ف شمال ؤروپا ف لعصر د لحديد. من بين لخاصيات لّي كيتشاركو فيها لّوغات لجرمانية، كاين تّقسيم ديال لفعال ل فعال قوية ؤ فعال ضعيفة. نّݣليزية كتّعتابر لوغة أنݣلوفريزية حيت هيّا ؤ لّوغة لفريزية كيتشاركو ف خاصيّات إضافية، سيرتو شي تويشيات ف تّصريف د لفعال ؤ ف نّوطق.[7]
تّاريخعدل
نّݣليزية لقديمةعدل
مقالة متعمقة: نݣليزية قديمة
أقدم شكل من شّكال د نّݣليزية كيتسما نّݣليزية لقديمة ؤلا لأنݣلوساكسونية، لّي كانت مهضورة مابين لقرن سّات ؤ لقرن حضاش ميلادي. نّݣليزية لقديمة تطورات من مجموعة د لّهجات لجرمانية لغربية، لّي عادتن كتّجمع ف إطار لّوغات لأنݣلوفريزية، ؤلا لّوغات لجرمانية د لبحر شّمالي، ؤ كانت مهضورة ف فريزيا (شمال د هولاندا ؤ شوية ف لغرب د ألمانيا)، ف ساكسونيا سّفلية (شّمال لغربي د ألمانيا)، ؤ ف لجنوب ديال شبه جزيرة يوتلاند (شّمال د ألمانيا ؤ لجنوب د دّانمارك).[8]
ف لقرن لخامس لميلادي، لقبايل لأنݣلوساكسونية ستاقرات ف بريطانيا من بعد ما طاحت لإمبراطورية رّومانية لغربية. جوج قرون مورا داكشي ولّات لّهجات لجرمانية ديالهم هيّا لّي مسيطرة ف بريطانيا، ؤ خدات لبلاصة ديال لّوغات لّي كانت ف إقليم بريطانيا رّوماني، بحال لبريطونية لقديمة لّي كتعتابر لوغة كيلتية، ؤ لّاتينية. هاد لّهجات ولّات كتسما Ænglisc إنݣليسك لي ولّات English إنݣليش نيسباتن ل لقبايل لأنݣلية، ؤ لبلاد ديالهوم ولّات كتسما Ænglaland إنݣلالاند ؤلا بختيصار England إنݣلاند.[8][9]
نّݣليزية لقديمة كانو فيها 4 ديال لّهجات رّئيسية، لّي كينقاسمو ل جوج مجموعات: لّهجات لأنݣلية (لّهجة لميرسية ؤ لّهجة نّورثامبرية) ؤ لّهجات سّاكسونية (لّهجة لكينتية ؤ لّهجة سّاكسونية لغربية).ب سباب لإصلاحات تّعليمية ديال لماليك ألفريد لعاضيم ف لقرن تّاسع غادي تولي لّهجة سّاكسونية لغربية ديال مملكة ويسيكس هيّا لّوغة لمعيارية ديال نّݣليزية لقديمة.[10]
جوج د نّوصوص لمعروفين ب نّݣليزية لقديمة هوما لملحامة ديال بيوُولف لّي كانت مكتوبة ب سّاكسونية لغربية، ؤ نّشيد ديال كييْدمون لّي تكتبات ب لّهجة نّورثامبرية، ؤ لّي هيا أقدم قصيدة شيعرية نݣليزية معروفة.[11] نّݣليزية لعصرية تطورات سيرتو من لّهجة لميرسية ؤ سّكوطلاندية من لّهجة نّورثامبرية. ف لقرن لخامس كانت نّݣليزية لقديمة كتّكتب ب لأبجدية رّونية بحال لّوغات لجرمانية لوخرة، سيرتو لّوغات لأنݣلوفريزية، مي معا لقرن سّات، ولّات كتّكتب ب لأبجدية لّاتينية، معا شي رموز رونية بحال þ (= ث) ؤ ð (= ذ).[12]
نّݣليزية لقديمة وخا هيّا لجدة د نّݣليزية لعصرية، ماكاينش تفاهوم بيناتهوم، ؤ شي نݣليزي من لقرن لواحد ؤ عشرين مايقدش يفهم نّݣليزية لقديمة بلا مايتعلّم ليها. لݣرامّير ديال نّݣليزية لقديمة كتشبه ل ديال لألمانية ديال دابا، ؤ أقرب لوغة ليها كانت هيّا لفريزية لقديمة. نّݣليزية لقديمة متلان فيها لإعراب ديال سّميات، بحال ف لألمانية، علا حساب واش فاعل، مفعول، ؤلا مجرور، ؤ نفس شي كينطابق علا لحروف د لإضافة، لفعال ؤ نّْعوت. نّݣليزية لعصرية ب لمقارنة، فيها شكال قلال ديال ضّماير ؤ شّكال ديال تّصريف د لفعال حتا هوما قل من دوك لّي كاينين ف نّݣليزية لقديمة.[8] هاد تطور كيشبه لّي وقع ما بين لعربية ؤ دّاريجة. هادا ميتال ديال جملة ب نّݣليزية لقديمة ؤ لموقابيل ديالها ب نّݣليزية لعصرية، ب طرجمة ل دّاريجة:
- نّݣليزية لقديمة: Foxas habbað holu and heofonan fuglas nest
- نّݣليزية لعصرية: Foxes have holes and the birds of heaven nests[13]
- داريجة: تّعالب عندهوم حفاري ؤ طّيور د سّما عندهوم عشاش
نّݣليزية لوسطانيةعدل
- مقالة متعمقة: نݣليزية وسطانية
معا تّأتير ديال لوغات خرة، غادي تطور نّݣليزية لقديمة بشكل تدريجي ل نّݣليزية لوسطانية. تّاريخ لّي كيتّعطا عادة ديال لبدية د هاد تّطور هوّا 1066 فاش جا ويليام لفاتح نّورماندي باش يسيطر علا نّݣليز. ولاكين نّݣليزية لوسطانية ماكاتميّز ب شكل فيعلي حتال مابين لقرن تلطاش ؤ لقرن خمسطاش.
بزاف د لكلمات ديال نّݣليزية لقديمة غادي يبداو كيتّنساو ؤ كيتعوضو ب كلمات ديال نّوردية لقديمة لّي كانو جابوها سّكانديناڤيين من لقرن لعاشر، يعني قرن قبل من ويليام لفاتح. هادشي طرا بشكل تدريجي، ؤ مدة طويلة كانو لكلمات ديال نّݣليزية ؤ لموقابيلات نّوردية ديالهوم كيتّسعملو جنب ب جنب. لكاتب ؤ دّيپلوماسي نّݣيليزي ويليام كاكستون ف لّخر ديال لقرن 15 كان متلا كيتشكا بلي بنادم ماكيعرفش إينا كلمة فيهوم يخدّم، بحال كلمة ey إي لّي ب نّݣليزية لقديمة كتعني بيضة (ب لألمانية Ei)، ؤ لموقابيل ديالها egg إيݣ، لّي دخل من نّوردية ؤ لّي مستعمل دابا ف نّݣليزية لعصرية. أمتلة خرين لّي تّنساو فيهوم لكلمات ديال نّݣليزية لقديمة ل صالح كلمات ديال نّوردية كاين sweostor موقابيل syster (دابا sister بمعنى خت)، niman موقابيل taca (دابا take، بمعنى خدا)، ؤ grama موقابيل angr (دابا anger، بمعنى غضبة).[8]
معا لستيعمار نّورماندي ديال ويليام لفاتح، غادي تبدا نّݣليزية كتأتر ب لفرانساوية لقديمة. لأغلبية د نّوبالا من أصل نݣليزي يا غادي يموتو ف لمعارك ضد لجيش نّورماندي ديال ويليام، يا غادي يتّحكم عليهوم ب لإعدام ب تهمة د لخيانة، من بعد ما ويليام شد لحكم د نّݣليز. غادي تولي ضونك لفرانساوية ل مدة جوج قرون هيّا لّوغة د لقصر لمالاكي ؤ ديال طّبقة د نّوبالا نّورماندية لّي عوضات طّبقة لقديمة. ب سباب لختيلاط ديال نّورمانديين معا نّݣالزا ب جّواج، ؤ حيت نّاس ديال طّبقات لجتيماعية نّازلة خاصهوم يكومونيكيو معا سيادهوم، غادي ينتاشرو لكلمات لّي جايين من لفرانساوية ف لهضرة ديال لعامة د نّݣالزا.[8]
وحدة من لموميزات ديال نّݣليزية لوسطانية ف لݣرامير هوّا بلي فقدات تّمييز لعشوائي ديال جّندر د سّميات (دكري، نتوي، محايد) لّي كان ف نّݣليزية لقديمة، ؤ ولّا جّندر متعلق ب لمعنى ديال سّمية، لّي كيتسما جّندر طّبيعي. لإعراب حتا هوّا بدا كيطير بشوية حتا غبر ف مرة معا لبدية د لقرن 16 فاش كتبدا لفترة ديال نّݣليزية لعصرية.[8]
من بين أهم لمكتوبات لأدابية لّي تكتبو ب نّݣليزية لوسطانية، كاين لحجّايات د كانتربوري The Canterbury Tales ديال دجوفري تشوصر، أعضم كاتب نݣليزي قبل من شيكسپير، ؤ كتبو مابين عام 1387 ؤ 1400.[8]
مرة خرة نفس لميتال ديال قبل، ولاكين معا لجوملة ب نّݣليزية لوسطانية حتا هيّا:
- نݣليزية قديمة: Foxas habbað holu and heofonan fuglas nest
- نّݣليزية لوسطانية: Foxis han dennes, and briddis of heuene han nestis
- نݣليزية عصرية: Foxes have holes and the birds of heaven nests[13]
- داريجة: تّعالب عندهوم حفاري ؤ طّيور د سّما عندهوم عشاش
لبدية د نّݣليزية لعصريةعدل
- مقالة متعمقة: النݣليزية لعصرية
ف لقرن 16 كاتبدا لفترة ديال نّݣليزية لعصرية. هاد لفترة نقدرو نقسموها ل جوج فترات، نّݣليزية لعصرية لمبكّرة (من لبدية د لقرن سطاش تال لقرن تمنطاش)، ؤ نّݣليزية لعصرية لمعطلة (من لقرن تمنطاش ؤ تسعطاش تال دابا).[14]
نّݣليزية لعصرية لمبكّرةعدل
تميزات هاد لفترة ب تلاتة د لحوايج رئيسيين: تّكحيزة لڤوايلية لكبيرة، تّبسيط ديال لقواعد د لإعراب، ؤ لمعيرة لّوغاوية د نّݣليزية.
تّكحيزة لڤوايلية لكبيرة (نّݣليزية: The Great Vowel Shift) هوّا فينومين ليساني لي أدّا ل تغيير جدري ف طّاريقة د نّطقان ديال لڤواييلات ف نّݣليزية، سيرتو لڤواييلات طّوال، حيت كان تغيير متسلسل، يعني كلا تغيير ف سّيستيم د لڤواييلات كان كيأدي ل تغييرات خرة ؤ هيا غادية. متلا كلمة bite (ب معنى عض) كانت كاتّنطق بحال beet بيت، مي مورا لقرن 16 ولات كاتّنطق بايت، ؤ كلمة about كانت كاتّنطق أبوت (بحال boot) ؤ دابا ولات أباوت. هاد لفينومين كيفسّر علاش نّݣليزية لعصرية مامتناسقاش ديما ف نّطقان ؤ لإملاء، حيت بزاف د شّكال لكتابة بقاو من نّݣليزية لوسطانية، ؤ علاش لحروف د لڤواييلات ف نّݣليزية كيختالف نطقانهوم ف شلا حالات على نّطقان ديالهوم ف لوغات ؤروپية خرة.[15]
ف هاد لفترة، بدات لأهمية د نّڭليزية كاتطلع، مقارنةً معا لفرانساوية نّورماندية، ف عهد لماليك هينري لخامس. لقصر ولّا كيصدر لوتايق رّسمية ديالو ب نّڭليزية، ؤ بانت نڭليزية وسطانية معيارية جديدة مبازية على لّهجات ديال لندن و لمنطقة د ميدلاند شّرقية. ف 1476، ويليام كاكسطون دخّل لمطباعة ل نّڭليز ؤ بدا كيطبع لمنشورات ؤ لكتوبا، ؤ هادشي زاد من نّتيشار ديال هاد نّڭليزية لمعيارية. لأداب نّڭليزي د هاد لفترة كيشمل لأعمال ديال ويليام شيكسپير ؤ طّرجامة د لإنجيل لي كوميصيوناها لماليك دجيمس لّول لي كاتسمّا تال دابا ب سميتو.
وخا تّكحيزة لڤواييلية لكبيرة دارت تغييرات موهيمة ف نّڭليزية، هاد لّخرة ف نطقانها كانت باقة ماكاتشبهش 100% ل نّڭليزية لي كانعرفو دابا. متلاً حرف K ف كلمت knight ؤ حرف G ف كلمت gnat كانو باقين كيتنطقو. بزاف د تّويشيات ف لڭرامير ؤ تّركيب لي كيبانو دابا قدام ؤ غراب، كانو عاديين ف ديك لفترة.
لميتال ديال قبل لي موخود من لإنجيل د متّى:
- نݣليزية قديمة: Foxas habbað holu and heofonan fuglas nest
- نّݣليزية لوسطانية: Foxis han dennes, and briddis of heuene han nestis
- نݣليزية عصرية مبكّرة: Foxes haue holes and the birds of the ayre haue nests
- نݣليزية عصرية: Foxes have holes and the birds of heaven nests
- داريجة: تّعالب عندهوم حفاري ؤ طّيور د سّما عندهوم عشاش
نّتيشار د نّڭليزيةعدل
من لقرن 18، لإمبراطورية لبريطانية بدات كاتسيطر على بزاف د لمناطق د لعالم، ؤ لإنتاجات تّقافية ؤ لفلسفية ؤ لعلمية ب نّڭليزية تزادو بشكل كبير بزاف معا نّتيشار ديالها. نّڭليزية ولّات ب هادشي أول لوغة عالمية ب لمعنى لحقيقي، حيت سهّلات تّواصل مابين بزاف د لبلدان. لمستعمرات د بريطانيا ف إفريقيا، أميريكا ؤ أسيا ؤ بلايص خرين بداو كيخدّمو نّڭليزية، ؤ طوّرو لهجات خاصين بيهوم. لبلدان لي ستاقلو من بعد ؤ كانو عندهوم بزاف د لّوغات، ردّو نّڭليزية لوغة رسمية باش يتجنّبو صوعوبات سياسية ؤ إيديولوجية لي تقدر تنتج من لماخدة ديال وحدة من لّوغات لمحلية بلاصت لخرين ف رّسميات ديال دّولة.
معا تّطور ديال نّڭليزية لعصرية، لأساليب ديال لكتابة ؤ لڭرامير بقاو كيتمعيرو، ؤ نّاشرين ديال لكتوبا ؤ دّيكسيونيرات مدعومين من دّولة، ب لإضافة ل تّعليم لعومومي، عاونو ف نتيشار هاد لمعيار د نّڭليزية لعصرية. ف 1755، صامويل دجونصون صدّر دّيكسيونير د لّوغة نّڭليزية، لي دخّل لإملاء د لكلمات ؤ تّراكيب لجومال لمعياريين. ف 1828، ف جّيهة لخرة د لمحيط لأطلاسي، نوح ويبستر صدّر دّيكسيونير لميريكاني ديال لّوغة نّڭليزية، لي تاهوّا لعب نفس دّور ف نّڭليزية لميريكانية. لهضرة ب لّهجات لي ماتابعاش ل لّوغة لمعيارية ولّات كاتجيب ضّحك ؤ تّكوميك حيت كاتّعتابر رمز ديال تّكلاخ ؤ لمستوى تّعليمي ؤ جّتيماعي لهابط، ؤ داكشي علاش طّبقة لوسطانية د لمجتمع ضغيا أضابطات نّڭليزية لمعيارية ؤ تخلّات على لّهجات ديالها. ف لقرن 20، نّتيشار د نّڭليزية زاد تسارع ملي لميريكان خدات بلاصت بريطانيا كا قوة عضمى، مورا لحرب لعالمية جّاوجة، ؤ بسباب قنوات د تّلفازة بحال لبي بي سي لي كانت كاتّشاف بشكل واسع. ف لقرن 21، نّڭليزية ولّات أكتر لوغة مهضورة و مكتوبة ف تّاريخ د بنادم.
ف نّڭليزية لعصرية، لإعراب مشا بشكل شبه كامل. تّخدام ديال لفيعل do كا فيعل موساعيد ولّا منتاشر بزاف. صّيغة د لماضي ديال لأفعال تاهيّا تمعيرات ؤ تقننات بشكل كبير ب زّيادة ديال ed- ف لّخر د لفيعل (قبل كانو بزاف د لأفعال لي عندهوم فورما خاصة بيهوم).
تّوزيع لجغرافيعدل
ف 2016، كانو 400 مليون شخص ف لعالم هاضرين ب نّڭليزية كا لوغة د لم، ؤ 1,1 مليار كا لوغة تانية. نّڭليزية هيّا أكبر لوغة من حيت لعاداد د لهاضرين. نّڭليزية مهضورة ف جميع لقارّات، ؤ ف ڭزاير موجودين ف جميع لموحيطات ف لعالم. ؤ هيا أكتر لوغة كيهضروها نّاس ملي كيتلاقاو ف أي بلاصة ف لعالم ؤ ماكاتكونش عندهوم لوغة د لم مشتاركة بيناتهوم.
لّانڭويست لهندي براج كاشرو قسّم لبلدان د لعالم ل تلاتة دّوارات على حساب لهاضرين ب نّڭليزية، ؤ تّأتير ديال هاد لبلدان على لمعيار ديال لّوغة.
- دّوارة لّولة ؤلا دّوارة دّخلانية: لبلدان لي فيها أغلبية هاضرين ب نّڭليزية كا لوغة د لم، بحال لميريكان، لمملكة لمتحدة، و كانادا.
- دّوارة تّانية ؤلا دّوارة لبرانية: لبلدان لي فيها أقلية هاضرة ب نّڭليزية كا لوغة د لم، ولاكين هاد لّوغة منتاشرة بزاف ف لإدارة ؤ لإعلام.
- دّوارة تّالتة ؤلا دّوارة لمتوسّعة: لبلدان لي بزاف د نّاس فيها كيتعلّمو نّڭليزية كا لوغة أجنبية، ؤ هاد لبلدان غادين ؤ كيتزداو.
لفونولوجياعدل
لفونيتيك ؤ لفونولوجيا ديال نّڭليزية كاتبدّل على حساب لّهجة، بلا مايأتر هادشي ف لعادة على تّفاهوم لمتبادل مابين لّهجات. لختيلافات لفونولوجية كاتعطينا فونيمات مختالفين، بينمّا لختيلافات لفونيتيكية كاتعطينا نطقان مختالف ديال نفس لفونيم. هاد طّابلوات كيبيّنو نّطقان لمعياري ديال نّڭليز ؤ لميريكان، ب ستيعمال لألفبائية لفونيتيكية لعالمية.
لكونصوناتعدل
| شنفي | سناني | لتّي | مورلتّي | غاري | طبقي | قرجوطي | ||||||||
|---|---|---|---|---|---|---|---|---|---|---|---|---|---|---|
| نيفي | m | n | ŋ | |||||||||||
| وقفي | p | b | t | d | k | ɡ | ||||||||
| موقوف حتيكاكي | tʃ | dʒ | ||||||||||||
| ساكت حتيكاكي | f | v | θ | ð | s | z | ʃ | ʒ | h | |||||
| علاين ساكت | l | ɹ* | j | w | ||||||||||
عيون لكلامعدل
- ^ "لإحصائيات د لمجلة د بابل".
- ^ "What are the top 200 most spoken languages? [شنو هوما لّوغات ل 200 لأكتر مهضورين ف لعالم؟]" (ب نڭليزية).
- ^ "English Language Statistics [سطاتيستيك ديال نّݣليزية]" (ب نڭليزية).
- ^ "ليستة د لّوغات رّسمية د ليتيحاد لؤروپي".
- ^ "لإحصائيات د لهضرة د لينݣليزية فلمغريب".
- ^ "History of English [تّاريخ د نّݣليزية]" (ب نڭليزية).
- ^ ويين هيربيرت (2007). The Germanic Languages [لّوغات لجرمانية]. لمطبعة ديال جامعة كامبريدج.
- ^ a b c d e f g ألبرت س. باف، طوماس كييبل (2002). A History of the English Language [تاريخ د لّوغة نّݣليزية] (ب نڭليزية). روتليدج.CS1 maint: uses authors parameter (link)
- ^ "Engla land" (ب نڭليزية).
- ^ طوماس تون (1992). The Cambridge History of the English Language. 1: The Beginnings to 1066 [تّاريخ ديال كامبريدج د لّوغة نّݣليزية، لݣزو لّول، من لبدية حتال 1066]. لمطبعة ديال جامعة كامبريدج.
- ^ دانييل دونوݣو (2004). "Old English Literature [لأداب نّݣليزي لقديم]". doi:10.1002/9780470776025. Cite journal requires
|journal=(معاونة) - ^ "Anglo-Saxon runes (ᚠᚢᚦᚩᚱ/Futhorc/Fuþorc)" (ب نڭليزية).
- ^ a b لاص، روجر (2006). دينيسون، ديڤيد؛ هوݣ، ريتشارد م. (إيديتورات). A History of the English language [تّاريخ د لّوغة نّݣليزية]. لمطبعة ديال جامعة كامبريدج. pp. 46–47. ردمك 978-0-521-71799-1.
- ^ "Late Modern English" (ب نڭليزية).
- ^ مانفريد ݣورلاخ (1991). Introduction to Early Modern English. مطباعة جامعة كامبريدج. pp. 66–70.
شوف تاعدل
|
تقدر تزيد شوف بزاف د تّصاور و لمعلومات ديال English language ف ويكيميديا كومنز. |