لغزو النورماندي ل النݣليز

لغزو نّورماندي ل نّݣليز هوّا مجموعة د لأحدات تّاريخية لّي طرات ف نّݣليز معا لبدية ديال عام 1066، لّي أدّات ل سّيطرة ديال نّورمانديين ؤ تّتويج ديال ويليام لفاتح كا ماليك علا نّݣليز.

رسمة من لقرن 13 ديال لحكّام د نورمانديا رولو نّورماندي، ويليام بوسيف طويل، ؤ ريتشارد لّول نّورماندي

نّورمانديين براسهم كانو مجموعة ديال لقبايل دّانماركية لّي ستاقرات ف نورمانديا ف شّمال لغربي ديال فرانسا، ف لبدية ديال لقرن لعاشر. ف 912، زّعيم ديالهم رولو نّورماندي غادي يدير تفاهم معا لماليك د فرانسا شارل لبسيط بحيت غادي يعتارف بيه كا ماليك عليه، موقابيل باش لماليك يقبل سّلطة ديال نّورمانديين علا لمنطقة فين كانو مستاقرين، ؤ غادي يولي رولو أول دوك ديال نورمانديا. نّورمانديين معا مرور زّْمان غادي يتخلاو علا لّوغة د جدودهوم، ل صالح لفرانساوية لقديمة، ؤ غادي يطورو وحدة من أعضم تّقافات ديال ؤروپا ف داك لوقت، ؤ لجيش ديالهوم غادي يولي أقوى جيش ف ؤروپا. من لقرن لعاشر ؤ لبدية د لقرن حضاش، كانو ديجا علاقات قوية ما بين نّݣالزا ؤ نّورمانديين، علا طريق جّواج ما بين لملوك ؤ لأومارا د نّݣليز ؤ لحكام د نورمانديا. نّورمانديين كانو ديجا ف لبلاط لملاكي د نّݣليز من نّص لّول ديال لقرن حضاش.[1]

ف يناير 1066، لماليك إدوارد لمعتارف غادي يموت بلا مايخلي ولد لّي يخلفو. إدوارد كان ديجا واعد ويليام، لّي كان دوك ديال نورمانديا ؤ ولد عمو من دّرجة تّانية، بلي غادي يشد لحكم من موراه. مي ف نّݣليز ماكانوش قابلين بيه، حيت كان ولد ماشي شرعي ؤ دوّز أغلبية د حياتو برّا نّݣليز ف نورمانديا. ويليام ضونك ماكانش عندو طريقة باش يفرض شّرعية ديالو بلا سلاح، ؤ بعد بزاف د لمعارك، قبل راس لعام ديال 1067 غادي يولي ماليك ديال نّݣليز. ويليام غادي يقضي علا جميع نّوبالا من أصل نݣليزي، ؤ ل مدة عقود، غادي يسيطرو نّورمانديين علا جميع لمناصب ؤ لألقاب د سّلطة.[1]

عيون لكلام بدل

  1. ^ a b ألبرت س. باف، طوماس كييبل (2002). A History of the English Language [تاريخ د لّوغة نّݣليزية] (ب نڭليزية). روتليدج.CS1 maint: uses authors parameter (link)
  تقدر تزيد شوف بزاف د تّصاور و لمعلومات ديال Norman Conquest of England ف ويكيميديا كومنز.