تمازيغت (وسط لمغريب)

تمازيغت (وسط لمغريب)
النوع	لهجة، لوغة و لغة حية
تخدام
اللي كبرو بيها	3,000,000 (1998)
كايتهضر بيها ف	لمغريب
أصلية ف	لمغريب
لخصائيص
لكتبة	ألفبائية لاتينية، تيفيناغ و أبجدية عربية
لوضعية داللوغة	6a مزيانة
لفاميلة داللوغات
لوغة د بنادم لوغات أفرو-أسيوية لوغات أمازيغية لوغات أمازيغية دالشمال لوغات أمازيغية دلأطلس
لخاريطة
لكواض لي كايعرّفو اللوغة
إيزو 639-3	tzm
ڭلوطولوڭ	cent2194
إيطنولوڭ	tzm

تمازيغت ديال وسط لمغريب (لي كتسمى ف لمغريب بعض لمرات ثمازيغت ن أطلاس Tmaziɣt-n-atlas ؤلا شلحة زايان) هيا لوغة أمازيغية من لعائيلة ديال لوغات لأفروأسيوية كيهدرو بيها 5 د لملاين د ناس ف لمغريب، خصوصا ف جبال وسط لمغريب، وحتى ف مدن وسط لمغريب و بين لمغاربة د وروپا. تمازيغت ديال وسط لمغريب هي من لوغات لأمازيغية لي كيهدرو بها أكتر عدد د نّاس، مع لقبايلية، سوسية، ريفية، شاوية وتوارݣية. ف لمغريب، كتنافس سوسية على شكون أكتر وحدة فيهم متداولة.

ݣاع لهجات ولا لوغات لأمازيغية يمكن لواحد يسميهم تمازيغت، ولكن تمازيغت ديال وسط لمغريب هي لوحيدة لي ناسها كيعيطو ليها غير تمازيغت. مادامها لغة أفروأسيوية، تمازيغت فيها بلعا د لحروف المفخمة (يعني كاين ت وط، ولا د و ض)، د لحروف لهوية (لي كتخرج من لها ديال لحلق: ق، خ، غ) ود الحروف الحلقية (ح، ع) وما فيهاش صوت پ. تمازيغت فيها تلاتة ديال لحروف لمتحركة، ولكن فيها عاداد ديال لكلمات ما فيهمش حتى حرف متحرك وكلها سكون.

بعكس السوسية (ولا تشلحيت)، ما كانتش تمازيغت ديال وسط لمغريب موتقة بالكتابة حتى للقرن 20. ولكن حاليا ف وسط لمغريب كتكتب رسميا بتيفيناغ ف لكتوبة د لمدرسة متلا، واخا كاين كتوبة عليها كيستعملو الحروف اللاتينية ولا لعربية.

ترتيب لعادي ديال لكلمات ف لجملة هو فعل-فاعل-مفعول، ومرة مرة فاعل-فعل-مفعول. لكلمات ف تمازيغت كيتبدلو على حساب لجنس ديالهم ( مؤنت ولا مدكر)، لعدد ديالهم (جمع ولا مفرد) ومحلهم ف لجملة. وهاد التبدال كيدار بحروف كيتزادو ف الاول ديال لكلمة ولا ف لخر ديالها، ولا فيهم بجوج ف نفس الوقت.

تصنيف

تمازيغت ديال وسط لمغريب هي وحدة من لوغات الأمازيغية لي منتشرة بزاف وكتنافس سوسية (تشلحيت) على شكون أكتر وحدة متداولة ف لمغريب. ولكن صعيب عموما لواحد يفرق بين هاد لوغات خصوصا بزاف منهم كيسميوهم ماليهم تمازيغت. ولفرق كيكون لأغلبية ف نطق بعض لكلمات وليكسيك لي كيستعملو ماليها. ومن لفوق، تمازيغت ديال وسط لمغريب فيها حتا ختيلافات من منطقة لمنطقة.

ناس لي كيهدرو بتمازيغت ديال وسط لمغريب كيسميو راسهم أمازيغ (إمازيغن ف لجمع) وهي كلمة متداولة خصوصا بين لأمازيغ ولأصل ديالها ما معروفش، ولكن حتيمال كتعني "رجال/ناس لحرار". مصطلح تمازيغت. لي هو مؤنت أمازيغ، كيعني لوغة لأمازيغية. وهاد لمصطلحات ديال أمازيغ للشخص وتمازيغت للوغة كيستعملوهم حتى ف باقي لمناطق لأمازيغية، بحال ريف و سوس، ف بلاصت كلمات أريفي/تاريفيت ولا أشلحي/تشلحيت. ولكن بين أمازيغ وسط لمغريب كيتستعملو غير كلمات أمازيغ وتمازيغت ديما كيف ما كان سياق لهدرة.

ف ديراسات لقديمة، كانت تمازيغت ديال وسط لمغريب كتسما مرة مرة برابر، وهي كلمة عربية مدرجة، ولا تبربريت. و هاد جوج كلمات مرتابطين بالمصطلح لعربي بربر لي كيتنعتو بيه ݣاع لغات/لهجات لأمازيغية، واخا لإستعمال ديالو غادي وكينقص حيت بزاف كيجيهم كلمة كتنتاقص من لأمازيغ.

تمازيغت ديال وسط لمغريب كتنتامي للفرع الأمازيغي ديال لعائيلة د لوغات الأفروأسيوية، لي فيها لوغات خرين د شمال إفريقيا وجنوب غرب اسيا، منهم لوغات سامية، لوغة لمصرية، تشادية ولوغات لكوشية. بحال لأغلبية ديال لوغات الأمازيغية، حتافضات تمازيغت ديال وسط لمغريب بخاصيات د لوغات الأفروأسيوية، بحال سيستيم فيه مؤنت ومدكر، ترتيب فعل-فاعل-مفعول، حروف مفخمة، ستيعمال ديال جدر باش يتبناو كلمات جداد منو، زيادة ديال س ف لحالة ديال لكوزاتيف (فغ : خرج، سوفغ : خرج *شي حاجة*) (وهاد ضاهرة لخرا كاينة حتى ف عائيلات خرين، بحال لوغات نيجر كونݣو). ف لعائيلة ديال لوغات الأمازيغية، تمازيغت ديال وسط لمغريب كتنتمي، مع تشلحيت/السوسية، للفرع الأطلسي ديال لوغات لأمازيغية شمالية.

تمازيغت ديال وسط لمغريب جاية وسط سنسلة د لهجات شادة من تاريفيت ف شمال شرقي لتشلحيت ف لجنوب لغربي. ليكسيك ديالها فيه ختيلافات باينة مع سوسية، وسيستيم ديال لأفعال فيها قرب لريفية كتر من قربو لسوسية. وتمازيغت ديال وسط لمغريب كاين تنوع بين مناطقها ف لهدرة كتر من السوسية. لهجات ديال تمازيغت د وسط لمغريب كتقسم لتلاتة ديال لمجموعات جوغرافية: لهجات لأطلس لمتوسط، لهجات لأطلس لكبير ولهجات جبل صاغرو وتيلال لي ضايرين بيه. واخا ضاهرة ديال تحريف بعض لأصوات كاينة ف لوغات لأمازيغية ديال وسط وشمال لمغريب و ف دزاير، وحتى ف بزاف ديال لهجات لأطلس لمتوسط، هاد ضاهرة نادرة بزاف بين أمازيغ لأطلس لكبير، وما كايناش مارة عند أمازيغ جبل صاغرو. فلهجات لجنوبية (بحال ديال أيت عطا) كيقدر يكون فيها بعض لختيلاف ف سانطاكس: ف تمازيغت د وسط لمغريب كيتستعمل پريفيكس د ف لجملة لخبرية (متال : هاداك/راه راجل دارݣاز)، لهجات لجنوبة كتستعمل لپريفيكس تيپيك ديال السوسية، لأطلس لكبير وجبل صاغرو، إيݣا (متال، هاداك/راه راجل إيݣا ارݣاز). ولكن كتبقى أغلبية ديال لختيلافات بين لهجات وسط لمغرب ف نطق.

من لمجموعات لي كتهدر ب تمازيغت ديال وسط لمغريب كاين أيت عياش، أيت مرغي، أيت يوب، مرموشا، أيت يوسي، أيت مݣيلد، زيان، زمور، أيت رباع، أيت سري، ݣروان، أيت سݣوݣو، أيت يافلمان، أيت سيخمان، أيت نضير.

لحد شرقي ديال لمنطقة لي كيهدرو فيها ناس بتمازيغت د وسط لمغريب ما محددش مزيان. لهجات ديال أيت سغروشن وأيت واراين كيتكلاصاو عموما ف لهجات وسط لمغريب، وكيتقال بلي لهجة د أيت سغروشن مفهومة لجيرانهم أيت

عياش. ولكن، جينيا، أيت سغروشن كينتميو للفرع زناتي ديال لوغات الأمازيغية شمالية، وماشي للفرع لأطلسي بحال باقي لهجات د وسط لمغريب. دكشي علاش بعض لمصادر ما كتجمعهومش مع لأمازيغية ديال وسط لمغريب.

تاريخ

لأمازيغ كيعيشو ف شمال إفريقيا ما بين مصر ولموحيط لأطلسي من قبل ما يبدا تاريخ ديال لمنطقة كيتسجل هادي 33 قرن. ف لقرن لخامس قبل لميلاد، مدينة قرطاج لي أسسوها لفينيقيين كانت متحكمة ف أغلبية لمناطق ديال شمال إفريقيا. ومن بعد لحروب لبونيقية، ولات ف بلاصتها روما هي لي متحكمة. لمنطقة ديال وسط لأطلس بقات مستقلة على طول لحقبة لكلاسيكية، ولكن مرة مرة بعض لكلمات ف تمازيغت ديال وسط لمغريب، بحال أيوݣو (تور ديال لحرت)، لي جاية من لاتينية iugum إيوݣوم (مجموعة ديال تيران)، و أزاليم (لبصلة) من لبونيقية Bsal-im بصال-إم، كتبين بلي كان كونطاكط بين أمازيغ وسط لأطلس وهاد شعوب لي كانت مستعمرة شمال إفريقيا.

خريطة ديال دولة لمرابطية ف عز نفود ديالها، ف جوايه 1120. كانت كتغطي لأغلبية د شمال إفريقيا وجنوب إيبيريا.

لعرب ستولاو على لأرض لي فيها لمغريب ودزاير حاليا ف لقرن سابع، وهاجر عدد منهم للمنطقة ودخلو لأمازيغ للإسلام. وخصوصا مورا ما جاو بنو هلال للأرض لي فيها تونس حاليا ف لقرن 11، بدات كتنتاشر لعربية ف شمال إفريقيا كتر. واخا هاكاك، ناس ف لأطلس لمتوسط بقاو كيهدرو بالأمازيغية، بحالهم بحال ناس لمناطق لي فيها جبال ف شمال إفريقيا.

بين لقرن 12 و 15، كان وسط لأطلس بحال باقي لبلايص ف لمغريب تابع للحكم ديال سلالات لأمازيغية ديال لمرابطين، لموحدين ولمرينيين. ومن لقرن 17 لدابا، لمنطقة تابعة لحكم لعلويين. ولكن، لحد لقرن 20 كانت سيطرة على لمنطقة محدودة وكانو أغلب جوايه ديالها ف بلاد سيبة، يعني كيعتارفو ماليها بالحكم لملكي ولكن ما كاين حتى خضوع سياسي ليه. ف لقرن 16، رجعات تمازيغت لمنطقة تافيلالت لي كانت معربة، وكان رجوعها على يد أيت عطا لي مدو سيطرة ديالهم ف لمنطقة، و خلاو قبايل خرين يجتمعو ف تحالف ديال أيت يافلمان باش يدافعو على راسهم.

ف 1912، معاهدة فاس ردات لمغريب تحت لحماية د فرانسا و صبانيا، لي بداو يحتلو لبلاد عسكريا. خلات لمعاهدة لعرش لعلوي ف بلاصتو، ولكن لفرانساويين بداو يدخلو بعسكرهم لمناطق لأطلس. واخا هاكاك لمقاومة ديال لقبايل لأمازيغية فيه كانت صعيبة بزاف، لي عكسات وبلوكات دخول د لفرنساويين حتى ل 1933 ف بعض لبلايص، بحال ف مناطق أيت عطا.

مورا ليستيقلال ديال لمغريب ف 1956، طغات بزاف نعرة لعروبية فلبلاد، ونضام تعليمي لي بدا يتبنا كلو معرب، ولوغات لأمازيغية، لي منهم تمازيغت ديال لأطلس، كانت مقصية منو مرة. ولكن، ف 1994، مورا ما بداو لمطاليب ديال لأمازيغ باش يتعتارف بيهم كتكبر، قررات لحكومة تبدا تعلم لأمازيغية ف لمدرسات، وطلقات برامج ف تلفازا بلوغات لأمازيغية، لي منها تمازيغت ديال لأطلس.

توزيع لجوغرافي

نسبة ديال لي كيهدرو ب تمازيغت ديال وسط لمغريب على حساب إحصاء 2004

تمازيغت ديال وسط لأطلس وحدة من لوغات لأمازيغية ربعة لي منتاشرةبزاف (تلاتة لاخرين هما ريفية، سوسية ولقبايلية)، وكتنافس سوسية على شكون أكتر وحدة متداولة ف لمغريب. تمازيغت ديال وسط لأطلس كيهدرو بها ناس ف لأطلس لمتوسط كامل ونواحي ديالو، من تازة ف شرق لحتى لمناطق ف جهة رباط سلا قنيطرة ف لغرب. و كيتهدر بها حتى ف وسط وشرق لأطلس لكبير. يعني لبلايص فين منتاشرة متنوعة بزاف إيكولوجيا، من جبال وغابات لأطلس لمتوسط، لواحات تافيلالت ف شمال غرب الصحرا.

لأمازيغية ف لمغريب مقسمة على تلاتة ديال لجيهات : ريفية ف شمال، تمازيغت ديال وسط لمغريب ف لوسط، وسوسية ف لجنوب/لجنوب لغربي. تمازيغت ديال وسط لمغريب مفهومة شوية لريافة، ولأمازيغ ديال وسط لمغريب يقدرو يفهمو شوية ريفية، ولكن كيفهمو سوسية حسن. دكشي علاش تمازيغت ديال وسط لمغريب قنطرة لغوية بين ريفية وسوسية، لي ما كاينش بيناتهم فهم متبادل.

لوضع رسمي

تمازيغت ديال وسط لمغريب، بحالها بحال باقي لوغات لأمازيغية، عندها وضع صوصيولوغوي هابط، واستعمالها منحصر خصوصا ف الدار، ونادر بزاف ف شي حاجة رسمية. كاين إنتاج لراديو وتلفازا بها، و موسيقى حتى هي، وكاينة سياسة ديال تدريس ديالها.

ما بين أمازيغ وسط لمغريب، 40 ل 45% كيهدرو غير بيها، ولباقي كيهدرو حتى بالدارجة كلوغة تانية. ناس لي كيهدرو غير بيها أغلبيتهم شراف، ولا دراري صغار. لعيالات لي لأغلبية كيهدرو بها بوحدها، حيت هما ليا كيبقاو ف دواور و ف جبال، و رجالهم لي كيمشيو يخدمو ولا يتسوقو ف لمدينة. مدام تمازيغت كتستعمل بزاف ف دار، لبنات كيكبرو كيهدرو بيها و كيدوزوها لولادهم من بعد، و بهاد طريقة كيحافضو عليها. لأمازيغ لي بيلانݣ، تعلمو دارجة من لمدرسة، ولا حيت هاجرو لمدينة، ولا من تلفازا و راديو، ولا من لإدارة ما كتعاملش بتمازيغت. لكن لأغلبية ديال دراري صغار ف لمناطق لقروية كيهدرو غير بتمازيغت، وفاش كيمشيو للمدرسة كيعانيو بزاف من تمييز، خصوصا فاش لؤستاد ما كيهدرش بتمازيغت، وخصوصا ف لمدرسة كيخصهم يتعلمو دارجة، ولعربية لفصحى ولفرونسي.

لمناطق لقروية ف لمغريب، ومنها وسط لأطلس، فيها بزاف ديال لفقر. تمازيغت ديال وسط لمغريب، بحال سوسية، كينقص ستيعمالها، حيت لعائيلات لأمازيغية كتهاجر للمدينة لأسباب اقتصادية وما كيبقاوش يستعملو لأمازيغية. هدشي لاش بزاف ديال لمتقفين كيحدرو من لخطر ديال تراجع ديالها. ولكن، لأمازيغ ديال وسط لمغريب كيهاجرو لمناطق ديالهم قل من غيرهم، على حساب دراسات. ومن لفوق، كاين خزان ديموغرافي مهم ديال ناس لي كيهدرو بها لي كيخليها ماشي مهددة بلينقراض ݣاع، واخا لأمازيغ ديال وسط لمغريب كيولدو قل من باقي لمغاربة عموما.

ترسيم

على حساب دستور لي تصوت عليه ف 2011 ف لمغريب، لأمازيغية لوغة رسمية مع لعربية. ف 1994، قال لحسن التاني بللي لهجات لأمازيغية غادي يولي عندها وضع رسمي؛ تلفازا بدات كتدوز برامج بللهجات ب تلاتة (تمازيغت ديال وسط لمغريب، ريفية، و سوسية) تلاتة د لمرات ف نهار؛ وبداو كيطورو كتوبة للتدريس ديالها. ف 17 ؤكتوبر 2001 وقع لماليك محمد ساديس ضهير 1 01 299 لي حدت و نضم بيه لمعهد لملكي للتقافة لأمازيغية، ليركام. هاد لمعهد مسيرو مجلس فيه خبراء، فنانين و ناشطين أمازيغ كلهم كيعينهوم لماليك. لمعهد لي لمقر ديالو ف رباط، لعب دور مهم باش تقنن وترسم لكتابة ديال تيفيناغ. لمعهد ما كيخدمش باش يعوض للهجات ديال تمازيغت بلوغة أمازيغية موحدة. ولكن لمعيرة كتحافض على لخصوصية ديال لهجات بتلاتة، وغير كتعوض لمصطلحات لي موخودة من لعربية ولا لفرونسي بمصطلحات أمازيغية، وكتزيد لمصطلحات لي هما ناقصين. متلا ف لمعجم رسمي ديال لمعهد، لكلمة ديال بلاد كترجم تامازيرت، لي هو لمصطلح لي متداول ف سوس لأطلس، وتامورت، لي هو لمصطلح لمتداول ف ريف.

لكتابة

كلمة تمازيغت بتيفيناغ

لحد لقرن 20، تمازيغت ديال وسط لمغريب ما كانتش مكتوبة وغير لوغة شفوية، ماشي بحال سوسية لي كاين كتوبة ديالها قدام، واخا حتى ف لحالة ديال تمازيغت ديال وسط لمغريب كاين شي كتوبة قلال بزاف و ب لحرف لعربي. يعني حتافضو ناسها عليها بالهدرة ف لمناطق لقروية خصوصا لي معزولة على لمراكز لحضرية. لمتقفين ديال لأطلس لمتوسط، بحال غيرهم ف شمال إفريقيا، كانو كيفضلو يكتبو بالعربية، ولا لفرونسي، حيت كينضرو ليهم كلوغات راقية مقارنة بتمازيغت.

حاليا كاين تلاتة ديال طرق باش كتكتب لوغات لأمازيغية : تيفيناغ، لحرف لاتيني و لحرف لعربي. ليختيار كيكون عموما مرتابط بالخلفية سياسية و/ولا لفكرية ديال لي كيكتب. ولكن ف لمغريب لكتابة ب بتيفيناغ هي لي رسمية ولكتابات رسمية كتكون بلوغة معيارية و ماشي بلهجة ف حد داتها. واخا هاكاك، كاين كتب مهمة على تمازيغت ديال وسط لمغريب بالحرف لاتيني، بحال ديكسيونير ديال طايفي (1991).

فونولوجيا

لحروف ساكنة

لحروف ساكنة مع أمتلة

صوت	متال	لمعنى	صوت	متال	لمعنى	صوت	متال	لمعنى
/m/	'?ⵎⴰ' / 'ما؟'	'شنو؟'	/n/	'ⵉⵏⵉ!' / 'إيني!'	'قول!'	/b/	'ⴱⴰⴱ' / 'باب'	'مول'
/t/	'ⵉⵙⴰⵍⵜ' / 'إيسالت'	'سقصاه'	/d/	'ⴷⴰⵀⴰ' / 'داها'	'هنا'	/tˤ/	'ⵜⴰⵎⵟⵟⵓⵟ' / 'ثمطوط'	'مرا'
/dˤ/	'ⴰⴹⴰⵕ' / 'أضار'	'رْجل'	/k/	'ⴽⵙ' / 'كس'	'رعى (لغنم)'	{{/g/	'ⵉⴳⴰ' / 'إيݣا'	'دار، عمل (شي حاجة)'
/xʷ/	'ⴽⵯⵓⵍ' / 'كول'	'كولشي'	/ɣʷ/			/q/	'ⵉⵇⴰⵕⵉⴹⵏ' / 'إيقاريضن'	'لفلوس'
/qʷ/	'ⵉⵇⵯⵎⵕ' / 'إيقمر'	'لعب لقمر/قمّر'	/f/	'ⴼⴰ' / 'فا'	'تفوه'	7s/	'ⵙⵉⵡⵍ' / 'سيول'	'هدر'
/z/	'ⴰⵥⴰⵢⵢⵉ' / 'أزايي'	'زاياني (من قبيلة زايان)'	/sˤ/	'ⴰⵚⵎⵎⵉⴹ' / 'أصمّيد'	'لبرد'	/zˤ/	'ⵥⴹ' / 'زض'	'نسج'
/ʃ/	'ⴰⵛⴰⵍ' / 'أشال'	'لأرض'	/ʒ/	'ⵕⴰⵄⴰ' / 'راعا'	'قلب' / 'شوف'	/χ/	'ⴰⵅⴰⵜⴰⵔ' / 'أخاثار'	'كبير'
/ʁ/	'ⵖⴰⵍ' / 'غال'	'فكر / جاب ليه لله'	/χʷ/	'ⴰⵅⵎⵎⴰⵙ'/'أخمّاس'	'خمّاس'	/ʁʷ/	'ⴰⵖⵣⵣⴰⴼ' / 'أغزاف'	'طويل'
/ħ/	'ⵃⴰⴷⵣ' / 'حادز'	'قرّب'	/ʕ/	'ⴰⵄⴷⴰⵡ' / 'أعداو'	'عدو'	/h/	'ⵀⴰ' / 'ها'	'ها (فلان / شي حاجة)'
/j/	'ⴰⵢⵓⵔ' / 'أيور'	'قمر'	/w/	'ⵡⴰⵅⵅⴰ' / 'واخّا'	'واخّا'	/l/	'ⴰⵎⵍⵍⴰⵍ' / 'أملّال'	'بيْض'
/lˤ/	'ⵍⴰⵥ' / 'لاز'	'جوع'	/r/	'ⴰⵡⵔⴰ' / 'أورا'	'أجي'	/rˤ/	'ⴰⵏⵥⴰⵕ' / 'أنزار'	'شتا'

عيون لكلام

تقدر تزيد شوف لڤيرسيون تّجريبية ديال tzm ف مؤسسة ويكيميديا.

تقدر تزيد شوف بزاف د تّصاور و لمعلومات ديال Central Atlas Tamazight ف ويكيميديا كومنز.