تاقبايليت

تاقبايليت
النوع	لغة طبيعية و لغة حية
تخدام
اللي كبرو بيها	5,586,000 (2012)
كايتهضر بيها ف	جزاير
أصلية ف	ولاية بجاية، ولاية البويرة، ولاية تيزي وزو، ولاية الجزائر، ولاية جيجل، ولاية سطيف، ولاية المدية، ولاية برج بوعريريج، ولاية بومرداس و ولاية ميلة
لخصائيص
لكتبة	ألفبائية لاتينية
لوضعية داللوغة	5 كاتطور
لفاميلة داللوغات
لوغة د بنادم لوغات أفرو-أسيوية لوغات أمازيغية لوغات أمازيغية دالشمال
لخاريطة
لكواض لي كايعرّفو اللوغة
إيزو 639-2	kab
إيزو 639-3	kab
ڭلوطولوڭ	kaby1243
إيطنولوڭ	kab

تاقبايليت أولّا لقبايلية هي وحدة من اللوغات لأمازيغية دالشمال كايهضرو بيها لقبايل فالشمال والشمال الشرقي ديال الدزاير. كايهضرو بيها الناس فلمنطاقة ديال لقبايل فالشرق ديال لجزائر لعاصمة وفيها نيت، وفبلايص خرين حدا لبليدة، بحال بني صلاح وبني بويعقوب. التقديرات ديال شحال كايهضرو بهاد اللسان شادّة مابين 5 حتال 7 دلمليون دلبشري فلعالم، لغالبية ديالهوم فالدزاير، على حساب لمعهد داللوغات والتقافات دالشرق فباريز.

التصنيف

لقبايلية هي وحدة من اللوغات لأمازيغية اللي كاينة فالشمال. هاد اللوغة تفرقات بكري بزاف على اللوغة لأمازيغية لبديانية، ولاكين سبقاتها فهاد الشي تاضونݣيت.

أمتيلة دلهضرة

• واحد كايهضر بتاقبايليت فالدزاير.
• وحدة كايهضر بلقبايلية فلميريكان.

لينتيشار

لقبايلية هي لوغة أصلية فلمينطاقة دلقبايل وكاينة فسبعة ديال لويلايات فالدزاير.

تقريبا التلت ديال الدزايرين ناطقين ناشطين بوحدة من اللوغات لأمازيغية، لأغلبية ديالهوم قريبة للجزائر لعاصمة، وكايهضرو بتاقبايليت وتاشاويت، معا شي مجتمعات فلغرب والشرق ولجانوب ديال لبلاد. لقبايل هوما أكبر ݣروپ كايهضر بشي لوغة أمازيغية فالدزاير، ولاكين مكايشكّلوش أغلبية.

لغالبية ديال السكان فلويلايات دبجاية، لبويرة وتيزي وزو كايهضرو بلقبايلية. هاد اللوغة كاينة بشكل رئيسي فلويلايات دبومرداس وبرج بوعريرج وجيجل ولجزائر لعاصمة اللي فيها حتى الدارجة الدزايرية.

هاد اللوغة كايهضرو بيها الناس اللي تزادو برا لقبايل من لأصول الدزايرية لقبايلية وهي عندهوم لوغة أم فلمدون دأوروپا وأمريكا الشمالية (كتير شي ففرانسا). كاينة تقديرات كاتݣول باللي النص ديال الناس دلقبايل عايشين برّا هاد لمينطاقة لجغرافية.

لوضع الرسمي

•  مقالة متعمقة: لأمازيغية لمعيارية الدزايرية

من مورا لحتيجاجات لكبار ديال 2001-2002 اللي تعرفو بالربيع لكحل، الدستور الدزايري د2002 عتارف بلأمازيغية (بݣاع اللوغات ولمتغيرات ديالها) كلوغة وطنية ولاكين ماشي رسمية حتال 2016 من مورة حملة داروها نشطاء. لعربية مازالة بلحكم دلقانون اللوغة الرسمية ديال لبلاد. لفرانساوية مامعتارفش بيها فحتى شي وتيقة دلقانون، ولاكين هي بلحكم دلواقيع لوغة رسمية حيتاش خدامين بيها فݣاع ليدارات ولمؤسسات، وفݣاع لقطاعات ديال لحوكومة، بعض لمرات كتر من لعربية فالدزاير.

لأمازيغية فالدزاير ماعندهاش مناخ ملايم فاش تستعمل واخّا كاينة إداعة (لإداعة التانية اللي كاينة من لعهد ديال حرب الدزاير) وتلفازة (لقناة الرابعة أولّا قناة تمازيغت). لملكية ديال لقنوات لخاصة فالدزاير ممنوع، داكشي لاش لقبايل دارو قناة ديالهوم ففرانسا سميتها Berbère Television.

ف1994 التلامد ديال لقبايل قاطعو الديراسة عام كامل حيتاش طالبو باش تدخل لأمازيغية فلمقررات ديال لمدراسة، وبهاد الشي تدارت هيئة رمزية ديال لأمازيغية (HCA) ف1995. لأمازيغية ولّات كاتقرا فلمدارس ديال لبلايص فين كايهضرو بيها واخّا ماشي بزّز، الشي اللي خلّا لحضور ليها يكون قليل.

الرايس دلبلاد فديك الساع عبد العزيز بوتفليقة كان مرة مرة كايݣول باللي لأمازيغية "عمرها ماغاتكون لوغة رسمية، وإلا غاتكون لوغة وطنية خاص يدوز هادشي فليستيفتا". ف2005 ݣال بوتفليقة باللي "ماكايناش شي دولة عندها جوج لوغات رسميين (وهادشي ماشي بالصح، حيتاش كانادا فيها لفرانساوية والنݣليزية وبلاد مالطا فيها لمالطية والنݣليزية لوغات رسميين)، وهادشي عمرو غايكون لحال فالدزاير." واخّا هكاك، من مورا ربعين عام ديال النضال لمسالم وليحتيجاجات وليضرابات والتعبية الشعبية، اللي مابينهوم الربيع لأمازيغي (ليحتيجاجات وليضرابات فتيزي وزو، لبويرة، بجاية والدزاير لعاصمة ف1980) والربيع لكحل ف2001، الرايس بوتفليقة ولحوكومة ديالو تراجعو على لقرار وستاسلمو للضغط ديال لقبايل وعتارفو بلأمازيغية كلوغة وطنية بلا ستيفتاء.

اللهجات

التوزيع لجغرافي ديال اللهجات دتاقبايليت. EOR كاتعني الشرقية لبعيدة، OR كاتعني الشرقية، OC كاتعني لغربية وEOC كاتعني لغربية لبعيدة.

كاينين جوج ديال اللهجات: لقبايلية لكبيرة (فلغرب) ولقبايلية الصغيرة (فالشرق)، ولاكين لواقيع معقّد كتر من هكّا، اللهجات فتاقبايليت كايشكلو سنسلة ديال اللهجات اللي يقدر يتقسم لربعة ديال اللهجات رئيسين (من لغرب للشرق):

• لغربية لبعيدة: فتيزي غنّيف، بغني ودراع لميزان.
• لغربية: ف آت مَنݣْلّات، آت يراتَن، آت عيسي وآت يانّي.
• الشرقية:
  • الشرقية دلغرب: ف آت مليكش.
  • الشرقية دلوسط: آت عيدل، آت خيار
  • الشرقية دالشرق: آت سليمان
• الشرقية لبعيدة: أوقاس، ملبو وآت سماعيل. كاتسمّى حتى "تاساحليت" وكايعتابروها شي لوغويين بحساب "إتنولوݣ" لوغة بوحدها. لمفاهمة ديال الناس اللي كايهضرو بلغربية معا اللي كايهضرو بالشرقية لبعيدة صعيبة بزاف إلا ماتعتابراتش غايبة أصلا.

لفروقات فالنطق

	لغربية لبعيدة	لغربية	الشرقية		الشرقية لبعيدة
			دلغرب	دالشرق
الشدة ف [w]	[bʷ] مشددة	[bʷ] مشددة	[gʷ] مشددة	[β] مشددة	محافضة عليها
الشريط تاع n+w	[bʷ] مشددة	[bʷ] مشددة	[gʷ] مشددة		محافضة عليها
التشفيه	✓	✓	✓	✗	✗
السريط تاع n+y	[g] مشددة	[g] مشددة	[g] مشددة	[y] مشددة	[y]
[ts] و [dz] لمرقْقين	✓	✓	✓	✗	✗
ḍ (الضاض)	ḍ	ḍ	ḍ	ṭ (الطاء)	ṭ

لفروقات فلقواعد

	لغربية لبعيدة	لغربية	الشرقية		الشرقية لبعيدة
			دلغرب	دالشرق		أوقاس
لمحاصرة دلفيعل بالنون (n)	✓	✓	✗		✗
الضماير دلملكية (ميتال: غايب مفرد مدكار)	-nnes	-is, -ines	-is, -ines		-is
لفيعل لمعاون لماضي ad	ad	ad	ad		ad	di

لفرق مابين لكلمات

ݣاع اللهجات فتاقبايليت كايشتاركو فنفس لكلمات ولمعجم من غير اللهجة الشرقية لبعيدة، واخّا كاينين كلمات فيهوم شوية ديال ليختيلاف، بحال لكلمة د"حلم" فالدارجة، الطرجامة ديالها فاللهجات من الشرق للغرب هي: bargu (بارݣو)، argu (أرݣو)، argu (أرݣو)، bureg (بورَݣ).

النطق

النطايق فلتحت كايبينو كيفاش كاتنطق تاقبايليت.

الصوايت

تاقبايليت عندها تلاتة ديال الصوايت

النطق ديال تاقبايليت

	قدامي	وسطاني	لوراني
مسدود	i		u
محلول		a

لكتبة ⟨e⟩ كاتستعمال باش تمتّل لمصوت لمخفي [ə] اللي كايجي بزاف فلقبايلية. تاريخيا، لعلماء كايعتاقدو باللي هاد الصايت جا من التخليطة ديال تلاتة دالصوايت خرين أولا التحياد ديالهوم فݣاع اللوغات لأمازيغية. التحقاق ديال شي صوايت، خصوصا /a/، راهو متأتر بلخاصيات ديال لحروف اللي ضايرين بيه، متلا لحروف اللي باينين بزاف كايستلزمو لفم يكون محلول كتر فاش الصايت كايتنطق. متال: aẓru (آزرو، حجرة) مقارنة معا amud (أَمود، الزرع). هاد الصوايت /a ،i، وu/ كايبانو كتر وكايولّيو [æ، ɪ، وʊ].

لحروف

		شفايهي		سنايني شفايهي	سنايني		لتايوي		لتايوي غاري		غاري		طبقي		لهايوي		حلقي	قرجوتي
		باين	مشفه		باين	محلقن	باين	محلقن	باين	محلقن	باين	مشفه	باين	مشفه	باين	مشفه
مفجر وموقوف حكاك	ماعندوش صوت				(t [t̪])	ṭ [tˤ]	tt [ts]		č [tʃ]				(k [k])	k [kʷ]	q [q]	q [qʷ]
	عندو صوت	(b [b])	b [bʷ]		(d [d̪])		zz [dz]		ǧ [dʒ]				(g [ɡ])	g [ɡʷ]	(q [ɢ])
حكاك	ماعندوش صوت			f [f]	t [θ]		s [s]	ṣ [sˤ]	c [ʃ]	c [ʃˤ]	k [ç]	k [çᶣ]			x [χ]	x [χʷ]	ḥ [ħ]	h [h]
	عندو صوت	b [β]			d [ð]	ḍ [ðˤ]	z [z]	ẓ [zˤ]	j [ʒ]	j [ʒˤ]	g [ʝ]	g [ʝᶣ]			ɣ [ʁ]	ɣ [ʁʷ]	ɛ [ʕ]
نيايفي		m [m]			n [n]
مكرر					r [r]	ṛ [rˤ]
شبه ساكت					l [l]	l [lˤ]					y [j]			w [w]

الجميع والسريط

فتاقبايليت كاينين بزاف ديال اللهجات واللكنات اللي جايين من الجميع والسريط ديال شي حروف (غاليبا كايتقسمو للقبايلية الشرقية ولقبايلية لغربية). شي خاصيات من هاد الجميع والسريط كاينين فاللهجات كاملين، أما خاصيات خرين كاينين غير فلبعض ديال هاد اللهجات. هاد لخاصيات ديال الجميع والسريط ماكايبانوش فلكتبة:

• Axxam n wergaz (أخّام ن وَرݣاز، الدار تاع الراجل) كاتنطق إما axxam n wergaz (أخّام ن وَرݣاز)، axxam bb wergaz (أخّام ب وَرݣاز) أولا axxam pp wergaz (أخّام پ وَرݣاز) (N+W=BB).
• D taqcict (د تاقشيشْت، هادي بنت) كاتنطق tsaqcict (تْساقْشيشْت) (D+T=TS)
• كاينين وحدين خرين، بحال D/T+T=TS، N+W=BB/PP، أولّا I+Y=IG.

التشديد كايأتر على النطق ديال شي حروف: كايشد شباه حروف لعلة ولحروف لحكاكة وكيرجّعها لحروف مفجرة. بشكل خاص حرف لغين ɣ لمشدد كايرجع قاف بالشدة qq، وليا مشددة y كاترجع لݣا بالشدةgg، ولواو w لمشدد كايرجع حرف لبا مشدد bb.

لحروف لمفجرة ولحروف لحكاكة

تاقبايليت هي لوغة عامرة بلحروف لحكاكة اللي هي فلوغات أمازيغية خرين حروف مفجرة، ولاكين فلكتبة ماكاينش تمييز مابين هاد الجوج. هاد لجدوال كايعطي ليستة ديال لحروف لحكاكة ولحروف لمفجرة وإيمتا كايتنطقو (ملاحضة: الشدة كاترجع لحروف لحكاكة لحروف مفجرة):

لحرف	B ولا /β/	D ولا /ð/	G ولا /ʝ/	K ولا /ç/	T ولا /θ/
حكاك	β	ð	ʝ	ç	θ
مفجر	b	[d̪]	ɡ	k	[t̪]
كاين مفجّر مورا	m	l,n	b,j,r,z,ɛ	f,b,s,l,r,n,ḥ,c,ɛ	l,n
كاين مفجر فلكلمات (ولمشتقات اللي جاية منها)			ngeb, ngeḥ, ngeẓwer, angaẓ, ngedwi, nages, ngedwal

لقواعد

السميات

تاقبايليت عندها جوج ديال لجناس، لمدكار ولمؤنات. بحال ݣاع اللوغات لأمازيغية، السميات لمدكرة كاتبدا بواحد من هاد الصوايت (a-, i-, u-) (أَ-، إِ-، أُ-)، أما السميات لمؤنتة كاتبدا عامة ب -t (ت-) وكاتسالي ب t- (-ت). متال: aqcic (أَقْشيش، ولد) أولّا taqcict (تَقْشيشْت، بنت). لمجموع كايجي غالبا بالتبدال ديال -a (أَ-) دلبدية واللي كاتولي -i (إِ-)، وإما الزيادة ديال en- (- ـــَـن) فاللخر (لجمع السالم) أولّا التبدال ديال الصوايت وسط لكلمة (لجمع دالتكسير)، أولا بجوج. متال:

• argaz (أَرْݣاز) ⇐ irgazen (إِرْݣازَن) (رجال)
• adrar (أدْرار) ⇐ idurar (إِدورار) (جبولة)
• afus (أَفوس) ⇐ ifassen (إِفاسَّن) (يدين)

بحال ݣاع اللوغات لأمازيغية، تاقبايليت عندها جوج دلحالات فلأسماء: لحالة لمنفاصة ولحالة تاع لمضاف. لكلمة فلحالة لمنفاصلة ماكايطرا ليها والو فالشكل تاعها. لحالة تاع لمضاف كاتجي ملّي كايتبدّل /-a/ (أَ-) وكايولّي /-u/ (أُ-)، لخسارة ديال الصايت اللول فشي كلمات مأنتين، الزيادة ديال واحد من حروف لعلّة فاللول، وفبعض لحالات ماكايطرا حتى شي تغيير. متال:

• adrar (أدرار) ⇐ wedrar (وْدْرار)، جبل
• tamdint (تَمْدينْت) ⇐ temdint (تامْدينْت)، مدينة
• tamurt (تامورْت) ⇐ tmurt (تْمورْت)، بلاد
• asif (أَسيف) ⇐ wasif (واسيف)، واد
• iles (إِلَس)⇐ yiles (يِيلَس)، لسان
• taddart (تَدّارت) ⇐ taddart (تَدّارت)، ڤيلاج

لحالة ديال لمضاف كاتكون، بحال اللي فتمازيغت وسط لمغريب، غير فلفاعل اللي كايجي من مورا لفيعل، مورا حروف لجر، لمفاعيل، ومورا شي نوامر. السميات فتاقبايليت تقدر تكون فلحالة لمضافة إلا سبقو واحد لجملة إسمية فيها ضمير رجّاع فاللول. متال:

• لحالة لعادية: Yewwet aqcic (يَوَّت أَقشيش، هو ضرَب الدرّي) (فيعل - مفعول بيه)
• لحالة دلمضاف: Yewwet weqcic (يَوَّت وَقشيش، الدري ضْرَب) (فيعل - فاعيل)

من غير من مورا لحروف دلجر تاع "ar" (آر) و"s" (سْ)، ݣاع السميات كاياخدو لحالة دلمضاف، متال:

• لحالة لعادية: Aman (أَمان، لما)
• لحالة دلمضاف: Kas n waman (كاس ن وامان، كاس تاع لما).

لفعال

لفعال فلقبايلية كايتصرفو لتلاتة دلوقات: لماضي لعادي، لماضي لمجهد (ديال لماضي لبعيد) ولمستقبل (ad + لماضي). نادرا ماكايتستعمل لماضي بوحدو فتاقبايليت (على لعكس ديال اللوغات لأمازيغية لخرة اللي كاتعبّر بيه على لحاضر).

"لفعال الضعاف" عندهوم لفورمة تاع لماضي لعادي كاتشبه للمضارع. لأمتيلة فلجدوال كاتعطي التحويل للمتكلم لواحد.

لفعل	لماضي لعادي	Ad + لماضي (لمستقبل)	لماضي لمجهد (لماضي لبعيد)
If (إف، غلب)	ifeɣ (إفَغ)	ad ifeɣ (أدْ إفَغ)	ttifeɣ (تِّيفَغ)
Muqel (موقَل، شوف)	muqleɣ (موقَلْغ)	ad muqleɣ (أدْ موقَلْغ)	ttmuquleɣ (تّموقولْغ)
Krez (كْرَز، حرت)	kerzeɣ (كَرزَغ)	ad kerzeɣ (أدْ كَرزَغ)	kerrzeɣ (كَرّْزَغ)

• "لفعال لقاصحين" أولّا "لفعال الشادّين":

لفعل	لماضي لعادي	Ad + لماضي (لمستقبل)	لماضي لمجهد (لماضي لبعيد)
Aru (آرو، كتب)	uriɣ (أوريغ)	ad aruɣ (أدْ أَروغ)	ttaruɣ (تّاروغ)

الضماير لمتصلة ديال تاقبايليت

الشخص		واحد	مجموع
لمتكلم		ɣ-... (...-غ)	...-n (نـ-...)
لمخاطب	مدكار	t-... -ḍ (تـ-...-ض)	t-... -m (تـ-...-م)
	مؤنات		t-... -mt (تـ-...-مْت)
لغايب	مدكار	...-i/y (إِ/يْ-...)	n-... (...-ن)
	مؤنات	...-t (تـ-...)	nt-... (...-نْت)

لفعال كاتصرّف للشخوص بالزيادة دبال لحروف. هاد لحروف داللخر هوما بحال بحال فݣاع لوقات (غير لمعنى اللي كايتبدل). لحرف لفاصل e يقدر يتزاد مابين لحرف دالزيادة لقبلاني ولفيعل. لفعال ديما كاينة على لفاعيل ديالها ويقدر تعكس الشخص ديال لمفعول بيه اللول والتاني. متال:

• Yuɣ-it (يوغ-يت، شْراه) (هو.شرا.ه)
• Yenna-yas (يِنّا-ياس، ݣال ليه) (هو.ݣال.ل.ليه)
• Yefka-yas-t (يَفْكا-ياسْ-ت، عطاه ليه) (هو.عطا-ل.ليه-ه)

تاقبايليت لوغة فيها لفعال دلحركة غادين بلحروف دالزيادة. جوج ديال لحروف كايورّيو فين غادة لحركة:

• d (د) كاتدي جيهة لمتكلم، وتقدر تطرجم ب"هنا"
• n (ن) كاتدي جيهة لمخاطب، وتقدر تطرجم ب"لهيه".

متال:

• iruḥ-d (إِروحْ-د، جا لهنا)، iruḥ-n (إروحْ-ن، مشا لهيه).
• awi-d aman (أَوي-د أمان، جيب لما لهنا)، awi-n aman (أوي-ن أمان، دّي لما لهيه).

لقبايلية فيها جوج طروفا باش تدير النفي، لحرف ur (أور) اللي كاتزاد للول ديال لفيعل، ووحدة أولا بزاف ديال لحروف دلزيادة اللي كايبدّلو لفيعل أولّا واحد من لحجج ديالو. متلا، النفي الساهل دلفيعل كايتدار بالزيادة ديال ur (أور) قبل لفيعل، ومن بعد لفيعل كاتزاد ara (أرا). متال:

• Urareɣ (أورارَغ، لْعْبْتْ) ⇐ Ur urareɣ ara (أور أورارَغ أرا، مَالْعَبْتْش)

لكلمات دالنفي لاخرين (متال: acemma (أشَمّا)، ...) كايتستعملو معا ara (أرا) باش يتعبر على أنواع معقدين ديال النفي.

لشتيقاق ديال لفعال كايدّار بالزيادة ديال لحروف. كاينين تلاتة ديال لنواع دلشتيقاق: التسباب، لينعيكاس ولمبني للمجهول.

• التسباب: كايجي بالزيادة ديال -s (س-) أولا -sse (سّ-) أولّا ssu- (سُّو-) فاللول ديال لفيعل:

ffeɣ (فّغ، خْرْجْ) ⇐ ssuffeɣ (سُّوفَغ، خْرّْجْ).

kcem (كْشَم، دْخَل) ⇐ ssekcem (سّكْشَم، دْخَّل).

irid (إيريد، يتغسَل) ⇐ ssired (سّيرَد، غْسْل).

• لينعيكاس: كايجي بالزيادة ديال -m (مـ-) أولّا -my(e) (مي"ــَـ"-) أولّا -myu (ميو-) فاللول ديال لفيعل:

ẓer (زَرْ، شاف) ⇐ mẓer (مْزَر، يشوف واحد لاخر).

ṭṭef (طَّف، شدّ) ⇐ myuṭṭaf (ميوطَّف، شدّ واحد لاخر).

• لمبني للمجهول: كايجي بالزيادة ديال -ttu أولّا -ttwa أولّا -tt أولّا -mm(e) أولّا -n أولّا -nn فاللول ديال لفيعل:

krez (كرَز، حرت) ⇐ ttwakrez (تّواكْرَز، تّْحْرْتْ).

ečč (أَتْش، كول) ⇐ mmečč (مَّتْش، تكال).

• شكال معقدين: كاتجي بالتخليطة ديال جوج ولّا كتر من دوك لحروف دالزيادة:

enɣ (أَنْغ، قتل) ⇐ mmenɣ (مَّنْغ، قتل واحد لاخر) ⇐ smenɣ (سمَنْغ، يدير السبة باش واحد يقتل لاخر)

جوج من هاد لحروف دالزيادة يقدّو يلغيو بعضيّاتهوم:

enz (أَنْز، يتباع) ⇐ zzenz (زَّنْز، بيع) ⇐ ttuzenz (تّوزَّنْز، يتباع). النتيجة: ttuzenz = enz!! (تّوزَّنْز = أَنْز).

ݣاع لفعال فتاقبايليت عندهوم سمية لفاعل، وكايتخرّج بالزيادة ديال -am (أَمـْ-) ولّا -an (أَنـْ-) (إلا كان لفيعل بادي بلحروف دلبا ولفا ولميم ولواو) فاللول ديال لفيعل. (كاينين ستيتناءات بطبيعة لحال). متال:

ṭṭef (طَّفْ، شدّ) ⇐ anaṭṭaf (أَنَطّاف، مالك -ديال شي حاجة-).

inig (إِنيݣ، سافر) ⇐ iminig (إِمينيݣ، مسافر).

eks (أَكْسْ، كْسْب) ⇐ ameksa (أَمَكْسا، كسّاب).

فلقبايلية لفعال كايجيو بشكل مختالف على حساب الجدور دلفعال. غاليبا هاد لفعال كايجي قبل منهوم لحروف دالزيادة -a (أَ-) أولّا -t(u) (ت(و)-). متال:

ffer (فَّر، تخبّى) ⇐ tuffra (توفّرا، تخَبية) «Tuffra n tidett ur telhi» (توفّرا ن تيدَتّ أور تَحلي، التخبية دلحقيقة خايب).

ɣeẓẓ (يَزّ، عَض) ⇐ aɣẓaẓ (أَغْزاز، لعضّان)

zdi (زدي، جمَع) ⇐ azday (أزْداي، التجماع)

ini (إِني، ݣال) " ⇐ timenna (تيمَنّا، لمݣال)

الضماير

الضماير إمّا كاتبقى منفاصلة أولّا كاتزدا مع لفعال والسميات. متال: Ula d nekk (أولا د نَكّ، حتّا أنا)

الشخص	مفراد	مجموع
متكلم مدكار	nekk / nekkini (نَكّ / نَكّيني، أنا)	nekni (نَكْني، حنا دالرجال)
متكلّم مؤنات	nekk / nekkini (نَك / نَكّيني، أنا)	nekkenti (نَكَّنْتي، حنا دلعيالات)
مخاطب مدكار	kečč / kečči / keččini (كَتْش / كَتْشي / كَتْشيني، نتا)	kunwi / kenwi (كُنْوي / كَنْوي، نتوما دالرجال)
مخاطب مؤنات	kemm / kemmi / kemmini (كَم / كَمّي / كَمِّيني، نتي)	kunnemti / kennemti (كُنَّمْتي / كَنَّمْتي، نتوما دلعيالات)
غايب مدكار	netta / nettan / nettani (نَتّا / نَتّان / نَتّاني، هو)	nutni / nitni (نُتْني / نِتْني، هوما دالرجال)
غايب مؤنات	nettat (نَتّات، هي)	nutenti / nitenti (نُتَنْتي / نِتَنْتي، هوما دالعيالات)

الضماير دلملكية كاتزدا معا السميات اللي كاتشير ليها. متال: Axxam-nneɣ (أَخّام-نَّغ، الدار ديالنا).

الشخص	مفراد	مجموع
متكلم مدكار	(i)w (يوْ) / inu (ينو، ديالي)	nneɣ (نَّغ، ديالنا)
متكلّم مؤنات	w(i) (يوْ) / inu (ينو، ديالي)	nnteɣ (نّْتَغ، ديالنا)
مخاطب مدكار	(i)k (يك) / inek (ينَك، ديالك)	nwen (نْوَن، ديالكوم دالرجال)
مخاطب مؤنات	(i)m (يِمْ) / inem (ينَم، ديالكي)	nkent (نْكَنْت، ديالكوم دلعيالات)
غايب مدكار	(i)s (يِسْ) / ines (يِنَس، ديالو)	nsen (نسَنْ، ديالهوم الرجال)
غايب مؤنات	(i)s (يِسْ) / ines (يِنَس، ديالها)	nsent (نْسَنْت، ديالهوم دلعيالات)

كاينين تلاتة ديال السميات دليشارة: هدا، هادو (لقريب)، هاداك، هادوك (للبعيد) ولغياب ديال ليشارة. يقدر يتزداو معا السميات أولّا يبانو منفاصلين. متال: Axxam-a / Axxam-agi (أخّام-ا / أخّام-اݣي، هاد الدار "الدار-هادي")، Wagi yelha (واݣي يلها، هادا راهو زوين "هادا راه.زوين")

لحروف دلجر ولإضافة

لحروف دلجر ولإضافة كاتسبق لمجرور ولمضاف تاعها: i medden (إِ مَدَّن، للناس)، si taddart (سي تادّارت، من لڤيلاج). ݣاع السميات كاياخدو لحالة دلمضاف فاش كايسبقها شي حرف دلجر ولا تاع لإضافة من غير من مورا "ar" (آر، حتال) و"s" (سْ، لجيهة).

شي حروف عندها جوج شكال: واحد كايدّار معا حروف الزيادة اللي واخدة الدور ديال الضمير، ولاخور كايجي معا أي حاجة خرة.

شي حروف عندها سمية موصولة أولّا أداة ديال الستيفهام، متال:

• i (إِ، حرف لجر ل) ⇐ iwumi (إِوومي، لْمّْن).
• Tefka aksum i wemcic (تَفْكا أَكْسوم إِ وَمْشيش، هي عطات اللحم للمش) ⇐ Amcic iwumi tefka aksum (أمْشيش إِوومي تَفْكا أَكْسوم، لمشّ لمّْن هي عطات اللحم).

التراكيب

لحرف دالنعت d (دْ) هو أداة مايمكنش لواحد يستغنا عليها إلا بغا يهضر بلقبايلية. لمعنى ديال هاد لحرف بالدارجة هو نيت "راه" بݣاع الشكال ديالو. مايمكنش هاد لحرف يتعوض بلفيعل ili (إِيلي، يكون). هاد لحرف ديما كاتبعو سمية فلحالة لعادية (ماشي لمضافة). متال:

• D taqcict (دْ تاقْشيشْت، راها بنت)
• D nekk (دْ نَكّ، راه أنا)
• Nekk d argaz (نَكّ دْ أَرْݣاز، أنا راه راجل)
• Idir d anelmad (إيدير دْ أَنَلْماد، إيدير راهو تلميد)
• Idir yella d anelmad (إيدير يَلّا د أَنَلْماد، إيدير راه كان تلميد)

لحرف دالنعت d (دْ) ماخاصّوش يتخلّط بلحرف دلعطف d (دْ، لواو دلعطف)، حيتاش هاد لحرف دلعطف كاتّبعو سمية فلحالة لمضافة، أمّا لحرف دالنعت كاتبعو سمية فلحالة لعادية. متال:

• Nekk d argaz (نَكّ دْ أَرْݣاز، أنا راه راجل) (d هنايا حرف دالنعت: السمية فلحالة لعادية).
• Nekk d wergaz d weqcic (نَكّ دْ وَرْݣاز دْ وَقْشيش، أنا والراجل والدّري) (d هنايا حرف دلعطف: السمية فلحالة لمضافة).

عيون لكلام

تقدر تزيد شوف بزاف د تّصاور و لمعلومات ديال Kabyle language ف ويكيميديا كومنز.