ويكيپيديا:كيفاش نزيدو كلمات جداد
هاد صفحة محاولة باش نحطو قواعد عامة لّي نقدرو نتبعوها باش نقادو كلمات جداد ف دّاريجة. لحاجة ل كلمات جداد جات من لواقع بلي دّاريجة ل حد سّاعة ماشي لوغة مكتوبة بزاف، يعني منطوقة كتر بزاف منما هيّا مكتوبة، ؤ كاينين كلمات ديال حوايج، كائنات ؤلا مفاهيم لّي معروفة ف مناطق ؤ مامعروفاش ف مناطق خرين، ؤلا كانت ف لقديم ؤ تّنسات، ؤلا ماعمّرها كانت، حيت لإنسان لمغريبي ماكانش محتاج ليها ف لحياة ليومية ديالو، ؤلا حيت يالّاه تّختارعات، بحال سّميات ديال طيكنولوجيا جديدة ؤلا مافاهيم د صّيونص.
ب عتيبار تّاريخ لّي داز منو لمغريب، كنلقاو بلي تّقافة د لمغريب بما فيها دّاريجة عندها روافد مختالفين لّي خدات منهوم سيرتو لكلمات، ؤحتا تّعابير ؤ تّراكيب د لجومال ؤ لأصوات (فونيتيك) ؤ لڭرامير. هاد رّوافد خاصنا نشوفوها كا إغناء ل دّاريجة ؤ ل تّقافة د لمغريب، ؤ لوجود ديالها كيبيّن لقوة ؤ لنفيراد د تّقافة لمغريبية، عكس بعض تّيارات لإيديولوجية لي كتحاول تقصي واحد ؤلا بزاف من هاد رّوافد، ل صالح رّافد لّي كتعتابرو هوّا "لموهيم" ؤلا لوحيد لّي خاصو يبقا. بحال هاد لإقصاء ماغادي غير يفقّر لّوغة ؤ تّقافة لمغريبية، ؤ يحد من لقدرة ديالها باش تطور ؤ تّأقلم معا لمستجدات، ف عالام لّي ماكيحبسش من تّطور.
أهم حاجة خاصها تّوفر ف لكلمة جّديدة، هيّا بلي تكون ساهلة ف لفهامة، يعني ف لحالة لميتالية خاص لمعنى د لكلمة يكون باين ؤلا قريب ل لمغاربة كاملين، ؤلا علّاقل ل فيئة منهوم، غير ب طّاريقة باش تشتقات لكلمة ؤلا لّوغة منين تخادت. خاصها تكون ساهلة ف نّوطق ؤلا يتدرّج نّوطق ديالها ب صيغة مغريبية، يعني ب لأصوات ديال لحروف ديال داريجة. ؤ تالت حاجة هيّا خاص لكلمة تكون لحتيمالية د لقابول ديالها كبيرة، يعني بلي يلا تستعملات ف مقال ف ويكيپيديا ؤ تّقرات بزاف، كاين حتيمال كبير بلي غادي تنتاشر ؤ تدخل ف لستيعمال د لمغاربة. هنا كيدخلو عتيبارات ديال لفهامة ؤ نّوطق، ب لإضافة ل عتيبارات خرين بحال لكونطيكست ديال لستيعمال د لكلمة، تّشابه ديالها معا كلمات خرين، ضّومين د تّخصص ؤ غيرهوم. متلا، ف لانفورماتيك، يقدر يكون حسن يلا تخادو بزاف د لمصطلحات كيما هوما من نّڭليزية، معا تّدريج ديال نّوطق ديالهوم، سيرتو يلا كانو لوغات خرين حتا هوما كيديرو نفس لحاجة.
رّوافد لّوغاوية د دّاريجة
بدلرّوافد لّوغاوية ؤ تّقافية د لهضرة د لمغاربة تبدلو معا مرور زّمان. واحد لوقيتة كانت لبونيقية (لّوغة د قرطاج) كتلعب دور كبير ف لمدون لمغريبية لقديمة بحال وليلي ؤ ليكسوس. مورا داكشي كنلقاو لّاتينية سيطرات علا لمجالات لحضرية ؤ تّقافة د شمال إفريقيا ف لمناطق لّي كونطرولات لإمبراطورية رّومانية. من لبدية د لعصور لوسطانية لعبات لعربية دور كبير حتا هيّا، ؤ دّاريجة كتندارج ف إطار لّوغات ؤلا لّهجات لعربية. لفرانساوية ؤ سّپنيولية كان عندهوم تأتير كبير حتا هوما ف لفترة لحاديتة، ؤ نّڭليزية، ب عتيبارها لوغة عالامية كتدير تأتير ف تّقافة لعالامية ب شكل عام، ؤ ديال لمغريب ب شكل خاص. لأمازيغية هيّا لعامل تّقافي لوحيد لّي كان ف لقديم ؤ باقي مستامر حتال ليوم. نقدرو نڭولو ضونك بلي دّاريجة واخدة ؤلا باقة كاتاخد من هاد رّوافد:
- لعربية: لهيكل لعام د لّوغة ؤ أغلبية د لموعجام
- لأمازيغية: بزاف د تّراكيب ؤ لكلمات ؤ نّوطق
- لفرانساوية: بزاف د لكلمات تّقنية
- سّپنيولية: بزاف د لكلمات، سيرتو ف دّاريجة شّمالية
- نّڭليزية: سّميات ديال طينكولوجيات ؤ مافاهيم ف بزاف د ضّومينات لعلمية ؤ تّقنية
- دّاريجة : دّاريجة براسها بحال أي لوغة خرة، عندها قدرة باش تشتق كلمات من لفعال ؤلا سّميات لي فيها، ب صيغات د لشتيقاق ديالها. متلا: خدم => تخدام، سرط => سريط، نجار => تانجارت، جمع => جماعة، أجموع، جامع، ؤ زيد ؤ زيد. ب لإضافة ل هادشي، نقدرو ناخدو كلمة ديجا مستعملة ؤ نعطيوها معنى جديد ب لعتيماد علا ترابط منطيقي بين لمعاني بجوج (متلا شي ختيراع عندو نفس شّكل ؤلا نفس دّور ديال شي حاجة ديجا معروفة).
شنو هيا كلمة جديدة؟
بدلكانعتابرو كلمة جديدة أي كلمة لّي كتشير ل مفهوم ماشي بديهي عند لمغاربة ؤ ماعندوش مصطلح معروف ؤ منتاشر ديجا ف شي منطقة من لمناطق د لمغريب. عادة لكلمة جّديدة كيخص يكون ليها مقال خاص بيها، لّي لعنوان ديالو سوا كيدكر لكلمة براسها، ؤلا شي وحدة من لمشتقات لّوغاوية ديالها.
كيفاش كيتم قتيراح كلمة جديدة؟
بدلقبل مايقتارح شي كتاتبي كلمة جديدة، خاص يشوف واش كاينة كلمة ف دّاريجة متداولة دابا ؤلا ف لقديم لّي كاتفيد لمعنى لمقصود. يلا مالقاش كلمة بحال هاكا، علا حساب لحالة، خاصو يشوف واش يقدر يشتق كلمة من كلمة داريجية خرة، ؤلا ياخدها من وحدة من رّوافد لّوغاوية لّي مدكورة لفوق، معا تّدريج د نّوطق. لعوامل لي كاتحدد إينا وحدة ف هاد لختيارات خاص نتبعو حتا هيا مدكورة لفوق، ؤ خاصها تّناقش حالة ب حالة. مايمكنش نديرو قاعيدة عامة لي كاتنطابق علا لحالات كاملين (متلا ناخدو لكلمات كاملين من لفرانساوية ؤلا غير من لعربية ؤلا غير من لأمازيغية)، حيت هنا نقدرو نزلقو ف نحياز إيديولوجي، لي يقدر يبان زوين ؤ مناسب ل شي بعضين، ولاكين ماغاديش يخدم لنتيشار ديال لستيعمال د دّاريجة كا لوغة مكتوبة بين لمغاربة كاملين ب تّوجهات لمختالفة ديالهوم، علا لمدى لبعيد. تّطوير ديال لّوغة لمكتوبة هيا مشروع ديال مجتمع علا قدو، ماشي ديال رباعة د نّاس، ؤ لفرض ديال قواعيد ؤلا مصطلحات مايمكن تديرو غير سلطة لّي كاتأتر ف لملاين د نّاس، بحال سّلطة ديال دّولة، ؤ حتا ديك سّاعة ؤ شوف تشوف. هادشي ماكيمنعش بلي رباعة د نّاس تقدر تقتارح كلمات ؤلا صيغة د لّوغة لّي تقدر تلاقي لقابول بين لمغاربة، ؤ ينتاشر لستيعمال ديالها. داكشي علاش هاد لخدمة خاصها تبقا ف إطار تفاعل دايم معا لمجتمع ؤ لإنتاجات ديالو: ويكيپيديا ب دّاريجة خاصها، بشكل عام، تعكس لستيعمال د لّوغة لمغريبية عند لمغاربة.
شكون كيقرر واش كلمة جديدة خاصها تّخاد؟
بدلب عتيبار بلي ماكايناش مؤسسة مغريبية رسمية لي كاتقرر ف لمسائل لّوغاوية د دّاريجة، بما فيها لكلمات جّديدة، كيبقا لقرار مرهون ب رّغبة د جماعة كبيرة ديال نّاس باش يستعملو ؤلا مايستعملوش شي كلمة. أي كتاتبي ف ويكيپيديا يقدر يقتارح كلمات جداد، ؤ طالما ماكاينش عتيراض عليهوم ؤلا قتيراح كيبان حسن، غادي تبقا لكلمة لمقتارحة هيا لي مخدمة. لكتاتبي لي قتارح كلمة مفروض عليه باش يشرحها ف تّيكست، ؤلا يدير ليها مقال ديالها ؤ يكون ليان وسط لارتيكل لأصلي كيدّي ليها، سينو كاين حتيمال كبير باش ماتّفهمش ؤ يجي شي كتاتبي أخور من بعد يبدلها ؤلا يحيدها. ؤ من لأحسن يزيد لكلمة ف كناش لكلمات جّداد يلا ماكانش عتيراض ؤلا تسالا نّيقاش عليها. ف حالة يلا ماكاينش تّيفاق علا كلمة جديدة (متلا كاينين بزاف د لقتيراحات ؤلا لكلمة كاتبان ل شي كتاتبيا مامناسباش)، خاص يطرا نيقاش ؤ ڤوط ف لپاج د نّيقاش لّي مناسبة (متلا لپاج د نّيقاش ديال لمقال لّي تقتارحات ؤلا تستعملات فيه لكلمة). هاد لڤوط خاصو يحدد إينا كلمة خاصها تخدم ف لعنوان د لمقال، إينا كلمة ؤلا كلمات لّي مسموح يتخدمو ف تّيكست كا موراديفات، ؤ إينا كلمة ؤلا كلمات مامقبولينش ؤ ماخاصش يتخدمو ف ويكيپيديا ب لمعنى لّي تم قتيراحو. لقرار د جّماعة خاصو يتحتارم، حتا من طاراف نّاس لّي ماعجبهومش لقرار، ؤ يلا بان ليهوم بلي لقرار غالط يقدرو يعاودو يفتحو نّيقاش، بشرط تكون دازت واحد لمدة (لّي خاص نتافقو عليها)، ؤ يكونو معطيات جديدة لّي يخليو نّيقاش عندو معنى (متلا شي كتاتبي لقا عين ؤلا مصدر جديد بحال كتاب ؤلا مقال كيهضر علا شي مصطلح).