ويكيپيديا:طلب كلمة ؤلا تعبير

هادي صفحة طلب كلمة ؤلا تعبير. يلا ماعرفتيش كيفاش كاتڭال شي كلمة ؤلا تعبير ب الداريجة، تقدر تسوّل هنا، و تطاڭي لكتاتبيا النشيطين ؤلا لي كاتعتاقد بلي غاتكون عندهوم فكرة. يلا ب لموقابيل عندك سؤال عام على لكتابة د الداريجة ؤلا لڭرامير ؤلا شي مسألة لوغاوية خرة، عافاك حل مداكرة ف ميزان لكلام. عافاك قلّب تا ف لمراجع لي مليستيين ف الليان د لمراجع ف الناڤبوكس لفوق. يلا مالقيتي والو ؤلا ماعندكش وقت تقلّب، سوّل الجماعة، و حاول تعطي أمتلة ديال لكلمة ؤلا التعبير لي كيتقلب عليه، ؤ تا موقابيلات ب لوغات خرين يلا كاتعرفهوم. لكلمات و التعابير لي تّلقاو يقدرو يتزادو ف هاد الصفحة.

طلبات

***** كتب طّلب ديالك تحت من هاد سّطر *****

الشفق القطبي

سلام أ الدراري @Reda benkhadra, Mounir Neddi, Mico2022, Anass Sedrati, Achraf112, Yosh cvd, و Elmerrakchi: كانحاول نلقى طرجامة مزيانة ل "الشفق القطبي" Aurora Borealis. ب لعربية "شَفَق" هوّ "لحمورية لي كاتكون ف السما ف وقت غروب الشمش" (مصدر)، و "قُطب" هوّ ف لأصل لعصا لغليضة لي كاتدور عليها الرحا (مصدر). غير هاد الجوج تويشيات ماعرفتش كيفاش كيتڭال ليهوم ب الداريجة. شي حد عندو فكرة ؤلا يقدر يقتارح شي طرجامة خرة ڭاع وخا تكون بعيدة على هاد لمعنى؟ --Ideophagous (مداكرة) 17:32، 23 شتنبر 2023 (+01)

السلام عليكم،

قطبي هنا جاية من القطب الجنوبي والشمالي، حيت هوما لي فيهم هاد الظاهرة، او كاتسمى بالعربية تا ضوء الفجر، ولا الفجر القطبي، بالتالي نقدرو نسميوها نيت الفجر القطبي، ولا لوان لفجر، ولا سما لفجر، ولا خضورية لفجر، ولا ضواو لفجر، ضو لفجر، ضواو القطب، @Ideophagous Mounir Neddi (مداكرة) 21:52، 23 شتنبر 2023 (+01)

سلام خاي @Mounir Neddi إيه، ولاكين كلمة "قُطب" براسها مستحدتة ف لعربية و نقدرو نصاوبو ليها موقابيل ف الداريجة، داكشي علاش دكرت لمعنى لأصلي ديالها. ب النسبة ل "فجر" ماجاتنيش مناسبة حيت "شفق" ماكاتحيلش ل وقت ف النهار ب التحديد، مي ل ضاهرة ديال لوان كيبانو ف السما. "لوان" ؤلا "ضواو" جات مزيانة. Ideophagous (مداكرة) 21:56، 23 شتنبر 2023 (+01)

سلام خاي @Ideophagous: ف نضري ممكن نسميو هاد ضاهرة "ضواو شمال" (ولا حاجة قريبة ليها) كيما ف نڭليزية northern lights علاما نلقاو كلمة كاتعبر كتر على "قطب" ؤ "شفق". Reda benkhadra (مداكرة) 01:36، 24 شتنبر 2023 (+01)

سلام خاي @Reda benkhadra. "ضواو الشمال" مزيانة بزاف. ف جميع لحالات غادي يخصنا نلقاو طرجامات مناسبين ل "شفق" و "قُطب" على حساب كيفاش كانو كيسمّيوهوم الناس لقدام، ؤلا نستلهمو من لهضرة ديالهوم. Ideophagous (مداكرة) 07:32، 24 شتنبر 2023 (+01)

استنساخ

سلام @Reda benkhadra, Mounir Neddi, Mico2022, Anass Sedrati, Achraf112, Yosh cvd, و Elmerrakchi: كاين شي كلمة ف داريجة كتعني cloning بلمعاني ديالا ف بيلوجيا أو لنفورماتيك "cloning the DNA ,to clone the content of a hard disk" . شكراً.--Yosh cvd (مداكرة) 20:33، 23 شتنبر 2023 (+01)

سلام خاي @Yosh cvd. كانضن "كلونا"، "كلوناج" هوما لي كيخدّمو الناس كتر (لي كيهضرو على بحال هاد لمواضيع). يلا رجعنا ل لإشتقاقات ف الداريجة، عادةً لأفعال د لعربية لي فيهوم استـ كاتزاد فيهوم الشدة بلاصتها ف الداريجة، متلا استخدم => خدّم، استوظف => وضّف، استمتع => تمتّع ... وخا تا ستخدم و ستمتع و غيرهوم يقدرو يتخدّمو، بحال كلمات خرين د لعربية كانو دخلو من فاش بدا مسلسل التعريب ف لمغريب مور لإستقلال. لموهيم عندنا دابا ف ريّي تلاتة د لإمكانيات:

• كلونا، كلوناج
• نسّخ، تنساخ
• ستنتسخ، ستينساخ

Ideophagous (مداكرة) 22:04، 23 شتنبر 2023 (+01)