ويكيپيديا:كيفاش كانكتبو
هاد صّفحة هيّا محاولة ل جمع لقواعد د لكتبة ب دّاريجة ف ويكيپيديا، ؤ تحديد لحكام باش كيتقادّو ؤ كيتجمعو هاد لقواعد. لهاداف ديال هاد لمجهود هوّا نوصلو ل تحرير ورقة بيضا لي كاتشرح بشكل دقيق لحروف د لكتابة ديال دّاريجة، ؤ لقواعد د لكتابة ؤ لإملا، بشكل لي يكون منطيقي ؤ كيحتارم نّتايج د لأبحات لأكاديمية لي تدارو ف هاد لبلان، ؤ رّغبة ديال جّماعة د ويكيپيديا، سيرتو ف لمسايل لي ماشي محسومة ؤلا فيها كتر من إمكانية.
لحكام ديال لمداكرة ؤ لڤوط علا لقواعد د لكتبة ديجا كاينين ف ويكيپيديا:لحكام د لمحتوى - اللوغة. ب لموقابيل، لحكام لي مليستيين ف هاد لپاج هوما لحكام ديال لخطوة لي موراها، لي هيّا جمع لقواعد ؤ صّياغة ديال لڤيرسيون لّولة د لورقة لبيضا، لي كيتّفتارض بلي تريديجا ؤ تحط ف سيتات أكاديمية مفتوحة بحال Academia ؤلا Research Gate.
لحكام بدل
- لورقة لبيضا خاصها تحدد لحروف د لكتبة ؤ كيفاش كيتنطقو، ؤ لقواعد د لكتبة ؤ لإملا ديال لكلمات ف لأشكال تّصريفية ديالهوم. لورقة لبيضا ماكاتحددش إينا كلمات خاصهوم ؤلا ماخاصهومش يتّستعملو، كيفما كان لأصل ديالهوم. ولاكين لورقة لبيضا تقدر تحدد كيفاش شي كلمة خاصها تّكتب، علا حساب لقواعد د لكتبة ؤ لإملا لموصوفين فيها.
- لجمع د لقواعد د لكتبة ؤ لإملا كيتدار بشكل كامل قبل ماتخرج لورقة لبيضا ؤ ماشي من بعد.
- لورقة لبيضا ماخاصش يكونو فيها قواعد د لكتبة لي ماڤوطاتش عليهوم جّماعة. جميع لقواعد د لكتبة لي ڤوطات عليهوم جّماعة ؤ توتقو ف لمداكرات ديال ميزان لكلام ؤ ف كناش لقواعد، خاصهوم يكونو ف لورقة لبيضا.
- لكتابة ديال لڤيرسيون رّسمية د لورقة لبيضا خاصها تكون ب دّاريجة، مكتوبة ب نفس لقواعد لي كاتوصف. طّرجمة ل لوغات خرين مومكينة ؤ مزيانة، سيرتو ل نّڭليزية.
- شكون يقدر يڤوطي علا لورقة لبيضا: أي كتاتبي عندو علّاقل 500 تعديل ف ويكيپيديا ب دّاريجة.
- لقاعيدة لي كاتربح هيّا لي ڤوطات عليها لأغلبية، حتا لوكانت هاد لأغلبية ضعيفة (متلا 51%). ف حالت يلا كان تعادل، كاتّحسب لأغلبية من إمغارن. ف حالت كان تّعادل حتا بين إمغارن، كيتخادو لقواعد بجوج كا تنويعات مقبولين ديال لكتبة. لقاعيدة ديال "هاد جّوج تنويعات بجوجهوم مقبولين" حتا هيّا يقدر يتڤوطا عليها، ولاكين ف حدود لمعقول (يلا ماكانتش غادي تدير تالافا).
- لورقة لبيضا كاتلزم أي كتاتبي ف ويكيپيديا ؤ تّطبيق ديالها ف لمقالات ؤ لعناوين ضاروري ف جميع لحالات لي محددة فيها، حتا لو كان لكتاتبي ماڤوطاش عليها ؤلا ڤوطا ضد شي بند من لبنود ديالها.
- لورقة لبيضا كاتلزم لمحتوى ديال ويكيپيديا ب دّاريجة لي كيبان ف لمقالات. ؤ تّطبيق ديالها ف لمداكرات (نّيقاشات) د ويكيپيديا ؤ بلايص خرين مستحب ؤ مرغوب. برا د ويكيپيديا لورقة لبيضا ؤ لبنود ديالها ماكيلزمو حتا شي حد، بمن فيهوم لكتاتبيا د ويكيپيديا.
- بعدما تكون دازت لورقة لبيضا، أي كتاتبي عندو علّاقل 500 تعديل عندو لحق يعاود يفتح لڤوط علا شي بند ؤلا مجموعة د لبنود، بشرط تكون دازت 30 يوم علا دخول لورقة لبيضا ف حيز تّنفيد، ؤ يكون علّاقل أمغار واحد موافق علا فتح لڤوط. ف حالة يلا كان لكتاتبي لي باغي يفتح لڤوط عندو صلاحيات د أمغار، خاص أمغار أخور يوافق.