ويكيپيديا:ميزان لكلام

مرحبا ف لميزان د لكلام تاع ويكيپيديا بالدارجة!

هاد الصفحة مخصصة باش نتناقشو على ݣاع لمسايل لمتعلقين باللوغة والطرق دلكتابة فهاد لموسوعة الجديدة. لهدف هو نفكّرو مجموعين في لمعيارة (Standardisation) ديال لكتابة د الداريجة.

كمّل لقراية

• كيف ما كاتعرفو كاملين، هاد التحدي الزوين ديال لبني د لوغة كايهضرو بيها لملاين ديال الناس بلا ما تكون عندها حتى شي مؤسسة أكاديمية يمكن يكون صعيب وساهل فنفس لوقت: ساهل حيت ماكاين حسن من لحرية وبنادم يكتب وهو مرتاح بلا ما يكون مشروط أولّا مربوط بخلاّلات د اللوغة اللي هي "أرثوذوكسية وجامدة" وهي لحاجة اللي تقدر تخلينا نبدعو ونستاغلو لجماليات والتويشيات الزوينة اللي كاينة في اللسان لمغريبي الجديد بݣاع لمناطيق ولعيون د التقافة ف لبلاد، وصعيب حيت أي تقنين بزايد يقدّ يخلينا نعاودو نفس ديك "الأرثوذوكسية اللغوية" ونخلقو لغة محنّطة وحدة خرة.

  لحاجة لمهيمة هي أن كل واحد فالدراري والدريات اللي مشاركين وناشطين فهاد لمشروع الزوين ياخد راحتو ويزعم يشارك فلقواعد والنيقاشات دلهضرة، حيتاش للأسف كاين "غياب مؤسساتي وسبات أكاديمي" فهاد لمجال. نتمنى من المحررين قبل ما يديرو تحويلات أولّا تغييرات تعبيرية فالمقالات يجيو يناقشوها هنا باش نبنيو شوية بشوية واحد السياسات اللي غاتكون مرنة وفعّالة ونستافدو من بعضياتنا. ― أمين التيفراتين.

إلا بغيتي تزيد مناقشة جديدة، ورّك على لبوطونة الزرقة لتحت. غادي تديك نيشان لواحد الصفحة خرة فيها جوج د لخانات. فلخانة اللولة (الصغيرة) عافاك كتب(ي) عنوان قصير كايلخص داكشي اللي بغيتي تݣولو(يه)، فلخانة التانية (لكبيرة) كتب(ي) اللي بغيتي. عافاك منين تسالي لكتبة، حاول(ي) تسيني التعليق ولّا آي حاجة كتبتيها بلكتابة ديال ربعة دلعاريضات بحال هادو (~~~~).

أرشيڤ: 1 · 2 · 3

قتيراح ب لقياس علا "علّاقل"

سلام أ دّراري @Anass Sedrati, Reda benkhadra, OussamaOuh, سمير تامر, Amaziɣmorocco, AyourAchtouk, و Samira Seddik:. ف تّخدام ليومي كيڭولو لمغاربة "علّاقل" (ب نّڭليزية at least)، ؤ كاين لي كيكتبها بحال لعربية على الأقل، ؤلا عل لأقل... لقتيراح ديالي هوا ماشي غير نكتبوها علّاقل، ولاكين نزيدو حتا كلمات خرين مشابهين علا نفس لموضيل، لي هوما:

• علّكتر: at most ب لعربية "على الأكثر"، "على أكثر تقدير"
• علّحسن: at best ب لعربية "في أحسن الأحوال"
• علّخيب: at worst ب لعربية "في أسوء الأحوال"

شي مرات كانبغي نعبر علا هاد لمعاني ؤ كيخصني نكتب 3 ؤلا 4 د لكلمات متلا "ف أحسن لأحوال"، ؤ غالبا كيكون تّعبير موخود كيما هوّا من لعربية، شّي لي كيهرس لموسيقية د جّوملة ب دّاريجة. يلا كانو أفكار خرين ؤلا نتيقادات مرحبا. -- Ideophagous (نقاش) 15:51، 28 غشت 2021 (+01)

السلام عليكم السي @Ideophagous: و تبارك الله عليك ديما كاتجيب لينا لجديد ف لوزان. أنا متافق على عاد لفكرة و غادي نبدا نحاول نخدّمها قتاش ما قدرت. شكرا بزاف. -- Anass Sedrati (نقاش) 16:23، 28 غشت 2021 (+01)

سلام خاي أناس. شكرا. ؤ نيت هاد لبلان ديجا مخدّم ف كلمات خرين بحال: علّيسر، علّيمن، عالله، ؤ غيرهوم. --Ideophagous (نقاش) 16:45، 28 غشت 2021 (+01)

السلام السي ونهارك مبروك@Ideophagous:, أنا عندي شوار حسن ماكانقولوش "علاقل" و علكتر لا علكتر كانقولو "فلقليلة..."(فلقليلة كان يجيب غير التعادل بعدا) ، "فلكتيرة..." ، "فلمخيرة..."، "فلخايبة...." وهادشي اللي قشعت من لهضور دالناس --OussamaOuh (نقاش) 22:33، 28 غشت 2021 (+01)

سلام خاي @OussamaOuh:. "علّاقل" مخدمة من طاراف بعض لمغاربا. أنا بعدا ماعمري سمعت "ف لقليلة". ماتنساش بلي دّاريجة كيختالفو مصطلحاتها ؤ تعابيرها من منطقة ل منطقة. ولاكين لقتيراح ديالك حتا هوا مزيان. كولما زادو تّعبيرات كولما زادت تّغنات لّوغة، ؤ ولّاو إمكانيات كتار عند لكتاتبي باش يعبر علا لمعاني. --Ideophagous (نقاش) 09:22، 29 غشت 2021 (+01)

تحياتي لإخوان، بلاصة ف لقليلة نقدرو نخدّمو بلقليلة/بلكتيرة اللي ديجا كاينين. --سمير تامر (نقاش) 19:22، 30 غشت 2021 (+01)

تعليق أمغاري: لإقتراحات لي تحطّو ل حد الساعة:

• علّكتر = فلكتيرة = بلكتيرة
• علّحسن = فلمخيرة
• علّخيب = فلخايبة
• علاقل = فلقليلة = بلقليلة

ف نضري نقدرو نزيدوهوم كاملين ل تعابير كيتعاودو. من غير يلا كانو قتيراحا خرين ؤلا عتيراض على هادو لي كاينين.--Ideophagous (مداكرة) 12:44، 22 أكتوبر 2023 (+01)

لفاصيلة ؤ نّقطة

سلام أ دّراري @Reda benkhadra و Anass Sedrati:. كانقتارح باش نّاقشو لموضوع ديال تخدام لفاصيلة ؤ نّقطة، لي كان جبدو أناس واحد لمرة. حاليان كاينة شوية د لفوضا ف تخدام لفواصل لعربية ، ؤ لّاتينية , ب لإضافة ل نّقطة ف لكتابة د نّماري ؤ لأعداد. كانضن راه واضح بلي لفاصيلة لعربية هيّا لي خاصها تخدّم ف نص عادي، ؤ بلي جميع لفواصل لّاتينية ف هاد لحالة خاصهوم يتعوضو. لي ماواضحش 100% هوّا ب نّسبة ل نّماري ؤ لأعداد. على حساب هاد لمقال ف ويكيپيديا ب نّڭليزية، لأعداد لعشرية ف لمغريب خاصهوم يتكتبو ب لفاصيلة لّاتينية، بحال 1,25 (واحد فاصيلة خمسة ؤ عشرين)، ولاكين ماكيوضحش واش ف لمغريب خاص يتكتبو لأعداد لكبار ب نّقطة، بحال 100.000.000 (ميات مليون) باش تكون لقراية ديالهوم واضحة. غادي يخصنا نخرجو ب قاعيدة إلزامية ديال لكتابة د لفاصيلة ؤ لأعداد لعشرية ؤ نّماري لكبار. قتيراح:

• لفاصيلة لعربية ديما كاتخدّم ف نص عادي. أي فاصيلة لاتينية ف بحال هاد لحالة خاصها تّعوض ب فاصيلة عربية.
• لأعداد لعشرية يتكتبو ب فاصيلة لاتينية ديما، كيما متافق عليه ف لمغريب.
• لأعداد ؤ نّماري لكبار (لي فايتين 9999) يتكتبو ديما ب نقطة مابين كلا تلاتة د نّماري باش لقراية ديالهوم تسهال.

واش بانت ليكوم شي حالة خرة ماتطرقتش ليها؟ فاش نتّافقو على لقاعيدة، خاصها تّزاد ل حكام لّوغة، ؤ غادي يكون مزيان يلا قادّينا دليل د سّتيل بحال هادا د نّڭليزية. نقدر نقاد عطاشة بوتية لي كاتصلح هاد لفواصل على حساب لقاعيدة لي تّافقنا عليها.--Ideophagous (نقاش) 12:03، 24 فبراير 2022 (+01)

السلام @Ideophagous:. شكرا بزاف حيت جبدتي هاد النقاش لمهم بزاف. الصراحة لإقتراح ديالك مزيان (هو اللي كانخدم بيه ملّي كاندير لأرقام). اللي غايبقا صعيب هو واش نتا ساهل ليك تدير عطاشة تاتقاد لفواصل لا عرفتي هاد لحالات ب تلاتة؟ -- Anass Sedrati (نقاش) 15:55، 24 فبراير 2022 (+01)

سلام خاي أناس. تقدر تكون معنكشة شوية ب نّسبة ل نّماري، ولاكين كاينين "تّعبيرات لمعاودة" Regular expressions لي كيسهّلو بحال هاد نّوع د لعطاشات. متلاً لپروڭرام يقدر يميز لأعداد من لحروف ب تعبير بحال هادا '[0-9]+' يعني ([0-9] = واحد لحاجة لي فيها نماري 0 تال 9، + = لي كيتّعاودو). حتا يلا ماكانش شي حل كامل، غادي نحاول علّاقل نصلح داكشي لي يقدر يتّصلح ب لبوت، ؤ نعلّم لوخرين ب شي طاڭ ؤلا تصنيف باش نصلحوه بيدينا. ؤ يلا بان ليكوم لبوت دار شي غلطة تقدرو تعلموني ديك سّاع. --Ideophagous (نقاش) 16:37، 24 فبراير 2022 (+01)

هاد لمداكرة تسدات. عافاك ماتبدّل فيها والو. أي تعليقات إضافية خاصها تزاد ف فقرة جديدة.

الهمزة في اللخر ديال لكلمة

اهلا بغيت نطرح مسألة الهمزة فاللخر ديال الكلمة حيت تانظن بلي مانقدروش نطبقو عليها نفس القاعدة ديال التاء في أخر الكلمة، بسبب طريقة نطق هاد الكلمات فالدارجة. مثلا جات تقيلة نقولو مدراسا ولا دراجا ولا سيارا، لابد من التا مربوطة واخا ماكاتنطقش، لكن بالنسبة للهمزة الأمر مختلف في بعض الحالات، واخا هي كاتنطق فأخر الكلمات تانظن أنه ماخصناش نكتبوها باش نحافظو على أصالة النطق ديال الدارجية. مثلا: صلاحا، لأوليا، شعارا، لأتقيا، لأدابا، الوزارا، لأطبا ---------- حيت بمجرد مانكتبوها تايولي خاصها تنطق، ويلا تنطقات كاتفقد تامغريبيت ديالها موضوع للنقاش --Mounir Neddi (مداكرة) 12:46، 11 غشت 2022 (+01)

سلام خاي @Mounir Neddi:. متافق معاك 100%. لهمزة يلا ماكانتش منطوقة ف كلمة لي متداولة ب دّاريجة بحال فقها ؤلا شوعارا ؤلا عولاما، ماخاصهاش تّكتب. ولاكين كلمات بحال "فضاء" ؤلا "إملاء" لي ماعندهومش موقابيلات داريجية متداولة، كانضن ماشي موشكيل يلا كتبناهوم كيما هوما ف لأصل ب لعربية. Ideophagous (مداكرة) 17:58، 13 غشت 2022 (+01)

طاڭ ل إمغارن: @Reda benkhadra, Mico2022, Mounir Neddi, و Anass Sedrati:، طاڭ ل لكتاتبيا النشيطين @Siaahmed, Mr. Lechkar, Alitoar, Achraf112, U13N4M, و Bisel91:، طاڭ ل لكتاتبيا لي كانو كيساهمو ف حلقات لمداكرة د ميزان لكلام @Elmerrakchi, Rabio10, DocPPicola, Marocsite, سمير تامر, و Rachidourkia:

إقتراح ديال قاعدة جديدة ب النسبة للكلمات لي أصلهوم عربي و كيتكتبو ب لهمزة ف اللخر (ماكاينينش كلمات من أصول خرين لي يقدرو يتكتبو ب لهمزة). تقدرو تشوفو لقواعد لقدام لي ديجا تّافقات عليهوم الجماعة ف كناش لقواعد

• لهمزة ف اللخر د لكلمة ماكاتّكتبش يلا كان النطقان ديالها ف الداريجة متداول بلا همزة، متلاً:
  • أطباء => طبّا
  • فقهاء => فقها
  • علماء => عولاما/علما
  • ماء => ما
  • دكاء => داكا/دكا
  • سماء => سما
• تقدر تّكتب لهمزة ف حالات ستيتنائية يلا لكلمة مامتداولاش ڭاع عند لمغاربا بلا همزة و تقدر ماتّفهمش ولا تسبب لتيباس ف لفهامة يلا ماتكتباتش لهمزة، و ماعندهاش موقابيل ب الداريجة لي مافيهش لهمزة، بحال:
  • فضاء
  • إنشاء
• كاينين كلمات لي مقبولين ف لإستعمال لعام، وخا عندهوم موقابيلات ديالهوم بلا همزة، حيت هاد لموقابيل ماكيكونش متداول بزاف. ف هاد لحالة، الصيغات بجوج مقبولين. متلاً:
  • جزء <=> ڭزو
  • أجزاء <=> ڭزوّات

لقاعدة خاصها تّناقش، بشكل عام و ف تفاصيلها، تا نوصلو ل إتفاق عام لي يرضي كولشي ؤلا علّقليلة لأغلبية الساحقة ديال لكتاتبيا لمشاركين. لإقتراح هوّ باش تكون هاد لقاعدة إلزامية. يعني ف الجواب ديالكوم عافاكوم وضّحو:

• واش هاد لقاعدة متافقين معاها ؤلا كاترفضوها بشكل كامل
• واش هاد لقاعدة كاتوافقو على جزء/ڭزو منها ؤ كاترفضو ڭزوات خرين
• شنو التبريرات لي عندكوم ل الرأي ديالكوم
• شنو التغييرات لي بغيتو تديرو ف لقاعدة يلا كنتو مامتافقينش
• واش لقاعدة خاصها تكون توجيهية، يعني مستحسن باش يتبّعوها لكتاتبيا، ولاكين ماشي ملزّمة عليهوم؛ ؤلا إلزامية يعني أي واحد شاف شي كلمة مامكتوباش على حساب لقاعدة خاصو يصححها، و نقدرو ڭاع نديرو سيستيم ديال التصحيح لؤطوماتيكي ل هاد لقاعدة لي مطبق و معمم على لموسوعة كاملة.--Ideophagous (مداكرة) 15:40، 7 غشت 2023 (+01)

متّافق Achraf112 (مداكرة) 10:21، 29 غشت 2023 (+01)

متّافق Alitoar (مداكرة) 03:47، 4 شتنبر 2023 (+01)

تدكير @Reda benkhadra, Mico2022, Mounir Neddi, و Anass Sedrati: و @Bisel91 و MohssinDr: لڤوط على لقاعدة باقي محلول حيت ماشاركوش فيه بزاف د لكتاتبيا.--Ideophagous (مداكرة) 09:48، 1 يناير 2024 (+01)

أنا متافق -- Anass Sedrati (مداكرة) 10:22، 1 يناير 2024 (+01)

متّافق -- Rachidourkia (مداكرة) 16:01، 28 أبريل 2024 (+01)

معا --Ideophagous (مداكرة) 23:13، 28 أبريل 2024 (+01)

تعليق أمغاري: لحكمة دخلات ل كناش لقواعد --Ideophagous (مداكرة) 23:23، 28 أبريل 2024 (+01)

لمداكرة لفوقانية تسدات. عافاك ماتبدّل فيها والو. أي تعليقات إضافية خاصهوم يتزادو ف لفقرة ؤلا الصفحة د لمداكرة لمناسبة. عافاك ماتدير تا شي تبديل أخور ف هاد لمداكرة.

مصطلاحات فعلا صعيبة وماشي ديال الدارجة المغربية

السلام عليكم. كانلقى بزاف ديال المصطلحات لي كانقولو بلساننا وما كانستعملوهمش فالدارجة ديالنا. يعني مثلا "عيون كلام". هادا واحد المصطلح فالأول ما فهمتوش. فمثلا حنا منين كانتناقشو بيناتنا وكاتقول شي معلومة، كايقول ليك شي واحد عطيني "مصدر المعلومة". يعني هاد الجملة كانشوفها حسن.

دابا كاين الذكاء الاصطناعي لي كايعاون بزاف، ومن بينهم موقع كلود. عندو دارجة مزيانة وما فيهاش غلطات. نقدر نقول حسن من هادوك لي كايكتبو هنا. كانتمنى نحاولو نكتبو بدارجة مفهومة بزاف وما تكونش فيها اللهجة ديال شي واحد ساكن فبرا.

راه ملي كانقرا كانتخيل بحال شي واحد جا من فرنسا وكايشرح لينا شي معلومة. كانتمنى مثلا إلا كتبتو المقالات ديرو فيهم كلود. عندو واحد الدارجة سليمة ومزيانة. وهادا كاحل الناس لي كايعانيو ولا ما كايقدروش يهضرو الدارجة مزيانة. Ivankatib (مداكرة) 01:21، 10 غشت 2024 (+01)

 كيفاش خاصنا نكتبو الدارجة المغربية ؟

بقلم؛ فـؤاد المساوي

مدينة بوزنيقة – دولة المغرب

06.60.04.31.30

fouadmoussawi@gmail.com

خاصنا نستافدو من التجربة ديال مصر؛

كنلاحظو باللي الدارجة المصرية اللي تعلمناها من الأفلام والمسلسلات والأغاني المصرية، فيها خليط من العربية الفصحى المُدرّجة وشي كلمات أجنبية، وشي كلمات خاصة بالمصريين...

و كنلاحظو باللي دارجتهم موحدة، والسبب هو تجمع الشعب المصري فْ مساحة ديال 4٪ من مساحة بلادهم..

و عندهم غير زُوج دارجات؛ الصعيدية والمدينية...

و احنا المغاربة، عندنا اثنين وستين لكنة، يعني اثنين وستين دارجة.. ولكن ممكن نستافدو من التجربة ديال المصريين، اللي هي تدريج بعض الكلمات الفصيحة، حيث الدارجة بنت الفصحى...

عندنا الزهر حيث يمكن نكتبو بدارجة قريبة للعربية الفصحى من هاذ اثنين وستين لكنة، باش حتى احنا تكون عندنا دارجة (معيارية)، يعني بحال الدارجة اللي كيهضرو بها الناس ديال دبلجة المسلسلات التركية واللاتينية... ولكن اللي كيهمنا اكثر هو طريقة الكتابة، حيتاش كل واحد كيكتب الدارجة ديالنا بطريقتو الخاصة، يعني خاصنا طريقة وحدة ف الكتابة.. هاذ الشي علاش خاص الأساتذة ف المدارس يبداو يعلمو التلاميذ طريقة موحدة باش يكتبو اللغة الدارجة... وعندهم طريقة بسيطة باش يديرو هاذ الشي:

خاصنا نكتبو الدارجة المغربية بطريقة يفهموها حتى اخوتنا العرب...

كيفاش نديرو ؟ تْبْعْ معاية :

أولاً: نكتبو الكلمة بالفصيحة ونشكلوها بالدارجة؛ مثلا (الموسوعة الحرة؛ نكتبوها بالعربية وما نكتبوش "الموسوعة الحورا").

ثانيًا: ضروري خاصنا نستعملو الشكل، يعني نكتبو فوق الحروف، السكون، والفتحة، والضمة، والكسرة والشدة، والمَدة، والهمزة، فوق الكرسي ديالها المناسب؛ مثلا ( جُغْمَة من البْحَر و لا جْميل الگرابة )..

ثالثًا: ما نكتبوش الألف بوحدو، ولا اللام بوحدها ف (ال) ديال التعريف؛ مثلا : اجامع (عنوان فلم) عوض الجامع / لمكتوب عوض المكتوب) ...

رابعًا: الكلمات اللي مفرقة ف الفصحى، نفرقوها ف الدارجة؛ مثلا (الفيس بوك .. التيساع فالخاطر، خاص نكتبوها التيساع فْ الخاطر، ولا التيساع في الخاطر.. حيث منطقة عبدة مثلا، كيذكرو (في) بالياء، وكيقولو مثلا؛ "لقيت خالي الغَوْثِي في السوق"...).

خامسًا: الكلمات الأجنبية، والأسماء الأجنبية، نكتبوها كما كتّنطق ف لغتها الأصلية؛ مثلا (طاندانس - جان فالجان)...

E - EA – A :  نكتبوها بالألف ...

O - EAU – AU - EU :  نكتبوها بالواو؛ مثل؛ (جوني هاليداي) ...

سادسًا: خاصنا نترجمو الكلمة الأجنبية اللي ف دارجتنا كيما كتّنطق، مثلا (نقولو على الحديقة، "جرضَة أو جْريضَة"، ماشي جريدة = صحيفة)..

سابعًا: ما خاصناش نحذفو بعض الحروف من بعض الكلمات؛ مثلا: (الخطأ : تا ما نجاوبك، تا تقولي شنو كنتي دير وشنو قـلتـلـيـه (!)؛ الصواب : انت ما نجاوبك؛ حتى تقول ليا أشنو كنتِ كـتـديـر و أشنو قــلـت ليه)...

ثامنًا: مناطق كثيرة ف بلادنا ما زال كينطقو الثاء، و الذال، و الظاء، كما يجب .. خاصنا نحافظو على هاذ الفونيمات (الأصولت)، ونگـولو : هذاك الذيب ... الثور ... المظلة.

تاسعًا: التأنيث والتصغير؛ شوف هاذ الجملة = المراوات كانو ݣــــالسين يتغداو ف طاجين صغير ... الصحيح هو = العيالات كانو گــالــسات يتغداو ف طويجين ... المراوات كلمة أطفال بحال العودان مثلا، (أي الخيل).

جدودنا كانو كيستعملو التصغير وما كانوش كيذكرو المؤنث...

والتصغير كيليق للتقليل (كويسات و بريريد)، والتكبير (واه على ثوير گـــــدّاش)، والتحبيب (وليدي) ...

وتصغير الأفعال كاين غير فْ الدّارجة المغربية (بحالْ؛ الذريري كيقيفقف من البرد) ...

عاشرًا: واحد الحرف كاين غير فْ الفرنسوية، ويمكن نترجموه للعربية بياء فوقها ضمة " يُـ "، (بحالْ؛  آلبير كامْيُ) ..

هاذ الشي اللي كتبت مْلخْص بجزاف (بالجزاف = بزاف) وغادي نرجع لهاذ الموضوع بتفصيل إن شاء الله ...

Fouad MOUSSAOUI (مداكرة) 17:43، 1 شتنبر 2024 (+01)

انا متافق بزاف مع هاد الطرح حيت الصراحة كنقرا مقلات كنتعصب بزاف واحد دارجة مفيها ميصلاح فحال شي واحد من برا كيدوي، تقهرنا ومكاينش تعاون من الاعضاء ، عطاش هادي كلمة او كيما قلتي الحورا هههه بغينا دارجة تكون فحال صحيفة كود اللي كيكتبو بالدارجة نقية صراحة شكرا بزاف على الطرح ديالك انا كنتافق معاك Mrflashow (مداكرة) 13:40، 15 دجنبر 2024 (+01)

سلام @Fouad MOUSSAOUI @Mrflashow. شكراً على التعليقات ديالكم. الموسوعة كيما كاتعرفو راها مفتوحة و تشاركية، و أي واحد يقدر يساهم فيها. يلا بان ليكم شي توجه محدد لي طاغي، سوا ف المضامين ولّا الكتابة، راه جاي من الإختيار ديال الأغلبية د الكتاتبيا النشيطين ف الموسوعة. تا شي حاجة ما كاتمنع شي واحد عندو تفضيلات خرين، ف طريقة الكتابة باش يساهم تا هوّ ف الموسوعة و بطريقتو الخاصة. بالنسبة للكتابة بحروف العلّة بلاصت الحاراكات، تقدرو تطّالعو على كتاب اللساني المغربي محمد المدلاوي "العربية الدارجة"، لي كيشرح فيه الفونيتيك ديال الدارجة، و علاش هوّ كيقتارح نحيّدو لحاراكات (ضمة، فتحة، كسرة) و نديرو بلاصتهم حروف العلة (و، ا، ي). بزاف لي كيكتبو هنا متبّعين هاد السيستيم، وخا أغلبية ماشي بشكل كامل، و المقصود منو ماشي هو نقراو "المغريب" بحال "المغرييييييب"، بل بشكل عادي كيما كانڭولوها فهضرتنا.

ڭود صراحة داكشي لي طّالعت عليه ماكيكتبوش بدارجة نقية، بل عامرة بكلمات و تعابير معرّبة بالزايد، وخا كاينين كلمات و تعابير مغربية قحة كاتقابلها. و شي مرات كيديرو الإعراب ديال العربية وخا الدارجة مافيهاش الإعراب. شوف متلا هاد لمقال:

• فتحت المصلحة الولائية للشرطة القضائية: "فتحت" مقبولة وخا عادةً بالدارجة كانڭولو "حلّات". ولايني "الشرطة" ماكاتڭالش ڭاع، كانڭولو "البوليس". باقي المصطلحات ماشي مشكل حيت ماعندهمش مقابلات بالدارجة.
• بولاية أمن مراكش: "بولاية" فيها إستعمال غالط ديال حرف الربط "ب" فالدارجة، حيت ماكانخدموهش هكاك، و فهاد الحالة خاصها تكون "فولاية". هاد التعبير كامل "ولاية أمن مراكش" راه عربي ماشي دارجي، و يلا درّجناه غادي نكتبو "ولاية الأمن ديال مراكش".
• بحثا قضائيا: ماكاينش الإعراب ف الدارجة، يعني خاص تكون "بحث قضائي".
• أول أمس => ول البارح
• وذلك لتحديد الأفعال الإجرامية => و هادشي على ود تحديد الأفعال الإجرامية

و زيد و زيد... صراحة يلا جينا نشوفو، راه المقال كامل مكتوب بالعربية الفصحى و غير العنوان لي مدرّج. بإختصار، الدارجة ديال ڭود راها عربية فيها شي جوج كليمات ديال الدارجة باش يسهّلو شوية القراية على الناس و يتنتاشر الموقع ديالهم، ولايني من منضوري الشخصي ماشي متال لي ضروري نحتاديو بيه، من غير يلا أغلبية د الكتاتبيا هنا قررو يتّافقو على تخدام دارجة ديال ڭود كمعيار. شكراّ مرة خرة، و لكم واسع النظر. Ideophagous (مداكرة) 15:44، 15 دجنبر 2024 (+01)

صراحة متافق معك لكن حنا كنعقدو اللغة كاينين مصطلحات فحال دبا "عيون كلام" فالدارجة فاش كيقولي شي واحد شي معلومة غالبا كنقولو عطيني "مصدر المعلومة" وزيد تعقيد ديال بعض المصطلاحات فحال "و" كتولي "ؤ" وكتقول التعريب راه بزاف ديال الاصدقاء بغاو اسهمو فويكيبديا ولكن هاد اللغة باش كتكبو شي بعد المرات كتبقى تحلل غير باش تفهم، اما بخصوص كود راه كيستعملو شي مصظلحات باللغة العربية باش تكون مفهومة عند الجميع وهدا هو الهدف الفهم ماشي تبقى ساعة باش تفهم Mrflashow (مداكرة) 21:01، 15 دجنبر 2024 (+01)

سلام @Mrflashow و شكراً على الرد ديالك. بالنسبة لمصطلح "عيون لكلام" راه كان تّختار بالتصويت باش يوحد السمية ديال الفقرة د المصادر، حيت كلّا واحد كان كيشرق ولّا يغرّب ("مصدر"، "مصادر"، "المصادر"، "المراجع"، "سورس"، و شي عجب خور). كانو عدد ديال الإختيارات، و هاد "عيون لكلام" هيّ لي الأغلبية ديك الساع وافقو عليها. تقدر تحل مداكرة جديدة ف البرلمان و تقتارح شي مصطلح خور، و يلا وافقو الأغلبية راه غادي يتم التبديل ديالو بالبوت.

بالنسبة ل "ؤ" راه تدار على ود الناس لي كيبغيو يكتبو "أو" حيت هاد الكلمة اللّخرة كاتخلق إلتباس ف المعنى (واش واو العطف ولّا "أَوْ" ديال العربية). تقدر تشوف قواعد خرين ديال الكتابة لي تافقات عليهم الجماعة، ف كناش لقواعد.

الأصدقاء ديالك و أي واحد بغى يساهم مرحبا بيه. راه المحتوى كيصاوبوه الكتاتبيا النشيطين ف الموسوعة. يلا كترو الناس لي عندهم نفس الرأي ديالك، راه الموسوعة غادي تولي غادية على داك الإتجاه. مايمكنش نمنعو شي واحد لي عندو رأي معارض كيما كان طالما ماكيخرقش قواعد إدارية ديال الأداب و السلوك و المحتوى، و إنما خاص إما نقنعوه باش يبدل الرأي ديالو يلا كانو أسباب مقنعة، ولّا نخليوه يساهم بالطريقة لي كاتريّحو طالما المحتوى موسوعي و مفهوم عند الأغلبية. هاد الصفحة نيت و صفاحي خرين مديورين باش نّاقشو بحال هاد المواضيع. و زيدون راه الدارجة ماعندهاش صيغة معيارية موحّدة، و هادشي لي كيخلق صعوبة باش كولشي يتافق على طريقة موحدة د الكتابة و حتى الإختيار د المصطلحات، طالما ماكايناش شي سلطة (بحال مؤسسات ديال الدولة) لي فارضاهم، كيما اللغات الخرين لي عندهم طابع رسمي، ولّا شي صيغة معيارية لي تنتاشرات بزاف بوحدها، كيما طرا ف النڭليزية.

فعلاً، راه الهدف الرئيسي هوّ المحتوى يكون مفهوم، ولايني السؤال هوّ لمّن؟ يلا كان خاصو يكون مفهوم للناس لي ديجا قاريين العربية مزيان، راهم أصلا قادرين يقراو ويكيپيديا بالعربية، و يلا خدمنا بصيغة معيارية ديال الدارجة لي معرّبة بزاف، ماغاديش تكون عندها شي فايدة كبيرة. بالمقابل، يلا حاولنا ندرّجو المصطلحات و نجيبو كلمات لي متداولين كتر عند المغاربا، راه غادي نقرّبو كتر للمغربي البسيط لي هوّ أصلا لي ماعندوش أكصي للمعلومة، و خاصّو موسوعة معرفية بحال هادي.

فاللخر هاد الإختيارات كيبقاو راجعين للناس لي كيكتبو فالموسوعة (الكتاتبيا)، و ماشي مفروضين بشكل فوقي، من غير القرارات الجماعية، بحال لي كاينين ف كناش القواعد. شكراً مرة خرة و تهلا! Ideophagous (مداكرة) 22:33، 15 دجنبر 2024 (+01)

الكتابة العروضية للداريجة

كتب داكشي لي كيتنطق وهني السوق، معدنا غراض بشي قواعيد نزيدو نوحلو راسنا معاهم !! 102.52.73.215 18:29، 14 نونبر 2024 (+01)

مرحبا. تا لكتابة على حساب النطقان راها قاعدة، و ماشي كولشي غادي يتّافق عليها. زيدون كاينين حالات ديال التصريف د لأفعال و السميات و النعوت لي كايوليو معقّدين يلا كتبنا كيما كانطقو، ولّا كيسهالو يلا خلينا كتابة بحال لعربية ف شي حالات (بحال التا مربوطة). Ideophagous (مداكرة) 21:52، 21 نونبر 2024 (+01)

تغير بعض المصطلح

كنتقتارح تبدل هاد المصطلاحات :

لانطيرفاص: نديرو "واجهة"

اللولة او اللاولا نبدلوها ب " الأولى" افضل

طكنولوجيا اش هاد المصطلح هههه كنقتارح نبدلوه ب تكنولوجيا Mrflashow (مداكرة) 21:14، 15 دجنبر 2024 (+01)

سلام @Mrflashow. صراحة مصطلح "أنطيرفاص" مخدّم عند الناس د لانفورماتيك كتر بزاف من "واجهة". ف رأيي خاص نمشيو معا الدارجة لي كيهضروها الأغلبية، سيرتو مّالين الضومين. بالنسبة ل "طيكنولوجيا"، راه كاين لي فعلا كينطقها هاكاك بحرف الطا ماشي التا. الكتابات بجوج راهم مقبولين و موجودين فالمقالات. Ideophagous (مداكرة) 22:47، 15 دجنبر 2024 (+01)

مقترح باش تسهال اللغة اكثر وهو

بما اننا قرينا اللغة العربية فغالبا شي بعض الكلمات كنقروها بالزربة كتكون واضحة وخا كتكون فالنطق مختلفة

دبا شوف معيا هاد المصطلاحات

ويكيپيديا، طكنولوجيا ، عيون كلام ، لحورا، معاونة، دّاريجة، ؤلا، تاتّعتابر، سانطيم هههه (لهربة ايوا سعيد هههههه)

لعمايد هههههه

صراحة بزاااااااااااف هاد المصطلاحات كنتقتارح الحل :

ويكيبيديا، تكنولوجيا، مصدر لمعلومة ، لحورة، مساعدة، الدارجة، ولا، تعتبر، سنتيم، الاعمدة

دبا قرا اللول مع اللي قتارحت انا سرعة فالفهم افضل

كنقتارح بما اننا كنكتبو بالاحرب العربية فسهولة فالقراية والفهم اتكون افضل لعتمدنا بعض المصطلاحات العربية اللي طبعا الهدف هو الفهم والمغرب كامل يفهم

Mrflashow (مداكرة) 21:27، 15 دجنبر 2024 (+01)

مرحبا @Mrflashow.

• ويكيپيديا/ويكيبيديا: حرف "پ" مخدّم بشكل رسمي فالموسوعة حيت كينطقوه بزاف د المغاربا، كيما "ڤ" و "ݣ". ماكانڭولوش wikibedia ويكيبيديا بل wikipedia ويكيپيديا.
• طيكنولوجيا راني عطيتك الرأي ديالي فيها ف الفقرة لي الفوق.
• عيون لكلام: كيما دكرت قبل تقدر تحل مداكرة جديدة و تطلب التبديل ديالها. يلا وافقو الأغلبية، الله يجيب التيسير.
• لحورا: متافق معاك ف هادي، و كانضن قليل لي كيكتبها هاكا. بدّلها يلا بغيتي، من غير يلا كان إعتراض من عند شي كتاتبيا خرين.
• معاونة: هوّ المصطلح لي متداول فالدارجة ماشي "مساعدة". المجالات السمياتية راه صعيب يتبدّلو فجميع الحالات، و راه بقينا كانّاقشو هاد المصطلحات (معاونة، ويكيپيديا، مداكرة، موضيل...) شي 6 شهور عاد ختاريناهم و بدّلناهم فالكوض ديال ويكي (كيتدار ليهم طلب خاص و كيشد وقت باش يتنفّذ).
• دّاريجة: مكتوبة بالطريقة ديال محمد المدلاوي. حالياً داريجة و دارجة بجوج مقبولين.
• ؤلا: كاين لي كينطقها هاكاك. "ؤلا" و "ولا" بجوج مقبولين.
• تاتّعتابر: ماشي هي "تعتبر"، من غير يلا كنتي قاصد "تُعتَبَرُ" و هادي راه ماشي دارجة. القاعدة ديال المبني للمجهول فالدارجة هي كانزيدو التا فالبدية، ماشي كانبدّلو الوزن: بحال كْتب => تّكتب (دارجة)، كَتَبَ => كُتِبَ (عربية).
• سانطيم: نفس الحالة ديال طيكنولوجيا، كاين لي كينطقها هاكاك. و الإملاءَات بجوج مقبولين (سانطيم و سنتيم).
• لعمايد: كانضن بلي جمع "عْمود" فالدارجة هوّ عمايد، على الأقل فشي لهجات. "أعمدة" راها عربية فصحى.

مسألة الفهم راها متعلّقة حتى بالولف، و راه طبيعي يلا مولّف تقرا بالعربية الفصحى غادي تجيك القراية بدارجة لي قريبة لدارجة الشارع فشكل و صعيبة فاللول. متلاً أول مرة قريت الكتاب ديال المدلاوي ماحملتوش و رميتو، ولايني معا الوقت كيولّف الواحد حتى كايولّيو دوك المصطلحات عاديين فالقراية. Ideophagous (مداكرة) 23:08، 15 دجنبر 2024 (+01)