نيولوجيزم
نيولوجيزم (النڭليزية: Neologism) من ليونانية νέο/néo للي كاتعني جديد ؤ λόγος/lógos لي كاتعني هضرة. هي شي كلمة للي مازال جديدة ؤلا يالاه بانت ف شي لوغة.[1] الضاهيرة د الخلق ؤ التصاويب د كلمات جداد كايتسمى النيولوجيا. الليسانيين كايفرقو بين عاداد د النواع د النيولوجيزم:
- النيولوجيزم د الشكل: لي هو كلمة جديدة يالاه تختارعات ؤ ما كانتش موجودة من قبل. بحال مثلا كلمة بيوتعياب ؤلا بيوتقليد للي تختارعو كا مقابل لكلمة Biomimetics ؤلا Biomimicry ب النڭليزية.
- النيولوجيزم د التسلاف اللوغاوي: لي هو فاش كاتسلف شي كلمة برانية بلاما تبدلها بزاف ؤلا غير كاتأضاپطيها شي شوية للداريجة. هاد النوع د النيولوجيزم كيتدار بزاف ف الداريجة خصوصا مع لعربية، لفرانساوية ؤ النڭليزية. كلمة نيولوجيزم براسها مثال ديال هاد النوع د النيولوجيزم.
- النيولوجيزم د لمعنى: لي ممكن نسمّيوه التكحاز السيمونتيكي. هو فاش كاتشد شي كلمة ديجا موجودة ف اللوغة ؤلا لشتيقاق ديالها ؤ كاتعطيها معني جديد لي يقد يكون قريب من المعنى القديم ؤلا بعيد عليه بزاف. أمثلة على هاد النوع هو مثلا كلمة فرتيتة لي المعني القديم ديالها هو طرف صغير بزاف د شي حاجة (فرتيتة د الخبز) ولكن تعطاها معنى جديد فاش تخدمات باش ترجم كلمة Charged Particle ب النڭليزية ف الضومين د لفيزيك ل فرتيتة معمرة ب الداريجة.
من فوق هاد النيولوجيزمات التقليدية، جزء كبير د النيولوجيزم لعصري كايتدار على شكل واحد النيولوجيزم جديد للي ممكن نسميوه النيولوجيزم د لاصل التيجاري ؤلا النيولوجيزم الراسمالي ؤلا النيولوجيزم د لماركات للي هو فاش الشركات الخاصة كايبداو يصنعو كلمات جداد غالبيتهم أسماء ماركات مسجلة ؤ يدخلوهم للمعجم اليومي. أبرز مثال على هاد الشي هو الشركات د البيڭ طيك Big Tech فحال ڭووڭل ؤ تويتر للي دخّلو أفعال ؤ سميات جديدة ف لقاموس اليومي د بزاف د اللوغات بحال لفيعل ڭوڭلي للي كايعني تقلب على شي حاجة ف موطور د التقلاب د ڭووڭل ؤلا كلمة تويت للي كاتعني پوسط ؤلا منشور ف السيت د تويتر.
عيون لكلام
بدل- ^ "Britannica, Neologism". مأرشيڤي من لأصل ف 2023-04-10. تطّالع عليه ب تاريخ 2022-11-06.