عبدالرحمان لمجدوب

عبدالرحمان لمجدوب
معلومات عامة
زيادة	مارس 1504 أزمور
لموت	1568 (غريغوري) (63/64 عام)
لجنسية	لمغريب
لحرفة	شاعير
لّوغات لي كيعرف	عربية

سيدي عبد الرحمان لمجدوب (بلعربية: عبد الرحمان المجذوب، بلأمازيغية: ⵄⴱⴷ ⵔⵃⵎⴰⵏ ⵍⵎⵊⴷⵓⴱ) هوا سيدي بوزيد عبد الرحمان بن عياد بن يعقوب بن سلامة بن خشان الصنهاجي وتسما بلمجدوب حيت كان بوهالي و زاهد فالدنيا وهاد لكلمة جات من الجدبة بالدارجة اللي كاتعني واحد لحالة ربانية و هواوية كاينة فلماكس ديال الدّرْجات اللي كايتمناو يوصلو ليها صحاب لحال. تزاد فتيط (بين أزمور والجديدة) وعاش فلقرن سطاش.

هاد السيد كايتعتابر جبل كبير فالداكيرة الشعبية و الترات دبلاد لمغريب، مول لكلام الرزين و الموزون، زجال لحكمة و شيخ الزجالة لمغاربة وقدر يأنفليونصي ݣاع بلدان شمال إفريقيا و واحد من لاوليا دالله الصالحين. تشهر بديوانو لمزمم بالداريجة لمغربية و غير بوحدو كايتعتابر مدرسة زجلية ماكاينش بحالها.

حياتو

صغرو و قرايتو

سيدي عبد الرحمان لمجدوب تزاد عام 1503م اللي كايجي معا 909هجرية فتيط اللي كانت ديك الساع مدينة عندها الشان بين لمدون لبحرية دلمغريب جات فدكالة وسط جديدة و أزمور ، بحيت بعيدة على اللولة بعشرة ديال لكيلوميطرات و التانية بخمسة ،و اللي على حساب لحسن لوزاني قال بناوها لقوط شحال هادي فاش حتالو موريطانيا الطنجية واخا سميتها أمازيغية و كاتعني لعين.

هاد لمدون اللي ضايرين بيها كانو بجوج محتالين من عند لبرطقيز هادشي اللي زير هاد لمدينة فليكونومي ديالها ، و بزز على لفاميلة ديال لمجدوب باش ترحل لمكناس وهوا باقي دري صغير عمرو ربع سنين وعلى هادشي ݣال :

"جيت من تيط بالعجلة

والشر زادني شطاية"

لمجدوب قرا فمكناس ومن بعد كمل ففاس وتما تعلم لعربية و الشرع و لأداب و التاريخ،وماشي بعيد فالجوامع ديالهوم فاش تعلم تانضامت و لبلاغة و فن لكلام . وهوا براصو هضر على فاس وقال عليها :

"الطبخ و الرمح في فاس و العلم والدين فيها

لاعيب يتقال في فاس مكمولة فكل جيهة"

أما على فن لكلام قال:

"كسبت فالدهر معزّة

وجبت كلام رباعي "

فداك الزمان كانو الكوراما دلمدينة كايجودو على الطلبة الجداد بالشعير و لݣمح و لفاكية... وهادشي كان كايموتيفيهوم باش يخدمو مزيان و يجتاهدو فلقراية ديالهوم و يجيبو لعلوم ولمجدوب مانساش خيرهوم وقال على هاد الناس :

"اللي يحب الطلبة نحبوه °°° ونعملو ليه فوق الراص عمامة

واللي يكره الطلبة نكرهوه °°° حتال يوم لقيامة"

محاينو

لمجدوب كان كايرحل بزاف فعلى حساب مݣال حج لبيت الله سبعة ديال لحجات، وهادشي كايبين لبركة و لكرامات ديال هاد السيّد اللي فزمانو كان لمغريب مشتت وفيه لفوضى من بعد ماطاحت ونهارت الدولة لوطاسية و لحالة ديال السيبة و لبلبالة سيرتو ففاس اللي كانت لعاصمة دلوطاسيين ديك الساع. كيما عاش واحد لوقت فعمرو فلعهد ديال الإمبراطورية الشريفة السعدية ولايني توفى فعام 1568م يعني عشر سنين من بعد موتو لمغاربة غايشهدو على أكبر مطايفة فالتاريخ دلمغريب و اللي هيا لمطايفة دواد لمخازن و اللي بسبابها لمغريب غايطراو ليه فيراجات فكرية ؤ روحية كبيرة. أما ماديا فكان لمجدوب كايعيش لمعاناة كايتحسر على قلة لعوين و لمادة زيد عليه لبليات اللي جاوه فاللخرديال حياتو فاش جاه لعمى و الصمك(مابقاش كايسمع) و لعيا اللي كان فيه:

وهادشي غانحسو بيه فهاد لبيوتا اللي ݣال فيهوم :

"مثلت روحي بلهدهود °°° :فكل شجرة ينادي

يعيط يا قلة الجيب °°° ياخروجي من بلادي"

فهنايا كان كايشبه راصو بالهدهود حيت قليل فاش كايتشاف وكايتخبا بين الشجار باش مايشوفو حتا حد وماكايزݣاش فواحد لغصن ولايني كايدوز من شجرة لخرا باش يقلب على رزقو .أما بالنسبة للمحاين الداتية ديالو قال عليها :

"عميت و صميت °°° وخفيت بعد الرزانة

واش كانون عاماين °°° نتسنى فيه السخانة

قلبي جا بين لمعلم و الزبرة °°° ولحداد مشؤوم مايشفق عليه

يردف ليه الضربة على الضربة °°° وإلا برد يزيد النار عليه"

غير شويا من بزاف دلمحاين اللي عاشها فحياتو زيد عليه الضلم و لحݣرة و لغش فزمانو، وكانت هضرتو شاهدة على الناس ديك الساعات فاش ݣال عليهوم :

"اللفت ولات شحمة°°° وتباع بالسوم لغالي

فلقلوب مابقات رحمة°°° شوف يا حالي يا لعالي

الريح و السحاب رشات و الغيم ضلام عليا °°°جيت نقول كلام لحق واللوم ولا عليا"

(السوم کلمة برانية وكاتعني ثمن أولا لمبلغ وكاتقابلها فلفرانساوية :Somme و النݣليزية :Sum).

ولايني واخا ݣاع هاد لمعاناة ولعداب كان لمجدوب كايعطينا قدوة فالصبر وهادشي اللي كايبينو هوا فبزاف دلمرات فاش قال :

لا تخمم لا تدبر °°°لا ترفد لهم ديما

لفلك ماهوا مسْمّر °°° ولا الدنيا مقيمة

وكايقصد من هنا باللي لحوال كاتبدل ومكاتدومش الدنيا دوارة بحال لفلك(لكون) ، و لهم و لغم ضروري مايمشيو شي نهار ويجي بلاصتهوم لخير و لخمير .وغانلقاوه عاوتاني فبزاف ديال لبيوتا كاينصح بنادم باش يصبر على لمشاكيل و لهموم ديالو :

"نرقد على الشوك عريان °°° و نضحك للي جفاني

نصبر لتعوس ليام °°° حتى ياتي زماني"

"مكتوب ربي نوديه °°° و الصبر واجب علينا

واللي نحبو نخـــــــــليه °°° ياناس ما اعتاها غبينة

ياصاحبي كون صبار °°° صبر على ماجرى لك

رقد على الشوك عريان °°° حتا يطلع نهارك

شنو دار؟

من بين أهم لحوايج اللي خلا لينا لمجدوب هوا ليبداع ديالو ف"الرباعيات" اللي هوا واحد نوع من تانضامت ديال الشيعر بان عند لفرس وهوما اللي بدعو فيه بزاف عكس لعرب اللي مكانوش مدينها فيه. والشيعر الرباعي هوا اللي كايكونو فيه ربعة ديال لقسام أولا شطورا وجوج بيوتا. وهادشي كايبان فهاد لبيوتا الجايين:

شافوني كحل مغلف °°° يحسبوا مافيا ذخيرة

وأنا كي لكتاب لمؤلف°°° فيه منافع كثيرة.

وهادشي غاتلاحضوه فݣاع لبيوتا اللي تحطو فهاد لارتيكل.

هاد الرباعيات تجمعو فديوان سيدي عبد الرحمان لمجدوب،

قوالو

على لمحبة

حبيبك حبو °°°والشر اللي بينكم خبيه

الا حبك حبو كتر°°°والا تركك لا تسال عليه

اللي حبك حبو كتر°°°واللي باعك لا تشريه

اللي بغانا نحبوه°°°على محبة الله مانلوموه

اللي حبك حبو°°°وفمحبتو كون صافي

واللي كرهك لاتسبو°°°وخليه يلقى لعوافي

مايفسد بين لحباب°°°غير النسا و الدراهم

على وزون لكلام

الصمت حكمة°°°ومنو كاتفرق لحكايم

لومانطق ولد الأيمة°°°مايجيه ولد لحنش هايم

ضحك ولعب معا الناس°°°فمك متن ليه لجامو

اللي يركب إيتهب°°°طرز الدهب فلجامو

اللي يدور يقول لحق°°°يدير هراوة فحزامو

الزيت يخرج من الزيتونة°°°و لفاهم يفهم لوغات الطير

اللي ماتخرج كلمتو ميزونة°°°يجحّرها فعقلو خير

لاتسرج حتا تلجم°°°واعقد عقدة صحيحة

لا تكلم حتى تخمم°°°لاتعود ليك فضيحة

الصمت الذهب لمشجر°°°ولكلام يفسد لمسالة

الا شفتي لا تخبر°°°والا سولوك قول لالا

راح داك الزمان وناسو°°°وجا هاد الزمان بفاسو

وكل اللي يتكلم بلحق°°°كسرولو راسو

كل دواي مسوس°°°يجيب لهليكة لراسو

ويستاهل ضربة بموس°°°حتا يبانو ضراسو

الشر مايضلم حد°°°غير من جبد على راسو

على لعيالات

سوق النسا سوق مطيار°°°يا الداخل رد بالك

يوريو ليك من الربح قنطار°°°و يديو ليك راس مالك

لا فالجبل واد معلوم°°°ولا فالشتا ريح دافي

لا فلعدو قلب مرحوم°°° ولا فالنسا عهد وافي

ماتاخدش لمرا لمعفونة°°°تتعاون هيا و الزمان عليك

بالك من لمرا لمعفونة°°°تاتلاقا هيا و الزمان عليك

مزين النسا بضحكات °°°لوكان فيها يدومو

لحوت يعوم فلما°°°وهوما بلا ما يعومو

بهت النسا بهتين°°° ومن بهتهم جيت هارب

يتحزمو باللفاع°°°ويتخللو بلعݣارب

حديت النسا يونس°°°ويعلم لفهامة

يديرو شركة من الريح°°°ويحسنو ليك بلا ما

لايعجبك نور الدفلة°°°فلواد داير ضلايل

لايعجبك زين الطفلة°°°حتى تشوف لفعايل

كيد النسا كيدين°°° ومن كيدهم يا حزوني

راكبة على ضهر السبع°°° و تقول ألحدأة ياكلوني

على فعلان لخير

يازارع لخير حبة°°°يازارع الشر ياسر

مول لخير ينما°°°ومول الشر خاسر

فاعل الشر مقبوض°°°فاعل لخير سالك

بالك بالك°°°بدراهمك جبتهالك

من جاور لجواد جاد بجودهم°°°ومن ناسب لأرذال خاب ضناه

ومن جاور قدرة تطلى بحومها°°° ومن جاور صابون جاب نقاه

فاعل لخير هنيه°°°بلفرحة و الشكر ديما

وفاعل الشر خليه°°°فعايلو يرجعو ليه غريمة

على لمادة

الشاشية تطيع الراس°°°الوجه تضويه لحسانة

لمكسي يقعد معا الناس°°°لعريان نوضوه من حدانا

لخبز يالخبز°°°ولخبز هوا ليفادة

لو ماكان لخبز °°°مايكون لا دين لا عبادة

حوست شعاب و عرقوب°°°وحوست غرب الزناقي

لمال قطعة من القلب°°°جربتها من عناقي

ضربت كفي لكفي°°°وخممت فلأرض ساعة

صبت قلة الشي ترشي°°°وتنوض من الجماعة

الرجل بلا مال محݣور°°°فالدنيا مايسواشي

لمشرار كي الدلو لمقعور°°°يوصل لما ويرجع بلا شي

على لمكتاب

الدنيا يسميوها ناقة°°°الا عطفات بجليبها ترويك

والا عصفات ماتشد فيها لباقة°°°يتكفح واخا يكون فيديك

مكتوب ربي نوديه°°°والصبر واجب علينا

واللي نحبو نخليه°°°يا ناس ماكبرها غبينة

والاكان السعد يتنجر من عود°°°تنجر ستين عود من غير عودي

والا كان السعد منك يامسعود°°°يا سقام السعود سقم لي سعدي