بيرطراند راسل

بيرطراند أرثر ويليام راسل (مزيود ف 18 ماي 1872، مات ف 2 فبراير 1970) هوّا فيلسوف، ماطيماتيسيان، ؤ عالم موسوعي بريطاني. لأعمال ديالو كانو سيرتو ف لفلسفة، لماط ؤ لّوجيك، ؤ كان عندهوم تأتير كبير على نضرية د لمجموعات، لّانݣويستيك، دكاء صّطيناعي، صيونص د لإدراك، لانفورماتيك، ؤ بزاف د لفروع د لفلسفة تّحليلية بحال لفلسفة د لماط، لفلسفة د لّوغة، لإيپيستيمولوجيا، ؤ لميطافيزيك. كان راسل أيضا موتقاف عومومي، توارخي، ناقد جتيماعي، ناشط سياسي، ؤ خدا لجايزة د نوبل د لأداب ف 1950.

راسل كيتّعتابر من أعضم لعولاما د لّوجيك ف لقرن 20، ؤ واحد من لمؤسسين ديال لفلسفة تّحليلية، معا فلاسفة خرين بحال ݣوطلوب فريݣي، جورج إدوارد مور، ؤ تلميدو لودڤيك ڤيتݣنشطاين. راسل ؤ مور كانو لقادا د تّورة لفيكرية لبريطانية على لمدراسة لميتالية، ؤ معا لؤستاد ديالو ألفريد نورث وايتهاد، راسل ألّف لكتاب د پرينكيپيا ماطيماتيكا ؤلا لمبادئ د لماط، لي كانت أهم محاولة ل ختيزال لماط كامل ف لقواعد د لّوجيك.

راسل كتب حتا ف مواضيع جتيماعية ؤ سياسية، ؤ كيتقارن بزاف ب ڤولطير، حيت بجوج كانو عندهوم كتابات فلسافية عميقة ؤ ف نفس لوقت كانت عندهوم شعبية كبيرة عند جمهور عريض بسباب لكتابات ديالهوم لي موجّهة ل لعامة. راسل عتابر لحرب لعالمية تّانية ضد ألمانيا نّازية بلي كانت أهون شّرور، ؤ كان ضد دّيكتاتورية سّطالينية، ؤ كان من لموساندين ديال تحياد سّلاح نّووي. راسل بقا ناشط كا موتقاف عومومي حياتو كلها حتا مات على عمر د 97 عام.

حياتو ؤ لكاريير ديالو

برطراند راسل تزاد ف 1872، ف ريڤنزكروفت ف تريليك، إقليم مونماوثشر، ف شّرق د ويلز. على عمر د عاماين ماتت ختو ؤ مو، ؤ عاماين مورا داكشي ف 1876 مات بّاه. غادي ياخدو جدّو لورد دجون راسل، لي كان واحد لوقت رائيس د لووزارا ف بريطانيا، باش يتربّا معاه. جدّو غادي يموت حتا هوّا مورا عاماين، ؤ غادي تّكلف جدّاتو ب تّربية ديالو ف لوندريس. ف 1883، برطراند بدا يتعلّم تّسطار من عند خوه فرانك. ف 1890 بدا يقرا ف جامعة ترينيتي كوليدج، ؤ تماك تلاقا ب ؤستادو ألفريد نورث وايتهاد.

ف 1893 خدا ليصونص ديالو ف لماط، ؤ عام مورا داكشي تعيّن أطاشي ديپلوماسي د بريطانيا ف پاري، ؤ تجوج ب أليس پيرصال سميث. ف 1895، بدا كيقرا ف جامعة برلين. ؤ ف 1896 ولّا موحاضير ف مدراسة لندن د لقتيصاد، ؤ دار موحاضرات ف لميريكان ف جامعة دجونز هوپكينز ؤ جامعة برين ماور. ف 1899 بدا كيقري ف ترينيتي كوليدج. ف 1901، ولّا موحاضير ف جامعة كامبريدج، ؤ ف نفس لعام كتاشف لپاراضوكس د راسل. ف 1905 راسل طوّر أهم موساهمة ديالو ف لّانݣويستيك، لي هيّا نّضرية د تّوصيفات.

راسل ترشح تلاتة د لمرات ل لبرلمان نّݣليزي ف 1907، 1922 ؤ 1923 ؤ فشل فيهوم كاملين. طلّق ؤ تجوج شحال من مرة، زار بزاف د لبلدان منها روسيا، شّينوا، جّاپون ؤ ؤسطراليا، ؤ عطا موحاضرات ف جامعات ف فرانسا، نّݣليز ؤ لميريكان. خدا شلا جوايز، منها ميدالية دي مورݣان ف 1932، ميدالية سيلڤيستر ف 1934، جايزة كالينݣا ف 1957، جايزة لقدس ف 1963 ؤ جايزة نوبل د لأداب كا عتيراف ب كتاباتو لمتنوعة ؤ لهامّة لي كاتنتاصر ل لقيام لإنسانية ؤ ل لحرية د لفيكر.

لأعمال ديالو

برطراند راسل عندو عشرات د لأعمال منشورين مابين 1896 ؤ 1969، من بينهوم:

• German Social Democracy [دّيموقراطية شّتيراكية لألمانية]. 1896.
• An Essay on the Foundations of Geometry [مقالة على سّاس د تّسطار]. 1897.
• A Critical Exposition of the Philosophy of Leibniz [تقديم نقدي ل لفلسفة د لايبنيتس]. 1900.
• The Principles of Mathematics [لمبادئ د لماط]. 1903.
• Philosophical Essays [مقالات فلسافية]. 1910.
• Principia Mathematica [پرينكيپيا ماطيماتيكا]. 1910–1913.CS1 maint: date format (link)
• The Problems of Philosophy [لپروبليمات د لفلسفة]. 1912.
• Our Knowledge of the External World as a Field for Scientific Method in Philosophy [لمعرفة ديالنا ب لعالم لبراني كا مجال ديال لمنهج لعلمي ف لفلسفة]. 1914.
• Justice in War-time [لعدالة ف وقت لحرب]. 1916.
• Introduction to Mathematical Philosophy [تقديم ل لفلسفة د لماط]. 1919.
• The Analysis of Mind [تحليل لعقل]. 1921.
• The Problem of China [لموشكيلة د شّينوا]. 1922.
• Free Thought and Official Propaganda [لفيكر لحور ؤ لپروپاݣاندا رّسمية]. 1922.
• The ABC of Atoms [لّيفبا د دّرات]. 1923.
• The ABC of Relativity [لّيفبا د نّسبية]. 1924.
• What I Believe [باش كانآمن]. 1925.
• On Education, Especially in Early Childhood [على تّعليم، سيرتو ف لبدية د صّغُر]. 1926.
• The Analysis of Matter [تحليل لمادة]. 1927.
• Why I Am Not a Christian [علاش أنا ماشي مسيحي]. 1927.
• Selected Papers of Bertrand Russel [مقالات مختارة ديال برطراند راسل]. 1927.
• Marriage and Morals [جّواج ؤ لأخلاق]. 1929.
• Education and the Social Order [تّعليم ؤ نّيضام جّتيماعي]. 1932.
• Freedom and Organization, 1814–1914 [لحرية ؤ تّنضيم]. 1934.
• Religion and Science [دّين ؤ صّيونص]. 1935.
• Which Way to Peace? [إينا طريق ل سّلام]. 1936.
• Power: A New Social Analysis [لقوة: تحليل جتيماعي جديد]. 1938.
• An Inquiry into Meaning and Truth [تحقيق ف لمعنى ؤ لحاقيقة]. 1940.
• The Bomb and Civilisation [لقنبولة دّرية ؤ لحضارة]. 1945.
• A History of Western Philosophy and Its Connection with Political and Social Circumstances from the Earliest Times to the Present Day [تاريخ لفلسفة لغربية ؤ علاقتها ب ضّوروف سّياسية ؤ جّتيماعية من زّمانات لّولة حتال دابا]. 1945.
• Human Knowledge: Its Scope and Limits [لمعرفة د بنادم: لإمكانيات ؤ لحدود ديالو]. 1948.
• Authority and the Individual [سّلطة ؤ لفرد]. 1949.
• New Hopes for a Changing World [أمال جديدة ل عالم كيتبدل]. 1951.
• The Impact of Science on Society [تّأتير د صّيونص ف لمجتمع]. 1952.
• Satan in the Suburbs and Other Stories [شّيطان ف ضّواحي ؤ قيصاص خرين]. 1953.
• Human Society in Ethics and Politics [لمجتمع د بنادم ف لأخلاق ؤ سّياسة]. 1954.
• Logic and Knowledge: Essays 1901–1950 [لّوجيك ؤ لمعرفة: مقالات 1901 تال 1950]. 1956.
• Understanding History and Other Essays [لفهم د تّاريخ ؤ مقالات خرين]. 1958.
• The Will to Doubt [لإرادة د شّك]. 1958.
• Common Sense and Nuclear Warfare [تّخمام لمشاع ؤ لحرب نّووية]. 1959.
• My Philosophical Development [تّطور لفلسافي ديالي]. 1959.
• Wisdom of the West: A Historical Survey of Western Philosophy in Its Social and Political Setting [لحكمة د لغرب: مسح تاريخي ديال لفلسفة لغربية ف لخلفية جّتيماعية ؤ سّياسية ديالها]. 1959.
• Bertrand Russell Speaks His Mind [برطراند راسل كيهضر بصراحة]. 1960.
• Fact and Fiction [لواقعة ؤ لخيال]. 1961.
• Has Man a Future? [واش بنادم عندو موستقبال؟]. 1961.
• Essays in Skepticism [مقالات على تّشكيكية]. 1963.
• Unarmed Victory [نتيصار بلا سلاح]. 1963.
• On the Philosophy of Science [على لفلسفة د صّيونص]. 1965.
• War Crimes in Vietnam [لجرايم د لحرب ف ڤيطنام]. 1967.
• The Autobiography of Bertrand Russell [لوطوبيوݣرافيا د برطراند راسل]. 1951–1969.CS1 maint: date format (link)

لمزاود

• لكتوبا د بيرطراند راسل ب ؤديو فابور
• لكتوبا د بيرطراند راسل فابور (تيكست)