لفيديرالية د روسيا ولا ليتيحاد الروسي ولا روسياالروسية Российская Федерация، روسيسكايا فيديراتسيا) هي واحد لبلاد جات فالشمال د آسيا ؤ شّمال شّرقي د أوروپا. روسيا هي أكبر بلاد ف لعالم من جيهت لمساحة، اللي هي كتر من 17 مليون كم²، و تيسكنو فيها شويا كتر من 146 مليون د الناس. حيت روسيا بلاد كبيرة بزاف، كيحدًوها بزاف د لبلدان من لغرب ومن لجنوب. هاد لبلدان هوما: النورڤيج، فينلاندا، إسطونيا، لاتڤيا، ليتوانيا، پولونيا، بيلاروسيا، أوكرانيا، جورجيا، آزيربايدجان، كازاخيستان، الشينوا، مونݣوليا و كوريا الشمالية.

روسيا

Россия (ru)
Российская Федерация (ru)

نشيد النشيد الوطني الروسي (27 دجنبر 2000)

لعاصيمة موسكو
الساكينة
شحال دالسكان 146,804,372 (2017)
السمية ديال السكان روسي، روسية، رواسا, روسيات
اللوغات الرسمية روسية
متوسط ديال لعمر 71.59293 (2016)
لجغرافيا
لميساحة 17,075,400 كم²
لقمة لعالية إلبروس (5,642 م)
لبلاصة الطايحة بحر قزوين (−28 م)
تاريخ
توارخ مهمة ضم الاتحاد الروسي للقرم (18 مارس 2014)
Monetary reform in Russia, 1998 (1 يناير 1998)
Monetary reform in Russia, 1993
الأزمة المالية الروسية 1998 (1998)
الحرب الشيشانية الأولى
تخلف عن التسديد (17 غشت 1998)
جتياح روسي د ؤكرانيا د 2022
economic sanctions against the Russian Federation
أعياد يوم روسيا (12 يونيو)
يوم المدافع عن أرض الآباء (23 فبراير)
النهار لعالمي د لمرا (8 مارس)
عيد شغل (1 ماي)
عيد الربح على النازية (9 ماي)
يوم الوحدة الوطنية (4 نونبر)
راس لعام (1 يناير)
لإدارة
نضام الدولة super-presidential republic
رئيس روسيا ڤلاديمير پوتين
رئيس وزراء روسيا ميخائيل ميشوستين
لبرلمان الجمعية الاتحادية الروسية
سلطة لقضائية لكبيرة المحكمة الدستورية لروسيا الاتحادية
لقتيصاد
الناتج الداخلي لكامل 1,836,892,075,548 $ (2021)
مؤشر التنمية لبشرية 0.822 (2021)
لفلوس روبل روسي
معلومات خرة
توقيت ديال لبلاد ڭرينيتش +2
رمز لبلاد RU
رمز لانترنيت ‎.ru‎، .рф، .рус و .su
رمز التيليفون +7
نماري د ليرجونس 112، 01، 02، 03، 101، 102 و 103
جيهة د صوڭان ليمن
السيت الرسمي gov.ru


لجمهورية د روسيا هي فيديرالية فيها 85 كيان تيحادي (كيتسماو أوبلاسط) بحال لجمهوريات لمحلية ولا لأقاليم، اللي عندها لبرلمان و لحوكومات لمحلية ديالها. لعاصمة د روسيا هي موسكو، وهي لمقر د لحكومة لمركزية. لفلوس ديالها هي الروبل، الرئيس ديالها هو ڤلاديمير پوتين.

روسيا هي واحد لبلاد اللي أترات فلمسار د لعالم من بزاف د الجوايه. فلقرن 18 كانت لإمبراطورية د روسيا كبيرة لدرجة تعتابرات تالت أكبر إمبراطورية فالتاريخ.

ف عام 1922، كانت روسيا من لمؤسسين ديال ليتيحاد السوڤياتي، اللي كان هو لمنافس د ميريكان وقت لحرب لباردة. ف 1991 طاح ليتيحاد السوڤياتي وخرجو منو بزاف د لجمهوريات، منها جمهورية روسيا ليتيحادية كيما كانعرفوها دابا.[1]

روسيا كاتّعتابر من بين لبلدان لي عندها پوطونسييل تولي قوة عوضما، مكلاصية 52 ف مؤشر التنمية البشرية، ؤ 11 ف نّاتج دّاخلي لإجمالي، ؤ 6 ف نّاتج دّاخلي لإجمالي على حساب لقدرة د شّرا. ؤ معتارف بيها كا قوة نووية، ؤ عندها أكبر صطوك ديال سّلاح نّووي ف لعالم، ؤ تاني أقوى جيش ف لعالم.

لأصل د سّمية بدل

كلمة "روسيا" جات ف لأصل من سّمية ديال شعب "رّوس" لي كانو جماعة د نّورديين هاجرو من لمنطقة د سّويد ديال دابا، مابين لقرن 8 ؤ لقرن 11 ميلادي، ؤ أسسو دولة كيسمّيوها تّوارخيا "روس لكيڤية". هاد دّولة تقسمات ل دويلات، لي دابا كانلقاو ف ؤكرانيا ؤ بيلاروسيا، ؤ وحدة منهوم لي كانت كاتسمّا Русская земля، روسكايا زيمليا، تطورات ل روسيا لي كانعرفو دابا. ملي تأسسات دّوكية لكبيرة د موسكو، بعض لمناطق لي كانت تابعة ل إمارة روس لكييڤية بدات كاتخدّم سّمية ليونانية ديال لبلاد د رّواسا، لي هيّا Ρωσσία (روصيا)، ؤ هاد لموصطلح تعمم ؤ بدا كيتخدّم على لبلاد لي كانعرفوها دابا ب روسيا.[2]

لجغرافيا ؤ تّضاريس بدل

روسيا هيّا لبلاد لي عندها أكبر تيساع ف لعالم، لي كيمتّل ضّوبل د تّيساع د كانادا، لي جات ف رّتبة تّانية. ؤ كاتمتد على شمال أسيا كاملو، ؤ شّرق د ؤروپا، على 11 منطقة زمانية، ؤ فيها تنوع كبير ديال تّضاريس ؤ لمشاهد طّابيعية، من صّحاري ل سهوب ل لغابات ؤ توندرا أركتيكية. روسيا كيدوز منها أطول واد ديال ؤروپا لي هوّا واد لڤولݣا ؤ فيها أكبر ضاية ف نفس لقارة، لي هيّا ضاية لاضوݣا، ؤ أعمق وحدة ف لعالم لي هيّا ضاية بايكال، ؤ تسجلات فيها أبرد درجة د حرارة ف لعالم، برا د لمناطق لقطبية.[1]

سّكان بدل

روسيا فيها تنوع إتني كبير بزاف. أغلبية د سّكان هوما رواسا ب لإتنية، ولاكين كاينين كتر من 120 إتنية خرة، لي كيهضرو ب بزاف د لّوغات ؤ كيتبعو أديان ؤ تقاليد تقافية مختالفة. أغلبية د سّكان عايشين ف طّرف لؤروپي د روسيا، سيرتو ف جوايه موسكو. كاينين بزاف د رّواسا ف طّرف لأسياوي حتا هوّا، ؤ من لقرن 17، كانو ديجا ناس ناطقين ب رّوسية كيهاجرو جيهت شّرق ل سيبيريا، شّي لي خلا مدون ڤلاديڤوسطوك ؤ إيركوتسك يزداهرو دابا.[1]

تّاريخ بدل

تال عام 1000 بدل

بزاف د شّعوب دازو من لمنطقة لي فيها دابا روسيا، من عصور قبلتاريخية، سيرتو من لألفية تّانية قبل لميلاد، بحال شعوب هندوؤروپية، شعوب ؤرال-ألطائية ؤ غيرهوم. ف لعصور لقديمة، بانو مستعمرات إيرانية ؤ يونانية ف لمنطقة لي دابا كاينة ف ؤكرانيا. هاد لإمبراطوريات على ما كيبان ستاغلو لغابات ف لمنطقة مابين جبال لؤرال ؤ واد لڤولݣا ل أغراض قتيصادية، ولاكين ماكيبانش بلي خلاو شي أتار موهيمين تماك. مابين لقرن 4 ؤ لقرن 9 ميلادي، لقبايل د لهان، لأڤار، لݣواوطا ؤ لماݣيار (لهنݣاريين لقدام)، دازو من هاد لمناطق، ولاكين حتا هوما ماكيبانش بلي دارو شي تأتير على سّلاڤيين لي كانو بداو كينتاشرو ؤ كيستاقرو تماك. ف لقرن تّاسع، ب تّأتير د لمجي ديال تجار من شمال ؤروپا ؤ شّرق لأوسط، غادي يطراو تحولات موهيمة ف لمجتمع سّلاڤي على لمستويات لقتيصادية، جّتيماعية ؤ سّياسية. بزاف د هاد تّجار كانو خدامين ف مؤسسات تيجارية لي لمقر ديالها كان ف شمال إيران ؤ شمال إفريقيا.[1]

ف جوايه 830 كيبان أول حاكم ديال رّوس، لي أصلهوم من سكانديناڤيا، سيرتو سّويد، ؤ لي كان لّقب ديالو خاݣان ؤلا خان ؤ دكروه مصادر إسلامية ؤ غربية. هاد دّولة لي كانت ف جوايه مدينة ريازان لي كاينة دابا ف روسيا، تقدر تّعتابر لجدة لّولة ديال روس لكيڤية ؤ من بعد ديالت روسيا لحالية. رّوس لقدام معا جماعات سكانديناڤية خرة غادي يوسّعو تيريطوار ديالهوم، ؤ غادي يديرو هجومات على طّرقان نّهرية لي كيدّيو ل إسطانبول ؤ بغداد. هاد سّكانديناڤيين كانو معروفين ب سميت لڤارانݣيين، لي كانو كينتاميو ل قبايل ؤ فاميلات مختالفة ؤ متصارعة بيناتها. واحد من أهم شّخصيات د لڤارانݣيين هوّا أمير سميتو روريك، لي أسس سلالة لي حكمات بزاف د مناطق ديال سّلاڤيين شّرقيين حتال 1598. شّقوفا د لفلوس لي أصلهوم من شّرق لأوسط، ؤ لي وصلو تال سكانديناڤيا كيدلو على تيجارة مزداهرة، ؤ كاينين أدلة مكتوبة ديال هوجومات د لڤارانݣيين على إسطانبول ؤ شمال لقوقاز، ؤ توسعات لي طرات سيرتو مابين عوام 900 ؤ 930.[1]

مابين عوام 930 ؤ 1000، غادي يسيطرو ڤارانݣيين من منطقة نوڤݣورود على سّلطة، ؤ غادي يطورو تّيجارة ف لمنطقة مابين لبلطيق ؤ لبحر لكحل. دّور ديال لڤارانݣيين ف تأسيس إمارة روس لكيڤية محط نيقاش مابين تّوارخيا. تّوارخيا رّواسا كيميلو ل تقليل ؤلا ݣاع تجاهل دّور ديالهوم، ف لوقت لي تّوارخيا لغربيين كيميلو ل موبالغة دّور ديالهوم.[1]

إمارة كييڤ بدل

 
إمارة روس لكييڤية ف لقرن 11

ف 862 ميلادية، كان لأمير روريك، من شعب رّوس سّكانديناڤي، تّنتاخب حاكم ديال نوڤݣورود. ؤ ف 882، ؤليݣ لي حكم موراه فتح مدينة كييڤ، لي كانت قبل من داكشي كاتخلص ضرايب ل لخازار. إيݣور ولد روريك معا ولدو سڤياطوسلاڤ غادي يوسعو تيريطوار ديال رّوس، ؤ غادي يقضيو على مملكة لخازار ؤ يديرو هجومات عسكارية على لإمبراطورية لبيزنطية ؤ لإمبراطورية لفارسية. سڤياطوسلاڤ مات صغير على 29 عام، ؤ لمملكة غادي تعرف صيراع مابين ولادو، لي غادي تسالي ب لموت ديال جوج منهوم، ؤ طلوع ولدو ڤلاديمير لّول كا أمير ديال إمارة روس لكييڤية. لفترة د لحكم ديال ڤلاديمير ؤ ولدو ياروسلاڤ لحكيم كاتّعتابر لعصر دّهبي ديال مدينة كييڤ. لإمارة بدات كاتضعاف بسباب صّيراعات دّاخلية من لقرن 12، ؤ طاحت ف لقرن 13 معا لهجومات ديال لمنݣول.[3]

ڤلاديمير لّول كان لعب دور كبير ف تنصير سّلاڤيين تحت لكنيسة لؤرطودوكسية شّرقية، ؤ أسس أول قانون سلاڤي شرقي. ب طّيحة ديال كييڤ ف يد لمنݣول، غادي يستاقلو مناطق من إمارة روس لكييڤية، من بينهوم جمهورية نوڤݣورود لي غادي تبقا مزداهرة، ولاكين وخا داكشي غادي تبقا تحت تّهديد لمنݣولي، ؤ كاتخلص ضّرايب ل لمنݣول حتال 1480.[3] حدا جمهورية نوڤݣورود، غادي تبان بشوية بشوية واحد لإمارة مستاقلة سميتها دوكية ڤلاديمير، لي غادي تولي وحدة من لمنافسين سّياسيين ؤ تّيجاريين ديالها، ؤ لي فيها غادي تطور مدينة جديدة سميتها موسكو.[4]

دّوكية لكبيرة د موسكو بدل

ف لوقت د لفوتوحات لمنݣولية، كانت موسكو مدينة تيجارية ماعندهاش أهمية كبيرة كاتّواجد ف لهامش ديال منطقة "دوكية ڤلاديمير". لموضع ديالها عطاها حيماية نسبية من لهجومات د لمنݣول، ؤ لويدان لي حداها عطاوها أكصي ل منطقة لبلطيق، لبحر لكحل ؤ لقوقاز. من لّخر د لقرن 13، توالاو على لحكم ديال لإمارة جّديدة لي لعاصيمة ديالها موسكو، ؤ كاتسما دّوكية لكبيرة د موسكو، ؤلا موسكوڤيا، عاداد ديال لحكّام من سّلالة د روريك. هد لحكّام، من دانيل أليكساندروڤيتش ؤ ولدو إيڤان لّول، كان عندهوم طموح كبير باش يطلّعو لأهمية د لمدينة ؤ لإمارة ديالهوم. إيڤان لّول دار تّيفاق معا لمنݣول لي عطاه متيازات خاصة ضد لمنافسين ديالو. ف لقرن 14، لؤمارا د موسكوڤيا وسعو تيريطوار ديالهوم، سيرتو إيڤان تّالت لعاضيم لي فتح لمناطق د تڤير ؤ نوڤݣورود، ؤ ضم أجزاء منهوم ل لإمارة ديالو.[4]

حتال لعهد ديال إيڤان تّالت، كانو لؤمارا ديال سلالة روريك حكّام رئيسيين ديال موسكوڤيا، ولاكين ديما ف إطار تحالفات، ؤ سّلطة ديالهوم كانت قابلة ل نّيقاش. ولاكين إيڤان تّالت غادي يبدّل هادشي، فاش غادي يفرض سّلطة ديالو على لؤمارا لخرين د موسكوڤيا، ؤ غادي يخلّيهوم يعتارفو بيه ؤ ب لخولافا ديالو كا حكّام ؤطوقراطيين ف جميع لميادين (عسكارية، سياسية، قتيصادية) ؤ غادي يكون أول حاكم روسي كياخد لّقب ديال "تصار"، لموقابيل ديال قيصر ؤلا إمبراطور، ؤ "حاكم د رّواسا كاملين".[4]

روسيا تّصارية بدل

لّقب د تصار غادي يتوكّد فاش إيڤان تّالت تجوج ب صوفيا پالايلوجينا، لي كانت أميرة بيزنطية ؤ بنت خو لإمبراطور لبيزنطي لّخراني، ؤ لقصر د لحاكم لموسكوڤي غادي ينقل ؤ يبدا يخدّم جميع طّقوس، لموصطلحات ؤ رّموز لإمبراطورية لبيزنطية. حفيدو إيڤان رّابع لخلاع غادي يتبّت لّقب د تصار، ب موباركة رسمية ديال لكنيسة لؤرطودوكسية. سّقوط ديال لقسطنطينية (دابا إسطانبول) ف يد لعتمانيين خلا تّصار د موسكوڤيا لحاكم لوحيد لي عندو أحقية ف لّقب ديال إمبراطور ف لعالم لمسيحي، علّاقل من لمنضور ديال لكنيسة لؤرطودوكسية. موسكو براسها ولات كاتسمّا "روما تّالتة" (بعد روما ؤ لقسطنطينية)، ؤ هاد تّصور غادي يكون عندو تأتير كبير على تّقافة د روسيا ؤ لوجدان د رّواسا ف لقرون لي جاو.[4]

معا لّخر د لقرن 16، كانت موسكوڤيا توسّعات شرق جبال لؤرال. ولاكين لحروب ديالها ضد تحالف ديال مملكة پولونيا، دّوكية لكبيرة د ليتوانيا، مملكة سّويد ؤ لمملكة دّانونورڤيجية، لي تسمّات "لحروب لّيڤونية"، أدّات ل إضعافها، ؤ سقوط سّلالة د روريك، ؤ طّلوع ديال سلالة حاكمة جديدة هيّا سلالة رومانوڤ.[5]

لفاميلة د رومانوڤ كانت طلعات ل لواجهة ملي تناسبو معا سّلالة د روريك، ب جواج تّصار إيڤان رّابع لخلّاع ب أناسطازيا رومانوڤا. سّلالة د روريك غادي تحبس ملي مات فيودور لّول ف 1598، ؤ موراها غادي تنوض لفوضا ف لبلاد، ب تتابع ديال شحال من مدّعي د لحكم، أغلبية مدعومين من دوال خرين، بحال سّويد ؤلا پولونيا. ف 21 فبراير 1613، لمجلس لفيودالي رّوسي غادي يختار مخاييل رومانوڤ كا تصار د روسيا ؤ لحالة غادي تبدا تستاقر مرة خرة.[6]

هاد سّتيقرار كان سبابو سيرتو تّصاعد ديال لقوة د لكنيسة لؤرطودوكسية رّوسية، لي شي أفراد من رّومانوڤ كان عندهوم مناصب عالية فيها، ؤ لفعالية ديال لجهاز لإداري رّوسي لي كان خدّام مزيان حتا ف لفترات د لقلاقل.

موسكوڤيا بقات كاتزيد تّوسّع ف لقرن 17. ف لغرب شدّات ؤكرانيا لي كانت محتلاها پولونيا، ؤ ف شّرق وصلات لحدود ديالها ل لإمبراطورية شّينوية، ؤ سنات موعاهدات د سّلام معا بزاف د لبلدان. دخول ؤكرانيا تحت سّلطة د موسكوڤيا دخّل تّأتير لغربي على شلا مستويات، ف تّقافة، لمعمار، لأداب ؤ طّيكنولوجيا. تّصارات كانو سيرتو مهتمين ب طّيكنولوجيا لعسكارية.[4]

لإمبراطورية رّوسية بدل

 
تّوسعات ديال روسيا من عام 1300 تال 1945

ف 1721، تّصار پيوطر لعاضيم زاد ل راسو لّقب د إمبراطور، ؤ بدّل سّمية د لبلاد رسميّا من موسكوڤيا ل "لإمبراطورية رّوسية". وخا لإصلاحات لي بداها پيوطر لّول (لعاضيم) ردات روسيا من أقوى لبلدان ف ؤروپا، سّتيمرارية ديال نّيضام لفيودالي، لي كيخلي لقتيصاد معتامد بزاف على لفلاحة، ؤ كيخلي لفلاحين خدّامين بحال لعبيد عند نّوبالا، أدّا ل تزايد لفرق ف لقوة لقتيصادية ؤ سّياسية مابين روسيا ؤ ؤروپا لغربية، سيرتو مورا تورة صّيناعية.[7]

ف لعهد ديال تّصارينا كاطارينا تّانية، لي شدّات لحكم ف 1762 بعدما قتلات راجلها پيوطر تّالت، غادي تزيد تّوسع لإمبراطورية ف لغرب ؤ لجنوب. ف 1783، خدات كريميا، ؤ 4 سنين موراها ناضت حرب على كريميا مابين روسيا ؤ لإمبراطورية لعتمانية. لموعاهدة د جاسي ف 1792 عطات أراضي جديدة ل روسيا ف لجنوب، ولاكين ماحققاتش لهدف رّئيسي ديال كاطارينا تّانية باش تجرّي على لعتمانيين من ؤروپا، ؤ تعاود تبني لإمبراطورية لبيزنطية. ف لغرب، مملكة پولونيا كانت بدات كاتضعاف ف لقرن 18، ؤ روسيا خدات منها أراضي بحال ليڤونيا ؤ بيلاروسيا. معا حلول عام 1795، پولونيا كانت تّمحات من لخاريطة. كاطارينا حاولات تدير إصلاحات إدارية ؤ جتيماعية، ولاكين ف لّخر هاد لإصلاحات ماكملوش ؤ مابدّلوش لوضعية لميزيرية د لفلاحين رّواسا. ب لموقابيل، نّوخبة لحاكمة د روسيا ولّات عندها متيازات كبيرة، ؤ ولّات متأترة بزاف ب لغرب ؤ بعيدة ف سّتيل د لحياة ؤ تّصورات ؤ لعقلية ديالها على عامة شّعب. هادشي غادي يوجّد لمينصة سّياسية ؤ جّتيماعية ل تّورة لي غادي تنوض ف 1917، لي غادي تقضي على نّيضام تّصاري د روسيا، ؤ لي تسمات تّورة لبولشوڤية.[7]

لقرن 19 ؤ لبدية د لقرن 20 كانت فترة د لأزمة ف روسيا. من غير تّطور طّيكنولوجي لي عرفو لغرب ؤ لي تخلفات عليه روسيا، بداو كيبانو دوال قوية حداها، بحال ألمانيا لي وحّدها بيسمارك ف سّتينات د لقرن 19، جّاپون لي دازت من إصلاحات لمييجي د 1868 ؤ ولات دولة متقدمة، ؤ لميريكان لي خرجات من لحرب لأهلية شادة تيساع كبر ؤ قوية. وخا كانت روسيا إمبراطورية كبيرة لي باقة ف طور تّوسع، ماقدراتش تجينيري قدر كافي د لموارد لمالية باش لفينونسي صيناعة عصرية لي تقدر تجاري لبلدان لغربية ؤلا علّاقل تنافسهوم تيجارياً. روسيا كانت ف واحد دّيليما بحيت يلا مشات ف تطور قتيصادي سريع بزاف غادي يأدي ل مشاكل داخيلية ؤ تورات، ؤ تطور تقيل بزاف غادي يردها معتامدة قتيصادياً بشكل كبير على لبلدان لمتقدمة. وخا داكشي هاد لفترة عرفات تحولات موهيمة على لمستوى سّياسي ؤ لفيكري، ؤ حتا ف تّقافة ؤ لأداب ؤ لموسيقا ؤ لفن ؤ لعولوم.[8]

ف لبدية د لقرن 20، دخلات روسيا ف حرب معا جّاپون، لي غادي تأدي ل تورة داخيلية ف 1905. ؤ ف 1914 تجرّات بسباب تّحالفات ديالها ل لحرب لعالمية لولة، لي ماكانش مستاعدة ليها، شّي لي غادي يزيد يأزّم لوضعية ف لمجتمع رّوسي، ؤ غادي يأدّي ل تّورة رّوسية د 1917 لي معروفة ب تّورة لبولشوڤية. هاد تّورة بداوها ناشيطين يساريين لي كانو متأترين ب أفكار كارل ماركس ؤ قضات على نّيضام تّصاري ؤ لحكم ديال فاميلة رومانوڤ لي دام 3 د لقرون.[9]

تّورة لبولشوڤية ؤ لحرب لأهلية بدل

ف لبدية د 1917، نّيضام د روسيا كان على بونت يطيح. لملاين كانو ديجا ماتو ف لحرب لعالمية لّولة، ؤ لقتيصاد د لبلاد عانا بزاف ف هاد لفترة. ف فبراير 1917 (ف تّقويم ليولياني، ؤلا مارس 1917 على حساب تّقويم لݣريݣوري)، بزاف د رّواسا جّيّاع ؤ لعمّال د لوزينات بداو موضاهرات ؤ حتيجاجات بشكل تلقائي، بسباب نقص لماكلة ؤ لفيول. لقوات لموساعيدة لي تسيفطات باش تقمعهم رفضات باش تّيري على لموتضاهرين، ؤ كاين منهوم لي نضمّ ليهوم ݣاع. ف نفس لوقت، تّصار نيكولاس تّاني كان مشا ل جّبهة باش يقود لجيش رّوسي، ؤ خلّا مراتو لي كانت عندها شعبية طايحة بزاف تحكم بلاصتو، ؤ ووزارا لي ماعندهومش كفاءة. شي يامات مورما بداو لموضاهرات، جوج د لمجموعات مستاقلين بانو على سّاحة، لي كلا وحدة فيهوم كانت كاتدّاعي بلي كاتمتّل شّعب رّوسي: "لّجنة تّنفيدية"، لي هيّا مؤسسة خلقاتها دّوما (شّومبرة سّفلية د لبرلمان رّوسي)، ؤ كانت معارضة ل تّصار، ؤ "لمومتلين د ليتيحاد د لعمال د پيطروݣراد ؤ لعساكريا". فاش نيكولاس تّاني حاول يرجع ل پيطروݣراد، لي كانت لعاصيمة د روسيا ديك سّاع، عتارضوه حتيجاجات ديال لعمال د سّكة د تّران. ؤ فاش عرف بلي شّعبية ديالو طاحت، تخلا على لحكم ل صالح خوه ميخاييل. ميخاييل رفض باش ياخد لعرش، ؤ ب هادشي طاح لحكم تّصاري ف روسيا.[10]

هنا ولّا لحكم متقاسم مابين لحوكومة لمؤقاتة، لي كانت كاتمتل لمصالح د طّبقة لمتوسطة ؤ لبرجوازيين، ؤ "سّوڤييط د پيطروݣراد" لي كانت كاتمتّل لعمال ؤ طّبقة لفقيرة. هاد لّخرة ماكانتش ف لّول معارضة ل لحوكومة، ؤ ب لعكس دعات لأعضاء ديالها، من عمال ؤ عساكريا، باش يطيعو رؤاسا ؤ شّيفان ديالهوم طالمّا لأوامر ماكاتّعارضش معا لمبادئ شّتيراكية. لحوكومة من جيهتها بغات تدير سيستيم د لحكم بحال ف لغرب، ؤ عطات حرية د تّعبير، ؤ د صّحافة ؤ د دّين. مي ف ضرف شهورا، لوضعية زادت تأزّمات ؤ شحال من وزير ستاقلّ، ف لوقت لي لحرب ماكانتش غادة مزيان. ف أبريل 1917، لينين رجع ل روسيا، بعدما كان ساكن ف سويسرا. ؤ بدا كيحشد لأتباع ديالو باش يديرو تورة ضد لحوكومة. ف لأصل كانو جوج جماعات ف سّوڤييط د پيطروݣراد، لمينشيڤيك، لي كيمتّلو شتيراكيين معتادلين، ؤ لبولشيڤيك، لي عندهوم توجه توري. رّجوع د لينين قوّا لبولشيڤيك ؤ زاد ف لأعداد ديالهوم. ف يوليوز 1917، ناضو حتيجاجات تورية كبيرة د لعمال، لي دهشرات حتا لبولشيڤيك ؤ ماكانوش مستاعدين ليها. لحوكومة قدات تقمع هاد تّضاهرات، ؤ شدّات ليون طروتسكي، لي كان شّاف د لمينشيڤيك، ف لحبس، ؤ لينين هرب ل فينلاندا.

ف شتنبر، ليمينيين لموحافضين حتا هوما ناضو ضد لحوكومة لمؤقاتة لي كان كيقودها أليكسانر كيرينسكي، لي هوّا براسو كان يساري شتيراكي، ؤ حاولو ياخدو سّلطة ب نقيلاب عسكاري. كيرينسكي لي كان جمّد لأنشطة د لبولشيڤيين، رفع هاد لمنع، ؤ هادشي خلا لعمال باش يديرو شرع يدّيهوم ؤ يوقّفو نّقيلاب، لي كان كيقودو لجينيرال لاڤر كورنيلوڤ.[10]

ف لخريف د 1917، شّعبية د لحوكومة لمؤقاتة كانت طاحت، ؤ لعمال ؤ لفلاحين بداو كيسيطرو على لوزينات ؤ لأراضي د لفلاحة من عند لملّاك لبرجوازيين، ب نتيخاب مومتيلين ديالهوم لي يتكلّفو ب تّسيير. ف هاد لفترة نيت، لبولشيڤيين كان ولا عندهوم تأتير كبير ف پيطروݣراد ؤ موسكو. ف أكتوبر 1917، لينين رجع ل روسيا، ؤ قدر يقنع لّجنة لمركازية لبولشيڤية بلي لماخدة د سّلطة ماغاديش تكون ب سّلم، ؤ بلي ضاروري يهزو سّلاح ضد لحوكومة. طروتسكي، لي كان خرج من لحبس، سيطر معا جماعتو على لقشلة لعسكارية د پيطروݣراد، ؤ بهادشي ضمن ل جماعتو سّلاح، ؤ حرم لحوكومة من أهم ديپو د سّلاح ف لبلاد. تّورة لبولشيڤية بدات بصّح ف 6 نونبر 1917، ملي رّايس د لحوكومة كيرينسكي حاول يمنع صّحافة لبولشيڤية. هادشي عتابروه لبولشيڤيين حاراكة ضدتورية، ؤ ستاغلو لفرصة باش يسيطرو على لمباني د لحوكومة ف نفس نّهار. ف 7 نونبر، لينين علن على طّيحة د لحوكومة لمؤقاتة. كيرينسكي حاول ينضّم مقاومة برا لعاصيمة، ولاكين ماصدقاتش ليه، ؤ ضطر باش يهرب من روسيا. ف ضرف سيمانات كانو لبولشيڤيين سيطرو على موسكو بشكل فيعلي، ؤ شدو سّلطة. باش يقدر يركّز على لوضعية ف دّاخل، لينين ضطر يسني موعاهدة د توقاف تّير د لقرطاس معا ألمانيا، لي تخلّات فيها روسيا على لمناطق د لبلطيق، پولونيا، ؤ ؤكرانيا ل ألمانيا، ؤ شي مناطق من لقوقاز ل لإمبراطورية لعتمانية. لعاصيمة پيطروݣراد ديك سّاع ولات قريبة بزاف ل لحدود جّديدة د روسيا، ؤ هادشي خلا لحوكومة د لبولشيڤيين تحوّل لعاصيمة ل موسكو.[10]

ف أبريل 1918، بدات حرب أهلية ف روسيا، لي تواجهات فيها قوّات ضدشيوعية، كيقودوها ضبّاط من لعسكر تّصاري لقديم، ؤ لي تسمّاو لجيش لبيض، ؤ لقوات د شّيوعيين ب لقيادة د ليون طروتسكي لي ولا كوميسار د لحرب ف لحوكومة، لي تسماو لجيش لحمر. هاد لحرب كانت مصيرية ؤ حددات لموستقبال د روسيا ف لعقود لي تبعاتها. لجيش لبيض كان مدعوم من طاراف لبلدان لي كانو حولافا د روسيا ف لحرب لعالمية، لي هوما فرانسا، بريطانيا ؤ لميريكان، لي نزّلو عساكريا ديالهوم ف روسيا باش يدعمو لبرجوازيين. لحولافا كانو خايفين تنوض تورة شتيراكية عالمية. لجيش لبيض لي كان مشتّت جغرافياً ؤ إيديولوجياً، خسر ف معراكة مورا معراكة قدّام لجيش لحمر، ؤ لحولافا لي شعوبهوم عيّاتهوم لحرب ضطرو يسحبو لقوات ديالهوم من روسيا. معا لمجي د عام 1922، كانو شّيوعيين ربحو لحرب. ولاكين باش يقضيو على جميع شكال لموعارضة ف روسيا، حيّدو جميع لإصلاحات لي كانت دارت لحوكومة لمؤقتة د كيرينسكي، ؤ قمعو لحريات ب شكالها.[10]

ف نفس لوقت ؤ لحرب لأهلية شاعلة، روسيا حاولات ترد لأراضي لي تخلات عليهوم ل ألمانيا، ؤ قدرات تشد بيلاروسيا (ف يناير 1919)، ؤكرانيا (مارس 1919)، أزيربيدجان (أبريل 1920)، أرمينيا (نونبر 1920)، ؤ جورجيا (مارس 1921). ولاكين ماقدّاش ترد لمناطق د لبلطيق لي بانو فيها جمهوريات جديدة د لاتڤيا، إسطونيا ؤ ليتوانيا. فينلاندا لي عتارفات بيها روسيا ف دجنبر 1917، ؤ پولونيا، لي تولدات من جديد بعد جوج قرون د سّيطرة رّوسية، قدرو يحافضو على سّتيقلالية ديالهوم.[10]

ف دجنبر 1922، باش يتجنّب مطايفة معا لقوميين د كلا بلاد لي ولات تابعة ل روسيا، ؤ ف نفس لوقت مايعطيهومش ستيقلالية كاملة، لحيزب شّيوعي سنا تّيفاقية لي أسسات ليتيحاد سّوڤياتي. لبلدان على لحافة د هاد ليتيحاد لفيديرالي كانت كاتمتّع ب ستيقلالية تقافية ؤ عندها حوكومة شيوعية ديالها، ولاكين ف سّياسة ؤ ليقتيصاد كانو تابعين ل سّلطة لمركزية لي كاينة ف موسكو، لي مشكّلة ف أغلبيتها من رواسا. معا لمجي د عام 1936، كانو 11 دولة فيديرالية ف ليتيحاد سّوڤياتي.[11]

ليتيحاد سّوڤياتي بدل

لفترة د لحرب لأهلية عرفات سياسات قمعية لي تسمّات "شّيوعية د لحرب" (يعني سّياسات شّيوعية ف لفترة د لحرب لأهلية)، ؤ لي أدّات ل تورات داخلية من طاراف لعمال ب راسهوم، بسباب نّهيار د لقتيصاد. رّوبل طاحت قيمتو ل درجة بلي نّاس ولاو كيشدّو لخلصة ب لماكلة، حيت لفلوس مابقات عندهوم تا قيمة. لحيزب شيوعي لبولشوڤي، لي دابا ولا حاكم بوحدو حيّد لمسؤولين لي نتاخبوهوم لعمّال باش يسيّرو لوزينات، ؤ دار بلاصتهوم خوبارا ف تّسيير باش ترجع لإنتاجية صّيناعية كي كانت. لينين حبس "شّيوعية د لحرب" ؤ بدا مجموعة د لإصلاحات لي شي وحدين منهوم كانو ضد لمبادئ د شّيوعية، بحال ميلكية خاصة محدودة. ولاكين هاد لإصلاحات حبسو ملي مات على غفلة ف 1924. تّابع ديالو، جوزيف سطالين كانت عندو شوفة خرة ل تسيير لبلاد.[11]

روسيا ليتيحادية بدل

 
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها


أهم شّخصيات بدل

صيونص بدل

أداب بدل

سياسة بدل

موسيقا بدل

سپور بدل

  تقدر تزيد شوف بزاف د تّصاور و لمعلومات ديال Russia ف ويكيميديا كومنز.

عيون لكلام بدل

  1. ^ a b c d e f "موسوعة بريطانيكا، روسيا". موسوعة بريطانيكا. مأرشيڤي من لأصل ف 2023-05-14. تطّالع عليه ب تاريخ 2022-02-15.
  2. ^ "Here's Why Russia Is Called Russia" (ب نڭليزية). مأرشيڤي من لأصل ف 2023-01-19. تطّالع عليه ب تاريخ 2022-02-15.
  3. ^ a b ݣلين كورتيس (1996). Russia: A Country Study، Early History [تاريخ د روسيا، شاپيطر 2: تّاريخ لقديم] (ب نڭليزية). مأرشيڤي من لأصل ف 2023-08-14. تطّالع عليه ب تاريخ 2022-02-15.
  4. ^ a b c d e ݣلين كورتيس (1996). Russia: A Country Study، Muscovy [تاريخ د روسيا، شاپيطر 3: موسكوڤيا] (ب نڭليزية). مأرشيڤي من لأصل ف 2023-06-06. تطّالع عليه ب تاريخ 2022-02-15.
  5. ^ أليكساندر فيليوشكين. "Livonian War in the Context of the European Wars of the 16 th Century: Conquest، Borders، Geopolitics". Russian History. مأرشيڤي من لأصل ف 2023-08-13. تطّالع عليه ب تاريخ 2022-02-15. Cite journal requires |journal= (معاونة)
  6. ^ ؤركارد، ج. إدوارد (يوليوز 1989). "The Election of Michael Romanov". The Slavonic and East European Review. Modern Humanities Research Association. 67 (3): 378–402. JSTOR 4210028.
  7. ^ a b ݣلين كورتيس (1996). Russia: A Country Study، Early Imperial Russia [تاريخ د روسيا، شاپيطر 4: لبديات د لإمبراطورية رّوسية] (ب نڭليزية). مأرشيڤي من لأصل ف 2023-08-14. تطّالع عليه ب تاريخ 2022-02-15.
  8. ^ ݣلين كورتيس (1996). Russia: A Country Study، Transformation of Russia in the Nineteenth Century [تاريخ د روسيا، شاپيطر 6: تحولات لقرن 19] (ب نڭليزية). مأرشيڤي من لأصل ف 2023-03-29. تطّالع عليه ب تاريخ 2022-02-16.
  9. ^ ݣلين كورتيس (1996). Russia: A Country Study، The Last Years of the Autocracy [تاريخ د روسيا، شاپيطر 7: ليامات لّخرة د تّصارية] (ب نڭليزية). مأرشيڤي من لأصل ف 2023-06-06. تطّالع عليه ب تاريخ 2022-02-16.
  10. ^ a b c d e ݣلين كورتيس (1996). Russia: A Country Study، Revolutions and Civil War [تاريخ د روسيا، شاپيطر 8: تورات ؤ حرب أهلية] (ب نڭليزية). مأرشيڤي من لأصل ف 2023-08-14. تطّالع عليه ب تاريخ 2022-02-25.
  11. ^ a b ݣلين كورتيس (1996). Russia: A Country Study، The Era of the New Economic Policy [تاريخ د روسيا، شاپيطر 9: لعصر د سّياسات لقتيصادية جّديدة] (ب نڭليزية). مأرشيڤي من لأصل ف 2023-03-23. تطّالع عليه ب تاريخ 2022-02-25.