بوݣود
بوݣود
| ||
| ||
| معلومات عامة | ||
| زيادة | لقرن 1 قبل لميلاد موريطانية | |
| لموت | 31 قبل لميلاد Ancient Methone | |
| لكاريير ديال الشخص | ||
| شارك ف | ||
| لفاميلة | ||
| لواليد | ماصطانيصوسوس | |
| خوت | بوكوس تّاني | |
| شريك | إينوا لمورية | |
| لإتنية | مور قدام | |
بوݣود (ب لأمازيغية ⴱⵓⴳⵓⴷ، مات ف 31 قبل لميلاد ف ميطوني ف ليونان) هوّا ماليك أمازيغي لي حكم مملكة موريطانية معا خوه بوكوس تّاني، من ؤلا قبل من 49 ق.م تال 38 ق.م، بعد ما مات بّاهوم ماصطانيصوسوس. بوݣود كان شاد طّرف لغربي د موريطانية، لي دابا كاين ف شمال لمغريب، ؤ خوه بوكوس كان شاد طّرف شّرقي لي كاين دابا ف غرب ؤ وسط دزاير. لماليك بوݣود كان حليف موهيم د يوليوس قيصر، ؤ بعد لموت د هاد لّخر، ساند ماركوس أنطونيوس ؤ كليوپاطرا سّابعة ف لحرب لأهلية لي واجهو فيها ؤكطاڤيوس، لي غادي يولي من بعد لإمبراطور أوݣوستوس قيصر.[1]
سّمية
بدلسّمية د بوݣود مدكورة عند ليونانيين كا βoγoς، بوݣوص. ف شّقفات د لفلوس لي صدر بوݣود، سميتو مكتوبة ب لّاتينية Bocut لي غالباً قرب ل نّطقان لأمازيغي لأصلي. ب لبونيقية، هاد سّمية كانت كاتّكتب ب ݣ(ك) ت.
كاين شخص أخور من لفاميلة د بوݣود لي كانت عندو نفس سّمية، ؤ لي كان ولد لماليك بوكوس لّول، يعني عم لماليك بوݣود.[2]
حياتو
بدلكيما لفترة لموريطانية بشكل عام، ماكانعرفوش بزاف على بوݣود ؤ لحكم ديالو. ف 49 ق.م، كان ديجا ماليك ديال موريطانية لغربية، ف لوقت لي بوكوس تّاني كان ماليك د موريطانية شّرقية (شرق واد مولوكا، ف لغالب ملوية). لعولاما كيرجّحو بلي بوݣود ؤ بوكوس كانو خوت، ب عتيبار لعادة د قسيم لممالك بين لخوت ف شمال إفريقيا (بحال بين ولاد لماليك ميكيپسا د نوميديا)، ؤ بلي كانو ولاد لماليك ماصطانيصوسوس. هادشي كيزيد يتوكّد حيت بوكوس تّاني كان صدر شقفات د لفلوس ب كتابة "بوكوس ولد سوس". شّقفات د لفلوس لي تسكات ب سميت بوݣود ب لموقابيل ماكاتدكر غير سميتو.[2]
ف شي وقت مامحددش تجوج بوݣود ب مرا لي كان سميتها إينوّا، ؤ لي كانت معروفة بلي كانت زوينة بزاف. بوݣود مشا ف مغامرة ل لجنوب، يمكن جيهت لمناطق سّتيوائية د قارة إفريقيا، ؤ جاب ل مراتو قصب عملاق ؤ أسپيرج كا هدية.[3]
لإشاعات كانت كاتضور بلي مراتو كانت عشيقة ديال يوليوس قيصر. حيت هاد لقصة مدكورة عند توارخي روماني واحد هوّا سويطونيوس، مايمكنش ناخدوها ب جدية كبيرة. ولاكين يلا كانت لواقعة حقيقية، فا لعلاقة بين إينوا ؤ يوليوس قيصر كانت قصيرة بزاف و غالباً وصلات ل لمسامع ديال بوݣود، حيت لكوپل تلقا هدايا سخية من عند قيصر، يمكن كا عتدار من جيهتو. وخا هاد لقصة ماشي متبوتة، لمخيلة لؤروپية ستعمالاتها ف أعمال مسراحية ؤ درامية ف لقرون لوسطانية.
يوليوس ضد پومپييوس
بدلف لحرب د يوليوس قيصر ضد پومپييوس، لخوت بجوج، بوكوس ؤ بوݣود، كانو ف صّف د يوليوس قيصر، ؤ عاونوه باش يغلب تّحالف د پومپييوس معا لماليك يوبا لّول د نوميديا. پومپييوس ضرب لمسافة ب لبحر من ؤتيكا ل موريطانية، و حاول يهجم على لموعسكار د بوݣود ف أسكوروم، ولاكين هاد لّخر قدر يرد لهجمة،[note 1] خوه بوكوس لونصا هجمة مضادة ؤ شاملة ضد لپومپيين ؤ لحولافا ديالهوم ف نوميديا. قيصر ديك سّاع سيفط جينيرال روماني سميتو سيتيوس، باش يعاون بوكوس ضد لماليك يوبا، لي لارمي ديالو كانت باغة تّجمع معا ديال پومپييوس. بوكوس قدر يسيطر على سيرتا (دابا قسنطينة ف دزاير) لي كانت عاصيمة د نوميديا، شّي لي فورصا لماليك يوبا باش يتراجع.[3]
ف 48 ق.م، بوݣود تدخّل ف سپانيا باش يضمن سّلطة ديال قيصر على لمناطق ديالها.[2] فاش نتاصر يوليوس قيصر ف 46 ق.م ف معراكة طاپسوس، لي طرات ف بلاصة جات دابا ف سّاحل د تونس ؤ ماشاركش فيها بوݣود، لماليك بوكوس تّاني شد طرف كبير من نوميديا، ؤ وسّع مملكة موريطانية جيهت شّرق. بوݣود شارك ف معراكة موندا ف 45 ق.م لي كانت آخر معراكة د قيصر ضد لفرقة د لؤپتيماطيس لي لپومپيين كانو وحدين منهوم، ؤ لماليك بوݣود لعب دور موهيم فيها فاش دار هجمة من لّور على لارمي د لپومپيين لي تلّفات ليهوم نّوامر ؤ عجّلات لخسارة ديالهوم.[note 2]
تورة ف سپانيا
بدل
ف إقليم هيسپانيا لبعيدة Hispania Ulterior (لجنوب د سپانيا ديال دابا)، لي كان حاكم فيها كوينتوس كاسيوس لونݣينوس تحت سّلطة د قيصر من 49 ق.م، ناضت تورة قايدها واحد لكوماندان ف لجيش سميتو كلاوديوس ماركيلوس أيسيرنينوس. تّورة ناضت بسباب تّعسف ؤ ستيغلال سّلطة لي كان ليمارسو كاسيوس. هاد لّخر طلب لمعاونة ديال لماليك بوݣود باش يرد تّوار، لي لبّا دّعوة.
ف نفس لوقت يوليوس قيصر كلّف لحاكم ديال إقليم هيسپانيا لقريبة Hispania Citerior (شّرق د سپانيا ديال دابا) لي سميتو ماركوس أيميليوس ليپيدوس باش يخمد تّورة. تّدخل ديال ليپيدوس ماكانش من جيهت كاسيوس، مي كا طرف تالت موحايد لي كيمتّل قيصر. هادشي خلا لقايد د تّوار ماركيلوس باش يقبل يتشاور معاه، ؤ قدرو بجوج باش يتغلّبو على هجمة غفّالة ديال لماليك بوݣود على لموعسكار د ماركيلوس. بوݣود موراها دار تّيفاق معا ليپيدوس ؤ ماركيلوس باش يخليو كاسيوس يمشي فحالو معا لعساكريا ؤ لخدّاما لي موالين ليه. كاسيوس مابقاش حاكم د لإقليم ؤ غادر، ؤ مات ف عاصيفة ف لبحر ف طريقو ل روما.[5][6]
ؤكطاڤيوس ضد أنطونيوس
بدلبعد لغتيال د يوليوس قيصر ف 44 ق.م ناض صراع على سّلطة ف روما، مابين لجينيرال ماركوس أنطونيوس، ؤ ؤكطاڤيوس حفيد خو قيصر. ف هاد لمطايفة لخوت بوݣود ؤ بوكوس تّاني ماتّافقوش ؤ كل واحد فيهوم تحالف معا طاراف، بوݣود معا أنطونيوس، ؤ بوكوس معا ؤكطاڤيوس (لي غادي يولّي من بعد لإمبراطور أوݣوستوس قيصر).
ف مارس 43 ق.م، بوݣود صيفط فرسان من لجيش ديالو باش يدعمو أنطونيوس. ف يونيو من نفس لعام، ستقبل ك. بالبوس لي كان من لأعيان د أنطونيوس ؤ كانو جرّاو عليه من سپانيا. ف لحرب د پيروسيا (41 تال 40 ق.م)، بوݣود حاصر قاديس، ؤ حاول يستولي على لكنوز ديال معبد هرقول ملقارت لي كيتّعتابر أقدم معبد ف جّيهة لغربية د لمتوسط.[2]
ف جوايه 38 ق.م، نّاس د طانجا تارو ضد لماليك بوݣود، ؤ ولّات لمدينة مستاقلة على سّلطة ديالو ؤ تابعة نيشان ل رّومان. بوكوس تّاني ستولا على موريطانية لغربية فاش كان خوه بوݣود ف سپانيا، ؤ هاد لّخر ضطر باش يمشي جيهت شّرق عند لحليف ديالو أنطونيوس. بوكوس تّاني ولّا ماليك على موريطانية كاملة، ب مساندة ديال ؤكطاڤيوس، ؤ ولات لمملكة ديالو كبر ب كتير من لي ورت من عند بّاه ماصطانيصوسوس ؤ جدّو بوكوس لّول.[1]
لماليك بوݣود مشا ل عند لحليف ديالو أنطونيوس ف شّرق، و تّقتل ف معراكة أكتيوم ف ميطوني ف ليونان، ب أمر من لجينيرال رّوماني أݣريپا.[2]
إصدارات صولدية
بدل
لفلوس لي تسكّو ب سميت بوݣود تّلقا منّهوم عاداد قليل، ؤ أغلبية مصاوبين من نّقرة، ؤ شي وحدين من لبرونز.[2] سّتيل ديالهوم كيبيّن تأتير نوميدي ؤ إيبيري. عكس شّقفات نّوميدية، لفلوس د بوݣود مكتوبين ب لّاتينية بشكل كامل بلا تا شي أتار ديال لبونيقية. هاد لفلوس تسكّو ف لغالب ف لفترة د لحرب لأهلية د قيصر، غالباً ل غاراض سياسي، سيرتو ب سباب ستيعمال نّقرة لي نادرة ف لفلوس د شمال إفريقيا ف لقديم، ؤ تخدام لّاتينية بوحدها. لفلوس د بوݣود ف لغالب تسكّو ف ليكسوس ؤلا وليلي، ؤ لوجوه ديالهوم كيمتّلو رموز سياسية رومانية (بحال لباطو د لحرب)، ؤلا دينية.[8]
نوطات
بدلعيون لكلام
بدل- ^ a b لموسوعة لأمازيغية، بوكوس. مأرشيڤي من لأصل ف 30 ماي 2023. تطّالع عليه ب تاريخ 1 مارس 2022.
- ^ a b c d e f "لموسوعة لأمازيغية، بوݣود". مأرشيڤي من لأصل ف 3 مارس 2022. Cite journal requires
|journal=(معاونة) - ^ a b دوان و. رولر. The World of Juba II and Kleopatra Selene: Royal Scholarship on Rome's African Frontier. ص. 57-58.
- ^ a b ناثانييل هوك (يناير 1818). "The Roman History, from the Building of Rome to the Ruin of the Commonwealth" (ب نڭليزية).
- ^ ريتشارد د. وايݣل (1992). Lepidus: The Tarnished Triumvir. نيويورك: Routledge. pp. 28–30.
- ^ لموسوعة لبريطانية، ݣزو 5. مأرشيڤي من لأصل ف 2023-02-24. تطّالع عليه ب تاريخ 2022-06-23.
Bogud, king of Mauretania, and M. Lepidus, proconsul of Hither Spain, to whom Cassius had applied for assistance, negotiated an arrangement with Marcellus whereby Cassius was to be allowed to go free with the legions that remained loyal to him
- ^ Les monnaies de l'Afrique antique, Chapitre 6. Les royaumes maurétaniens à l’époque des guerres civiles : Bogud (49-38 av. J.-C.) Bocchus II (49-33 av. J.-C.) L’interrègne (33-25 av. J.-C.). pp. 409–411. مأرشيڤي من لأصل ف 20 يونيو 2020.
- ^ Les monnaies de l'Afrique antique, Chapitre 6. Les royaumes maurétaniens à l’époque des guerres civiles : Bogud (49-38 av. J.-C.) Bocchus II (49-33 av. J.-C.) L’interrègne (33-25 av. J.-C.). pp. 205–211. مأرشيڤي من لأصل ف 1 يوليوز 2020.