بوكوس اللول

بوكوس اللول
معلومات عامة
زيادة	لقرن 2 قبل لميلاد موريطانية
لموت	لقرن 1 قبل لميلاد
لجنسية	موريطانية
لحرفة	عاهل
لفاميلة
لولاد	ماصطانيصوسوس Bocchus' daughter ڤولوكس
لمحيط	باڭا (سلف) يوغرطن (نسيب) بوكوس تّاني (حفيد) بوݣود (حفيد)

بوكوس ؤلا بوخوس (ب لاتينية Bocchus؛ ب تامازيغت: ⵡⴽⴽⵓⵙ ⴰⵎⵣⵡⴰⵔⵓ Wekkus Amezwaru) هو ماليك ديال مملكة موريطانية (موروسيا ف لمصادر ليونانية)، ما بين 110 ؤ 80 قبل لْميلاد، لّي لمؤرخين سماوه بوكوس لول. كان مْتناسب معا يوغرطن ماليك نوميديا، ؤ تحاربو بجوج كا حولافا ضد رّومان، ف لْحروب لّي تسمات لحروب د يوغرطن. فلّخر بوكوس غادي يدير معاهدة ديال صّلح معا روما، ؤ غادي يعتاقل يوغرطن ؤ يسلّْمو ل رّومان ف 105 ق.م، بعدما يوغرطن خلف ب لوعد ديالو ل بوكوس باش يعطيه أراضي من نوميديا، هاد لأراضي لي دابا كاينة ف لغرب د دزاير.

لمعنى تاع سميتو

واخّا صّيغة لي تدكرات بيها سميتو ف لمصادر رّومانية بحال لحروب د يوغرطن تاع لمؤلف سالوستيوس، بصيغة bocchus كتختالف قرايتها بين بوكوس ؤلا بوخوس، لكن لأرجح هو بوكوس.

علا حساب أ. پيليݣرين بوكوس Bocchus هيّا صّيغة لّاتينية ديال سمية أمازيغية واقيلا وكوس wekkus، لّي تقدر تكون عندها علاقة معا أوقّاس، لّي هيّا سمية معروفة عند تّوارݣ ؤ كتعني سّبع. كاينة شحال من بلاصة ف شمال إفريقيا عندها سمية مشابهة بحال مدينة أوقاس ف دزاير، ؤلا جبل أوقاس ف تونس.

حياتو ؤ فاميلتو

مامعروفش بزاف علا بوكوس لول ؤ لْمملكة ديالو من لْمصادر تّاريخية. لْمؤرخ ؤ سّياسي رّوماني سالوستيوس فكتابو حروب يوغرطن كيݣول: لْمور كانو كاملين تحت لْحكم ديال لْماليك بوكوس، لّي ماكانت عندو حتا معرفة ب شّعب رّوماني من غير سميتو، ؤ ماكنا كنعرفو عليه والو قبل من هاد زّْمان لا ف سّلام وْلا ف لْحرب. علا حساب شّهادة ديال سالوست، بوكوس كانو عندو بزاف ديال لعيالات، كيفما كانت لْعادة عند لْمْلوك ؤ رّؤساء ديال لقبايل لْمورية لأمازيغية ؤ نّوميدية. من بين لْولاد ديال بوكوس، كاينين غير ربعة لّي دكرهم تّاريخ: واحد لبنت، مامعروفش سميتها، تْجوجات ب يوغرطن، ؤ تلاتة ديال دراري، سوسوس ؤلا ماستانيسوسوس، لي غادي يولي ماليك من موراه، ڤولوكس، لي كان قائد ديال جيش، ؤ ولد آخور سميتو بوݣود. بوكوس لول كان فلْغالب ولد ولا حفيد ديال لْماليك باݣا، لّي كان فنفس لعصر ديال لْماليك ماسينيسا، ؤ كان عاونو باش يرد مملكة نوميديا من سيفاكس فاش كانت ضايرة لحرب لبونيقية تانية.

ف لّخر ديال لقرن تّاني ؤ لبدية د لقرن لّول قبل لميلاد، حاول لبحار ليوناني لمشهور إيوديكصوس لقوزيقي باش يقنع لماليك بوكوس لّول يدير حملة د لستيكشاف ديال لمنطقة لأطلاسية، ولاكين هاد لحملة ماغادي تطرا حتال لعهد ديال لماليك يوبا لموريطاني ف لّخر ديال لقرن لّول ق.م.

لعوام لّخرة ديال لحكم د لماليك بوكوس لّول عرفات ضطيرابات سياسية حيت لماليك كان شرف ؤ ضعافت سّلطة ديالو. هادشي كيتجلّا ف ستيقلال طانجا تحت حكم عائلة أميرية قايدها يفتاس ؤ موراها ولدو أسكاليس. جّينيرال رّوماني سولا Sulla صيفط جيش باش يدعم أسكاليس، ولاكين لجنرال رّوماني كوينتوس سيرطوريوس ف خيلال حملة عسكارية ديالو عاون ف تحياد لأمير أسكاليس من لحوكم ديال طانجا ف جوايه 81 ؤلا 80 ق.م.

حروب يوغرطن

ف 108 ق.م لماليك بوكوس غادي يتردد مابين أنه يساند يوغرطن ولا رّومان. غادي يتحالف معا يوغرطن علا شرط أنه يواعدو يعطيه تلت ديال لأراضي د نوميديا مورا ماتسالا لحرب. لجيش ديالهم غادي يخسر قدام رّومان ف معركة سيرتا تّانية. مورا لحرب، يوغرطن غادي يرفض ييفي بلْوعد ديالو لبوكوس، ؤ هاد لأخير غادي يبدا لمفاوضات معا رّومان، ؤ مورا واحد لّقاء معا لجنرال رّوماني لوسيوس كورنليوس سولا، غادي يسيفط سفراء لروما. مورا سلسلة ديال لمشاورات، غادي يسيفط بوكوس ل يوغرطن باش يجي ل عندو، ؤ غادي يطيح يوغرطن فلْفخ ؤ يتشد بسلاسل ؤ يتعطا لسولا. كمكافأة للمعاونة ديالو، رّومان غادي يعطيوه لأراضي لّي كان كيطالب بيها، ؤ مملكة موريطانية غادي تولي شادة من لْمحيط لْأطلسي حتال مدينة صالداي (بجاية ف دزاير). باش يزيد يعمّق تّحالف ديالو معا رّومان، بوكوس غادي يسيفط مجموعة ديال تّحف كتبينو كيسلم يوغرطن لسولا. هاد لْهْدية غادي تخلق أزمة ما بين سولا ؤ لجنرال ݣايوس ماريوس، لّي ف إطار مجموعة ديال صّراعات غادي تأدي لسقوط نضام لجمهوري فروما.

لماليك بوكوس لول غادي يحافض علا علاقات مزيانة معا روما، ؤ غادي تولي مملكة موريطانية ممول رئيسي ديال لإمبراطورية رّومانية فعدد ديال لمنتوجات، بلإضافة ل لْحيوانات ل تّفراج ؤ لْمتعة بحال نمورا، سبوعا، لفيولا، ؤ غيرهم.

إعدام لمستشار ماݣودولسا

من بين لحوايج لقليلة لّي كنعرفوها على داكشي لي وقع فمملكة موريطانية، و بضّبط فعهد لماليك بوكوس لّول، هي بلي واحد من بين لمستشارين تاع بوكوس كان سميتو ماݣودولسا (Magudulsa)، وهو من نخبة لحاشية، وقع فخلاف مع لماليك و كان خلاف كبير داكشي علاش هاد لمستشار هرب من موريطانية و مشا لروما. ولكن من بعد واحد لوقيتة واحد النقيب روماني كان سميتو ليوْيُوس دروسوس Livius Drusus كان باغي يقوي العلاقة مع لماليك بوكوس و يرد ليه لمزيان لي دارو بوكوس معاه فاش قدر يدير حدّ لتمرد يوغرطن على رّومان ،هادشي علاش هاد نقيب دار ݣاع جهدو و قلب علا ماݣودولسا حتى لقاه و شدّو و رجعو ل موريطانية و سلمو ل بوكوس. ومن بعد ما طاح موكدولوسا ف يد بوكوس، هاد لّخّر عطا أمر باش ماݣودولسا يتعدم ب طريقة غريبة. ليعدام تاعو كان ب ستيعمال فيل. أما تأريخ تاع هاد لواقعة فا تّوارخي سطيفان ݣصيل كيݣول بلي وقعات ما بين عام 104 ق. م و 91 ق.م.

لْخولافا ف لْحكم

بوكوس لول كان بّات ماستانيسوسوس، ؤ لْجد ديال بوكوس تاني ؤ بوݣود، لّي غادي يقسمو مملكة موريطانية بيناتهم. بوكوس تّاني من بعد غادي يستاغل لغياب ديال خوه ف سپانيا، ؤ غادي يسيطر علا لْمملكة بوحدو. مورا ما مات بوكوس تّاني ف 33 ق.م، ماغادي يكون حتا حد يخلفو، ؤ مملكة موريطانية غادي تولي تابعة ضمنيا ل رّومان، وخا غادي ينصبو يوبا تاني ؤ مراتو كليوپاترا سيليني، لي كانو ترباو فروما، ماليك ؤ ماليكة علا موريطانية. مورا ما تقتل ولدهم لْماليك پطليموس بأمر من لإمبراطور كاليݣولا، غادي تولي مملكة موريطانية رسميا تحت سّيطرة ديال رّومان، ؤ غادي تقسم لجوج أقاليم، موريطانية طّنجية ؤ موريطانية لْقيصرية.