البلايك ديال الماطريكول فالمغريب

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

البلايك ديال الماطريكول ديال الطوموبيلات ف المغريب هوما بلايك كايكونو ف اللور ؤ القدام ديال الطوموبيلة ؤ اللي كايكون فيهم واحد الشرتلة ديال الأرقام اللي كاتمكن من التعريف ديال الطوموبيلة ؤ مولاها. السيسطيم ديال البلايك اللي كاين دابا بدات الخدمة بيه ف 2000.

بلاكة د الماطريكول تاع طوموبيلة عادية ف المغريب.

السيسطيم ديال الماطريكول اللي كاين دابا

السيسطيم ديال بلايك الماطريكول اللي كاين دابا ف المغريب كايحتارم واحد النورم جديدة اللي بدات بيها الخدمة ف عام 2000. هاد الكونفيڭورة الجديدة اللي كاتبدا من ليسر لليمن و كاتتكوّن من واحد الشرتلة ديال خمسة النماري ف ليسر ما بينات 00,001 ؤ 99,999 ؤ اللي كاتوافق النمرة ديال التقياد ديال الطوموبيل. تابعاها حرف ديال الهجا عربي (أ، ب، ج، د، ه، و...) اللي جا وسط البلاكة محصور ما بينات جوج بودرات كوحل تابعاه نمرة ع ليمن ديال العمالة ؤلا الإقليم اللي تسجلات فيه الطوموبيلة

تقياد المراكب حسب العمالة ؤ الأقاليم

النمرة	العمالة / الإقليم		النمرة	العمالة / الإقليم		النمرة	العمالة / الإقليم
1	الرباط		31	قلعة السراغنة		61	بني ملال
2	سلا		32	الصويرة		62	أزيلال
3	سلا الجديدة		33	أڭادير إداوتنان		63	السمارة
4	الصخيرات تمارة		34	إنزڭان أيت ملول		64	ڭلميم
5	الخميسات		35	شتوكة أيت باها		65	طانطان
6	كازا - أنفا		36	تارودانت		66	طاطا
7	كازا - عين السبع		37	تيزنيت		67	آسا الزاڭ
8	كازا - الحي الحسني		38	ورزازات		68	العيون
9	كازا - بن مسيك		39	زاڭورة		69	بوجدور
10	كازا - مولاي رشيد		40	طانجة أصيلة		70	وادي الذهب
11	كازا - الفيدا		41	الفحص أنجرة		71	أوسرد
12	كازا - المشور		42	العرايش		72	كازا - عين الشق
13	كازا - سيدي البرنوصي		43	شفشاون		73	النواصر
14	المحمدية		44	تطوان		74	مديونة
15	فاس - الجديد		45	الحسيمة		75	المضيق الفنيدق
16	فاس - المدينة		46	تازة		76	الدريوش
17	فاس - الزواغة		47	تاونات		77	ڭرسيف
18	صفرو		48	وجدة أنڭاد		78	وزان
19	بولمان		49	بركان		79	سيدي سليمان
20	مكناس - المنزه		50	الناظور		80	ميدلت
21	مكناس - الاسماعيلية		51	تاوريرت		81	برشيد
22	الحاجب		52	جرادة		82	سيدي بنور
23	إفران		53	فيڭيڭ		83	الرحامنة
24	خنيفرة		54	آسفي		84	الفقيه بن صالح
25	الرشيدية		55	الجديدة		85	اليوسفية
26	مراكش - المنارة		56	سطات		86	تينغير
27	مراكش - المدينة		57	خريبكة		87	سيدي إفني
28	مراكش - سيدي يوسف بن علي		58	بنسليمان		88	طرفاية
29	الحوز		59	قنيطرة
30	شيشاوة		60	سيدي قاسم

خريطة ديال المغريب فيها النماري ديال العمالات ؤ الأقاليم

الطوموبيلات الجداد

الطوموبيلات اللي يالاه مشريين جداد ف المغريب كايركّبو ليهم واحد البلاكة موقّتة فيها 6 النماري على ليسر ؤ كلمة "WW" على ليمن بالبيض بالكحل على خلفبة بيضة.

البوليس، الجادارميّا، العسكر، المرود، ؤ البومبّيا

المراكب ديال البوليس كايركّبو ليهم بلاكة مكونة من نماري ف ليسر مكتوبين بالبيض فوق الكحل ؤ حرف الشين على ليمن مكتوب ب لحمر فوق لبيض.

المراكب ديال الجادارميّا كايركّبو ليهم بلاكة مكونة من نماري ف لوسط مكتوبين ب لبيض فوق لكحل ؤ كلمة «الدرك» على ليمن مكتوبة ب لحمر فوق الرمادي ؤ السامبول ديال الجادارميّا ع ليسر.

المراكب ديال العسكر كايركّبو ليهم بلاكة مكونة من كلمة «ق م م» ف الوسط تابعاها على ليسر شرطة تابعاها شرتلة تاع النماري كاملين بيهم مكتوبين بالبيض على لكحل ؤ على ليمن ڭاع ديال البلاكة كانية الراية ديال المغريب ؤ السامبول ديال العسكر ف ليسر ڭاع تاع البلاكة.

المراكب ديال المرود كايركّبو ليهم بلاكة فيها على ليمن حروف «ق س» مكتوبين بالحمر فوق من لبيض ؤ على ليسر شرتلة تاع النماري مكتوبين ب لبيض فوق الكحل.

المراكب تاع البومبيّا ؤ لابيلانص (الوقاية المدنية) كايركّبو ليهم بلاكة بيضة مكتوب على ليمن ديالها «و م» ب لحمر ؤ على ليسر ديالها شرتلة تاع النماري ب لكحل.

طوموبيلات الدولة

طوموبيلات الدولة ف المغريب كايركّبو ليهم بلايك فيهم ع ليمن كلمة «المغرب» مكتوبة ب لحمر على لبيض ؤ ع ليسر شرتلة تاع النماري مكتوبين ب لبيض على لكحل.

الطوموبيلات ديال الجماعات ف المغريب كايكونو عندهم بلايك كوحل مكتوب عليهم بالبيض شرتلة تاع النماري تابعهم حرف «ج» ؤلا "J".

الطوموبيلات ديال المسؤولين الكبار

الطوموبيلات د الدولة اللي كايركبو فيهم الوزارا كايوكونو بحال البلايك العاديين غا هوما فيهم "99" ع ليمن.

الطوموبيلات د الدولة اللي كايركبو فيهم الولات كايوكونو بحال البلايك العاديين غا هوما فيهم "96" ع ليمن.

الطوموبيلات د الدولة اللي كايركبو فيهم لعمال ؤ رؤاسا د لمجالس لإقليمية كايكونو عندهم بلايك كوحل مكتوب عليهم ب لبيض "W" متبوعة بشرتلة تاع النماري.

الطوموبلات الدپلوماسيين

الطوبيلات اللي كايركبو فيهم الهيئات الديپلوماسية ف المغريب كاتكون عندهم بلاكا ب الشيبي مكتوب عليها بالكحل شرتلة تاع النماري ف الوسط ؤ عبارة «هـ د المغرب» ع ليمن ؤ عبارة «C D MAROC» ع ليسر.