كارطة د كورة

لكارطة د كورة (بالنݣليزية: Penalty card، بلعربية: بطاقة جزاء) فالرياضة د كورة هي دوزان ديال التحكيم كايخدّمو لحكم باش يوقف شي كوايري عند حدو إلا طغا فالتيران وكتّر من لغلاط ولمخالفات اللي يقدّو يضرّو اللعابة لوخرين أولّا يأترو فالنتيجة ديال لماطش. أول حكم خدم بالسيستيم ديال لكارطات هو لحكم كين أستن فكاس لعالم د 1966،[1] وكانت ديك الساعة الصفرة كاتعني للكوايري "وقف إلا قدرتي"، ولحمرة "وقف ودابا"، وكان لحكم كايهزهوم قبل مايهضر معا اللعّاب. لمعنى ديال لكارطات اللي كاين دابا (الصفرة تنبيه ولحمرة طرد) بان أول مرّة فكاس لعالم د 1970 فلميكسيك.[2]

كاينين جوج د اللوان فلكارطات د كورة: الصفر ولحمر.

لكارطات اللي كاينينعدل

 
حكمة هازّة كارطة صفرة على لعّابة دارت غلط.

فلكورة كاينين جوج ديال اللوان فلكارطات: الصفر ولحمر. فاش لحكم كايهز الصفرة على شي كوايري، كايكون هاداك غير تنبيه ليه على شي غلط دارو. فاش كايعاود لكوايري يدير لغلط مرّة خرة أولا كايدير غلط آخور، كايهز عليه لحكم كارطة باللون لحمر، واللي كاتعني باللي داك اللعّاب خاصو يخرج من التيران.[3]

كارطة صفرةعدل

لكوايري اللي تجمعو عليه بزاف ديال الصفرة كاتوقّفو لجاميعة د كورة لواحد لعدد ديال لميطشان. هاد لعدد كايختالف على حساب لجاميعات ولمنافسات. كايعطي لحكم كارطة صفرة للكوايري اللي دارة وحدة من هادو:

  • قلّة لحيا بلهضرة ولفعال
  • كايخرق لقواعد د اللعبة بزاف
  • كايعطّل لمعاودة د اللعب
  • ماكايحتارمش التيساع اللي مطلوب فركنية، توش أولّا ضربة غلط
  • دخل أولّا عاود يدخل للتيران بلا ليدن د لحكم
  • خرج من التيران بلعاني بلا مايعلم لحكم
  • فعال ماشي رياضية (شوف لغلاط ف كورة):
    • حيّد التيشورت فاش ماركا ݣول
    • مشى كاينقّز على لݣريّاج أولّا قرّب بزاف عند لجمهور.[4]

كاينين مازال جوج ديال لفعال اللي يقدو يجيبو صفرة على لكوايري فلميطشان اللي فيهوم لحكم لمعاون بلڤيديو (لڤار):

  • دخل على لبلاصة اللي كايدير فيها لحكم لمراجعة بلڤيديو
  • دار ليشارة دلڤار (ليشارة د التلفازة) بزايد.[5]

كارطة حمرةعدل

 
لحكم غادي يهز كارطة حمرة على كوايري.

كايعطي لحكم لكارطة لحمرة للكوايري وكايجري عليه إلا عاود واحد من لغلاط اللي لفوق مرّة خرة أولّا كايشدها نيشان إلا دار واحد من هادو:

  • نكر باللي لفرقة ديالو كانت غاتماركي بيت ولكورة تقاست بليد (من غير لحارس فلمينطاقة د پيلانتيات ديالو) وزاد تناݣر معا لحكم
  • نكر باللي لفرقة ديالو كانت غاتماركي بيت بغلط (من غير إلا لحكم عطى پيلانتي وكانت محاولة باش تّلعب لكورة) وزاد تناݣر معا لحكم
  • اللعب ديالو فيه غلاط خطيرين
  • سلوك ضاسر وفيه التّعدو
  • كايسب وكايعاير بكلام قبيح بزاف وݣال شي هضرة/دار شي حركة ولّا حوايج خايبين بزاف
  • يشد كارطة صفرة تانية فنفس لماطش
  • من غشت 2020، وبسباب الجايحة ديال كوڤيد-19، أي واحد كحب بلعاني على لخرين.

كاينة مازال فعلة اللي تقد تجيب حمرة على لكوايري فلميطشان اللي فيهوم لحكم لمعاون بلڤيديو (لڤار):

  • الدخول للبيت ديال لعمليات دالتحكيم بلڤار.

إلا خرج شي كوايري بحمرة، ماخصّوش باقي يدور فالتيران، ماكايبقاش فلمينطاقة التقنية ديال لفرقة (بحال اللعابة لبديلين) وماكايتعوّضش وكايبقى النقصان فلفرقة اللي فالتيران. فلأغلبية ديال لمنافسات ولبوطولات، أي واحد خدا كارطة حمرة نيشان كايتمنع من اللعب ديال لميطشان الجايين، ولعدد ديال هاد لميطشان بالضبط كايختالف على حساب لقانون ولقرارات ديال لجاميعة د كورة فديك لبلاد. كايتحبس لماطش وكايتّلغى إلا أي فرقة خداو 5 من لكوايرية ديالها حمرة وبقاو غير سبعة اللي لاعبين.

عيون لكلامعدل

  1. ^ "Ken Aston - the inventor of yellow and red cards". fifa.com. تطّالع عليه ب تاريخ 20 فبراير 2013.
  2. ^ "Ken Aston – the inventor of yellow and red cards". fifa.com. مأرشيڤي من لأصل ف 30 أبريل 2015. تطّالع عليه ب تاريخ 20 فبراير 2013.
  3. ^ International Football Association Board. Laws of the Game (PDF) (طبعة 2014/2015). Zurich: FIFA. مأرشيڤي من لأصل (PDF) ف 1 شتنبر 2014. تطّالع عليه ب تاريخ 20 نونبر 2014.
  4. ^ "IFAB Laws of The Game: Law 12.3: Disciplinary Action".
  5. ^ "Players making VAR review 'TV' signal to receive yellow cards". 28 ماي 2018 – على طريق www.espn.com.
  تقدر تزيد شوف بزاف د تّصاور و لمعلومات ديال Association football cards ف ويكيميديا كومنز.