فلوس

لفلوس ؤلا لمال هوما أي ستون ؤلا تسجيل يقدر يتڤيريفا لي مقبول بشكل عام كا خلاص ديال شي سلعة، سربيس، دين ؤلا ضاريبة، ف واحد لبلاد ؤلا واحد لكونطيكست صوسيوقتيصادي محدد. لوضايف د لفلوس متنوعين بحال وسيلة د تّبادل، مخزون د لقيمة، عبرة د لحساب، ؤ سطوندار د لخلاص لمعطل (بحال لكريدي). أي ستون (بحال شقفة ؤلا ورقة) ؤلا تسجيل يقدر يتڤيريفا (ف كونط بنكي متلاً) لي كيحقق هاد لوضايف كيتّعتابر فلوس.

ميتال ديال كارطة بنكية لي يقدر بنادم يجبد بيها لفلوس من ڭيشي ؤطوماتيكي. أغلبية د لفلوس لمتداولة دابا هيّا على شكل تسجيلات بنكية لي كيتبادلوها ؤرديناتورات بيناتهوم بلا ماتّطبع على شكل وراق ؤلا تّسك على شكل شقفات د لفلوس.

لفلوس معتامدين على جوج مبادئ أساسية هوما لقابلية لكونية د تّحويل (أي سلعة ؤ سربيس يقدرو يباعو ؤلا يتّشراو ؤ أي دين ؤلا ضاريبة يقدرو يتخلّصو ب لفلوس) ؤ لمقبولية ؤلا تّيقة لكونية (أي واحد تعاملتي معاه قتيصاديا كيتيق ف لقيمة د لفلوس ؤ كيبغي يتعامل بيهوم). بلا هاد جوج مبادئ مايقدروش لفلوس يلعبو دّور ديالهوم.

لفلوس هوما فينومين قتيصادي مولّد، لي بان بشكل تدريجي ؤ تلقائي من لمحاولات د بنادم باش يطّور لقدرة ديالو على تبادل لقيمة لقتيصادية. قبل من لفلوس كان بنادم كيتبادل سّلاعي براسهوم (متلاً كيلو د زّبدة موقابيل 2 كيلو د ماطيشة) ف إطار سيستيم لي كيتسمّا لمقايضة. فاش بانو لحضارات لّولين، بانو معاهوم ريزوات معقّدين ديال لبيع ؤ شّرا لي لمتطلبات ديالهوم ولات فايتة لقدرات لعادية د لفرد ؤلا حتا مجموعة د لأفراد، باش يعقلو على تّبادلات كاملين ؤ لقيمة د كل حاجة موقابيل شي حاجة خرة، ف إطار سيستيم جتيماعي، قتيصادي ؤ سياسي لي غادي ف تطور مستامر. لكتابة ؤ لفلوس بانو ف نفس لوقت، ف بلاد سومر (ف لعراق دابا)، ؤ يمكن ف شّينوا، باش يحلو هاد لإشكالية.

لفلوس تطورو معا مرور زّمان، باش يوليو متجردين من لقيمة لمادية ؤ حتا من لمادة براسها. أغلبية د لفترات تّاريخية ؤ تال مؤخراً كانو لفلوس لمتداولين على شكل ما كيتسما ب لفلوس د سّلعة، لي كيكونو مصاوبين من ؤلا مدعومين ب شي حاجة عندها قيمة قتيصادية. حالياً، أغلبية د لفلوس لي متداولين هوما فلوس د لفياط، لي لقيمة ديالهوم ماعندها تا علاقة معا شي حاجة عندها قيمة قتيصادية بحال دهب ؤلا نّقرة. لأغلبية سّاحقة د لفلوس لي كاينين ف لبلدان لمتقدّمة ليوم، هوما على شكل تسجيلات ف لبانكة.

بشكل عام ف لعالم كامل كاين تقريباً 40 تريليون دولار د لفلوس على شكل شقفات ؤ وراق د لفلوس ؤ تسجيلات بنكية لي تقدر ب سوهولة تّجبد على شكل فلوس فيزيكية (شقفات ؤلا وراق)، لي نقدرو نزيدو عليهوم 50 تريليون دولار ديال لفلوس لعامة لي فيها ستيتمارات ب نواعها ؤ تسجيلات خرين لي ماشي ساهل تّحول على شكل فلوس على لمدى لقريب. يلا زدنا عليهوم لمجموع د لقيمة ديال لكريپطوصولدي (بحال بيتكوين) ؤ نواع خرين د لقيمة لي سّيولة ديالهوم ضعيفة نقدرو نوصلو ل كوادريليون (واحد تابعينو 15 زيرو) د دّولار د لفلوس لي كاينين ف لعالم كامل.

تاريخ

•  مقالة متعمقة: تاريخ د لفلوس

بنادم ف لفترات لقديمة بزاف، ملي كان صياد ميخال (كيجيب ماكلتو من صّيد و جميع لماكلة لي ف شّجر ؤلا طايحة ف لرض)، ماكانش كيحتاج ل لفلوس. صّياد لميخال كان متعدد تّخصصات، ؤ كيقدر يدبّر على لماكلة، يطيّب، يصايب لّباس ؤ سّلاح ديالو ؤ يصلحو، ؤ يداوي راسو ب عشوب لي جمعهوم رّاسو. فاش كاتكون لحاجة ل تبادل لحوايج ؤلا لمعاونة كانت كاتطرا ف إطار ضيق فوسط لعشيرة ديالو، ؤ ف حالات قليلة معا أفراد د عشاير خرين، ف إطار مقايضة (تبادل د لحوايج ؤلا لمعاونة نيشان).

فاش بانت زّراعة، بقا بنادم عايش ف مجتمعات قروية صغيرة، ؤ ماتبدّلاتش لوضعية بزاف ف لبدية. ولاكين معا طلوع أول لمدون ملي بداو لمجتمعات ؤ لحضارات كيتطورو، ولّا بنادم كيتخصص ف حرفة محددة، ؤ كيتعامل معا عاداد كبير بزاف د لغراب (جمع "غريب") لي يقدر يشوفهوم غير مرة ؤلا جوج ف حياتو. لفقدان د تّيقة لمتبادلة ؤ لمقدار لخيالي د تّعامولات تّيجارية خلا لمقايضة سيستيم مامناسبش ل لقتيصاد زراعي لمتطور. تّحول ل قتيصاد معتامد على لفلوس ماجاش دقة وحدة، مي خدا وقت. أول صولدي د فلوس معروف كان هوّا سّيلا، لي هوّا عبار د شّعير كيساوي إيطرو تقريبا، عند سّوماريين جوايه 3000 قبل لميلاد. لخدّاما ؤ شّيفان كانو كيتخلّصو ب واحد لعاداد ديال سّيلات د شّعير، لي كياكلو منها داكشي لي محتاجين ليه، ؤ لباقي كيشريو بيه حوايج خرين. لخلاص د ضّاريبة ل دّولة تا هوّا كان ب هاد لفلوس د شّعير.

مورا داكشي بان عند لأكاديين شّيكيل د نّقرة، لي ماكانش فلوس كيما كانعرفو، مي عبار د نّقرة كيساوي تقريبا 8.33 ڭرام. هاد لفلوس، وخا ولاو متجرّدين ف لقيمة ديالهوم كتر من سّيلا (ماعندهومش قيمة بيولوجية) كانو معقّدين ف تّعامول بيهوم حيت خاص يتوزنو كلا مرة. أول شقفات د لفلوس بانو ف مملكة ليديا (ف لغرب ديال تركيا ديال دابا) ف جوايه 640 قبل لميلاد، ؤ جميع شّقفات لي بانو من بعد ف شمال إفريقيا ؤ شّرق لأوسط، ؤ ؤروپا كينحادرو من هاد لفلوس د ليديا.

لمزية ديال شّقفات د لفلوس هيّا بلي خفاف ؤ ماكيشدوش لبلاصة، ضونك ساهلين ف لهزان، ؤ كاتكون مطبوعة فوق منهوم لقيمة ديالهوم، ؤ لعلامة ؤلا تّصويرة ديال سّلطة لي سكّاتهوم. هاد لمسألة لّخرة ضارورية، حيت كاتبيّن بلي سّلطة (لماليك ؤلا لحوكومة) كيضمنو لموتوقية (بلي لفلوس حقيقية) ؤ لقيمة ديال دوك لفلوس.

بزاف د نّواع د لفلوس تستعملو عبر تّاريخ بحال لكوكياج ؤ لملحة، لي منها جات كلمت صالير (من لّاتينية sal، ملحة).