بيتكوين


لبيتكويننݣليزية Bitcoin، رّمز ديالو ، تّيكر ديالو BTC ؤلا XBT) هيّا كريپطوعوملة لامركزية مبنية علا سوفتوير ب مصدر محلول، تختارعات ف 2008.[1] لّي ختارع لبيتكوين مامعروفش ؤ سمّا راسو ساطوشي ناكاموطو (يقدر يكون واحد ؤلا بزاف د نّاس). تّخدام ديال بيتكوين بدا ف 2009، و من ديك لوقت بداو تيخدّموها بزّاف د نّاس ؤ طلعات لقيمة ديالها. أعلا قيمة وصل ليها بيتكوين ل حد سّاعة هيّا 67,778 دولار ميريكاني، ف 9 نونبر 2021.[2]

بيتكوين
بيتكوين
معلومات عامة
تاريخ د لبدية 3 يناير 2009
رّمز
تيكر BTC و XBT
بلايص د لبيع ؤ شرا Bitfinex، كراكين، بينانس، Huobi، BitBay، GDAX و KuCoin Exchange
شكون طورو ساطوشي ناكاموطو
لونڭاج سي++
طيكنولوجيا إثبات العمل و Secure Hash Algorithm 2
ريپو د لكود https://github.com/bitcoin/bitcoin
تّرخيص رخصة إم أي تي
أعلا قيمة 67778 دولار ميريكاني
مشاريع مبازية عليه لايتكوين، پيركوين، بيتكوين كاش، بيكوين ڭولد و Bitcoin Private
لموقع رّسمي https://bitcoin.org

لبيتكوين ماتاتحتاجش وسيط ف لخدمة ديالها ؤ ماعندهاش شي بنكة مركزية تاتحكم فيها. تاتخدم نيشان ما بين نّاس ؤ كولشي لمعاملات لّي كيدوزو فيها كيتقيدو ف واحد لكناش موزّع سميتو بلوكتشيين. طّريقة باش تاتخدم لبيتكوين تيخليها فيها لأمان و ماعمرو ما وقع بلي بزطام ديال لبيتكوين تّختارق ؤلا تقرصن (حيت لبيتكوين فيها نضام ديال لإجماع تيخلّي صعيب بزاف تتقرصن). هادشي ماكيمنعش أن لبيتكوين يقدر يتّشفر يلا قد شي حد يهاكي شركة ديال تبادل لكريپطوعملات، ؤ كان ديجا وقع ل شركة إم تي ݣوكس ف 2014.[3][4]

تّاريخعدل

 
تّطور د لقيمة د لبيتكوين معا لوقت

لمصاوبة (2008 تال 2011)عدل

قبل مايبان بيتكوين، كانو ديجا أفكار ؤ قتيراحات غاديين ف نفس لتيجاه ديال لكريپطوعملات، بحال لپروطوكول د إيكاش، لّي ختارعو ديڤيد تشاوم ؤ ستيفان براندز ف 1983، لّي عكس لبيتكوين كان كيحتاج ل سلطة مركزية (بحال بانكة) باش تجيري سّيستيم.[5] ف سّنوات لّي موراها بانو أفكار عندها علاقة معا لمفهوم د لپروڤ د لخدمة، ؤ لفوايد ديالو، متلا ف لحد من سپام ف لإيميلات. هاد لمفهوم كيلعب دور لوّلي (رئيسي) ف طّيكنولوجيا د لبيتكوين.

أول قتيرحات ديال كريپطوعملة كانو ديال لمهندس شّينوي ويي داي ف 1998،[6] ؤ ديال لعاليم د لحواسب لميريكاني نيك صابو، لّي ختارع لبيت ݣولد ف 2005. هاد لبيت ݣولد وخا داكشي ماكانش مأمن مزيان ضد لهجمات من نوع سيبيل.[5]

ف 18 غشت 2008، تسجّل ضّومين ديال bitcoin.org. ؤ ف 31 أكتوبر من نفس لعام، واحد لورقة علمية تنشرات ف ليستة د لمييلاج ديال لكريپطوݣرافيا، ب عنوان Bitcoin: A Peer-to-Peer Electronic Cash System (بيتكوين: سيستيم إلكتروني د لفلوس مبني علا لپيرتوپير)، مسنية ب سمية ساطوشي ناكاموطو.[7] ناكاموطو لونصا بيتكوين علا شكل سوفتوير ب مصدر محلول ف يناير 2009، ؤ بقا كيتبادل ميساجات ب لپسودو ديالو مرة مرة حتال 2011 ؤ موراها غبر. لهوية ديالو ل حد سّاعة مامعروفاش. شّركة د كوينبيز ديال لكريپطوعملات، علنات ف واحد رّاپور ف فبراير 2021 بلي يلا تعرفات لهوية د ناكاموطو غادي يأتر هادشي ب شكل سلبي علا لقيمة د بيتكوين.[7]

ف 3 يناير 2009، ناكاموطو ماينا أول بلوك ديال لبلوكتشين د لبيتكوين، لّي كيتسما لبلوك لأصلي ؤلا لبلوك زيرو. ف لكوينبيز ديال هاد لبلوك كانت هاد لجملة مكودية ب نضام سطّاشي The Times 03/Jan/2009 Chancellor on brink of second bailout for banks (جورنال ذ تايمز 03 يناير 2009، لمستشار علاين يعتق لبانكات من لأزمة ل لمرة تانية). هاد لجملة كتحيل ل لعنوان ديال أرتيكل د جورنال ذ تايمز، ؤ تعتابرات كا توقات (تحديد د لوقت) ؤ كومونطير علا لأزمة لقتيصادية ب سباب لبانكات.[8]

أول طرونصفير ديال لبيتكوين دّار ف 12 يناير 2009، ما بين ناكاموطو ؤ لعاليم د لحواسب هارولد فيني، لّي كان طوّر تقنية ديال لپروڤ د لخدمة لمعاودية ف 2004. ناكاموطو كان سيفط 10 بيتكوين ل فيني. هارولد فيني ؤ ناكاموطو تبادلو إيميلات، ؤ ناكاموطو زاد طوّر لپروطوكول ديال لبيتكوين علا حساب لفيدباك لّي كان كيعطيه فيني.[9] أول طروصفير ب غرض تيجاري دّار ف 22 ماي 2010، ملي لپروݣرامور لاصلو هينيتش شرا جوج پيتزات ب 10000 بيتكوين.[10]

لمحلّلين د لبلوكتشيين قدّرو بلي ناكاموطو غادي يكون ماينا مليون بيتكوين قبل ما يغبر ف مرة.[11] قبل من داكشي ناكاموطو عطا لاكصي ل لكود ديال بيتكوين ل ݣاڤين أندرسون. أندرسون غادي يولّي رئيس ديال لمبرمجين ف لمؤسسة د لبيتكوين. أندرسون غادي يحاول يديصونطراليزي لپروجي بحيت عطا أكصي ل پروجي ل 4 د دّيڤلوپورات خرين، مي هادشي غادي يخلق صراع ؤ شك علا لمستقبل ديال لبيتكوين، مقابل كون بقا ناكاموطو هوّا سّلطة لمركزية ف داكشي لّي متعلق بيه.[12]

دّيزاينعدل

 
لبلوك زيرو ديال بيتكوين، لي هوّا أول بلوك ف لبلوكتشيين ديالو لي تماينا ؤ تّطلق ب شكل عومومي

تّعدينعدل

لعدد د لبيتكوينات كيتزاد بشكل تدريجي ب واحد لپروصي كيتسما تّعدين Mining. هاد لپروصي كيخدمو فيه أفراد ؤلا شركات عندهوم سيرڤيرات قوية كدّير عمليات حسابية باش كتحل واحد لمسألة. فاش كتحلها، كتاخد واحد لمقدار ديال لبيتكوين كا مكافأة (هاد لبيتكوينات كيتصاوبو من والو، ماشي شي واحد كيعطيهم، بحال كيفما لبانكة تقدر تصايب فلوس من والو فاش كيدير بنادم ؤلا شركة شي سلف). هاد لمقدار كيتقسم علا جوج كولا 4 سنين تقريبا، مي لقيمة ديال لمكافأة كتزاد حيت لقيمة ديال بيتكوين غادية ؤ كتزاد بشكل كبر. أقصى عدد ممكن ديال لبيتكوينات هوّا 21 مليون، ؤ غادي نوصلو ليه ف عام 2140 علا أقصى تقدير.

لخصوصيةعدل

وحدة من لخاصيّات ديال بيتكوين هيّا بلي كيحافض ب شكل عام علا لخصوصية ديال لأفراد لّي كيستعملوه، بحيت مبدئيا يقدر بنادم يتبادل لفلوس ف رّيزو د لبلوكتشيين د بيتكوين، بلا ما تّفرش لهوية ديالو. وخا داكشي كاينين نتيقادات علا بيتكوين من هاد نّاحية، متلا من طرف إدوارد سنودن لّي ݣال بلي دّيڤلوپورات لّي كيطورو بيتكوين ماعطاوش ل لخصوصية أهمية كافية.[13]

لبيتكوين كا سوفتويرعدل

لبيتكوين كور، لّي هوّا سّوفتوير علاياش مبني سّيستيم د لبيتكوين، مكتوب ف أغلبية د لكود ديالو ب لّونݣاج سي++، ؤ تحط ف أنترنيت ف يناير 2009 ب مصدر محلول، ب ترخيص د إم آي تي.[14] هاد سّوفتوير فاش كيطيليشارجيه ؤ كيخدّمو بنادم كيولّي عݣدة ف رّيزو ديال لبلوكتشيين ديال بيتكوين. هاد رّيزو مكوّن من بزاف د لعݣدات كولهوم خدّامين ب هاد سّوفتوير، ؤ كيتبادلو لمعلومات بيناتهم. لبيتكوين كور ف نفس لوقت كيلعب دّور ديال بزطام ديال لبيتكوين، لّي كاتراجع ؤ كاتڤاليدي لخلاص ب بيتكوين. لبيتكوين كور كان ف لّول سميتو بيتكوين، ولاكين تبدّلات ليه سّمية باش مايتخالطش معا سّمية ديال لعوملة ؤ ديال رّيزو.[15] كاينة عندو حتا سمية خرة متداولة هيّا لكليان د ساطوشي Satoshi Client.

تّقبل د لبيتكوين كا عملةعدل

بزاف ديال نّاس تينتاقدو لبيتكوين حيت فنضرهم هيّا فلوس ماشي مضمونة و لقيمة ديالها تاتبدّل بزاف (حيث ما كاينش شي مركز تيقرّر ف لقيمة ديالها) و تاضّيع تّريسينتي بزّاف ف لخدمة ديالها. ولاكين كاينين بانكات ؤ شركات بداو ديجا كيقبلو تّعامل ب لبيتكوين ؤ كريپطوعملات خرين، بحال پايپال لّي علنات ف أكتوبر 2020 بلّي غادي تعطي لإمكانية ل لكليانات ديالها باش يبيعو ؤ يشريو بيتكوين.[16] ف لمقابل، أندرو بييْلي، لمدير ديال لبانكة د نّݣليز حدّر من تّطايريت ديال لبيتكوين، ؤ عتابر بلي كتسبب ليه مخاوف.[16]

علا حساب راپّور صدراتو لبانكة د سنغافورة ف يناير 2021، لبيتكويْن ؤ لكريپطوعملات بشكل عام، يقدرو يرومپلاصيو دّهب كا ستيتمار بْعيد لأمد، يلا قدرو يتغلبو علا مجموعة د لمشاكيل بحال تّطايريت، لْقْبول من طرف لمؤسسات، ؤ رّيسك لمرتابط ب سّمعة (ب عتيبارهم كيتستعملو ل غراض ماشي تال لهيه بحال تبييض لفلوس ؤ نواع خرين د لإجرام).[17]

ف 4 ماي 2021، دخلو لكريپطوعملات ب شكل رسمي ل وولستريت، فاش تزاد أنديكس خاص ديالهم ف لمؤشر ديال داو دجونز. هاد لانديكس فيه جّوج عملات لكبار لّي هوما بيتكوين ؤ إيثيريوم. كريپطوعملات خرين باقيين غادي يتزادو من بعد هاد لعام.[18]

ف 5 ماي 2021، تّعلن بلّي لبيتكوين، ؤ كريپطوعملات خرين، غادي يوليو متوفرين ف خلال نفس لعام كا عملات يقدرو لكليانات ديال مياوات د لبانكات لميريكانية يشريوهم. لبانكات د لميريكان خداو هاد لقرار بعدما شافو عدد كبير د لكليانات ديالهم كيدوزو لفلوس لسيتات د تّبادل بحال كوينبييز ؤ كراكن.[19]

لوضعية لقانونيةعدل

ف لمغريبعدل

لبيتكوين ممنوع ف لمغريب من نونبر 2017 حيت "تقدر تأتر سلبيا على لقتيصاد د لبلاد" ب سباب تّطاريت ديالها لي كاتخلي تّامان ديالها يتبدل بزاف. تّعامل ب لبيتكوين يقدر يعرّض شّخص ل عقوبات تقدر توصل ل لحبس ؤ غرامات.[20] وخا داكشي لمغريب تكلاصا ف سّيت د تّعاملات د لكريپطو لوكل بيتكوينز Local Bitcoins تّالت ف شمال إفريقيا ؤ شّرق لأوسط، ؤ 36 ف لعالام ف تّعامل ب لبيتكوين ف 2018.[21] ل حد سّاعة ف 2021 كاينين تقريبا 900،000 مغريبي كيمتالكو بيتكوين، شي لي كيمتل تقريبا 2،4% د سّكان د لمغريب، ب قيمة إجمالية ديال 6 د لمليون د دّولار، شّي لي كيجعلو لّول ف شمال إفريقيا ؤ رّابع ف إفريقيا، مورا نيجيريا، جنوب إفريقيا ؤ كينيا.[22]

ف شينواعدل

شّينوا منعات لكريپطوصولديات، بما فيها بيتكوين، من 2019، ولاكين عمليا بقاو شّناوا كيتعاملو بيهوم ؤ كيعدّنو فيهوم.[23] ف 19 ماي 2021، شّينوا منعات لبانكات ؤ لمؤسسات لمالية شّينوية باش تدير تّعامل ؤلا لبيع ؤ شّرا ديال لكريپطوعوملات، شّي لّي أدى ل طّيحة ديال تّمن ديال بزاف منهوم، بما فيهوم بيتكوين لّي نزل ل قل من 40000 دولار ميريكاني. شّينوا كانت ديجا سنوات ؤهيّا كتحاول تحد من لستيعمال ؤ تّعامل ب لكريپطو. هاد لقرار وخا داكشي ماكيمنعش لأفراد يديرو بزطام ديال كريپطوعوملة، ؤ يتبادلو بيناتهم علا أساس فردي.[24] ف 24 شتنبر 2021، جا قرار د لمنع لكامل د لكريپطو ؤ تّعامل بيها حتا علا لأفراد، ؤ لي بقا مستامر ف هاد "لأنشطة لفينونسية لممنوعة" كايتّعتابر بلي كيمارس جريمة ؤ غادي تّم لمتابعة ديالو قضائيا.[23]

ف روسياعدل

روسيا مانعة تّاعامول ب لبيتكوين ؤ لكريپطوصولديات ف دّاخل، ولاكين مسموح تّعدين ديالو ؤ تّعامول بيه معا جيهات برا د روسيا. بسباب لعوقوبات لقتيصادية لي فرضاتها لميريكان عليها، لمسؤولين رّوس كيفكرو باش يحولو بعض تّعامولات ديالهوم، سيرتو ف لمجال د طّاقة، ل صولديات خرين بحال لبيتكوين، باش ينقصو لعتيماد ديالهوم علا دّولار.[25]

ف بلدان خرينعدل

كاينين بلدان خرين مانعين لبيتكوين، و خرين معتارفين بيه و تاتخلي ناس يخدّموه بحال لميريكان و لبلدان د لإتحاد لأوروپي.[26]

ف يونيو 2021، لجمعية التشريعية د صالڤادور دوزات قانون لي رد لبيتكوين عوملة قانونية ف لبلاد.[27] هاد لقانون بدا يتطبق من 7 شتنبر 2021.[28]

عيون لكلامعدل

  1. ^ عملة «بيتكوين» المُشَفَّرة تلهب حماس المستثمرين وتتجاوز مستويات قياسية - القدس العربي (2021)
  2. ^ "Bitcoin, ether hit record high, other cryptos also surge" (بنڭليزية). 9 نونبر 2021.
  3. ^ "Can All Of Bitcoin Be Hacked" (بنڭليزية). 16 فبراير 2020.
  4. ^ "Bitcoin surges to new high near $65,000 as all eyes turn to Coinbase direct listing" (بنڭليزية). 14 أبريل 2021.
  5. ^ a b "Bitcoin and Beyond: A Technical Survey on Decentralized Digital Currencies" (PDF) (بنڭليزية).
  6. ^ "bmoney, Wei Dai" (بنڭليزية).
  7. ^ a b "The many alleged identities of Bitcoin's mysterious creator, Satoshi Nakamoto" (بنڭليزية). 26 فبراير 2021.
  8. ^ "لبلوك زيرو ديال بيتكوين".
  9. ^ "Hal Finney received the first Bitcoin transaction. Here's how he describes it" (بنڭليزية). 3 يناير 2014.
  10. ^ "10 Years After Laszlo Hanyecz Bought Pizza With 10K Bitcoin, He Has No Regrets" (بنڭليزية). 22 ماي 2020.
  11. ^ "Bitcoin's value just passed $1 trillion" (بنڭليزية). 19 فبراير 2021.
  12. ^ "A Solution To Bitcoin's Governance Problem" (بنڭليزية). 21 شتنبر 2015.
  13. ^ "Bitcoin Privacy Feud Erupts After Edward Snowden Pans Long-Awaited Taproot Upgrade" (بنڭليزية). 11 ماي 2021.
  14. ^ "لبيتكوين كور ف ݣيتهاب". ݣيتهاب.
  15. ^ "Bitcoin Core version 0.9.0 released" (بنڭليزية). 19 مارس 2014.
  16. ^ a b "Guide: What is Bitcoin and how does it work" (بنڭليزية). 5 فبراير 2021.
  17. ^ "Bank of Singapore Says Crypto Could Replace Gold as Store of Value". كوينديسك (بنڭليزية). 25 يناير 2021.
  18. ^ "S&P Dow Jones brings bitcoin, ethereum to Wall St with cryptocurrency indexes". رويترز (بنڭليزية). 4 ماي 2021.
  19. ^ "Bitcoin will soon be available through hundreds of US banks" (بنڭليزية). 5 ماي 2021.
  20. ^ المغرب يجرم التعامل ب "البيتكوين" خشية على اقتصاده وعملته - وكالة لأناضول (2017)
  21. ^ "المغرب يحتل مرتبة متقدمة بين الدول المتعاملة بـ"البيتكوين"" (بلعربية). 5 شتنبر 2018. مأرشيڤي من لأصل ف 5 شتنبر 2021. تطّالع عليه ب تاريخ 5 شتنبر 2021.
  22. ^ "Cryptocurrency information about Morocco [معلومات د لكريپطوصولدي علا لمغريب]" (بنڭليزية).
  23. ^ a b "China declares all crypto-currency transactions illegal" (بنڭليزية). 24 شتنبر 2021.
  24. ^ "China bans financial, payment institutions from cryptocurrency business" (بنڭليزية). 19 ماي 2021.
  25. ^ "Putin suggests openness to moving energy trade to crypto from dollar in the future" (بنڭليزية). 14 أكتوبر 2021.
  26. ^ ما هي الدول التي تحظر التعامل بعملة بتكوين؟ - العربي الجديد (2017)
  27. ^ Ostroff, Caitlin (2021-06-09). "El Salvador Becomes First Country to Approve Bitcoin as Legal Tender". Wall Street Journal (بنڭليزية). تطّالع عليه ب تاريخ 2021-06-09.
  28. ^ Renteria, Nelson (25 June 2021). "Bitcoin to become legal tender in El Salvador on Sept 7". Reuters. تطّالع عليه ب تاريخ 25 June 2021.
  تقدر تزيد شوف بزاف د صور و معلومات ديال Bitcoin ف ويكيميديا كومنز.

لمزاودعدل