إيلون ماسك
إيلون ماسك (تزاد ف 28 يونيو 1971) هو رجل أعمال و مستتمر ف تكنولوجيا، و مهندس. عندو لجنسية ديال جنوب إفريقيا و كانادا و لميريكان، وهو لمؤسس و رئيس تنفيدي و شاف ديال لمهندسين و لمصميين ديال شركة سپيس إيكس؛ مشارك ف تأسيس شركة طيسلا و مدير تنفيدي و مهندس منتج ديالها؛ شارك ف تأسيس شركة نيورالينك؛ المؤسس ديال شركة ذا بورينݣ كامپاني؛ مشارك ف تأسيس ؤپن إيي آي وواحد من روآسا د مجلس لإدارة ديالها؛ مشارك فتأسيس شركة پايپال. ف 2022، شرا شركة تويتر ب 44 مليار دولار.[1]
إيلون ماسك
| ||
| ||
| معلومات عامة | ||
| زيادة | 28 يونيو 1971 (51 عام) پريطوريا (جنوب إفريقيا) | |
| لجنسية | لميريكان (2002–) كانادا (1989–) جنوب إفريقيا (1971–) | |
| لحرفة | مبرمج، موهنديس، بياع وشرّاي، مستثمر، شخصية أعمال ضخمة، مستثمر ملاك و international forum participant | |
| لّوغات لي كيعرف | نڭليزية | |
| لكاريير ديال الشخص | ||
| شارك ف | ||
| لفاميلة | ||
| لواليد | إيرول ماسك | |
| لواليدة | ماي ماسك | |
| خوت | توسكا ماسك، كيمبال ماسك، Elliot Rush Musk، Asha Rose Musk، Alexandra Musk و قيمة مجهولة | |
| شريك | دجاستين ماسك (2000–2008) تالولا رايلي (2010–2012) تالولا رايلي (2013–2016) | |
| لولاد | نيڤادا ماسك Griffin Musk Vivian Jenna Wilson Damian Musk Saxon Musk Kai Musk إيكس أش إي طناش Exa Dark Sideræl Musk قيمة مجهولة قيمة مجهولة | |
| لمحيط | ليندون ريف (ولد عم / ولد خال) | |
| معلومات خرى | ||
| دين | لاأدرية | |
| لجوايز |
| |
| ||
             
| ||
ف دجنبر 2016 كان تكلاصا هو 21 فا لّيستة د فوربس ديال أقوى الناس ف لعالم. إيلون ماسك، ب تروة لي كانت كاتقدّر ف 2020 ب 336 مليار دولار، ماكانش غير أكتر شخص مرفّح ف لعالام، مي ف لغالب أغنى شخص ف تّاريخ د بنادم.[2][3][4] مجموعة د لحرايفيا ديال تّبزنيس كيعتاقدو بلي ماسك غادي يولي ف سّنوات جّاية أول تريلياري ف تّاريخ.[5] ف 2022، إيلون سجل أكبر خسارة د لفلوس ف التاريخ ملي طاحت لقيمة د التروة ديالو ب 200 مليار دولار. دابا كاتقّدر التروة ديالو ب 194 مليار دولار و هوّا تاني أكتر شخص مرفح ف لعالم مورا لفرانساوي بيرنار أرنو، مول شركة لوي ڤيطون ديال لمنتوجات د الرفاهية.[1][6]
إيلون كيتّعتابر شخصية متيرة ل الجدل، حيت دار بزاف د التصريحات متعلقة ب السياسة و الطيكنولوجيا ف السنوات اللخرة، سيرتو ف تويتر، لي تارت خلافات كبيرة بين لمساندين و لمعارضين ليه. و تّنتاقد بزاف حيت كتب شي حوايج ماعندهاش ساس علمي، بحال التصريحات ديالو على الجايحة د كوڤيد 19. ف 2018، هيئة د لأوراق لمالية و لبورصات لميريكانية SEC دعات إيلون ف لمحكامة حيت دار تعليق غالط ف تويتر بلي ضمن الراسمال لكافي باش يتدار ستحواد پريڤي ل شركة طيسلا. لمحكامة فرضات على إيلون باش يحيد راسو من رياسة لمجلس لإداري د تيسلا ل مدة د 3 سنين (وخا باقي مدير عام ديالها)، و باش يخلص أمونض ديال 20 مليون دولار.[7]
حياتوعدل
إيلون ماسك تزاد و تربا ف پريطوريا ف جنوب أفريقيا، ومشا ل كانادا ملي كانت عندو 17 عام باش يقرا ف جامعة كوينز، و من بعد عامين تحول لجامعة پينسلفينيا، و تما خدا لإجازة ديالو ف لاقتصاد من مدرسة وارتون و إجازة خرة ف لفيزيك من مدرسة لفنون و لعلوم، و بدا كيوجد دوكتورا ديالو ف لفيزيك تطبيقية و علم لمواد ف لجامعة د ستانفورد ف 1995 ولكن خرج من لقراية من بعد يومين باش يلتاحق ب لمسار ديالو ف لأعمال لحرة. من بعد غايشارك فتأسيس زيپ-2، واحد شركة متخصصة ف سوفتوير ديال ݣيد د لمدينة ل جورنالات، لي من بعد غاتشريها شركة كومپاك ب 340 مليون دولار ف 1999. ماسك من بعد غايأسس شركة إيكس.كوم، واحد لبانكة ؤنلاين، لي تشركات معا شركة كونفينيتي ف 2000 و من بعد ف نفس لعام ولات پايپال، لي غاتشريها إي باي ب 1.5 مليار دولار ف 2002.
ف ماي 2002، ماسك أسس شركة سپيس إيكس، لي كتهتم ب تصنيع صوارخ و رحلات ف لفضاء، لي هو لمدير تنفيدي و لمصمم رئيسي ديالها. نضم ل شركة طيسلا، لي كتصايب طونوبيلات كيخدمو ب تريسينتي، ف 2004، عام من مورا ما تأسسات، و ولا هو لمدير تنفيدي و لمهندس لمنتج ديالها. ف 2006 لهم إنشاء شركة سولار سيتي، ديال طّاقة شّمسية (لي ولات دابا تابعة ل طيسلا)، و خدم رئيس مجلس لإدارة فيها. ف 2015، ماسك شارك ف تأسيس أوپن إي آي د لبحت لاربحية لي كتهدف ل ترويج دكاء صطيناعي ضريف، يعني ماكيشكلش خطر علا لحضارة ؤ لحياة د بنادم. ف يونيو 2016، شارك ماسك ف تأسيس نيورالينكديال تّقنية لعصبية مركزة علا تطوير أنطيرفاص مخ-أورديناتور (تقنية كتهدف ل تّيصال مباشر بين مخ بنادم و لأورديناتور). ف دجنبر 2016 ماسك أسس ذا بورينݣ كامپاني، لي هي شركة ديال لبنية تحتية و كتهتهم ب حفير لأنفاق.
فوق من لمساعي تجارية ديالو، ماسك تصور نظام ديال طّرونسپور عندو سرعة كبيرة سماه هايپرلوپ، و قتارح لفيكرة ديال طيارات نفاتة سرع من صوت كتطلع و تهبط عموديا ب دفع ديال فرفارات كتخدم ب تريسينتي. ماسك ݣال بلي لهدف ديال سپيس إيكس، طيسلا و سولار سيتي كتدور علا رؤية ديالو ل تغيير لمستقبل ديال بنادم. لأهداف ديالو هيّا نّقيص من لحتيباس لحراري ب لانتاج و سّتيهلاك ديال طاقة لمتجددة و نّقيص من لخطر ديال نّقيراض ديال بنادم ب لبني ديال مستوطنات ف لمريخ.
لكاريير د تّبزنيسعدل
زيپ 2عدل
ف 1995، إيلون معا خوه كيمبال ماسك و ڭريڭ كوري أسسو شركة زيپ 2 (كاتّقرا زيپ تو).[8][9] بّاه إيرول ماسك عطاه 28.000 دولار باش يبدا الشركة ديالو، لي طوّرات ڭيد د لمدينة ب خرائط ف أنتيرنيت، لي كان باقي جديد ديك الساع، و كانت كاتدير لماركيتينڭ ف الجورنالات. ف فبراير 1999، شركة كومپاك شرات زيپ 2 ب 307 مليون دولار، لي خدا منها إيلون 22 مليون.[10]
إكس ضوت كوم و پايپالعدل
مقالات متعمقة: إكس ضوت كوم• لمافيا د پايپال
ف 1999، إيلون ماسك كان من بين مؤسسين ديال شركة إكس ضوت كوم X.com، شركة ديال السرابس د لفلوس و لخلاص ب لإيميل.[10] و كانت من أول لبانكات ف أنتيرنيت لي عندها لاصورانص من مركز فيديرالي ميريكاني. ف الشهر اللول ديالها وصلات ديجا ل 200.000 كليان. وخا إيلون كان عضو مؤسس، لمستتمرين ف الشركة عتابرو بلي ماعندوش خبرة كافية، و قبل مايسالا لعام حيّدوه من لمنصب د لإدارة د الشركة، و حطو بيل هاريس بلاصتو.[10]
ف عام 2000، إكس ضوت كوم ندامجات معا شركة خرة كاتدير نفس السربيس لي هيّا كونفينيتي Confinity.[11] إيلون رجع مدير د الشركة الجديدة، ولاكين التفضيل ديالو ل السيستيم د مايكروصوفت على ؤنيكس Unix خلق نقيسام مابين لموضافين د الشركة، و خلا پيتر ثيل لي كان مؤسس د كونفينيتي، باش يستاقل من لمنصب ديالو ف لمجلس د الشركة. بسباب التراكم ديال لمشاكيل، ف شتنبر 2000، لمجلس لإداري ستاغل لفرصة فاش إيلون ماسك مشا ل شهر لعسل معا مراتو اللولة، باش يحيّدو من لمنصب ديال لمدير، و رجّعو پيتر ثيل بلاصتو. و ف 2001 بدّلو السمية ل پايپال (لي كانت السمية ديال السربيس د لخلاص ديال كونفينيتي).[12]
ف 2002، شركة إيباي شرات پايپال ب 1,5 مليار دولار، و إيلون لي كانت عندو أكبر نسبة د لأسهم فيها ب 11,72%، دّا 175 مليون دولار ف نصيبو. ف 2017، شرا السمية د الضومين X.com من عند پايپال "ل أسباب عاطفية"،[13][14] و ف 2022 ڭال بلي بغا يقاد "إكس، لأپليكاصيون ديال كولشي" X, the everything app.[15]
سپيس إكسعدل
- مقالة متعمقة: سپيس إيكس
ف لبدية د 2001، إيلون ولّا مشارك معا مارس صوصاييتي Mars Society (لمجتمع د لمريخ)، لي هيّا مونضامة لاربحية كاتهدف ل الستيكشاف د لمريخ و الستيطان ديالو من طاراف بنادم. إيلون و لأعضاء د لمونضامة ناقشو لفكرة و التمويل ديال لمصيفطة د نبتة ل لمريخ. ف أكتوبر من نفس لعام، مشا ل موسكو باش يشري صاروخ عابر ل لقارات لي يقدر يتخدّم ف ديك لمهمة. الرواسا ماخداوش لقضية ب جدية كبيرة حيت عتابرو ماسك مبتدئ ف هادشي د لفضاء، و لمفاوضات فشلو.
لمحاولة التانية د شّرا د صّوارخ من عند روسيا ف فبراير 2002 تا هيّا فشلات، و إيلون قرر باش يبدا يصاوب صوارخو رّاسو، و ب أتمنة طايحة. ف ماي 2002، أسس شركة سپيس إكس ب راسمال د 100 مليون دولار من فلوسو و كان لمدير التنفيدي و رئيس لمهندسين ديالها.
لمحاولة اللولة ديال لإطلاق د سپيس إكس تدارت ف 2006، ب صاروخ فالكون 1. وخا لإطلاق فشل، وكالة لفضاء لميريكانية نازا دارت كونطرا ديال لمصيفطة ل لفضاء معا الشركة. بعد جوج محاولات خرين فاشلين لي قرّبو سپيس إكس من لإفلاس، لمحاولة الرابعة ف 2008 نجحات ب وصول الصاروخ فالكون 1 ل لمدار د لأرض. ف نفس لعام، الشركة خدات كونطرا د 1,6 مليار دولار من عند نازا باش تستعمل الصاروخ فالكون 9 و لمركبة دراڭون د سپيس إكس، باش يديرو 12 رحلة ل لمحطة لفضائية الدولية، حيت برنامج مكوك لفضاء ديال نازا كان معول باش يحبس ف 2011. ف 2012، لمركبة دراڭون دارت لتيحام معا لمحطة لفضائية، باش تكون أول مركبة تجارية كاتدير هاد لعملية.[16]
ف إطار تقليص لكلفة ديال الصوارخ، سپيس إكس سعات ل تطوير صوارخ ب معاودة د التخدام (يعني كايطلعو ؤ كيعاودو ينزلو باش يتصيفطو مرة خرة ل لفضاء)، حيت قبل كانو الصوارخ كيتصاوبو باش يتخدّمو مرة وحدة. ف بزاف د لحوارات إيلون كان كيشبّه هادشي ب طيارة كاتصاوب و كاتّستعمل مرة وحدة، شّي لي غادي يخلي التمن د التيكي ديالها غالي بزاف مايقدّو عليه غي لملايريا. ف 2015، سپيس إكس قدرات ل أول مرة ف التاريخ باش تنزّل ليطاج اللول ديال صاروخ (فالكون 9) على رجليه.
ف 2018، الشركة دارت أول إطلاق ديال صاروخ فالكون هاڤي Falcon Heavy، لي كانت فيه طونوبيلة طيسلا روودستر خاصة ديال إيلون ماسك باش تمتّل حمولة وهمية د الصاروخ. من 2019، سپيس إكس خدّامة على تطوير سطارشيپ، لي هوّا صاروخ ب معاودة د التخدام بشكل كامل، قادر يهز تقل كبير بزاف، و مديور باش ياخد لبلاصة ديال صوارخ لفالكون و لفالكون هاڤي.
ف 2020، سپيس إكس دارت أول عملية مصيفطة ديال رواد د لفضاء ل لمحطة لفضائية الدولية، باش تولي أول شركة تجارية ف التاريخ كاتحقق هاد لإنجاز.
سطارلينكعدل
- مقالة متعمقة: سطارلينك
من 2015، بدات شركة سپيس إكس ف تطوير السيستيم ديال سطارلينك Starlink ديال الصاطليتات (أقمار صطيناعية) لي كاتعطي السربيس د لأنتيرنيت ف لعالم كاملو. أول جوج ساطليتات تجريبيين د سطارلينك تصيفطو ف فبراير 2018، لعشرات د الصاطليتات خرين تصيفطو موراهوم، و لمشروع غادي يشد 10 سنين باش يكمل، و يكلّف جوايه 10 مليار دولار على حساب التقديرات.
لإتحاد لعالمي د لفلكيين نتاقد هاد لمشروع حيت غادي يبلوكي الشوفان د لفضاء من لأرض، و يقدر يتسبب ف زديح معا مركبات فضائية لي كيتصيفطو على حساب ماڭالت هاد لمونضامة.
ف لوقت ديال الجتياح الروسي د ؤكرانيا، إيلون عطا لاكصي فابور ل الناس د ؤكرانيا ل أنتيرنيت ب سطارلينك، شّي لي كيكلف الشركة 400 مليون دولار ف لعام.
طيسلاعدل
- مقالة متعمقة: شركة طيسلا
بدات شركة طيسلا Tesla Inc، لي كان سميتها طيسلا موطورز Tesla Motors، ف 2003، و أسسوها مارتين إبرهارد و مارك طارپينينڭ. إيلون ماسك أنڤيستا 6,5 مليون دولار ف الشركة باش يولي أكبر مساهم فيها، و ولا عضو و رئيس لمجلس لإداري ديالها. إيلون لعب دور أساسي ف التطور د الشركة، و سهر على الديزاين ديال أول پرودي ديالها طيسلا روودستر، مي ماكانش كيتدخل بزاف ف لخدمة ليومية. بسباب لأزمة لمالية د 2007 و 2008 و خلافات لي كانت بدات من 2007، لمجلس لإداري جرّا على إبيرهارد، و إيلون ولّا لمدير د الشركة. ف 2009، بعد خلاف قانوني معا إبيرهارد، خرج قرار د لمحكامة كيعتابر إيلون ماسك من بين لمؤسسين ديال طيسلا. ف 2019، إيلون حطم الروكور ديال أطول مدة ف منصب ديال مدير د شركة د الطونوبيلات.
صولار سيتيعدل
- مقالات متعمقة: صولار سيتي• طيسلا إنيرجي
إيلون ماسك حط لكونصيپط د الساس ديال شركة صولار سيتي، لي أسسوها ولاد خالتو ليندون و پيتر ريڤي ف 2006. هاد الشركة كاتصاوب لپانوات ديال الطاقة الشمسية و كاتعطيهوم فابور من دار ل دار موقابيل باش لكليان يشري الطاقة لي كيجينيريو من عند الشركة ل مدة 20 عام.
ف 2016، إيلون ماسك شرا صولار سيتي ب 2,6 مليار دولار، و دمجها معا الديپارطومو د الطاقة ديال شركة طيسلا، باش يأسس طيسلا إنيرجي.
نيورالينكعدل
- مقالة متعمقة: نيورالينك
ف 2016، إيلون ماسك كان عضو مؤسس د شركة نيورالينك ديال النيوروطيكنولوجيا (طيكنولوجيا د الدماغ)، ب ستيتمار ديال 100 مليون دولار. لهدف ديال نيورالينك هوّا باش تدمج الدماغ د بنادم معا الدكاء الصطيناعي، ب لمصاوبة د شقفات إليكطرونية كيتغرسو ف الدماغ. هادشي غادي يخلي بنادم تطور لقدرات ديالو بحال الداكرة، و لقدرة على التواصل معا لماكينات و الصوفتوير. التطبيق اللول ديال هاد الطيكنولوجيا غادي يكون ف لمداوية ديال أمراض بحال الزهايمر.
ذ بورينݣ كامپانيعدل
- مقالة متعمقة: ذ بورينڭ كامپاني
ف 2017، إيلون ماسك أسس ذ بورينڭ كامپاني لي لهدف ديالها باش تحفر أنفاق لي يدوز منهوم الطرافيك ديال لمركوب و ينقصو الضغط على الطرقان فوق لرض. الجوج بلانات اللولين لي كانو مخططين ف لغرب د لوس أنجيليس و شيكاڭو تّلغاو ف 2018، ولاكين النفق ديال لاس ڤيڭاس ديجا كمل ف 2021، و كاين واحد أخور مخطط ليه ف مدينة فورت لودرديل ف ولاية فلوريدا.
تويترعدل
- مقالة متعمقة: تويتر
Elon Musk تويتر @elonmusk I made an offer
https://sec.gov/Archives/edgar...14 أبريل 2022[17]
.jpg){kind=small}
ف 25 أبريل 2022، لمجلس لإداري ديال شّركة د تويتر علن بلي قبل طّلب د شّرا ديالها من طاراف إيلون ماسك ب 44 مليار دولار.[18][19] ف 8 يوليوز، لمحامي د إيلون ماسك علن بلي لغا لقرار د شّرا "حيت شّركة د تويتر ماتبّعاتش لّتيزامات ديالها ف إطار صّفقة".[20] بزاف د اللغا و لماخدة و الرد طراو ف هاد لافير، ولاكين ف 27 أكتوبر 2022، إيلون كمّل الصفقة د الشرا د تويتر بشكل رسمي، باش يولي لمدير و رئيس لمجلس لإداري ديالها. مور ما خدا زمام لأمور فيها، إيلون جرّا على بزاف د لموضافين د تويتر، منهوم لمدير لقديم ديالها پاراڭ أڭراوال، و نقص الرقابة على لمنشورات فيها. مركز قانون لحاجة لجنوبي لي كيتبّع لحقوق لمدنية ف ميريكان، ڭال بلي لخطاب د لكراهية ولا كيتشاف كتر ف تويتر مورما ماسك ولا مدير ديالها. إيلون دار شحال من قرار لي عاود تراجع عليه، بحال لقرار باش يعطي لعلامة الزرقة ل أي واحد خلّص شتيراك شهري.
ف 18 دجنبر 2022، إيلون ماسك دار صونداج ف تويتر كيسوّل لمتابعين ديالو واش يعتازل من لمنصب د لمدير، و 57,5% ڤوطاو ب "أه". ماسك وعد باش يحيّد من لمنصب ديالو "ب مجرد ما يلقى شي مسطي يبغي يشد بلاصتو".
ف 11 ماي 2023، ختار إيلون ليندا ياكارينو بش تخلفو على راس لإدارة ديال تويتر.[21]
أراء ديالوعدل
الدكاء لإصطناعيعدل
إيلون كان من بين لي سناو برية مفتوحة كيطالبو فيها جميع اللابوات و لمؤسسات لي خدامين على الدكاء لإصطناعي باش يحبسو لخدمة ديالهوم و مايطوروش سيستيم جديد قوى من شاط جي پي تي 4، ل مدة ديال 6 شهور على ما يتحلو مجموعة د لمعضلات التقنية و لأخلاقية لي يقدرو يسببوها لڤيرسيونات الجايين ديال الدكاء لإصطناعي، بحال بلي يقدرو يديرو لخدمة ديال لملاين د الناس و يردّوهوم ل الشوماج.[22][23]
عيون لكلامعدل
- ^ a b "Elon Musk breaks Guinness World Record for 'largest loss of personal fortune in history'". 13 يناير 2023.
- ^ "إيلون ماسك، سيرة ديالو" (ب نݣليزية).CS1 maint: unrecognized language (link)
- ^ "Elon Musk Is The Richest Person In History". فوربس (ب نڭليزية).
- ^ "The World's Billionaires - Richest People On Earth, 2021" (ب نڭليزية).
- ^ "Experts Say SpaceX Might Make Musk a Trillionaire, But Tesla Just Boosted His Worth $25 Billion". ياهو (ب نڭليزية).
- ^ "THE REAL-TIME BILLIONAIRES LIST".
- ^ "Tesla's Elon Musk says tweet that led to $20 million fine 'Worth It'" (ب نڭليزية). 27 أكتوبر 2018. مأرشيڤي من لأصل ف 22 ماي 2020.
- ^ ديليڤيت، پيتر؛ هول، دانا (13 غشت 2012). "Greg Kouri, early investor in PayPal, dies in New York". The Mercury News. مأرشيڤي من لأصل ف 6 أكتوبر 2022.
- ^ هادلسطون، طوم جونيور (19 يونيو 2018). "How Elon Musk founded Zip2 with his brother Kimbal". CNBC. مأرشيڤي من لأصل ف 9 نونبر 2022.
- ^ a b c ڤانس، أشلي (2017) [2015]. Elon Musk: Tesla, SpaceX, and the Quest for a Fantastic Future (طبعة 2nd). نيويورك: Ecco. ردمك 978-0-06-230125-3.
- ^ هادلسطون، طوم جونيور (19 يونيو 2018). "Elon Musk slept on his office couch and 'showered at the YMCA' while starting his first company". CNBC. مأرشيڤي من لأصل ف 18 غشت 2020.
- ^ ؤضيل، مارك (30 شتنبر 2014). "Timeline: The rise of PayPal". Financial Times. مأرشيڤي من لأصل ف 22 يونيو 2020.
- ^ هوانڭ، إكو. "Elon Musk bought a web domain worth millions with 'sentimental value' to him". Quartz. مأرشيڤي من لأصل ف 25 يونيو 2020.
- ^ ستات، نيك (10 يونيو 2017). "Elon Musk now owns X.com, the defunct domain of his second startup". The Verge. مأرشيڤي من لأصل ف 25 يونيو 2020.
- ^ كلاينمان، زوي (5 أكتوبر 2022). "Elon Musk, Twitter and the mysterious X app". BBC. مأرشيڤي من لأصل ف 21 أكتوبر 2022.
- ^ واسطلز، Jackie (30 ماي 2020). "SpaceX and NASA launch Crew Dragon in Florida: Live updates". CNN. مأرشيڤي من لأصل ف 29 غشت 2020.
- ^ Elon Musk [@elonmusk] (14 أبريل 2022). "I made an offer
[www.sec.gov/Archives/edgar/data/0001418091/000110465922045641/tm2212748d1_sc13da.htm sec.gov/Archives/edgar...]" (Tweet) – على طريق Twitter. - ^ "44 Milliarden US-Dollar zahlt Elon Musk für Twitter" (ب لالمانية). 26 أبريل 2022. تطّالع عليه ب تاريخ 26 أبريل 2022.
- ^ "Elon Musk bought Twitter. Here's what he says he'll do next" (ب نڭليزية). 25 أبريل 2022. تطّالع عليه ب تاريخ 26 أبريل 2022.
- ^ "Elon Musk notifies Twitter he is terminating deal". 8 يوليوز 2022.
- ^ "Linda Yaccarino wird neue Chefin von Twitter" (ب لالمانية). 2023-05-12.
- ^ "Pause Giant AI Experiments: An Open Letter". 2023-03-29. تطّالع عليه ب تاريخ 2023-04-02.
- ^ "Elon Musk joins call for pause in creation of giant AI 'digital minds'". 2023-03-29. تطّالع عليه ب تاريخ 2023-04-02.
|
تقدر تزيد شوف بزاف د تّصاور و لمعلومات ديال Elon Musk ف ويكيميديا كومنز. |