يوبا التاني

يوبا التاني
معلومات عامة
زيادة	52 قبل لميلاد هيبون
لموت	23 (73/74 عام) تيبازة الموريطنية
لجنسية	نوميديا روما القديمة
لحرفة	كاتب، توارخي، سياسي و عالِم
لّوغات لي كيعرف	ليونانية لبالية
لفاميلة
لواليد	يوبا الأول
شريك	كليوپاطرا سيليني التانية غلافيرا
لولاد	پطوليمايوس لموري دروسيلا الموريطنية الكبرى Cleopatra of Mauretania

يوبا تّاني ؤلا يوبا لموري لي سميتو شي مرّات ب لغالاط كاتّقرا جوبا (ب نݣليزية Juba ؤ ب لاتينية IVBA ؤلا IUBA)، هو يوبا بن يوبا (يوبا لّول) بن هيمبسال (تّاني) بن ݣوضا بن مستنبعل بن ماسّنيسا بن ݣايا بن زيلالسن، ماليك أمازيغي موري من أصل نوميدي حكم مملكة موريطانيا شي نص قرن تقريبا، و كان عالم مهم لدرجة أن شي كتّاب داروه من أفضل علماء الإغريق، و كيما ݣال ستيفن ݣسيل فيوبا شخصية مميزة ساهمات فيه بزاف تاع شّخصيات من شعوب مختلفة و عطاتنا شخصية يوبا المحبوبة، فهو أمازيغي الدم، إغريقي الهوية، روماني التربية، لموروث تاعو بوني، و ممكن نزيدو حتا مصري-مقدوني و حيت تزوج كيليوباطرا سيليني المصرية، و كيسميه ݣسيل الأفريقي الطيب .

يوبا فصغرو و شّباب نتاعو

يوبا فصغرو

تّاريخ زّيادة نتاع يوبا ممضبوطش مزيان ،ولكن كيتقدر بعام 50 قبل الميلاد، و هادشي حيت عارفين أن يوبا كان صغير بزاف فعام 46 قبل الميلاد، غاتكون عندو شي 5سنين أولا 7سنين فوسط فوضى الحرب. و ملي كان لواليد تاعو يوبا لّول كيتقاتل مع جيوش الرومان بقيادة قيصر خلاّ لفاميلة نتاعو فمدينة زاما و مشا لّْحرب، ولكن مقدرش يرجع حيتاش ملي نهازم قدّام رّومان قرر ينتاحر، و ملي ربح قيصر الحرب و دخل لمدينة زاما، قلب على لفاميلة نتاع يوبا لّول ،و واخّا معرفناش آش دار بولاد يوبا لاخرين ولكن لّي كنعرفو هو أن قيصر خدا معاه يوبا الولد لروما و دوزو فموكب رّْباح لي تّْدار لقيصر. ملي وصل يوبا وهو باقي غير دري للقصر فروما كان غير واحد من بزاف تاع دْراري لي كان أغلبهم مشارقة جابوهوم للقصر باش يزرعو فيهم روح المواطنة رُمانية باش يكونو واجدين لخدمة رّومان ملّي غادي يولّيو حكام لبلاداتهم الأصليين، و من بين العتقاء لي كانو فلقصر رّوماني كانت كيليوباطرا سيليني لي تربات مع يوبا فنفس لقصر و غادي تولي مراتو فالسنوات الجّايّا إلى جانب مراتو لوخرة ݣلافيرا . يوبا ملي كان فلقصر كان أوكتاف هو لْمكلّف بتّربية تاعو و تهلّا فيه وعطاه سمية جديدة هي كايوس يوليوس Caius Julius و لكن هاد السمية غادي يحيدها يوبا ملّي غايولي ماليك و غادي يسمي راسو ريكس يوبا REX IVBA بمعنى: الملك يوبا.

شْباب نتاع يوبا

دوز يوبا طفولة عامرة بالعلم و الفن و القيم، ولّا شبعان بتّقافة اليونانية و روح لمواطنة رّومانية، و تحت عينين أوكتاف تعلم يوبا اللغة الإغريقية و اللاتينية.

و ملي ولا يوبا فعمر 19 عام تقريبا، مشا مع أوكتاف للشرق فرْبيع تاع عام 31 ق.م و شارك فالحرب تماك فجنب رّومان ضد أنتوني و كيليوباطرا و رجع بعد تلت سنين تقريبا فشهر غشت من عام 29 ق.م.

و معروف بلّي يوبا شارك حتا ف لحرب لي وقعات فإسبانيا، فاش مشا مع الإمبراطور أغسطس و بقاو فإسبانيا عامين هوما عام 26 ق.م و 25 ق.م ، فاش حارب لعسكر رّوماني جيوش الآشتوريين و الكنطبريين ، ومن بعد ما كملات لحرب فإسبانيا، أغسطس عطا واحد الطرف من أرض الجيتول ليوبا باش يحكمها و هادشي باش يعوض ليه الأراضي لّي كان لواليد تاع يوبا حاكمها، و محبسش هنا و لكن بعد ما مات لماليك بوݣود على يد أݣريبا ، و حتا لماليك بوكوس الثاني مات بعدما وصى باش تْعطا المملكة الموريطانية -لي كانت شادّا أقصى توسع ليها- للرّومان، قرر الإمبراطور يعطي دوك جّوج ممالك ليوبا باش يحكمهم، وهكدا و هكدا و فالخريف تاع سنة 25 ق.م يوبا غادي يولّي ماليك رسمي على مملكة بوغود و مملكة بوكوس الثاني و مملكة يوبا لّول .

مملكة يوبا الثاني جغرافيا و سياسيا و اقتصاديا

طوبونوميا مملكة يوبا الثاني

بعدما ولى يوبا هو لماليك نتاع رقعة جغرافية واسعة من شمال إفريقيا، كانت لحاجة لّولة لي دارها هي أنه يوحد قبايل موريطانيا من تحت دولة وحدة بضفتين لي هوما 'موريطانيا الطنجية ، و أحيانا خدم القوة باش يتمكن من إخضاع القبايل، و رجع شرشال هي عاصمة طّرف الشرقي من المملكة و وليلي هي عاصمة طّرف الغربي، و بشكل عام حكم من لبحر لبيض لمتوسط حتا تفوت جنوب-غرب الصويرة بشوية، و كان حاكم حتا شي طروفا من لارض تاع الݣيتول و حتا شوية من لارض قبايل الأطولول، وهادشي كامل كان تحت لْحضية تاع رّومان. من خلال لخريطة تاع أݣريبا ، غادي نقدروا نجبدو واحد ليست تاع شي مدن موريطانية كانو معروفين عند الرومان و من المرجح أنهم كانو تحت حكم يوبا و لي منهم:

• طنجيس
• زيليس
• ليكسوس
• سبتة
• تمّودا
• وليلي
• بيناصا
• تاموسيدا
• توݣولوسيدا
• بوماريا
• قيصرية

النظام السياسي فموريطانيا

كان نظام كيشبه لتاع رّومان، كان يوبا هو لماليك لي عندو السلطة المطلقة، ولكن هادشي مكيمنعش أن الحكم كان ديمقراطي و تمثيلي-نيابي، بحيث كان مجلس بلدي كيتم لينتيخاب تاع الأعضاء من بين لمواطنين الأحرار و هكدا كل مجلس كيتكلف بتسيير مدينة وحدة.

اقتصاد موريطانيا

مكاينش شك أن يوبا غادي يبني أقوى اقتصاد عرفاتو مملكة موريطانيا فݣاع التاريخ نتاعها لّي كيرجع للنص لّول من الألفية لّولا قبل الميلاد، والدليل على هادشي هو عدد الفلوس لي سكْها يوبا و لي كيتعتابر عدد هائل مقارنة بالملوك السابقين، و كثرة سك الفلوس كاتعني بلي المملكة فهاد لوقيتة عرفات رخاء اقتصادي مهم، وكان يوبا كل عام كيعطي أوامر باش تتسك عملة جديدة فيها رقم الحكم لي وصل ليها، و أكبر رقم بينات عليه الكشوفات الأثرية بحال كنز بناصا هو 48، يعني أن يوبا على الأقل حكم لمدة 48 عام. و بحكم لعلاقة صْحيحة لي كانت بين روما و شرشال و وليلي، فكانت موريطانيا هي المزود الرئيسي لروما ببزاف د المنتوجات منهم:

• السبوعا : كانو كيتستعملو لأغراض الترفيه و الألعاب رّومانية، و كنلقاو نوع من سّبوعا مشهور و هضرو عليه شي شعراء رومان لي هوا السبع الأوطولولي ؤلا السبع الݣيتولي.
• السمك المملح .
• صْباغة تاع الأرجوان: لماليك يوبا آمر باش يتستعملو الجزر الفرفورية لي كاينين قدام لابلاج نتاع الصويرة فصناعة نتا واحد الصباغة بنفسجية، هاد المصنع كان تابع لأراضي الأطولول و هادشي لي خلا هاد القبايل يتشهرو بزاف بالأرجوان الجيتولي.
• الݣاروم: و هو لمرقة نتاع لحوت كيستعمل فبلاصة لعطرية.
• الأثاث الخشبي: فعهد يوبا تباعت واحد طابلة من الخشب للرومان بثمن مرتفع.

يوبا العالم المثقف

ما كاينش شك أن يوبا كان مشهور بالمؤلفات و البحوث العلمية لي دار، حيت كان عالم موسوعي ماخلا حتا علم مكتبش فيه، لدرجة أن لمؤرخ پلينيوس لقديم ݣال عليه:

" ما كاينش شك أن شّوهرة نتاع يوبا كا عالم فاتت شوهرة نتاعو كا ماليك "

،وكانو لكتّاب لي كانو فزمانو و لي بعد منو كيعتابروه من أعظم علماء الإغريق بحال المؤرخ بلوتارك ، واخا المؤلفات تاعو ضاعت للأسف و أغلب المؤرخين كيلوحو السبة على الحروب لي وقعات أثناء ثورة إيديمون بين الأمازيغ و الديكتاتور كاليݣولا،ومن الإنجازات العلمية لي كنلقاو آثار تاعها فالكتابات الرومانية:

• موسوعة ليبيكا : كانت فيها تلاتة تاع المجلدات كبار و هضر فيهم على تاريخ شمال إفريقيا و العادات و التقاليد و اللغة تاع الأمازيغ و فيها تقرير على الإستكشاف لي دارو لجزر الكناري و ملخص لرحلة حانون، وذكر فيهم الأنواع الحية لي كانت فالمملكة تاعو بحال الفيل، النمر، الحمار الوحشي،الغزال و السبع، ونباتات بحال الليمون و ال[فربيون] ، وذكر فهاد لموسوعة التراث الشفوي لي كان منتاشر ديك لوقيتة بحال قصة السبع الحقود لي باقا لحد اليوم فالتراث القصصي المغربي و حتا قصة البطل هيركوليس راجع لطنجة .
• النقد المسرحي: كان كيكتب فالشعر و النقد و كنعرفو بلي قبل ما يولي ملك كان انتقد واحد الممثل لعب دور شخصية سميتها ليويونتوس ضمن واحد لمسراحية سميتها هيبسيبيل و كتب أبيات شعرية كيضحك فيها على الممثل بسبب التمثيل العيّان لي دارو حيت كتّر من الماكلة قبل مايدخل للمسرحية.
• أبحاث فالفيلولوجيا التاريخية-الإشتقاقية: طرح نظرية الأصل اليوناني للغة الاتينية و كان كيحاول يجمع لكلمات اليونانية و يشتقها باش يثبت الفرضية، وكان مهتم بجمع المفردات العربية و السريانية و الهندية و الإثيوبية و لهجات الأناضول.
• كتاب التحريف فاللغة : هضر فيه على نتائج الدراسات و البعثات اللغوية لي كان كيدير و درس فيه التحريفات لي كيوقعو للمفردات.
• موسوعة الموسيقى: كتب فيها على الموسيقيين المشهورين فداك لوقت و دوزان لي كانو كيخدمو بيه.
• مدراسة شرشال للموسيقى: أثبت لينا المؤرخ بوزياني الدراجي بلي يوبا بنا هاد المدراسة و كان كيعيط على فنانين من برا باش يتعلمو السكان المحليين منهم.
• كتاب تاريخ المسرح : كيتكون من 18 مجلد هضر فيه على فن الرقص عند الشعوب المختلفة و كيفاش كيتخلط فن الموسيقى بالرقص و المسرح، و كتب على تاريخي الآلات الموسيقية.
• معهد التمثيل بشرشال: معهد بناه باش يتدرس فيه التمثيل.
• بناء المسارح: بنى 3 تاع المسارح واحد فوليلي و واحد فليكسوس و اللخر فشرشال.
• كتاب تاريخ الرسم :كتاب من 8 تاع الأجزاء، هضر فيه على تاريخ الرسم و الرسامين لي كانو فعهد يوبا و من بينهم: بوليݣنوت و باراهاسيوس .
• فن النحت: اهتم يوبا بالنحت و كيبان هادشي من عدد التماثيل تاعو لّي تكتشفات فبعض المواقع الأثرية، و فسنة 1916 تكتاشف تمثال كلب من البرونز مؤرخ من عهد موريطانيا الطنجية، بغل أفرشة ديلوص، وبورتريه تاع شاب فمقتبل العمر مصنوع من البرونز، و تمثال فارس وليلي و تمثال الآلهة فينوس.
• المتاحف: كانو جوج متاحف كبار واحد فوليلي و التاني فشرشال و جميع اللقى و التماثيل لي تّلقات فأنقاض هاد المتاحف كانت متشابهة و مؤرخة بالعهد الأوغسطسي.
• كتاب تاريخ بلاد العرب .
• كتاب تاريخ بلاد آشور .
• كتاب تاريخ روما .
• كتاب الأركيولوجيا الرومانية .
• البعثات الإستكشافية: مسيرة يوبا العلمية عرفات جوج بعثات كبار، اللولة كانت لاستكشاف جزر الكناري و الثانية لاستكشاف منابع نهر النيل، حيت نّاس لقدام كانو كيصحابو بلي نهر النيل كينبع من جبال الأطلس.
• الصيدلة: كان طبيب يوبا هو أوفوربوس و كيستعمل واحد من أنواع العشوب لي كيتعرف حاليا بالفربيون ،بالعربية : اليتوع و بالأمازيغية: تاناخوت حيت كيعطي تأثير مهدئ ضد السّم تاع الحناش.

عيون لكلام

تقدر تزيد شوف بزاف د تّصاور و لمعلومات ديال Juba II ف ويكيميديا كومنز.