وفاة ديال ريان أورام
ف 1 فبراير 2022، طاح واحد لوليّد سميتو ريان أورام ف عمرو 5 سنين ف بير[1] ف دوّار إغران ف جماعة تاموروت، إقليم شفشاون. لعمق ديال لبير 32 ميترو ؤ لعرض ديالو قل من 30 سانتيم، ف موضع معروف ب تربة ماشي مستاقرة، شّي لي صعّب لوصول ليه ؤ لإنقاد ديالو.[2] لمجهودات د فراقي د لإنقاد لي تابعة ل لوقاية لمدنية لمغريبية بقات خدامة من داك لوقت حتا قدرو يخرجوه ف 5 فبراير، ولاكين كان متوفي.[3]
هاد لحاديتة عرفات هتيمام ؤ موتابعة كبيرة من طاراف لمغاربا ؤ حتا ناس من دوال مجاورة بحال دزاير، ؤ جورنالات ؤ سيتات إخبارية عالمية ؤ قنوات د تّلفازة، بحال لݣارديان، نيويورك تايمز،[4] لبي بي سي، لجزيرة ؤ غيرها، شّي لي سرّع لعملية د ستينفار سّلطات لمغريبية باش تنقد ريان.[1]
صّحافة لغربية قارنات هاد لحاديتة معا وحدين خرين كيشبهوليها، بحال ديال واحد دّري صغير سپنيولي سميتو خولين روصيلو لي كانت طرات ف 2019 ؤ سالات ب لموت ديالو، ؤ دري طالياني ألفريدينو رامپي لي كان ف عمرو ست سنين فاش طاح ف بير لعمق ديالو 36 ميترو ؤ توفا مور تلتيام ف 1981.[5][6]
لخلفية
بدللمنطقة لجبلية فين طرات لحاديتة جات ف نواحي شفشاون ف شمال لمغريب (منطقة د رّيف)، لي معروفة ب زّراعة د لحشيش، لي كيشكّل مورد أساسي د لمدخول ل بزاف د لفاميلات ف جبال رّيف. هاد لعشبة كاتحتاج ل كميات كبيرة د لما د سّقي، سيرتو نّوع لمعدّل لي كيتستورد من لخاريج، عكس لكيف لي كاتعتامد زّراعة ديالو سيرتو على لما د شّتا. داكشي علاش سّكان د لمنطقة كيحفرو بيار عميقة، كيتسمّاو صوندات[7] باش يوصلو ل لمياه لي ف باطن لأرض. هاد صّوندات عادتن كيكونو مغطيين باش مايطيحوش فيهوم نّاس، ولاكين لوسع ديالهوم ماكيكونش كبير بزاف، ؤ ماكيشكلش خاطار كبير على شخص بالغ يلا طاح فيهوم.[8]
بسباب ضّغط لكبير على لفورشا لمائية لمنطقة كاتعاني من جفاف، لي كان من بين أسباب حيراك رّيف ف 2015،[9][10] ؤ كيخلّي سّكان يضطرو يحفرو صوندات أعمق ؤ أعمق باش يوصلو ل لما، ؤ عندو تأتيرات بيئية ؤ قتيصادية خاطيرة على لمنطقة بشكل عام.[11]
هاد لإشكاليات مامطروحينش غير ف لمغريب، مي كانلقاوهوم متلاً حتا ف سپانيا لي كاتعاني من لجفاف ف سّنوات لّخرة، ؤ فيها كتر من نص مليون بير ماشي قانوني على حساب تّقديرات. حوادت بحال هادو طراو أيضا ف بزاف د لبلدان، بحال دزاير، سپانيا، لميريكان، پولونيا ؤ ألمانيا.[12]
تايملاين
بدل
- 1 فبراير: ريان طاح ف بير لعمق ديالها 30 ميترو تقريبان فاش كان كيلعب، ف لوقت لي كان بّاه خدّام ؤ مشغول.[4] لفاميلة ديالو بقات كاتقلّب عليه، حتا لقاو بلي لبير محيد منها لغطا د لحماية ؤ كاينين أتار ديال رجلين صغار حداها. بعدما تأكدو بلي طاح ف لبير ب كاميرا د تّيليفون لي نزّلوها حتال لقاع، علمو سّلطات لمحلية. دارو محاولات د لإنقاد ب ستيعمال وسائل بسيطة، ولاكين ملي ماقدروش يوصلو ليه علمو سّلطات ديال إقليم شفشاون لي بدات كاتدرس طرقان جديدة باش يعتقو لولد.[13]
- 2 فبراير: حاولو متطوعين باش يوصلو ل ريان، ولاكين ضّيق د لحفرة جعل لقضية موستحيلة. مي قدرو يكونفيرميو بلي لولد باقي حي. صّوشل ميديا عطات هتيمام كبير ل هاد لحاديتة، ؤ ف تويتر ؤ مواقع خرين نتاشرو هاشطاݣات بحال #انقذو_ريان، #save_rayan ؤ غيرهوم. تم تنزيل لما ؤ لماكلة ؤ لوكسيجين ل ريان. سّلطات بدات كاتخدم على بلان جديد ؤ جابت دوزان تقيل د لحفير بحال جرافات باش تعتق ريان.[13]
- 3 فبراير: لفرقة د لإنقاد بقات خدّامة ف لحفير من جنب لبير باش يوصلو ل نفس لمستوى فين كاين ريان، باش موراها يبداو يحفرو أفقياً. لحفير خاصو يتدار بشكل تدريجي ؤ بشوية باش مايتسببوش ف نهيار ديال تّراب لي يقدر يقتل لولد ؤ حتا لي باغين يعتقوه. نّاطق رّسمي ب سميت لحوكومة مصطفى بايتاس ݣال بلي وزير دّاخيلية قدّم تقرير على لموضوع ل لحوكومة، ؤ بلي لفرقة د لإنقاد خدّامة ب توجيهات من لووزارا د دّاخيلية ؤ د صّحة ؤ لحماية جّتيماعية، ؤ تحت إشراف رايس لحوكومة عزيز أخنوش.[13]
- 4 فبراير: لحفير وصل ل نفس لمستوى فين كاين ريان، ؤ بدات لعملية د لحفير لأفقي، معا تخدام د قوادس عريضة باش تحمي لولد ؤ لفرقة د لإنقاد ف حالة وقوع نهيار. لحفير كيتم بشكل تقيل ب أدوات بسيطة بحال لفيسان ؤ لبالات لي ماكاتديرش رتيجاجات كبيرة. لعمال كانو كيحبسو مرة مرة باش يتجنبو شي نهيار د تّراب.[14]
- 5 فبراير: واحد لحجرة جات ف طّريق تسببات ف تعطال لعملية ب 3 د سّوايع.[14] فريق طبي ؤ هيليكوپطير ديال لقوات لملكية جّادارمية كيتسناو باش يخرج لوليّد ؤ يديوه ل أقرب سبيطار.[15] قوادس كبار كانو ديجا تحطو ؤ تّبتو باش يحميو نّفق.[16] ف ليل د نفس نّهار معا جوايه لعشرة علن دّيوان لملكي بلي ريان مات، ؤ لماليك محمد سّادس عزا واليديه شخصياً.[17]
- 7 فبراير: تدارت لݣنازة ديال ريان لي حضرو ليها مياوات د نّاس ف دّوار ديالو.[18]
تّغطية لإعلامية ؤ ردود أفعال
بدلتّغطية لإعلامية د هاد لحادات كانت كبيرة بزاف، سوا ف لمغريب، ف لبلدان د شمال إفريقيا ؤ شّرق لأوسط، ؤ ف لعالم كامل، ؤ ب بزاف د لّوغات بحال لعربية، لفرانساوية، نّݣليزية، سّپنيولية، لألمانية، لهولاندية ؤ غيرها.
بزاف د شّخصيات رّياضية بحال أشرف حكيمي ؤ رياض محرز، ؤ لفنية بحال نانسي عجرم ؤ دنيا باطما، ؤ سياسية بحال إيمانويل ماكرون ؤ شيخ محمد بن راشد آل مكتوم نعاو لوفاة ديالو ؤ عبّرو على تّضامن ديالهوم ف لكونطات رّسمية د تويتر.[19]
لبابا فرانسيس شكر لمغاربا ؤ حيّاهوم على لمجهود لكبير لي داروه باش ينقدو لحياة ديال ريان، ؤ عتابرو ميتال ديال "روح لقداسة لي كاينة عند بنادم".[20] وزارة لخارجية لميريكانية حتا هيا نعات ريان ف بيان رسمي ؤ عزّات لمغاربا ف لوفاة ديالو.[21]
نتيقادات
بدلبزاف د نّاس ف لمغريب نتاقدو لوزير لّول عزيز أخنوش حيت ماعلّقش على لحاديتة د ريان ؤلا لمجهودات لي تدارت باش تنقدو، ف لكونطات رّسمية ديالو ف صّوشل ميديا. ؤ نتاقدو لحوكومة حيت حتا وزير مغريبي ما زار لموضع ديال لحاديتة بشكل رسمي. ف لوقت لي عاداد كبير د شّخصيات سّياسية ؤ لفنية ؤ رّياضية علنات على دّعم ؤ تّعاطف ديالها ف لخمس يّام ديال محاولات لإنقاد، ؤ عزّات لمغاربا ؤ لفاميلة د ريان بعدما تّعلن على لوفاة ديالو.[22]
من جيهتو، نتاقد لمجلس لمغريبي د صّحافة، ف تقرير لي خرج ف 4 فبراير، تّخدام لّاأخلاقي ديال تصاور ؤ ڤيديوات د ريان ؤ هوّا عامر دمايات، ؤ ف حالة مزرية، ف جّورنالات ؤ لمقالات صّحافية، ؤ عتابر هادشي لي داروه بعض صّحافيين ؤ نّاشيطين ف صّوشل ميديا ضد أخلاقيات لحرفة د صّحافي، حيت كيضر لمشاعر د لفاميلة ديالو ؤ كيخرق مبدأ لحق ف صّورة، شّي لي ݣالتو حتا لحرايفية د لإعلام ؤ ليتيصال ؤ ؤستادة د صّحافة ف لمعهد لعالي د لإعلام ؤ ليتيصال ف رّباط دكتورة نادية لمهيدي.[23] ؤ نتاقد أيضا ستيجواب قاصرين ؤ هوما ف تأتر ب داكشي لي طاري ل ريان، غير على ود جمع لجيمات ؤ لڤيوز. ب لإضافة ل لّامهنية ديال بعض صّحافيين لي نشرو أخبار غالطة على لموضوع، ؤلا نشرو معلومات بلا مايتحققو منها ل أغراض تسويقية ؤ تيجارية.[24]
نتائج
بدلتأمين لبيار لقدام ؤ لمهجورين
بدلمن بين نّتايج ديال هاد لحاديتة هوّا لقرار لي داروه بزاف د لبلدان، سيرتو ف شمال إفريقيا ؤ شّرق لأوسط، باش يأمنو لبيار لقديمة لي تقدر تشكل خاطار على لمواطنين، ؤ تسبب ف فاجيعة خرة. ف لمغريب تم طمر لبير لي طاح فيه ريان، ؤ سّلطات ؤ ناشطين محليين بداو كيتحرّكو باش يأمنو لبيار لخاطيرة ؤ لمهجورة، بحال ف إقليم ناضور. وزارة تّجهيز ؤ نّقل لمغريبية عطات تعليمات ب تأمين جميع لبيار لمهجورة ف لبلاد، ؤ علنات بلي غادي تفرض عوقوبات مشددة على أي واحد خرق هاد تّعليمات.[25]
ف دزاير، لي طرا فيها حاديت بحال د ريان ف 2018، هيئات خاصة غادي تدار باش تفتّش لبيار بشكل عشوائي ؤ تعاقب مّاليهوم لي ماطبقوش إجراءَات تأمينية.[25]
ف سّعودية حتا هيّا، لي كانو ناسها متابعين لقضية د ريان طيوال ل 5 يّام ديال محاولة لإنقاد، بدات حملة ديال لإعلام على لمواضع د لبيار لمهجورين باش يتم تّأمين ديالهوم.[25] مورا لحاديتة، لوزارة د لبيئة ؤ لما ؤ زّراعة سّعودية علنات بلي ديجا طمرات ؤلا أمنات 2450 بير، ؤ بلي غادي تستامر ف هاد لمجهود.[26]
تسليط ضّو على لأطفال
بدللحاديتة د ريان سلّطات ضّو على لوضعية د لأطفال ف شمال إفريقيا ؤ شرق لأوسط، بحال لقضية ديال درّي سّوري فوّاز لقطيفان لي تعرض ل لختيطاف.[25]
تمارين د لإنقاد
بدلف لأردن لمودير د لأمن حسين الحواتمة عطا توجيهات باش دّيفاع لمدني لأردني يدير تمارين د لإنقاد مشابهة ل داكشي لي دارت فرقة لوقاية لمدنية لمغريبية ف لحاديتة د ريان.[27]
عيون لكلام
بدل- ^ a b "القصة الكاملة لجهود إنقاذ الطفل ريان من قاع بئر بشفشاون" (ب لعربية). 2 فبراير 2022. مأرشيڤي من لأصل ف 2022-02-05. تطّالع عليه ب تاريخ 2022-02-05.
- ^ "لحظة بلحظة.. آخر تطورات عملية إنقاذ الطفل ريان". سكاي نيوز عربية (ب لعربية). 3 فبراير 2022. مأرشيڤي من لأصل ف 2022-09-08. تطّالع عليه ب تاريخ 2022-02-05.
- ^ "Rayan: Moroccan boy trapped in well for four days has died" (ب نڭليزية). مأرشيڤي من لأصل ف 2023-07-19. تطّالع عليه ب تاريخ 2022-02-05.
- ^ a b "Live Updates: Tense Wait as Rescuers Work to Free 5-Year-Old From Well in Morocco". نيويورك تايمز (ب نڭليزية). 5 فبراير 2022. مأرشيڤي من لأصل ف 2022-02-05. تطّالع عليه ب تاريخ 2022-02-05.
- ^ "In Marokko in Brunnen gefallen: Rettung von Rayan (5) läuft auf Hochtouren". www.rnd.de (ب لالمانية). مأرشيڤي من لأصل ف 2023-06-01. تطّالع عليه ب تاريخ 2022-02-15.
- ^ "Marocco, Rayan come Alfredino: "Ripetuti gli errori fatti a Vermicino"". Tgcom24 (ب طاليانية). 2022-02-06. مأرشيڤي من لأصل ف 2022-12-13. تطّالع عليه ب تاريخ 2022-02-15.
- ^ "حكومة المغرب: خائفون من انهيار التربة فوق الطفل ريان!" (ب لعربية). 3 فبراير 2022. مأرشيڤي من لأصل ف 2022-02-09. تطّالع عليه ب تاريخ 2022-02-09.
- ^ "Morocco's king says 5-year-old boy trapped in deep well has died" (ب نڭليزية). 5 فبراير 2022. مأرشيڤي من لأصل ف 2022-06-29. تطّالع عليه ب تاريخ 2022-02-09.
- ^ "Morocco moves to legalise some cannabis cultivation". 10 يوليوز 2021. مأرشيڤي من لأصل ف 17 يناير 2022.
- ^ "Is Morocco's cannabis landrace the way forward" (ب نڭليزية). 8 أكتوبر 2020. مأرشيڤي من لأصل ف 2023-04-29. تطّالع عليه ب تاريخ 2022-02-09.
- ^ طوم بليكمان (مارس 2017). "Morocco and Cannabis: Reduction, containment or acceptance" [لمغريب ؤ لحشيش: تقليص، حتيواء ؤلا قبول]. Transnational Institute. Cite journal requires
|journal=(معاونة) - ^ "مأساة الطفل ريان.. أوروبا معنية أيضا بحوادث الآبار غير القانونية" (ب لعربية). 9 فبراير 2022. مأرشيڤي من لأصل ف 2023-02-05. تطّالع عليه ب تاريخ 2022-02-10.
- ^ a b c "قصة الطفل ريان تحبس الأنفاس في المغرب.. سقط في بئر ضيقة قضى يومين داخلها ومحاولات إنقاذه متواصلة". لجزيرة (ب لعربية). 3 فبراير 2022. مأرشيڤي من لأصل ف 2022-08-02. تطّالع عليه ب تاريخ 2022-02-05.
- ^ a b "المغرب.. فرق الإنقاذ على بعد مترين من الطفل ريّان العالق في البئر". لجزيرة (ب لعربية). 3 فبراير 2022. مأرشيڤي من لأصل ف 2022-05-21. تطّالع عليه ب تاريخ 2022-02-05.
- ^ "Rayan's rescue operation reaches a very advanced stage" (ب نڭليزية). مأرشيڤي من لأصل ف 2022-07-03. تطّالع عليه ب تاريخ 2022-02-05.
- ^ "المغرب.. انتهاء الحفر الأفقي لإخراج ريان" (ب لعربية). مأرشيڤي من لأصل ف 2022-07-07. تطّالع عليه ب تاريخ 2022-02-05.
- ^ "بلاغ من الديوان الملكي". وكالة لمغريب لعربي د لأنباء (ب لعربية). 5 فبراير 2022. مأرشيڤي من لأصل ف 2022-07-06.
- ^ "Hundreds gather for funeral of Morocco boy who died in well" (ب نڭليزية). مأرشيڤي من لأصل ف 2022-10-31. تطّالع عليه ب تاريخ 2022-02-09.
- ^ "World leaders, celebrities and artists mourn death of Moroccan child Rayan". 6 فبراير 2022. مأرشيڤي من لأصل ف 2022-10-31. تطّالع عليه ب تاريخ 2022-02-10.
- ^ "Pope Francis: Rayan, the boy stuck in a well in Morocco, shows beauty of 'saints next door" (ب نڭليزية). 6 فبراير 2022. مأرشيڤي من لأصل ف 2022-11-28. تطّالع عليه ب تاريخ 2022-02-08.
- ^ "وزارة لخارجية لميريكانية، لوفاة ديال ريان". 7 فبراير 2022. مأرشيڤي من لأصل ف 2023-04-01. تطّالع عليه ب تاريخ 2022-02-10.
- ^ "انتقادات واسعة في المغرب لـ"صمت" رئيس الحكومة بشأن محنة الطفل ريان" (ب لعربية). 5 فبراير 2022. مأرشيڤي من لأصل ف 5 فبراير 2022.
- ^ "خلف تداول صور وفيديوهات للطفل ريان وهو يقبع في قعر بئر ووجهه شاحب وتعلوه كدمات وبعض الدماء، تأثرا واسعا واكبه استنكار لنشر مثل هذه الصور". مأرشيڤي من لأصل ف 5 فبراير 2022.
- ^ "المجلس المغربي للصحافة يدين نشر "صور دامية" للطفل ريان". 5 فبراير 2022. مأرشيڤي من لأصل ف 2022-02-08. تطّالع عليه ب تاريخ 2022-02-08.
- ^ a b c d "Morocco and Arab Countries Mobilize to Secure Abandoned Wells After Rayan Tragedy" (ب نڭليزية). مأرشيڤي من لأصل ف 2022-12-03. تطّالع عليه ب تاريخ 2022-02-10.
- ^ "Saudi Arabia secures hundreds of its own wells after Morocco's Rayan tragedy" (ب نڭليزية). 9 فبراير 2022. مأرشيڤي من لأصل ف 2022-04-09. تطّالع عليه ب تاريخ 2022-02-10.
- ^ "مدير الأمن يوجّه بإجراء تمارين مشابهة لحادثة الطفل ريان" (ب لعربية). 6 فبراير 2022. مأرشيڤي من لأصل ف 2022-07-01. تطّالع عليه ب تاريخ 2022-02-10.