مسمن

مسمن

معلومات عامة
نوع د لماكلة	خبز مفرود

لمْسمْن ولا لملوي، ولا رغايف على حساب كل منطقة، هو واحد من الأطباق المغربية المشهورة ف المغريب و الجزائر،^[1]^[2]^[3] شكل ديالها مربع ولا مدور، و كتحط فلفطور، ولا معا أتاي.

التوجاد

التوجاد ديال لمسمن ساهل، لكن تايختالف من منطقة لمنطقة. تانخلطو طحين معا سميدة، و تانزيدو لخميرة و لما دافي، و تانخلطو كولشي تا يولي عجينة، تانزيتو لعجينة بزيت رومية، و تانخليوها ترتاح، فاش ترتاح تانصاوبو بيها كويرات صغار، و تانخليوهم يرتاحو مرة أخرى، من بعد تاندلكوها بليد، و تانطليوها بزيت ولا زبدة على حساب شنو تايعجبنا، من بعد تانطويوها على شكل مربع، و تانطيبوها على لمقلة، من جوايه بجوج، و كاتحط معا لعسل ولا الكوفيتير ولا أملو

لمكونات

كيلو ديال طحين
شوية ديال لملحة
زيت ولا زبدة دايبة
ماء دافي باش نخلطو لعجينة

في المغريب

لمسمن وجبة مشهورة بزاف فالمغريب، فالدار و على برى، حيت هي وجبة لذيذة عند لمغاربة، تايفطرو بيها و تاياكلوها معا أتاي، في اللول كان تطياب ديال لمسمن مرتبط بدار، لكن من بعد نتاشرتا فالزنقة بشكل كبير، و رجع من أكثر الوجبات لي تايستهلكوها لمغاربة.

تاينتاشرو المحلبات لي تايبيعو لمسمن ولحرشة ف المغريب كامل، و خاصة ف لأحياء الشعبية، كيف ما تانلقاو فالسويقات ديال الأحياء الشعبية عيالات تايبيعو لمسمن فالزنقة^[4]، و هادشي بسبب طلب لمرتافع عليه من طرف لمغاربة، خاصة فرمضان، حيت لمسمن وجبة أساسية فلفطور ديال رمضان، حيت هو وجبة لي التوجاد ديالها ساهل و سريع، و ريحتها زوينة و مذاقها لذيذ عند أغلب لمغاربة، عاد زيد أنها وجبة لي ماكاتكلفش بزاف ماديا، حيت التمن ديالها رخيص، متايفوتش 2 دراهم تا ل خمسين ريال للمسمنة، بلاضافة على أنه تايشبع. عام 2021 كانت واحد زيادة فالتمن ديال لمسمن، رجع تايدير فشي بلايص خمسين ريال بلاصة ربعين ريال، الأمر لي قلق لمغاربة شوية^[5]

عام 2021 عرف المغرب حملة ديال التنمر كبيرة فمواقع التواصل لجتماعي، كان الضحية ديالها طلبة معاهد التكوين المهني، بسبب أنهم تاياكلو لمسمن بزاف على حساب ما تروج ليه فهاد الحملة، الأمر لي قلق شي هيئات حقوقية فالمغريب، و خلاهم ينددو بهاد القضية.^[6]^[7]^[8]^[9]