عوام 1030
عوام 1030 ؤلا عقد 1030 هوّ عقد ديال الزمان بدا ف 1 يناير 1030 و سالا ف 31 دجنبر 1039.
هاد لعقد عرف الطيحة ديال لخلافة لأموية ف لأندالوس، و طلوع ملوك الطوائف، ف لوقت لي لممالك لمسيحية د إيبيريا ستامرو ف ماخدة مناطق جديدة لي كانو حاكمينها لمسلمين بشوية بشوية. الصراع بين لمسلمين و لمسيحيين كان ف جبهات خرين بحال ف الشرق معا لبيزانطيين، و ف لبحر لمتوسط و شمال إفريقيا.
السياسة و لحروب
بدلف لبدية د هاد لعقد، ف عام 1030، كانو حروب مابين لبيزنطيين و لمسلمين. لإمبراطور لبيزانطي رومانوص التالت قاد جيش ديال 20000 عسكري ضد لأمير د حلب نصر بن صالح بن مرداس. الجيش د لمسلمين حاصر الجيش لبيزانطي و خلاه يتراجع تال لقسطنطينية (إسطانبول دابا)، ولايني ف أبريل ولا ماي 1031، بعدما لبيزانطيين ردو هجمات د لفاطميين، لأمير نصر قبل باش يكون تابع ل لبيزنطة و يخلص الضرائب ليهم.[1] ف نفس لعام، الجينيرال لبيزانطي ڭيورڭيوس مانياكيس قدر يسيطر على مدينة الرها، ولايني غادي ترجع بزّربة ل لعرب من بعد.
ف لوسط د أسيا، ف أبريل د عام 1030، توفى محمود لغازناڤي، و ولدو مسعود شد لعرش ديال لإمبراطورية لغزناڤية لي كانت مسيطرة على مناطق ديال إيران، أفغانيستان و لهند ديال دابا.
ف الشمال د ؤروپا، لأمير ياروصلاڤ اللول لحكيم قدر يغلب لإسطونيين و يوسع لحكم ديال دولة نوڤڭورود و كييڤ.[2] ف 29 يونيو 1030، لماليك ؤلاف التاني هارالدصون حاول باش يسيطر على النورڤيج ب لمعاونة ديال لماليك د السويد أنوند ياكوب، ولايني الجيش د لفلاحا النورڤيجيين و الدانماركيين لي كان فايت ب واهلي لأعداد د الجيش ديالو، قدر يغلبو و تّقتل ؤلاف ف لمعراكة. دابا كيتّعتابر ؤلاف التاني قدّيس، و "لماليك لأبادي" ديال النورڤيج.
ف 1031، طاحت لخلافة لأموية د قرطبة، مبعد سنوات ديال لحرب لأهلية، و تقسمات الدولة ل طوائف. لأمير هشام التالت، اللخر ف السلالة لأموية لي حكمات قرطبة، حاول باش يعاود يوحّدها، ولايني كانت معارضة شديدة ضدو بسباب الضرائب لي كان طلّعها باش يبني الجوامع، و تشد ف لحبس.[3] ف نفس لعام، لأمير ياروصلاڤ د نوڤڭورود، قدر يسيطر على پولونيا. ف فرانسا بدات مجاعة لي بقات مستامرة تال عام 1033.
ف 11 أبريل 1034، لإمبراطور لبيزانطي رومانوص التالت تّقتل غرقان ف لحمام ديالو، ب أمر من مراتو زوي، لي تجوجات لحاجب ديالو، و ردّاتو إمبراطور د بيزنطة ب سمية ميخاييل الرابع.[4] ف نفس لعام، لكونت د لبرطقيز ڭونصالو مايا، ستاغل الضعف ديال لمسلمين، و قدر يتوسع ف لأندالوس؛ بينمّا أسطول بحري من لمدون الطاليانية د پيزا و جنوا قدرو يسيطرو على مدينة عنابة (دابا ف لحدود بين تونس و الدزاير) ل مدة عام.[5]
ف 23 مارس 1035، طرات معراكة سيسار مابين مملكة ليون و مملكة إشبيلية لمورية، لي نهازمو فيها لموريين. ف نفس لعام، دارت جمهورية پيزا هجمة على لمركز د لمناورا[ن 1] لمسلمين ف لڭزاير لإيولية.[6] ف 12 نونبر لماليك كنوت لعضيم توفى، و خلى ولادو الجوج هارثاكنوت و هارولد مدابزين على لحكم ديال النڭليز.
ف 1036، الزيريين هجمو على صقلية، و سيطرو على مدينة پاليرمو من عند النورمانديين، ولايني فشلو باش يرجّعو السيطرة د لمسلمين على لڭزيرة، حيت ف لعام التالي لبيزانطيين سيفطو الجينيرال ڭيورڭيوس مانياكيس لي قدر يغلب الزيريين و بدا لحملة ديال سترجاع لڭزيرة من عندهم.[7] ف 15 ماي، ف الجاپون توفى لإمبراطور ڭو إتشيجو، و تبعو خوه ڭو سوزاكو على لعرش. ف 13 يونيو د نفس لعام، توفى لخليفة لفاطمي الظاهر لإعزاز دين الله، و خلفو ولدو المستنصر لي كان ف عمرو 6 سنين.
ف 1037، هارولد اللول شد لعرش د النڭليز من خوه لي ماشي شقيق هارثاكنوت، و إيما النورماندية، مت هارثاكنوت، هربات ل مدينة بروج ف لفلاندر (دابا ف بلجيكا).[8] ف 4 شتنبر، لماليك فيرنانضو اللول قدر يغلب لوسو بيرموضو التالت ف معراكة طامارون، و وحّد لعرش ديال مملكة ليون و مملكة قشتالة.[9]
ف غشت 1038، طرات معراكة مابين مملكة غرناطة و مملكة ألميريا، لي وصفها الشاعر ليهودي لأندالوسي سماعيل بن النغريلة. ف نفس لعام ف الشينوا ستاقلات مملكة شيا لغربية على لإمبراطورية الشنيوية لي كانت حاكماها سلالة لياو.
ف 1039، توفى كونراد التالت د لإمبراطورية الرومانية لمقدسة، و تبعو ولدو هينري التالت ف لحكم، لي ولّا ماليك تا على الطاليان و بورڭوندي (مناطق لي دابا كاينين ف فرانسا و سويسرا). ف پولونيا، كازيمير اللول رجع و حاول باش يهدّن لوضعية د لبلاد لي قسماتها لحروب، و دار لعاصمة ديالو ف مدينة كراكوڤ لي بقات هيّ لعاصمة د پولونيا تال 1596.[10] ف لأندالوس، لمستعين اللول حيّد بني تجيب من لحكم ديال مملكة سرقسطة.[11]
الدين
بدلف أكتوبر د عام 1032 توفى لبابا يوحنا تسعطاش بعدما كان دوّز 8 سنين ف لمنصب، و خلفو ولد خوه بينيديكت التاسع، لي غالباً كان باقي مراهق.[12] ف لعام التالي تخلعو بزاف د لمسيحيين ف ؤروپا، حيت نتاشر لإعتقاد بلي لكون قريب يسالي و لقيامة قريبة تنوض، بسباب مرور 1000 عام على صلب لمسيح كيما كيتنبئ إنجيل رؤيا يوحنا.[13][14][15]
عند لبوديين لخطبة د الزهرة، لي هيّ قصة كاتعاود لأصل ديال بودية الزن بانت لمرة اللولة ف لأداب لبودي ف جوايه عام 1036.
شوف تا
بدلكرونولوجيا
بدلمقالات د لعقد د 1030:
نويطات
بدل- ^ جمع "منوار" = قرصان
عيون لكلام
بدل- ^ Halm، Heinz (2003). Die Kalifen von Kairo: Die Fatimiden in Ägypten, 973–1074 [The Caliphs of Cairo: The Fatimids in Egypt, 973–1074] (ب German). Munich: C. H. Beck. pp. 341–343. ردمك 3-406-48654-1.CS1 maint: unrecognized language (link)
- ^ Tvauri، Andres (2012). The Migration Period, Pre-Viking Age, and Viking Age in Estonia. pp. 33, 59, 60. تطّالع عليه ب تاريخ 27 دجنبر 2016.
- ^ Chejne, Anwar G. (1974). Muslim Spain: Its History and Culture, pp. 43–49. Minneapolis: The University of Minnesota Press. ردمك 0816606889.
- ^ Norwich, John (1991). Byzantium: the Apogee, pp. 279–80. London: Penguin. ردمك 0-670-80252-2.
- ^ Meynier، Gilbert (2010). L'Algérie cœur du Maghreb classique: De l'ouverture islamo-arabe au repli (658-1518). Paris: La Découverte. ص. 50.
- ^ Benvenuti، Gino (1985). Le Repubbliche Marinare. Amalfi, Pisa, Genova e Venezia. Rome: Newton & Compton Editori. ص. 42. ردمك 88-8289-529-7.
- ^ Meynier، Gilbert (2010). L'Algérie, cœur du Maghreb classique: De l'ouverture islamo-arabe au repli (658-1518). Paris: La Découverte. ص. 50.
- ^ Panton، James (2011). Historical Dictionary of the British Monarchy (ب نڭليزية). Scarecrow Press. ص. 16. ردمك 9780810874978.
- ^ Parker، Philip (2010). World History (ب نڭليزية). Dorling Kindersley Limited. ص. 430. ردمك 9781405352574.
- ^ Richard Brzezinski (1995). History of Poland: Old Poland – The Piast Dynasty, p. 18. ردمك 83-7212-019-6.
- ^ Stalls، Clay (1995). Possessing the land: Aragon's expansion into Islam's Ebro frontier under Alfonso the Battler, 1104-1134. Brill. ص. viii. ردمك 90-04-10367-8.
- ^ Kelly, J.N.D., and Walsh, Michael. "John XIX." in A Dictionary of Popes, 3rd ed. Oxford University Press, 2015. eISBN 978-0-19-179545-9
- ^ "The Apocalyptic Dossier: 967-1033". Boston University. Boston University Center for Millennial Studies. مأرشيڤي من لأصل ف 17 غشت 2018. تطّالع عليه ب تاريخ 7 ماي 2017.
- ^ Landes، Richard. "Introduction to Apocalypticism and Millennialism". Catholic Resources for Bible, Liturgy, Art, and Theology. مأرشيڤي من لأصل ف July 2, 2011. تطّالع عليه ب تاريخ 7 ماي 2017.
- ^ "A Brief History of the Apocalypse". www.abhota.info. تطّالع عليه ب تاريخ 2017-05-07.
 هادي زريعة ديال مقالة خاصها تّوسع. تقدر تشارك ف لكتبة ديالها. |
