سكف كف (مجلة)

مجلة مغريبية ديال لكوميكس كانت كاتصدر ب دّاريجة

سكف كف ؤلا سكفكف هيّا مجلة مغريبية ؤ فانزين ديال لكوميكس كانت كاتصدر ب دّاريجة ما بين يوليوز 2013 ؤ ماي 2018، ؤ خرجو منها ف لمجموع 9 د نّماري. سّمية ديال لمجلة تدارت علا واحد سّاندويتش كيتباع ف لكرارس ف كازا، لي كيتسما حتا خانز ؤ بنين، ؤ لي لمنضر ديالو كيبان خايب، ولاكين لمداق ديالو بنين بزاف. هاد لختيار جا كا ميطافور علا لمدينة د كازا، ؤ بزاف د لحجّايات لمصورين لي فيها كيهضرو علا لمدينة ؤ لحياة فيها. لموساهمين ف لغالب كيكونو فانز متطوعين لي كيبغيو يشاركو لأعمال لفنية ديالهوم، لي أغلبية كاتكون حجايات مصورة ب دّاريجة، ؤلا خليط مابين دّاريجة ؤ لعربية، ؤ شي مرات قيصاص قصيرة معا رسمة ف جّنب.[1]

من بين رّساما ؤ لكتاتبيا لي كانو، كانلقاو زينب فاسيكي لي دارت ف 2016 حجاية مصورة ب سميت "سوپر خديجة" ؤ 2018 علا تربية لجنسية.[2]

لبيان ديال سكف كف لي كان ف سّيت رّسمي (مطرجم من لفرانساوية):[3]

لفانزين د لحجايات لمصورة "سكفكف" هيّا مجلة مستاقلة، لي تخلقات ف إطار "إقامة فنية" من طاراف لپلاطفورم ؤپن تقافة، لي هيّا مجموعة د لفنانين لمتطوعين، معا لمشاركة ديال تّجمع د لفنانين "برين ؤويل فاكتوري".

هاد لپروجي لهدف ديالو هوّا لستيكشاف ديال لبعد لجتيماعي ؤ تّقافي ديال لمغريب، علا طريق رسومات ؤ تيكستات، لي كيتزعللو مابين داكشي لي جدّي ؤ لي مكومك، لمزيان ؤ لخايب، لبيض ؤ لكحل، ف لوقت لي كاتوصف لفوارق لبسيطة ؤ لكبيرة ديال مجتمع كيعيش طفرات مستامرة. فوق من هادشي، سّمية لي تّختارت باش تبيّن هاد لواقع تّقافي كاتشير ل واحد سّاندويتش معروف ف كازابلانكا، لي هوّا "سكفكف": ساندويتش لي لمكونات ديالو يعلمها غير مولانا، ولاكين لكازاوا كيحماقو عليه. شّيعار ديال "خانز ؤ بنين"، هيّا ميطافور د تّكوميك علا مدينة كانبغيوها وخا عاطية ريحتها.

عيون لكلام بدل

  1. ^ "CairoComix Festival Kicks Off" (ب نڭليزية). 1 أكتوبر 2015.
  2. ^ Abir El Adnani (3 يونيو 2018). "Diapo. Zainab Fasiki signe une BD en darija sur "l'éducation sexuelle"". h24info.ma (ب لفرانساوية). مأرشيڤي من لأصل ف 2022-04-21. تطّالع عليه ب تاريخ 2021-09-23.
  3. ^ "علا سكفكف" (ب لفرانساوية). مأرشيڤي من لأصل ف 2 يوليوز 2016.

لمزاود بدل

 
هادي زريعة ديال مقالة خاصها تّوسع. تقدر تشارك ف لكتبة ديالها.