جوطية

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

جّوطية هيّا سوق ديال لحوايج لقدام ؤلا لمستعملين، كيتدار عادتن ف بلاصة مفتوحة، ؤ كيقدر يكون يومي، سيماني (مرة ف سّيمانة، غالباً ف لويكاند)، ؤلا موسمي (مرة ف لموسم ؤلا ف لعام). جّوطيات كانلقاوهوم ف لعالم كامل، ولاكين طّابع ؤ تّنضيم ديالهوم كيقدر يختالف من بلاد ل بلاد. كاينين شلا نواع د لحوايج لي كيتباعو ف جّوطية، سيرتو لّباس، لأتات، لكتوبا، ؤ لأجهزة د ليليكطرونيك. جّوطية كاتجبد ليها بزاف د لكليان على ود لأتمنة نّازلة د سّلعة لي كاتكون ب جودة مقبولة ؤ شي مرات مزيانة. بعض نّاس كيمشيو ل جّوطية ماشي غير على ود لأتمنة، مي باش يلقاو شي حاجة نادرة ؤ عندها قيمة كبيرة، بحال لكتوبا لقدام، شّقفات د لفلوس، ؤلا لمصنوعات د لخشب.

جوطية ف كازا

جّوطية كاتختالف على لبازار ؤ على لقيسارية، لي كيكونو ديما كلا نهار، ؤ لبيّاعا فيهوم كيعرضو سّلعة ديالهوم ف حوانت.

سّمية

ؤصولوجيا

كلمة جوطية تقدر تكون جات من كلمة لفرانساوية jeté ؤلا jetable بمعنى "مرمي" ؤلا "يقدر يتّرمى". ؤلا تقدر تكون جات من تحريف ديال كلمة "جوق" ؤلا "جوقة" لي ب دّاريجة كاتعني "تجمع د بنادم". كاينة قرية تاريخية سميتها جوطة على واد سبو لي تقدر تكون خدات سميتها حيت كانت ف قرون غابرة سوق كبيرة كيتجمعو فيها نّاس.

ف لوغات خرين

ف بزاف د لّوغات لؤروپية، لموقابيل ديال "جوطية" نقدرو نطرجموه حرفياً ب "لمارشي د لڭراد". متلاً ف نّڭليزية flea market، ف لألمانية Flohmarkt، سّويدية loppmarknad، لفينلاندية kirpputori، ؤ لّهجة سّپنيولية ديال جانوب فلوريدا pulguero من pulga (ڭرادة). هاد لّوغات يقدرو يكونو طرجمو لموصطلح من لفرانساوية marché aux puces لي يقدر يكون كيرجع ل لقرن 19، حيت لأتات لي كان كيتباع فيه كيكون عامر ب لڭراد.

ف لبلدان د لعالم

لمغريب

•  مقالة متعمقة: جوطية ف لمغريب

جّوطية ف لمغريب كاتختالف على نواع خرين د لأسواق تّقليديين، بحال سوق لخوضرا، لقيسارية، تّربيعة (سوق د صّنايعيا) ؤ لمنجرة (سوق نّجارين)، ؤ على لمارشيات ؤ سوپرمارشيات، لا ف نوع سّلعة لمعروضة والا شّكل ؤ تّنضيم د لموضع. ف جّوطيات د لمغريب على جّنب كيقدرو يكونو بيّاعا د لماكلة ؤ لمشروبات، بحال لعاصير د لّيمون، لبيض لمسلوق، معقودة ؤ غيرهوم.

لبيّاعا ف لمغريب عندهوم تعابير خاصة باش كيعيطو على لكليان، لي يقدر بنادم مايسمعهومش ف بلاصة خرة بحال:

• بالي قبل ما تسالي
• عزل و تخيّر أ مولا وليدات
• تفركيسة فابور
• لا غلا على مسكين
• صحاب لعزلة و لمليح

تصاور

• 
  بيّاعة د دّوزان لقديم ف جوطية ف سان وان ف فرانسا
• 
  جوطية ف ألمانيا
• 
  جوطية ف ييڤاسكيلا، فينلاندا
• 
  جوطية ف ساحة لمارشي د كووپيو، فينلاندا
• 
  عرض د لبيّاعا ف بروكلين، نيويورك، لميريكان
• 
  بازار شور، ف مومباي، لهند
• 
  جوطية ف لايدن، هولاندا، ف لّخر د لقرن 19
• 
  جوطية ف بوديزير، كوينزلاند، ؤسطراليا
• 
  جوطية ف فاس، لمغريب