تيرات الترجيح (كورة)

تيرات الترجيح أولّا پيلانتيات (رسميا تيرات من النقطة دپيلانتي[1]، بلعربية: ضربات جزاء ترجيحية، بالنݣليزية: Penalty shoot-out) هي طريقة ديال تهراس التعادول والتحديد ديال شكون ربح ماطش فالرياضة د كورة، واللي ماخصّوش يسالي بالتعادول فاش يساليو لميطات لعاديين وحتى لميطات الزايدين (إلا تستاعملو). فتيرات الترجيح، لكوايرية كايشدو النوبة على التير على لݣول اللي عاس عليه لحارس ديال لفرقة لوخرة بوحدو. كولّا فرقة عندها لحق فخمسة ديال التيرات اللي خاص يلعبوهوم كوايرية مختالفين، واللي قدر يماركي عدد كبير فيهوم كايربح لماطش. تيرات الترجيح كايساليو فاش لفرقة كايكون عندها عدد ديال لبيوتة ماتقدرش توصل ليه لفرقة لوخرة. إلا كانو التيرات الناجحين ديال لفراقي مݣادّين، كايدوزو لدورة خرة ديال التيرات.[1] التيرات اللي كانو ناجحين ماكايتحسبوش معا لبيوتة ديال لكوايرية أولّا لفرقة، وكايكونو بوحدهوم فالنتيجة ديال لماطش. واخا الطريقة ديال تيرات الترجيح كاتشبه لپيلانتي، كاينين شي فروقات بيناتهوم. واحد لفرق اللي باين بزاف هو باللي لا لكوايري اللي تيرا ولا أي لعّاب آخور من غير لحارس اللي يقدر يلعب بلكورة مرّة خرة من مورا ماتّيرات.

تيرات الترجيح فكاس لعالم 2018 مابين النݣليز و كولومبيا

التيرات د الترجيح هي وحدة من تلاتة ديال الطرق اللي كاتخدّم باش يتهرس التعادول ديال شي ماطش واللي قابلة بيهوم لقواعد د اللعبة؛ لوخرين هوما لميطات الزايدين و، فلحالة ديال ميطشان لألي والروتور، قانون لبيوتة د الضيف.[1] كايتخدمو التيرات د الترجيح فاش واحد أولا كتر من الطرق لوخرين كايفشلو باش يجيبو فرقة رابحة فلماطش. لمسؤولين اللي نضّمو لماطش أولّا التورنوة كايحددو الطريقة ديال تهراس التعادول من قبل. فلبوطولات ولمنافسات لمحتارفة لكبار، وفاش كايكون تعادول، كايتزادو جوج ميطات ديال ربع ساعة لكولّا وحدة، وإلا بقا التعادول كايدوزو نيشان لتيرات الترجيح.

واخا بداو هاد التيرات كايخدّمو من السبعينات، مازال بزاف ديال الناس اللي كايتفرجو وكايتبّعو كورة كايناقدوهوم حيتاش كايݣولو باللي كايعتامدو على الزهر كتر من تاحرايفيت، ولعتيماد ديالهوم على زاوجات فردية مابين لكوايرية، الشي اللي ماكايخليش كورة تكون رياضة جماعية.[2] كاينين ناس خرين اللي كايݣولو لعكس، كايبان ليهوم باللي داك الزيّار وباللي مامعروفش شنو غايطرا كايخلّيو تيرات الترجيح وحدة من لكمالات اللي كايزيدو لحماس فماطش ديال كورة.[3][4]

فلعمومعدل

 
حارسة شدّات تيرة ديال الترجيح

فتيرات الترجيح، لكوايرية لخرين (من غير لحارس ومول التير) خاصهوم يبقاو ف الدويرة لوسطانية.[1] لحارس ديال لفرقة مولات التير كايوقف فين كايتلاقا خط لݣول معا لخط اللي كايحدد لمينطاقة د پيلانتيات (16.5 ميترو) حدا واحد من لحكام لمعاونين. لبيوتة اللي كايتسجلو فالتيرات ماكايتحسبوش فلكناش ديال لبيوتة د لكوايرية. التعادول هي نتيجة كتيرة ف كورة. تيرات الترجيح كايتستاعملو غير فميطشان اللي خاص ضروري تكون فيهوم فرقة رابحة فاللخر ديال لماطش[1]، كايكون هادشي غاليبا فالتورنوات دالسيستيم د خروج لخاسر، على لعكس ديال تورنوات روبين (السيستيم د لبوطولة)؛ تورنوة بسيستيم خروج لخاسر كاتخلي غير واحد لفرقة من داك لماطش تدوز للدور لمتابع فيها أولّا تربحها.

فلغالب كايتزادو جوج ميطات ديال ربع ساعة لكولّا وحدة، عاد باش كايدوزو لتيرات الترجيح، ولاكين هادشي ماشي ضروري.[1] فشي منافسات كايتخدّمو تيرات الترجيح باش يفرقو التعادول فݣروپ مبني على تورنوة روبين. هادشي كايطرا نادرا، وكايتدارو التيرات فلماطش اللخر ديال جوج فراقي عندهوم نفس لإحصائيات فلݣروپ.[5] بزاف ديال لبوطولات لمحلية جربات تيرات الترجيح فلميطشان لمتعادلين. فلبوطولا ديال الجاپون كانو دارو تيرات ديال الترجيح من مورا التعادول، واللي ربح كاتّعطاه نقطة خرة زايدة.[6] لفرقة اللي كاتخسر تيرات الترجيح كاتّقصى من لمنافسة، أما اللي ربحات كتدوز للدور لماجي أولّا كاتدّيها، ولاكين لماطش كايتحسب سالا بتعادول. متلا، واخا تقصات هولاندا من كاس لعالم 2014 فالدومي فينال، تحسبو باللي ماخسروش لماطش اللي تقصاو فيه.[7]

الطريقةعدل

 
تير ديال الترجيح. كايبانو لكوايرية كولهوم (من غير مول التير ولحرّاس بجوج) واقفين فالدويرة لوسطانية. لحارس لمدافع واقف بين الرجلين ومورا خط لݣول، ولحارس لاخور واقف فين كايتلاقا خط لݣول معا خط لمينطاقة د پيلانتيات، نفس لبلاصة ولاكين من الجيهة لوخرة (فليسر) واقف حكم ديال الشرط. لحكم اللول واقف قبالة كورة (اللي محطوطة فوق النقطة د پيلانتي) من الجنب.

اللي جاي هو ملخّاص ديال لقواعد اللي تدكرو فلقانون 10 ديال لقواعد د اللعبة.[1]

  1. لحكم كايلوح ريالة باش يحدد ف إنا ݣول غايتدارو لپيلانتيات. لحكم يقدر يبدّل لقرار ديالو لسباب ديال السلامة أولا فاش لݣول/الضس اللي حداه مابقاوش خاصهوم يتخدّمو.
  2. لحكم كايلوح ريالة مرة خرة باش يتّعرف إنا فرقة غاتبدا اللولة.
  3. ݣاع لكوايرية من غير مول التير ولحرّاس خاصهوم يبقاو فالدويرة لوسطانية ديال التيران.
  4. ݣاع التيرات كايتدارو بنفس الطريقة ديال پيلانتي.
  5. لفرقة هي اللي مسؤولة على الترتيب ديال لكوايرية اللي غايدوزو فالتيرات.
  6. كولّا كوايري عندو لحق يتيري لكورة مرّة وحدة. ماعندوش لحق يعاود مرّة خرة من غير إلا ݣالها لحكم.
  7. حتى واحد من غير لكوايري مول التير ولحارس ماعندو لحق يقيس لكورة.
  8. التير كايجيب بيت لمولاه إلا، من مورا ماكايقيسها مولاها مرّة وحدة هلّي، لكورة فاتت خط لݣول تحت لعارضة وبين الرجلين دلݣول بلا ماتقيس حتى واحد من غير لحارس لمدافع. لكورة تقدر تقيس لعارضة أولّ الرجلين دلݣول أولّا لحارس لمدافع قبل ماتدخل للݣول إلا شاف لحكم باللي هاد الردّان كامل جاي من التير براسو.
  9. لفراقي كايشدو النوبة على التيرات د الترجيح حتى يديرو كاملين خمسة ديال التيرات. واخا هكاك لفرقة كاتربح إلا ماركات عدد ديال التيرات ومايمكنش للفرقة لوخرة توصل ليه، واخا يبقاو تيرات خرين مازال ماتماركاوش.
  10. إلا من مورا لجولة اللولة ديال التيرات كان فيها تعادول (أولا ماتماركاش بيت ݣاع)، كايدوزو لجولات خرين اللي فيهوم بيت لكولّا وحدة، حتى كاتماركي فرقة ولخرة كاتضيّع.
  11. لفرقة اللي كاتماركي أكبر عدد من التيرات هي اللي كاتربح لماطش.
  12. غير لكوايرية اللي كانو فاللافان ديال لماطش أولا خرجو مؤقّاتا من لماطش (كلاو دقة أولا كايصايبو لكيطمة ديالهوم) هوما اللي عندهوم لحق يشاركو فپيلانتي. إلا فاللخر ديال لماطش أولّا قبل أولا فاش كايتلعبو التيرات ولّاو عند واحد لفرقة لعّابة قلال (بسباب شي دقة أولّا لخروج بحمرة) على لفرقة لخرة، كايتحيدو كوايرية من لفرقة لخرجة (بليختيار ديالهوم للكوايري/لكوايرية اللي غايخرّجو) حتى كايكونو بجوج مقادين فلعدد ديال لكوايرية اللي فالتيران.
  13. تقدر لفرقة تبدّل لحارس ديالها إلا تصاب (هادشي إلا ماوصلوش للماكسيموم ديال الشونجمويات اللي عندهوم لحق فيهوم فديك لمنافسة) بكوايري بديل أولّا بلكوايري اللي خرجوه فاش كانو كايتقادو معا لفرقة لوخرة.
  14. إلا لحكم جرا على لحارس بحمرة، خاص كوايري آخور من دوك اللي كملّو لماطش قبل ياخد الدور ديال لحارس.
  15. إلا شي كوايري آخور، من غير لحارس، خرج بوكلان الدق أولا بحمرة، كايكملو التيرات د الترجيح بلا شونجمو. لفرقة لوخرة خاصها تنقص من لكوايرية ديالها باش تقاد معا لخرين.
  16. أي كوايري بقا ف التيران يقدر يكون حارس، وماشي ضروري نفس لكوايري يكون حارس فالتيرات د الترجيح.
  17. حتى شي كوايري ماعندو لحق يعاود تير آخور حتى يدوزو صحابو كاملين ومعاهوم لحارس.
  18. فاش كايولّي ضروري باش لكوايرية يعاودو من جديد (بسباب التعادول اللي باقي كاين واخّا دازو كاملين)، ماشي ضروري على لكوايرية يدوزو فنفس الترتيب اللي دازو بيه قبل.
  19. ماخاصش التيرات ديال كوايري اللي خرج من التيران يتأجلو ليه. إلا مارجعش لكوايري للتيران كاتحيّد ليه ديك پيلانتي إلا مارجعش فلوقت باش يتيري فالنوبة ديالو.
  20. لحارس ماخصوش يلغي لماطش إلا هبط لعدد ديال لكوايرية فلماطش لقّل من سبعة فكولّا فرقة.

عيون لكلامعدل

  1. ^ a b c d e f g "Laws of the Game17_Digital_Eng.pdf" (PDF). IFAB. مأرشيڤي (PDF) من لأصل ف 11 شتنبر 2016. تطّالع عليه ب تاريخ 27 يناير 2017.
  2. ^ Wilson, M; Wood, G; Jordet, G. "The BASES Expert Statement on the Psychological Preparation for Football Penalty Shootouts" (PDF). British Association of Sports and Exercise Sciences. مأرشيڤي من لأصل (PDF) ف 6 يناير 2016. تطّالع عليه ب تاريخ 28 يناير 2015.
  3. ^ "World Cup shootouts are great and here is how other sports can adopt the thrilling finale". USA Today. 1 يوليوز 2018. تطّالع عليه ب تاريخ 2018-07-02.
  4. ^ "Goalmouth Scramble: 10 'important' thoughts on the World Cup". New Zealand Herald. 2 يوليوز 2017.
  5. ^ FIFA Technical Study Group (1990). FIFA World Cup Italia'90: Official Report (PDF). FIFA. ص. 59. مأرشيڤي (PDF) من لأصل ف 24 شتنبر 2015.
  6. ^ Hirata, T.; Szymanski, S. "The J. League and the World Cup". ف Lee, YH; Fort, R (إيديتورات). The Sports Business in The Pacific Rim. Sports Economics, Management and Policy.
  7. ^ FIFA.com (11 يوليوز 2014). "Van Gaal: We can still make history". fifa.com. مأرشيڤي من لأصل ف 29 يناير 2018. تطّالع عليه ب تاريخ 3 ماي 2018.
  تقدر تزيد شوف بزاف د صور و معلومات ديال Penalty shootout (association football) ف ويكيميديا كومنز.
  تقدر تزيد شوف بزاف د صور و معلومات ديال Penalty shootout (association football) ف ويكيميديا كومنز.