تسلول (كورة)

التسلول ولا ؤر جو هي وحدة من لقوانين ديال لكورة اللي كاينة مفصّلة ف لقانون 11 ديال لقواعد د اللعبة. لقانون كايݣول باللي لكوايري كاين ف وضعية د التسلول إلا شي قنت من الدات ديالو (من غير ليدين والدراع) كاين ف النص د التيران وقريب من خط لݣول ديال لفرقة لوخرة كتر من لبالون و/أولّا تاني آخر لعّاب من لفرقة لوخرة (آخر واحد كايكون غاليبا لحارس ولاكين ماشي ديما).

لحكم لمعاون كاينتع للتسلّول فاش كايهز الراية.

التسلول براسو ماشي مخالفة أولّا غلط، ولاكين لحكم يقدّ يتّاهم كوايري اللي باينة فيه داير تسلول، إلا شد لكورة من عند خوه ف لفرقة. من غير هادشي يقدر يتعاقب لكوايري على التسلول فاش كايكون "داخل فاللعب"، "معاكس معا شي واحد من لفرقة لوخرة" أولّا باغي تولّي عندو "لأولوية ف لقصارة".

التطبيق

التطبيق ديال لقانون د التسلول كايجي فتلاتة ديال لمراحيل: لوضعية د التسلول، لغلط د التسلول ولعوقوبة ديال التسلول.

لوضعية د التسلول

لمهاجم الزرق اللي فليسر ݣاع ديال التصويرة كاين فوضعية ديال التسلول حيتاش كاين فالنص د التيران وقريب لخط لݣول ديال لفرقة لحمرة كتر من لكورة (بلبيض) أولّا تاني آخر لعّاب ديال لفرقة لحمرة (أقرب واحد للخط لمقطّع لكحل). هادشي ماكايعنيش باللي هاد لكوايري كايدير غلط ديال التسلول. ماكايطرا هادشي حتى كايقيس أولّا كايقصر شي واحد آخور من لفرقة ديالو (الزرقة) بلكورة فاش هو كايكون فلوضعية ديال التسلول وكايولي هو (لكوايري الزرق) داخل فاللعب على حساب التعاريف اللي كاينين فلقواعد د اللعبة، واخا يدخل فاللعب من مورا مايحيّد من لوضعية د التسلول.

لمهاجم الزرق اللي كاين فلمينطاقة د پيلانتيات ديال لفرقة لحمرة ماكاينش فوضعية ديال التسلول حيتاش كاين مورا لكورة، واخا هو قريب كتر من خط لݣول على تاني آخر لعاب ديال لفرقة لحمرة.

كايكون لكوايري ف" لوضعية د التسلول" فاش "كايكون فالنص د التيران وقريب من خط لݣول ديال لفرقة لوخرة كتر من لبالون و/أولّا تاني آخر لعّاب من لفرقة لوخرة". فالنوسخة ديال 2017، ولّا عند لوضعية ديال التسلول جوج ديال الشروط باش يتݣال باللي شي لعّاب راه كاين فيها:

• أي طرف من الراس، لكرش ولّا الرجل ديال لكوايري كاين فالنص د التيران ديال لفرقة لوخرة (ماداخلش فيه خط النص)؛
• أي طرف من الراس، لكرش ولّا الرجل ديال لكوايري قريب من خط لݣول ديال لفرقة لوخرة كتر من لبالون و/أولّا تاني آخر لعّاب من لفرقة لوخرة.

لحارس كايتحسب آخر لعّاب فلفرقة التانية فالشرط التاني، ولاكين ماشي ضروري يكون هو نيت آخر لعّاب.

لغلط د التسلول

يقدر يتعاقب لكوايري على التسلول فاش كايشد لكورة من عند خوه فلفرقة و:

كايدخل فاللعب

كايلعب بكورة اللي شدها من عند صاحبو

كايتعاكس معا كوايري من لفرقة لوخرة

إلا حبسو أولّا ماخلّاهش يقصر لكورة فاش:

• • كايغطي عليه الشوف
  • باغي يحيّد ليه لكورة
  • باغي يلعب بكورة قريبة للكوايري لاخور
  • فاش كايدير شي حركة اللي باينة ماخلّاتش اللعّاب لاخور يقصّر براحتو

باغي تكون عندو "لأولوية فلقصارة" فاش كايقصر بلبالون أولّا كايتعاكس معا واحد من لفرقة لوخرة فاش لبالون

• • كايرجع من مورا ماضرب لپّوصط أولا لعاريضة دلݣول أولّا شي حكم أولّا أي كوايري من لفرقة لوخرة
  • كايعتقو أي لعّاب من لفرقة لوخرة.

التسلّول مومكين يطرا فاش شي كوايري كايدير واحد من لفعال اللي كاينين لفوق وكايكون عاد شد لكورة من ضربة غلط (نيشان أولّا مانيشانش) أولّا كورة مليوحة.

لبريح ولعوقوبة ديال التسلول

لعوقوبة ديال التسلول هي ضربة غلط مانيشانش كاتعطى للفرقة لوخرة فلبلاصة اللي طرا فيها لغلط واخّا يكون فنص التيران ديال لفرقة دلكوايري اللي دارو. لحكم كايعتامد بزاف على لحكّام لمعاونين باش يعرف واش طرا التسلول ولّا لا. فاش كايطرا التسلول، لحكم لمعاون لقريب ليه كايهز الراية بشكل أفقي. وفاش كايوقف لحكم اللول اللعب، لحكم لمعاول كايميّل الراية على حساب فين وقع التسلّول:

• كايهبط الراية 45 درجة للتحت إلا لغلط طرا فالتلت ديال التيران اللي حداه،
• كايهز الراية غادة (موازية) معا التيران إلا طرا لغلط فالتلت لوسطاني ديال التيران،
• كايطلّع الراية 45 درجة للفوق إلا طرا التسلول فالتلت ديال التيران اللي بعيد عليه.

عيون لكلام

تقدر تزيد شوف بزاف د تّصاور و لمعلومات ديال Offside (association football) ف ويكيميديا كومنز.

تقدر تزيد شوف بزاف د تّصاور و لمعلومات ديال Offside (association football) ف ويكيميديا كومنز.