بسطيلة

البسطيلة ولا الپاستيلا طبق مغريبي، و هي نوع من المعجنات المصنوعة من العجينة و عامرة بالبصلة، لحم الحمام (ولا الدجاج، الديك الرومي، ولا لحوت و لماكلة د لبحر) طايب ف زّعفران، المعدنوس و القزبور، البيض المسلوق واللوز، و مخلط الحلو و المالح معا القرفة.

بسطيلة
معلومات عامة
نوع د لماكلة	طبق سمك، طبق دجاج و فطيرة اللحم
لبلاد لأصلية	لمغريب، إيالة الجزائر و إقليم الأندلس
مصاوب من	لحم دجاج، حوت و مصارن دبيحة
كوزينة	كوزينة مغريبية

لأصل ديال لبسطيلة غالباً ف لمغريب، و ب تّحديد ف مدينة فاس و نّواحي ديالها، ولاكين يقدر يكون شي تأتير أندالوسي. ف غرب دزاير كانلقاو لبسطيلة ب دّجاج لي دخلات ل تماك ف وقت معطّل، حيت مامدكوراش ف كتوب طّياب لقدام على لكوزينة دّزايرية.

لبسطيلة تّقليدية كاتكون مصاوبة ب لحم لحمام، ؤ كاتكون كبيرة بزاف بحيت كاتوكّل 10 د نّاس. لمصاوبة د هاد لبسطيلة ف لقديم كانت كاتطلب تعاون ديال فرقة د طّباخا، ؤ كانت من لأكلات لمفضلة ديال لفاميلات لمرفّحة، ؤ ف سّتيقبالات و لمأدبات د لقصور عند سّلالات لملكية لي حكمات لمغريب.

تقدر تكون صناعة لورقة، لي كاتدخل ف لمصاوبة د لبسطيلة، أتّرات على تطور معجنات ؤروپية مشهورة دابا بحال ميلفوي ف فرانسا و سفوڭلياطيلي ف طّاليان.

لأصل

كاينين بزاف لإدعاءَات على لأصل د لبسطيلة، شي وحدين كيحطوه ف بلايص بعاد على لمغريب، متلا ف الشينوا، و بلي جابوه لعرب معاهوم ف لفتوحات ديال لقرن 8. واحد لفرضية خرة كاتڭول بلي لبسطيلة أصلها طبق أمازيغي ديال دّجاج لمطبوخ ف زّعفران، عندو نفس سّمية، ؤ بلي لعرب ف لفتوحات جابو معاهوم لفن ديال صناعة لورقة ؤ مكونات خرين من شّرق لأوسط. ولاكين أقوى لفرضيات كاتحط لأصل ديال هاد لأكلة ك نتيجة د التفاعل مابين لكوزينة لمغريبية و لكوزينة لأندالوسية.

لفرضية لأندالوسية

وحدة من لفرضيات ديال لأصل لأندالوسي د لبسطيلة ديالت لمؤرخ د لماكلة رودولف ڭريڤي، لي ڭال بلي لجدة د لبسطيلة هيا واحد لأكلة أندالوسية سميتها "الجذابة". هاد لفرضية ترفضات من طاراف باحتين خرين حيت بزاف د لمدون لي هاجرو ليها لموريسكيين بحال تطوان، ؤ تا مدون د غرب دزاير، ماعرفاتش لبسطيلة ف وقت مبكّر، و مادخلاتها تا هاجرو عائلات فاسية ل تماك. كيبان من هنا ديجا بلي لأصل د لبسطيلة يقدر يكون هوّا مدينة فاس.

دليل أخور ضد لأصل لأندالوسي د لبسطيلة هوّا طريقة التحضير و لمكونات. حيت لكوزينة د شمال إفريقيا معتامدة على سّمن و زّبدة، لي كاتدخل ف مكونات لبسطيلة، ف لوقت لي لجذابة كانت كاتصاوب ب زّيت، كيما لأكلات لأندالوسية بشكل عام. تال هادي 250 عام كانت زّبدة ف ؤروپا كاتّعتابر مادة طبية، و رّومان ؤ ليونانيين لقدام كانو كيعتابرو زّبدة "لماكلة ديال لمهيمجين"، و ف لقرون لوسطانية كانو غير لفوقارا لؤروپيين لي كياكلوها. لمصاوبة د لجذابة تاهيا ماشي بحال لبسطيلة، حيت لوراق ديالها كيكونو غلاض، ؤ ماكايتّستعملش فيهوم لبيض كيما لبسطيلة.

يلا كانت لجذابة لعبات دور ف تطوير لبسطيلة، غادي تكون غير ف تخدام لّوز و سّكار. و يلا كانت لجذابة هيّا لأصل لموباشير ديال لبسطيلة، ماكاين تا شي سبب لاش غادي تبدل سميتها على غفلة ملي تدوز ل لمغريب، و سيرتو تولي سميتها عندها أصل لاتيني، لي مامدكورش ڭاع ف لكتوبا د طّياب لأندالوسي. خوصي خاڤيير سيموني ب لموقابيل كيڭول ف كتابو Glosario de voces ibéricas y latinas usadas entre los mozárabes بلي كلمة bestila كانت موجودة ف لموزارابية، ؤ كاتعني "خبزة صغيرة"، ؤ أصلها من لّاتينية pastillum.

لفرضية لفاسية

بزاف لي كيشوفو كلمة "بسطيلة" ؤلا "پاستيلا" كيمشي عقلهوم ديريكت معا أصل سپنيولي ؤلا موزارابي (من لموزارابية، لهجة لاتينية أندالوسية كانو كيهضروها لموريسكيين) ديال لكلمة، ؤ كينساو بلي واحد لوقت لّوغة لّاتينية كانت مهضورة ف لمدون د لمغريب، ف لفترة د قبل لإسلام، ؤ تا لقرون لّولة د لفترة لإسلامية. لفرضية لمضادة إدن تقدر تكون بلي سّمية د هاد لأكلة جاية نيشان من لّاتينية لي كانت مهضورة ف لمغريب، سيرتو مدينة وليلي، لي بعيدة ب 60 كيلوميطر من فاس. لمدينة د فاس نيت بعدما تأسسات، عمّروها ف لّول قبائل أوربة لأمازيغية لي هاجرو من وليلي معا إدريس تّاني، و لي كانو بدلو دينهوم من لمسيحية ل لإسلام. لكلمة لّاتينية pastillum، پاستيلوم، لي كاتعني "لخبزة صّغيرة"، تقدر تكون هيّا لأصل ديال پاستيلا ؤلا بسطيلة.

لپاستيلوم كانت واحد لخبزة ؤلا كعكة مدوّرة لي كانت كاتّعطا قربان ل لأرباب د رّومان ف إطار طّقوس د لعبادة لوتنية لي كانت منتاشرة ف لإمبراطورية الرومانية، بما فيها إقليم موريطانية الطنجية ف شمال لمغريب. هاد لخبزة ؤلا لكعكة تقدر تكون عطات معجنات ب نواع مختالفين ف مناطق بحال ف سوريا، أناطوليا و فرانسا، لي معا مرور زّمان غبرات ؤ مابقا ليها أتار. ف لقرن 12 ف فرانسا متلا، كانو أنواع د لمعجنات سميتهوم pastillus، ؤلا wastellus، ؤلا gastiel كاتعمّرو ب لّحم ؤلا لحوت، ؤ كيتّعتابرو أكلات ديال لّوكس لي كياكلوهوم غي لأرسطقراطيين. ف لڭزاير لبريطانية لماليك د سكوطلاندا ويليام لملقب ب السبع حط طبق سميتو wastelli dominici فاش عرض على لماليك د النڭليز ريتشارد قلب السبع. بزاف د لباحتين حاولو يلقاو رابط مابين هاد "لبسطيلات لقديمة" من جيهة و لجذابة و لبسطيلة لمغريبية من جيهة خرة، ولاكين ماكيبانش بلي كاين شي رابط موباشير بيناتهوم.

كاينة إمكانية خرة ل لأصل د لبسطيلة، لي هيّا واحد لمعجنة أمازيغية د لأطلس لمتوسط كاتسما "تارخدولت"، لي كاتعمّر ب لبڭري ؤلا لغنمي، ؤ كاتكون فيها لقرفة، لبيض، زّبدة ؤلا سّمن. ولاكين صعيب نعرفو فوقاش بانت هاد لأكلة تاهيا، ؤ تقدر تكون تارخدولت غير تنويع أطلسي ديال لبسطيلة.

لي كيزيد يدعم لفرضية د لأصل لفاسي ديال لبسطيلة هوّا ببساطة لعدد لكبير د تّنويعات د هاد لأكلة ف لكوزينة لفاسية، لي ماكانلقاوهاش ف مدون خرة، ؤلا دخلات ليها معطّلة. بعض هاد تّنويعات غبرات ف مرة ؤلا قليل فاش كاتصاوب، بحال لبسطيلة ب لخليع، لبسطيلة ب لكفتة و سّمن، ؤ غيرها. لبسطيلة ب لحوت ب لموقابيل هيّا تنويعة لي تّختارعات غير ف لقرن 19 ؤلا 20، ملي هاجرو عائلات فاسية ل مدون ساحلية بحال كازا و رّباط.

لانتشار

تاتعتابر لبسطيلة أكلة وطنية ف لمغريب ورمز من رموز لكوزينة لمغريبية وعندها بلاصتها تا ف لكوزينة دّزايرية. ورقة البسطيلة ف لمغريب كاتسما "الورقة" و كاتكون رقيقة وتتشبه ل "الديول" ف دزاير و "البرواك" ف تونس، وهي ضرورية باش تڭاد البسطيلة.

بسطيلة الحوت

بسطيلة الحوت تيكون فيها الحوت و فواكه البحر و الشعرية.

مڭادة د بسطيلة الحوت

• عجينة ورقة البسطيلة.
• الزبدة.
• صفار البيض.
• زيت.
• فلفلة.
• سكينجبير.
• القزبور.
• ملحة ت الماكلة.
• عصير ليمون تالحامض.
• شعرية.
• الحوت.
• ويمكن تزيد لماكلة د البحر بحال لكروڤيت و لكالامار.

كيفاش تتصاوب بتصاور

• 
  الخطوة 1
• 
  الخطوة 2
• 
  الخطوة 3
• 
  الخطوة 4
• 
  الخطوة 5
• 
  الخطوة 6
• 
  الخطوة 7
• 
  الخطوة 8
• 
  الخطوة 9
• 
  الخطوة 10

نواع تالبسطيلة

تتصنع البسطيلة بنواع مختالفة، منها لحم الحمام و الدجاج و الحوت و لماكلة د البحر، و منها الحلو بالسكر و الحليب و ما زهر، و تتقدم بشكال مختالفة منها طبق تقليدي ومنها كاسات (كاپ كيك) ولا ملوية فورقة.

بسطيلة بلحم لغنمي.

بسطيلة بلحم الدجاج.

بسطيلة بلحم الحوت و ماكلة البحر.

بسطيلة بلحم الدجاج و غبرة تالسكار.

بسطيلة بماكلة البحر.

ملاوي تالبسطيلة.