أزرو

أزرو (ب لأمازيغية ⴰⵥⵔⵓ) مدينة فلمغريب، جات فجبل، بعيدة عن لجانوب ديال فاس ب89 كم ؤ ب68 كم عن مدينة مكناس، هي وحدة من لمدون ديال إقليم إيفران، ف جيهة ديال فاس مكناس، الناس ديالها واصلين ل54.289 بنادم على حساب لإحصاء ديال 2014 زيادة ديال ناس فلمدينة، خلاها تعرف تا زيادة فلبني، و أهلها باش تلعـب دور مهـم فلاقتصاد وثقافة ديال لمنطقـة.

أزرو
‫أزرو‬ (ar) ⴰⵣⵔⵓ (tzm)
مدينة آزرو من لفوق
لبلاصة
لبلاد	لمغريب
لإقليم	إقليم إيفران
السكان
شحال دالسكان	54,350 (2014)
شحال دلفاميلات	13,854 (2014)
لجغرافيا
لعلو	1,330 م
خط الطول بـ °	-5.21747589
خط لعرض بـ °	33.43774451
معلومات خرا
نمرة التيليفون لمحلية	53100
الرمز لجغرافي	2556464
لخريطة

سّمية

أزرو كلمة بالغة الأمازيغية و كاتعني لحجرة، تسمات بحال هكا حيت كاينة وسط منها حجرة كبيرة سميتها أقشمير.

لبلاصة

لبلاصة ديال أزرو متميزة و ستراتيجية وسـط جـبـال ديال لأطلس لمـتوسـط. حيت تايتلاقاو فيها بزاف ديال طرقان، لي أهلها باش تولي مركز لاستقبال الناس لي مسافرين لمدن أخرى من فـاس على (طريق لوطني رقم 8) فتيجاه خنيفـرة مراكـش. ؤ من مكنـاس على ( طريق لوطنية رقم 13) فتيجاه ميـدلـت الرشيـديـة. وهي نفسها طـريق تجارية ديال لقوافـل لقديمة بيـن لمـدون ديال لأطلسيـة، ولمـدون ولواحـات ديال صحراء فلجانوب ديال لمغريب. المسافـات ما بين مدينـة أزرو ولمدون لي قراب ليها هي: إفــران: 18 كلم - إيمـوزار كندر: 40 كلم - فــاس 86 كلم - مكناس: 70كلم - الحاجب: 36 كلم - صفـرو: 76 كلم - بولمان: 70 كلم - إيــدزر: 65 كلم - خنيفرة: 80 كلم. فـي التقسيـم لجيهاوي جديـد ديال 2015 رجعات أزرو محسوب على لجيهـة رقم 3 (فــاس مكنــاس) فلإقليم ديال إفــران.

تّاريخ

أزرو تدكرات ل لمرة لّولة ف تّاريخ ف برية صيفطها لبرطقيزي فيرناو طاڤييرا ل لماليك د لبرطقيز مانويل لّول ف ماي 1518. طاڤييرا ݣال ف بريتو بلي أزرو كانت ڤيلاج جديد بناه أحمد لعرج سّعدي خو سّلطان محمد شّيخ سّعدي. تّوارخي لمغريبي أحمد بن خالد الناصري كان كتب بلي تأسيس لمدينة د أزرو تايرجع ل لعهد ديال سّلطان إسماعيل بن الشريف عام 1095هـ/1684م، و تعاودات تبنات لمدينة ف لعهد ديال سّلطان لحسن الأوّل عام 1305هـ/1888م، لي بنى ف لمدينة جامع ديال لحسن اللول، لي مزال خدام تال ليوم.

سكان

أزرو تابعة لقبيلة "بني مݣيلد". هـاد لقبيلة لي كاتنسب راسها للولي صالـح سيدي مكيلـد لفيلالـي لي جا مـن تافيلالـت، و لي مدفون فجبـل سيـدي مكيلـد. الناس ديال هاد لمنطقة فتاريخ ديالهم كانو نص رحالة، تايرحلو بين أدرار و أزغار على قبل سرحة، لكن من بعـد ستاقروا هاد رحل فمنطقة، من قبايل مختالفين، و بدا لبني كايتطور.

تنمية

جامع الحسن لأول فأزرو

لموقيع ديال مدينة أزرو وتاريـخ ديالها ولجغرافيا ديالها، خلاوها بلاصة مرشحـة لتنميـة فهاد لمنطقة، هذا علاش درات فيها جامعة الأخوين "مركـز أزرو للخـدمـات الاجتماعية المحليـة" عام 2002، لي تايكون شباب ديال لمدينة باش يلقاو خدمة.

تعليم

• نسبة لأمية (نّاس لّي ما كايعرفوش يقراو ولا يكتبو) : 24%
• نسبة سّكان لّي قاريين فوق تّانوي (تانوي و جامعة): 25,8%

اقتصاد

• نسبة نّاس نّشيطين (لّي يقدرو يخدمو): 48,1%
• نسبة لبطالة (نّاس لّي ما خدامينش و تايقلبو على خدمة): 21%
• نسبة نّاس اللي خدامين ف دّولة (ولا لعاطلين اللي سبق ليهوم خدمو): 19,3%
• نسبة نّاس اللي خدامين في لقطاع لخاص (ولا لعاطلين اللي سبق ليهوم خدمو):42,5%

سياحة

حي لقشلة فأزرو

لمنطقة ديال أزرو معروفة بطبيعة ديالها، تالقاو وسط لمدينة مثلا حجرة كبيرة سميتها أقشمير، و فنواحي ديال لمدينة كانية شجرة كبيرة ديال الأرز معروفة سميتها ( أرزݣورو)، كيف ما معروفة بلقرودة ديال لأطلس "زعطوط".كاين بزاف ديال لبني لي عندو قيمة هندسية كبيرة، بحال، لمركـز ديال أزرو دلخدمات لاجتماعية لمحليـة لي تابـع لجامعـة الأخويـن، و ليسي طـارق بن زيـاد. كيف ما معروفة هاد لمدينة بلقرمود، خصيصا لقرمود لخضر، لي عندو هندسة بحال الهرم فسطوحة، كيف ما معروفة هاد لمدينة بتربية ديال لحوت دلما لحلو فأحواض خاصة، و فيها جامع كبير لي هو جامع النور، لي جا فصونطر ديال لمدينة و ضايرة بيه جردة كبيرة، و قريب ليه كاين جامع ديال لحسن لأول لي عندو قيمة تاريخية.

لأرز د لأطلس: أزرو معروفة بشجر ديال لأرز، لي تايعيش فيه زعطوط، و هو شجر خضر لعام كامل، محسوب على لمنتزه لوطني ديال إفران، تايجيو ليه سياح من كل بلاصة، هاد لغابة لي تاطل على مدينة أزرو فيها بزاف دلحيوانات أخرين بحال لحلوف، سنجاب، تعلب، و بزاف دلأنواع ديال طيور.

تلج: تايطيح خير ربي ديال ثلج فأزرو فوقت شتاء، و كاتروج الحركة فلمحطات ديال سكي لي قراب لأزرو، هاد ثلج تايغدي بزاف ديال لعيون و ضايات لي قراب لأزرو، و تايعطيوها قيمة سياحية كبيرة، خصوصا أم لمدينة عندها بنية تحتية مزيانة كاتخليها تستقبل سياح.

جامع النور فأزرو

لهندسة دلبني: أزرو معروفة بلقرمود لخضر بحال لي فجامع ديال النور لي هو أكبر معلمة فلمدينة، و عندو ساحة كبيرة وسط لمدينة سميتها ساحة محمد الخامس. كاين تا مجمـع صناعـة تقليديـة، ولمركب رياضـي، ولخزانة لبلدية، ودار طالبة، ومركـز أزرو للخدمـات الاجتماعية، و لمركز ثقافي، وإدارة المنتزه لوطني ديال إفران، كولها بنايات متميزة بلفقرمود، كاتعطي لمدينة هويتها. تانلقاو من جهة أخرى دار الحوت لي مختصة فتربية ديال ترويت، و 3 ديال ليسيات، و 3 ديال لكوليجات. وسط لمدينة كانية سويقة لي كياتعتابر أكبر مركز تجاري دائم فلمدنية. أمن أكبر وأقدم لمعالم فلمدينة ليسي طارق بن زياد، لي عندة شهرة كبيرة..

لأحياء دلمدينة: كاين طيط حسن، الحي القديم، القشلة، بوسلهـام، تيزي مولاي الحسن، أمحعوف، الزيـد، سيدي عسو، بويقور، عقبة الزبيب، الرتاحة والحي الصناعي، القشلة، صباب، شرمو، الأرز، لبام، الحي الصانعي القديم، وغيرها.

ثقافة ورياضة: كاينة دار شبـاب ولخزانـة لبلديـة ولمركـب لإجتماعـي التربـوي الريـاضـي ولمخيمات ولابيسين و دار ثقـافـة و لمركـب الثقافـي. تانلقاو عاود لمهرجـان سينمائـي دلفيلـم لقصيـر، مهرجـان “إكـتـــل” فشعر . “مهرجـان الصخـرة الوطنـي للشعـر” . كاني فأزرو متحف كبير و فضاء ديال ذاكرة التاريخية للمقاومة والتحرير أمير الأطلس.

معريض دتصاور

• تصاور د أزرو
• 
  أقشمير وسط مدينة أزرو
• 
  أزرة من لفوق
• 
  صونطر ديال أزرو
• 
  لحجرة دأقشمير لي تسمات عليها لمدينة
• 
  طرقة سوق لأسبوعي ديال أزرو
• 
  أزرو وقت تلج
• 
  لمركز تقافي ديال أزرو
• 
  أزرو فتلج
• 
  جامع نور فأزرو
• 
  أزرو بيض و كحل
• 
• 
• 
• 
• 
• 
• 
• 
• 
• 
• 
• 
• 
• 

شوف تا

• دير تومليلين

تقدر تزيد شوف بزاف د تّصاور و لمعلومات ديال Azrou ف ويكيميديا كومنز.