پلاج بوزنيقة

پلاج بوزنيقة
پلاج ديال الرملة فإقليم بنسليمان

پلاج بوزنيقة من الجهة الغربية
الموقع
نوع الشاطئ	شاطئ رملي
الإحداثيات	33.81908 - 7.15709-
المحيط	لمحيط لأطلسي
لجغرافيا
لمساحة	25 كتار
طول	3,5 كيلومر
لعرض	100 ميترو
لعلو	9 ميترو

پلاج بوزنيقة من القمر لإصطناعي

پلاج بوزنيقة پلاج د رّملة تايطل على المحيط الأطلسي، كاين فالشط ديال لإقليم د بنسليمان، بضبط فجماعة بوزنيقة، يتايحدو من شمال شرقي لمصب ديال واد بوزنيقة، ؤ من لجنوب لغربي لمصب ديال واد سيكوك، هاد لپلاج كتيتميز بالمورفلوجية ديال على شكل حرف w، و معروف بالكاليطي ديال لما ورملة ديالو، لي كايخليوه يستقبل فصيق بزاف ديال السياح من لمغريب كامل، بالخصوص من لمدن كازا ولمحمدية ورباط وسلا وبنسليمان.

لموقع

لپلاج ديال بوزنيقة جا على المحيط الأطلسي، بالضبط على الشط ديال لهضبة د شاوية، محسوب على إقليم بنسليمان، بالضبط فجماعة بوزنيقة، من شمال شرقي تايحدو لمصب ديال واد بوزنيقة (كايتخالط بزاف معا المصب ديال واد الشراط)، ومن لجنوب لغربي لمصب ديال واد سيكوك، أما من لجانوب، كاين لمنطقة ساحلية لي مجهزة لسياحة.^[1]

لمرفولوجية

پلاج بوزنيقة متميز بلمرفلوجيا لمتميزة ديالو على شكل حرف w، و بالحجم و طول ديالو لي كبار. كل بلاصة فهاد لپلاج تايسميوها سمية فشكل فالمنطقة، بحال "لابيسين" فلجنوب لغربي، و"لفلايك" فشمال شرقي. أما طول ديالو، تقريبا 3 كيلوميتر ونص، أما المساحة، تقريبا 25 كتار، بلا منحسبو لبلاصة لي مبنية، حيت هاد لپلاج مدورينو ديور، كايتسماو (كابانوهات)، لي تبناو على لملك العمومي ديال دولة، لي كراتهم بكونطرات طويلة، كاتجددها كل مرة وزارة تجهيز ونقل.^[2]

الشط

پلاج بوزنيقة عندو شط كبير مجهز على قبل سياحة، معروف تا بسميت "بوزنيقة باي" فيه إقامات سياحية، ؤ مجمع مولاي رشيد للشباب والطفولة، ؤ مخيم مجهز تابع لوزارة الشباب، ؤ بلاصة مخصص لمهرجان تبوريدة، و مابعيداش عليه غابة ديال الصنوبر. هاد المنطة تجهزات ببزاف ديال خدمات دالسياحة، بحال ريسطورات ؤ لقهاوي ؤ لباركينغات، أما في ا فشمال شرقي، كاين تيران ديال لغولف، ؤ مرسة ديال صيد تقليدي، و بلاصة ديال ليوخوت الصغيرة، و فتالي كاين واحد لوطيل كبير سميتو أوطيل لقصبة، لي رجع معلمة ديال لمدينة، هاد لوطيل دلخل فلبحر بحال شي شبه جزيرة، و فيه لجنب لوطيل بلاصة ديال الفيلات، و ريسطورات و قهاوي ديال لكلاص، و نوادي ديال رياضات د لبحر، خاصة سورف، ورا هاد القصبة كاين پلاج صغير هو امتداد ديال پلاج بوزنيقة، عزيز على الناس لي تايديو سورف. خاص نردو لبال باش مانخلطوش بين هوطيل لقصبة، و لقصبة تاريخية ديال بوزنيقة لي جات على الطريق ساحلي، و سميتها دابا لمربط الوطني لبوزنيقة، ولا حرس بوزنيقة.^[3]

سياحة

پلاج بوزنيقة من أكتر لپلاجات ف لمغريب من حيت لعدد د سيّاح، حيث لحجم لكبير ديالو ولكاليطي دلما ورملة ديالو، و تا فاش خدا الراية الزرقة 16 مرة متابعة من 2007،بلإضافة للموضع لمتميز ديالو حدا الخرجة ديال لوتوروت، و الطريق ساحلي، و طريق لوطني، ؤ لاڭار ديال تران، هادشي كامل تايخليه يستقبل بزاف ديال السواح لي بغاو يتبحرو كل نهار فصيف، خاصة من المدن لكبيرة لي قريبة ليه بحال كازا و رباط، هاد لپلاج تايتوفر على ڭاع تجهيزات لأساسية، (باساجات دلخشب، طارويات دزبل، راديو ديال لپلاج، السلامة، لأمن، باركينغ ... ).^[4]

فسياق أخر، بوزنيقة هي مدينة سياحية بفضل هاد لپلاج، لي تايدخل، جزء كبير من مجموع لمداخيل ديالها من مصدر سياحي،حيت هاد لپلاج تايخلق رواج مهم للمنطقة و ناس ديالها فصيف.^[5]

العيوب

واد سيكوك لي تايصب فلجنوب لغربي ديال لپلاج، تايجيب معاه الواد لحار و تايخلي ريحة خايبة، واخا كاين غير قريب محطة ديال لمعالجة دلواد لحار. من جهة أخرى، السواح تايشكيو من دوشات لي ماكاينينش و طواليطات لي قلال، و من لكلاب دزنقة لي كاينين فكل بلاصة. أما المشكل لكبير لي تايتعاود كل عام، هو التمن ديال لباركينغ، و لعشوائية فلكرا ديال لكراسا و لپاراصولات.^[6]