ويكيپيديا:بوتات/مصطلحات

هاد الصفحة فيها ڭلوصير ديال لمصطلحات التقنية و لإدارية لي متعلقة ب لبوتات د ويكيپيديا، مرتّبة على حساب ترتيب ألفبائي.

مصطلحات

أمغاربوت: بوت عندو صلاحيات ديال أمغار.
أنطيرفاص د لبرماجة ديال أپليكاصيون ولّا API: مجموعة د لمكتبات ديال لبرماجة لي كيسهّلو لمصاوبة ديال لبوتات و بشكل عام ديال أي پروڭرام. شوف API.

بوت: پروڭرام ؤلا تول ديال تطميت لمهام ؤلا لعطاشات.
بيروقراطي: خدايمي عندو صلاحيات باش يعطي صلاحيات ديال أمغار ؤلا بوت ل شي كونط د خدايمي. مستوى د لاكصي لي جا فوق من أمغار. حاليا ماكاين تا شي بيروقراطي ف ويكيپيديا ب الداريجة داكشي علاش بعد لموافقة على شي طلب ديال تبدال صلاحية، كيخص يتدار طلب ف ميطاويكي باش ينفّدو بيروقراطي Bureaucrat ؤلا ريجيسور Steward.

پايثون: لونڭاج د لبرماجة لي بزاف د مّالين لبوتات كيستعملوه باش يصاوبو لبوتات ديالهوم.
پايويكيبوت Pywikibot: مكتابة و API (شوف أنطيرفاص د لبرماجة د أپليكاصيون) لي كاتصلاح ل تطوير لپروڭرام د لبوتات ب پايثون. أكتر مكتابة مخدمة ف مجموع مشاريع ويكيميديا ف لمصاوبة د لبوتات.

تبدال صغير: تبدال ف النص ؤلا لكوض د شي صفحة لي ماتيكونش عندو مفعول كبير، بحال تحياد لخويات ف اللخر ديال السطورا، تحياد السطورا لخاويين ب الزايد، تصحيح لفواصل، و غيرهوم. عادةً هاد التبديلات ماكيحتاجوش ل مراجعة، من غير يلا خلقو موشكيل ف الشكل ؤلا لمحتوى ديال الصفحة.
تطميت: لحالة فاش لواحد كيرد شي عملية غادية ؤطوماتيكيا بلاصت مايديرها بنادم ب يديه.
تطميت جزئي: عملية ؤلا مجموعة د لعمليات لي طرف منها كيديرو بوت ؤلا پروڭرام، و طرف أخور كيديرو بنادم. شوف تا كتابة ب معاونة بوتية.
تطميت كامل: عملية ؤلا مجموعة د لعمليات لي كيديرهوم لبوت من طقطق ل السلام عليكوم. شوف تا كتابة بوتية.
تولفورج Toolforge: سيرڤور ديال مؤسسة ويكيميديا فين كيقدرو يتهوسطاو لبوتات بلاصت مايتلونصاو من لپيسي ديال مول لبوت.

حكام د لبوت: مجموعة د لقواعد و لحكام لي تّافقات عليها الجماعة د لويكيپيديين، و لي خاص جميع لبوتات و مّاليهوم يلتازمو بيها، من لوضع د الطلب تال لخدمة ليومية د لبوت.

ريجيسور: ب النڭليزية steward هوّ خدايمي عندو صلاحيات عالمية كاتعطيه أكصي ل جميع مشاريع ويكيميديا، بما فيها الصلاحيات ديال لبيروقراطي و لأمغار. هادشي كيخوّل ليه باش يعطي ؤلا يرفض صلاحيات د لبوت. باش تزيد تّعرف على الريجيسورات شوف هاد الصفحة ف ميطاويكي.

عطاشة بوتية: مهمة صغيرة و بسيطة عادةً، لي تقدر تّشرح ف جملة ؤلا جوج، و لي يقدر يديرها بوت.

كتابة ب معاونة بوتية ؤلا كتابة نص مطمّتة ؤلا *نص ؤطوماتيكية: كتابة ف ويكيپيديا ب معاونة ديال بوت لي يقدر يدير خدمة كاتسهّل التبدال د الصفحات، متلاً يعلّم الصفاحي لي خاص يتبدّلو ب شي تصنيف خاص، ؤلا يدير تبديلات لي خاص يراجعها و يزيد قادها كتاتبي بنادم.
كتابة بوتية ؤلا تبدال ؤطوماتيكي: كتابة ؤلا تبدال ف ويكيپيديا كيديرو لبوت بشكل كامل بلا متابعة ديال بنادم.
كونط ديال بوت: كونط خاص لي كيصاوبو مول لبوت ل لبوت ديالو. حيت ممنوع باش التبدال لؤطوماتيكي يتدار ب كونط ديال بنادم (شوف ويكيپيديا:لحكام د لبوتات). لكونط د لبوت خاص يكون عندو سمية د لخدايمي فيها "بوت" ؤلا "Bot" باش يعرف بنادم فيساع بلي كونط ديال بوت ماشي بنادم.

مقال بوتي: ف التعريف لحالي لي تم لإتفاق عليه، هوّ أي مقال لي صاوبو بوت، و مافايتينش التبديلات ديال كتاتبي بنادم فيه 1000 بايت ديال التيكست لحافي (بلا موضيلات، تصاور، عيون و غيرهم). شوف لحكام د لمحتوى د الجملة.
مول لبوت ؤلا لكوضور د لبوت: كتاتبي لي كيكون صاوب لبوت ؤلا كيخدم بيه و كيسيّرو، و كاتكون عندو لمسؤولية لكاملة ف داكشي لي كيديرو لبوت (بما فيها إصلاح لأخطاء ديالو، تا ب ليد يلا لزم لأمر).
ميدياويكي: الصوفتوير لي عليه واقفة ويكيپيديا.

نص ؤلا تيكست ؤلا كوض د ويكي: لكوض لخام ديال ويكي لي كيشكّل الساس باش كايتصاوبو الصفاحي ديال شي ويكي. لكتاتبي لي كيخدم ب لإديتور د الشوفان كيجينيري لكوض د ويكي بشكل لامباشر.