ويكيپيديا:لحكام د لمحتوى - اللوغة

هادي صفحة ديال لْحكام د لموسوعة. هاد صّفحة محمية و مايمكنش يبدل فيها غير مستخدم أمغار. يلا بغيتي تقتارح شي تبديل ف لْحكام ديال لّوغة، حلّ شي حلقة د نّيقاش ف لبرلمان ، ف ميزان لكلام ولا حلّ شي حلقة ف صّفحة د إمغارن.

روابط نقاشات المصادقة: 1 -

لحْكام لكبار

طريقة لبني ديال لّوغة

جّماعة د ويكيپيديا ب الدّاريجة هي لّي كاتبني لقواعد ديال لكتبة د لّوغة د لموسوعة ب شكل تعاوني و تجريبي Empirique.
السّاس د لقواعد د لكتابة هو لمحتوى لّي كايتبنا ف ويكيپيديا ب الدّاريجة.
ما يمكنش يتّفرضو على لمساهمين ف لموسوعة شي قواعد د لكتابة جايين من برّا لموسوعة.
لموسوعة ف لبدية ديالها كاتعطي ل أي عضو لحرّية باش يكتب ب الدّاريجا لّي كاتريّحو و لّي موالف كايستعمل.
لعملية ديال تّثبيت د لقواعد كاتدوز من نقاشات محددة (و ماشي عامّة) ف صّفحة د ميزان لكلام: أيّ قاعيدة تّافقات عليها جّماعة كاتّقيد ف صّفحة د لحكام و كاتولّي إلزامية على لمحرّرين.
إمغارن د لموسوعة لازم عليهوم يسيّرو نّيقاشات د ميزان لكلام و يديرولهوم خلاصات باينة.
ف لبني د كلمات جداد، و ب دّات ف لمواضيع لعيلمية ولا ب نّسبة ل لمفاهيم لمجرّدة (لّي يمكن ما يكونش عندها كلمتها ف الدّاريجا) ، لمحرّرين خاصّهوم يحاولو على قدر جهدهوم باش يديروه مع جّماعة د ويكيپيديا ب الدّاريجة.
- كل كلمة جديدة بناتها جّماعة خاصّها تتقيد ف ويكيقاموس ب الدّاريجة.

صّواب ف لّوغة

ب صفة عامّة أي موساهيم عندو لحرّية باش يستعمل أي كلمة ب الدّاريجا ف لمقالات.
ويكيپيديا ب الدّاريجة مشروع ديال موسوعة و صعيب يتقال فيه أن شي كلمة "خاسرة" ولا "حشومة" ولا "ما يمكنش تّقال".
خاص يعرف هاداك اللي تيكتب مقالة يختار كلمة على حساب السياق اللي تيكتب فيه و لموضوع. شي مرات تقدر تكون لكلمة صالحة تكون ف ويكي قاموس كتر من ويكيبيديا بحال دابا.
واخّا هاكاك، أي محرّر شاف أن شي كلمة ولا أسلوب تّستعملو ف لمقالات يمكن يكونو ماشي مقبولين يمكن ليه يقتارح حكام محدّدين لديك لكلمة و يطرحهوم ل نّيقاش ف ميزان لكلام.

كيفاش كاتطبّق لحكام د لّوغة عمليا

لموضوع/لموشكيل	شكون يقدر يطرحو	كيفاش	شكون كاينسّقها	فين كايدّار لقرار
خاصّ تتحطّ قاعدة د لّوغة	أي محرر ف لموسوعة، ب شرط يكون فايت 50 تبديل، و عندو 10 د التبديلات ف 6 شهور اللخرة	خاصّ تتحلّ حلقة نيقاش ف ميزان لكلام و تقرّر واش تقبل لقاعيدة ولا ترفضها، ويلا قبلاتها تحدّد واش لقاعيدة إلزامية ولا غير توجيهية.	ضروري ينسّقها شي أمغار	سوا كانت لقاعيدة مقبولة ولا مرفوضة، خاصّها تتحطّ ف كنّاش لقواعد. لقواعد لمرفوضة كاتّحطّ ف فقرة بوحدها ف لكنّاش.
خاصّنا نخلقو كلمة جديدة ما كايناش	أي محرر ف لموسوعة، ب شرط يكون فايت 50 تبديل، و عندو 10 د التبديلات ف 6 شهور اللخرة	خاصّ تتحلّ حلقة نيقاش ف ميزان لكلام و تحاول جّماعة توضع قتيراحات، يمكن ل جّماعة تقبل كتر من قتيراح واحد ل نفس لكلمة. يمكن نفس لحلقة تبني بزّاف د لكلمات دقّة وحدة يلا كانو ف نفس لمجال، عندهوم جدر واحد ولا عندهوم بنية موحّدة.	ضروري ينسّقها شي أمغار	لكلمات جّداد كايتقيدو ف كناش لكلمات جّداد على حساب لجدول د لكلمة. لأمغار خاصّو ف تّنسيق ديالو يتأكّد أن لحقول د لجدول كاملين تناقشو ف لحلقة و تّافقات عليهوم جّماعة.
شي كلمة خالقة موشكيل ديال صّواب ف لهدرة	أي محرر ف لموسوعة، ب شرط يكون فايت 50 تبديل، و عندو 10 د التبديلات ف 6 شهور اللخرة	خاصّ تتحلّ حلقة نيقاش ف ميزان لكلام و تكون متعلّقة غير ب كلمة وحدة (ماشي نيقاشات مترّعة). لّي طرح لموشكيل خاصّو يشرح مزيان ف شمن مستوى لكلمة خالقة مشاكيل و يعطي أمتيلة من لموسوعة. لقْواعد لمطلقة (يعني يتشكّا شي واحد من شي كلمة ما مستعملها حدّ ف لموسوعة) ما مقبولاش ف هاد لباب.	ضروري ينسّقها شي أمغار	على حساب شنو قرّرات حلقة نّيقاش.

زوم على لقضية د تّنسيق

تّنسيق كايعني أن لأمغار خاصّو يتأكّد أن لموضوع محدّد مزيان (ماشي مترّع و فضفاض)، يسيّر نّيقاش تّا يحصل لإيجماع، يدير لخلاصة و صيغة لقاعيدة ولا لكلمة جّديدة و يحطّها ف كنّاش لقواعْد ولا كناش لكلمات جّداد. لأمغار خاصّو يحرص على أنّ رّاي نّيهائي خاصّ يساهمو فيه محرّرين كايكتبو بزّاف ف لموسوعة و يخلّي لّي ما كايكتبوش بزّاف تاهوما يعبّرو على رّاي ديالهوم.

زوم على جدول لكلمات جّداد

لكلمة	تعريف مختاصر	لمقابلات ديالها (عربية - فرنسية - إنجليزية)	تأثيل - إيتيمولوجي (و معاه لّيان د حلقة نّيقاش)	نّوع ديالها سمية - فيعل - مصدر	مرادفات ديالها	تفاصيل لغوية (جنس - لجمع ديالها)	دّخلة ديالها ف ويكيقاموس

لكلمة: ب شّكل لمفرد ديالها بلا تعريف، ب لّيان ديالها يلا كانت لمقالة ديالها كاينة.
تعريف: يكون مختاصر بزّاف.
لمقابلات ديالها: باش يسهال تتّفهم ب زّربة، (حبّدا يتزادو ليانات د لمقالات ديالهوم).
إيتيمولوجي: لأصل د كيفاش تّبنات لكلمة و تمّا يتزاد لّيان د حلقة نّيقاش لّي خرجات منّها لكلمة.
نّوع ديالها: يعني واش سمية ولا فيعل ولا مصدر (نواع خرين يمكن يتزادو على حساب لحاجة و لغرق د تّفاصيل لّي بغينا).
مرادفات ديالها: كلمات خرين (يلا كانو) ب دّاريجة كايعنيو نفس لحاجة. هنا خاصّ لأمغار أن دوك لمرادفات تّاهوما كاينين دّخلات ديالهوم ف ويكيقاموس.
تّفاصيل لّغوية: يعني واش كلمة دكر ولا نتوة، كيفاش كايكون لجمع ديالها و كيفاش شكل د لكتبة ديالها يمكن يتحول (ف نّيسبة متلا).
دّخلة ديالها ف ويكيقاموس: لّيان د صّفحة ديالها ف ويكيقاموس (على قدر لإمكان).

مؤشرات تّتبع د لْحكام

لمؤشر	لقيمة	تاريخ
عدد لقواعْد لّي مقيّدين ف كنّاش لقْواعد	4	11 أكتوبر 2020
عدد لموساهيمين لّي شاركو ف لحلاقي د نّيقاش د لقواعْد (معدّل)	6.5	11 أكتوبر 2020
عدد لكلمات لّي مقيّدين ف كنّاش لكلمات جّداد	0	11 أكتوبر 2020
عدد لموساهيمين لّي شاركو ف لحلاقي د نّيقاش على لكلمات جّداد	0	11 أكتوبر 2020
عدد لحلاقي د نّيقاش لّي تدارو على مشاكيل صّواب ف لهدرة	0	11 أكتوبر 2020
عدد لموساهيمين لّي شاركو ف لحلاقي د نّيقاش على مشاكيل صّواب ف لهدرة	0	11 أكتوبر 2020