هيدروجين

سمع

(ملف)

لهيدروجين (ب نّݣليزية: Hydrogen من ليونانية ὕδωρ هودور "ما" ؤ لفرانساوية gène جين "يخلق، يصاوب" ب معنى "لّي كيخلق لْما") هوّا عنصر كيماوي أساسي، رّمز ديالو هوّا H ؤ نّمرة دّرية ديالو 1 ف طّابلو دّوري، هاد لعنصر مستّف ف سّطر (دّورة) 1 ؤ لعمود (لمجموعة) 1. هاد لعنصر داخل ف لݣروپ ديال لّافلزّات. ف ضّروف لمعيارية د ضّغط ؤ لحرارة، هاد لعنصر كيكون ف لحالة د غاز ؤ هوّا معروف من 1766.

هيدروجين
لجدوال الدوري
الرمز	H
النمرة الدرية	1
قبل منّو	عنصر كيماوي (نيوترونيوم)
بعد منّو	عنصر كيماوي (هيليوم)
ليحداتيات فلجدوال	عناصر الدورة الأولى و عناصر المجموعة الأولى
ليكتيشاف
اللي كتاشفو	هنري كاڤنديش
فين تكتاشف	نڭليز
إيمتا تكتاشف	1766
تسمّى على	ما
لبيانات لمعبورة
لكتلة	1.008 Da
شكل ليليكترونات	1s¹
لكتافة	0.08987 g/cm³
لحرارة فاش كايدوب	−259.14 °C
لحرارة فاش كايغلي	−252.87 °C
النماري دلاكسدة	−1، 1، 0
الطاقة دالتايّون (لمستوايات)	13.598 (1)
لكهروسيلبية	2.2

نبيعات ديال سپيكتر د لهيدروجين

تّاريخ

ف لبدية ديال لقرن 16، لخيميست پاراسيلسوس لاحض أن لْفوقاعات لّي كيطلعو فاش نّشارة د لحديد كتزاد ل لْحمض لْكبريتي قابلين ل ليشتيعال. ف 1671، روبرت بويل غادي يدير نفس لْملاحضة. حتا واحد من هاد جّوج ما قدر يستنتج لْوجود ديال لهيدروجين، داكشي علاش ليكتيشاف ديالو كيتنسب ل كاڤنديش. ف 1766، قدر يجمع هاد لفوقاعات ؤ يبين بلي مصاوبة من ݣاز مختالف علا لݣازات لْخرين. من بعد غادي يبين أن لهيدروجين ملّي كيتحرق كيعطي لْما، ؤ ب هادشي غادي يسالي معا لعتيقاد لّي كان منتاشر بلي لْما عنصر أساسي ف طّبيعة. هاد لݣاز غادي تعطا ليه سّمية ديال هيدرو-جين، ب معنى "لّي كيخلق لْما" من طرف عالم شّيمي لفرنساوي أنطوان لاڤوازيي.

ف 1931، هارولد أوري ؤ لمساعدين ديالو ف جامعة كولومبيا ف لميريكان، كتاشفو نوع آخور نادر ديال لهيدروجين. هاد نّوع، لّي هوّا ليزوطوپ هيدروجين-2، ؤ لكتلة ديالو ضّوبل ديال لهيدروجين-1، تسمّا دوتيريوم.

لخاصيات

لْخاصيات لْخارجية

لهيدروجين كيكون علا شكل ݣاز ف درجة لحرارة لْعادية، ؤ ماعندوش لون ؤلا ريحة، ؤ عندو أصغر كتافة ما بين لݣازات كاملين. كيولي سايل ف 252.879- درجة سيلسيوس، ؤ كيتجمد ف 259.16- درجة سيلسيوس.

لهيدروجين هوّا أكتر عنصر موجود ف لْكون ب نسبة ديال 73%، عاد تابعو لهيليوم ب 25%، ؤ لعناصر لخرين مجموعين 2%. أغلبية ديال هاد لهيدروجين كاين ف نّجوم. كوكب لمشتري حتا هوّا مكون أساسا من لهيدروجين.

لخاصيات لفيزيكية

لخاصيات لفيزيكية ديال لهيدروجين-1، لّي هوّا أكتر نضير د لهيدروجين متوفر ف طّبيعة هيّا كتّالي:

• لكتلة دّرية: 1.008 ݣرام/مول.
• لحالات د لأكسدة: 1، 0، 1-
• لكهروسلبية: 2.20 ف سلوم د پاولينݣ
• لكتافة: 0.09 كلݣ/م³
• شعاع دري: 0.79 أنݣستروم.

تطبيقات عملية

•  مقالة متعمقة: قتيصاد د لهيدروجين

لهيدروجين كيعتابروه بعض نّاس هوّا مصدر د طّاقة نّقية ديال لمستقبل، حيت نقدو نجيبوه من لْما، ؤ فاش كيتحرق كيولّي ما مرة خرة. كاينين ديجا خلايا د لْفيول كتخدم ب لهيدروجين، كتستعمل دابا ف بعض طّوبيسات ؤ طّوموبيلات.

لهيدروجين كيتستعمل ف لهندسة زّراعية باش ينتج لْأمونياك لّي كيتخدم ف تّخصيب زّراعي، ؤ ف إنتاج لپلاستيك ؤ بعض دّوايات. كيتستعمل أيضا ف تكرير لپيترول باش يتحيد منو لْكبريت، ب لإضافة ل صّناعة لغدائية متلا ف إنتاج سّمن صّناعي.

ف صّناعة د جّاج، كيتستعمل لهيدروجين ك مناخ حامي باش يتصنّعو لواح ملسة ديال جّاج، ؤ ف ليليكترونيك كيتخدم ف تصنيع رّقاقات سّيليكونية.

لكتافة ضعيفة ديال لهيدروجين خلاتو يكون أول ختيار ك غاز باش كيتعمرو لمنطادات، مي فاش نفاجر لْمنطاد لْمعروف هيندنبورݣ ف نيوجيرسي ف لميريكان، توقف هاد ليستخدام.

إزوطوپات

ليزيطوپ هيدروجين-1 كيتسما پروتيوم، ؤ كيكون مكون من پروتون ف نّواة ؤ إلكترون. دّوتيريوم ؤلا هيدروجين-2 نّواة ديالو مكونة من پروتون ؤ نيوترون، ؤ تريسيوم (هيدروجين-3) عندو جوج نيوترونات ؤ پروتون ف نّواة. لإزوطوپات لخرين كاملين صطناعيين تصاوبو غير ف لمختبر ؤ ماشي مستاقرين، بحيت كيتلاشاو ف أجزاء قليلة من تانية من بعد ماكيبانو.

لإيزوطوپات ديال لهيدروجين

سمية د لإيزوطوپ	سّمية 2	لكتلة دّرية (ݣرام/مول)	نّسبة ف طّبيعة (%)	نص د لحياة
هيدروجين-1	پروتيوم	1.008	99.9885	∞
هيدروجين-2	دوتيريوم	2.014	0.0115	∞
هيدروجين-3	تريسيوم	3.016	0~	12.31 عام
هيدروجين-4	-	4.026	0	140 يوكطوتانية
هيدروجين-5	-	5.035	0	910 يوكطوتانية
هيدروجين-6	-	6.044	0	290 يوكطوتانية
هيدروجين-7	-	7.052	0	23 يوكطوتانية

عيون لكلام

تقدر تزيد شوف بزاف د تّصاور و لمعلومات ديال Hydrogen ف ويكيميديا كومنز.