طّوموبيل ؤلا طّونوبيل هو مركوب تيتحرك على ربعة ديال روايض و تايشرويه ناس بزاف باش يسهال عليهم متلا السفر. يقدر يهز لباشار أولا السلعة من بلاصة ل بلاصة خرة ولكن تايحتاج ل شي فيول، بحال ليصانص أولا لمازوط باش يخدم لموطور.[1]

طوموبيل قديمة ف لمغريب

لمخترع لفرانساوي نيكولا جوزيف كونيو كان أول واحد صاوب مركوب د الطريق كيخدم ب فوّار لما ف 1769. ف 1808، ختارع السويسري فرونسوا إيزاك دو ريڤاز أول موطور د لحريق الدخلاني (باش كيخدمو الطوموبيلات ديال ليصانص و لمازوط دابا). الطونوبيلة لعصرية، لي يقدر يصوڭها أي واحد كلا نهار، صاوبها لمخترع لألماني كارل بينز ف 1886.

ف لقرن 20، ولّاو الطونوبيلات منتاشرين بزاف، و كان هينري فورد هوّ لي طوّر الطونوبيلة لي يقدر بنادم لعادي يشريها (ماشي غير لمرفّح). ف لميريكان، الطونوبيلات ضغيا خداو لبلاصة ديال لكرويلات لي كيجرهوم لعودان.[2] ف ؤروپا و بلايص خرين، الطلب على الطونوبيلات ماتزاد بزاف تال مور لحرب لعالمية الجاوجة.[3]

الطونوبيلة كيكون فيها دوزان ديال التحكم ب الصوڭان، الصطاصيوناج، و الراحة د الركاب، زيادة على الضواو. معا مرور الزمان، تزادو ليها مزيّات و وسايل د التحكم، بحال لمراية د اللور، لكليماتيزور، سيستيم د لملاحة، و وسايل د لمتعة بحال الراديو و الليكتور ديال الدياسك.

أغلبية د الطونوبيلات لي كاينين دابا كيخدمو ب موطور د لحريق الدخلاني لي كيمشيو ب حريق مواد مشتقة من لپيطرول، و شي وحدين كيخدمو ب التريسينتي ؤلا ب لهيدروجين. وخا الطونوبيلات د التريسينتي تّختارعو من شحال هادي، ماولاو متاحين ل عموم الناس تال عوام 2000، و كاينين توقعات بلي غادي يوليو رخص من الطونوبيلات د لپيطرول ف جوايه عام 2025.[4][5] التحول ل الطونوبيلات د التريسينتي كيتّعتابر من أهم لخطوات ف لحد من التبدال د لمناخ.[6]

عيون لكلام بدل

  1. ^ "automobile". مأرشيڤي من لأصل ف 6 أكتوبر 2023.
  2. ^ "The Motor Vehicle, 1917". ساينتيفيك أميريكان. مأرشيڤي من لأصل ف 26 أكتوبر 2022.
  3. ^ "Automobile History". www.history.com. مأرشيڤي من لأصل ف 27 نونبر 2018. تطّالع عليه ب تاريخ 2021-08-29.
  4. ^ "EV Price Parity Coming Soon, Claims VW Executive". CleanTechnica (ب نڭليزية). 2019-08-09. مأرشيڤي من لأصل ف 14 شتنبر 2019. تطّالع عليه ب تاريخ 2019-08-10.
  5. ^ "Electric V Petrol". British Gas. مأرشيڤي من لأصل ف 18 أكتوبر 2019. تطّالع عليه ب تاريخ 2019-10-18.
  6. ^ "Factcheck: How electric vehicles help to tackle climate change". Carbon Brief (ب نڭليزية). 2019-05-13. مأرشيڤي من لأصل ف 25 غشت 2021. تطّالع عليه ب تاريخ 2020-07-28.
  تقدر تزيد شوف بزاف د تّصاور و لمعلومات ديال Automobiles ف ويكيميديا كومنز.
 
هادي زريعة ديال مقالة خاصها تّوسع. تقدر تشارك ف لكتبة ديالها.