لمداكرة د ويكيپيديا:لحكام د لمحتوى - عيون لكلام

لبلوڭات شّخصية

سلام أ دّراري @Reda benkhadra, Anass Sedrati, سمير تامر, OussamaOuh, AyourAchtouk, و Mohamed.mdb:. كانقتارح باش نديرو لبلوڭات شخصية بشكل رسمي ف لبلاك ليست ديال لعيون ف ويكيپيديا ب دّاريجة. يعني ممنوع يتستعملو كا عيون ف أي مقال عندنا. يقدر لكتاتبي يستعمل لبلوڭات باش يلقا معلومات ؤ عيون خرين، ولاكين ف لّخر، خاصو يحط دوك لعيون رّسميين (كتوبا، وراق د لبحت، مقالات ف سيتات رسميين ؤ غيرهوم) ف لارتيكل، ماشي لّيان د لبلوڭ. لبلوڭ شّخصي ديال شخص مكتوب عليه أرتيكل ف ويكيپييديا يقدر يتزاد ف "لمزاود" بحال سّيت رّسمي، يلا كان متوكد 100% بلي ديالو. مي كاين ستيتناء واحد: يلا كان لبلوڭ كيعبر علا رّي ديال شخص ؤ هاد رّي لي خاصو يتزاد ف لمقال، ؤ متيقنين 100% بلي لبلوڭ ديالو. متلا: شي مقال مكتوب فيه "لموسيقار محمد بن الشيخ كيعتاقد بلي لموسيقا لمغريبية تطورات بزاف ف سّنوات لّخرة"، كاتعبر علا ري ديال "محمد بن الشيخ" لي نقدرو ناخدوه من لبلوڭ ديالو. سؤال مفتوح: واش نقبلو لبلوڭات لي تابعين ل لمؤسسات رسمية ؤلا ديال لمجلات د صّيونص، بحال لبلوڭ ديال ساينتيفيك أميريكان، لي مبدئيا يقدر أي واحد يكتب فيها (يلا قبلو ليه باش ينشر تماك)؟ -- Ideophagous (نقاش) 12:39، 6 غشت 2021 (+01)

معا هادشي اللي ݣلتي @Ideophagous: وآه لبلوݣات خاص يكونو ممنوعين. غدا نجي نصاوب بلوݣ باللي لمغريب كاين حدا النݣليز ونحطو مصدر فلمقالة دلبلاد، اللي ماعارفش راه غايتيق. يعني لبلوݣات خاص يتمنعو، حتا ديال لمجلّات لمرموقة حيتاش بنفس الشكل غدا غانمشي لساينتيفيك آميريكان ونكتب فيها بلوݣ ديال لمغريب ماكاينش فإفريقيا وغانجي نكتبها هنا كمصدر موتوق. آيه ديك لقضية ديال الري معاها ولاكين يكون اللي كاتب لبلوݣ هو اللي نيت كاتدوي عليه. حݣا كاينة قضية كرف من هادي، عندنا مستخديمين هنايا اللي هوما كتّاب كايخدّمو حسابات تقاشر وكايستعملو لكتوبة ديالهوم مصادر عندنا. آش غانديرو فهادشي؟ --سمير تامر (نقاش) 13:08، 6 غشت 2021 (+01)

و عليكم سلام سي @Ideophagous: شكرا بزاف ملي جبدتي هاد لقضية، ؤ مزيان باش نحسمو فيها. لمهم، غادي نعطي شي حالات د تخدام د لپلوڭات ف مقالات ديجا كاينين باش نشوفو كيفاش نأضاپطيو لبلوڭات ؤ نخرّجو لحكام د هاد لقضية:

• كاس لعرش (2015) ؤ كاس لعرش (2017) : كيخدمو پلوك باش يعطيو نتايج د كورة
• نضرية د تطور ؤ باكتيرية : كيخدمو پلوڭ باش يفسرو كونسيپطات عيلمية ولا يشرحوها ب داريجة
• إدي پايسر : كيخدم پلوڭ شخصي باش يوتق جملة كاينة ف لبيوڭرافي
• النادي المكناسي : كيخدم بلوڭ بحال سيت رسمي
• قبيلة الشرفاء اولاد ابي السباع : كيخدم پلوڭ بحال عين د لمعلومات لي كاينة

دونك لي كيبان هو تخدام د لبلوڭات ف لمزاود مافيهش نيقاش، لي كيبقا هو لحالات لي لبلوڭ غادي يكون ممكن ف لعيون (لي ف لغالب خاص يكونو قلال). --Reda benkhadra (نقاش) 13:25، 6 غشت 2021 (+01)

خاي @سمير تامر:. داكشي نيت، حيت أي واحد يقدر يقاد معلومة علا مقاسو ف بلوڭ ب سوهولة، ؤ يزيدها هنا بحال يلا حقيقية. ب نّسبة ل لبلوڭات ديال لمؤسسات رّسمية ؤ ديال لمجلات د صّيونص، كانضن علا حساب شّروط د نّشر لي دايرين عندهوم، داكشي علاش نيت طرحت سّؤال. حيت نقدرو ب نفس لمنطق نرفضو أغلبية د لكتوبا لمنشورين، حيت ماشي ب ضّارورة يكونو كيتراجعو من نّاحية لعلمية. يلا كانو شادين زّكير ف لپروصي د نّشر، يقدر يكون لمحتوى د لبلوڭ عندو نفس لقيمة ديال كتاب ؤلا مقال رسمي متلان. أنا لقتيراح ديالي هوّا ب نّسبة ل هاد نّوع د لبلوڭات (لي دايرينهوم مؤسسات عندها سمعة مزيانة) نشوفو حالة ب حالة.

ب نّسبة ل لكونطات تّقاشر، هادي حريرة خرة، خاصنا نّاقشوها بوحدها. ماعرفتش واش عندنا شي أرتيكل إداري علا هاد لمفهوم ديال "كونط تقشيرة" بعدا، حيت خاصنا نعرّفوه ب نّسبة ل نّاس لي ماعارفينوش. -- Ideophagous (نقاش) 15:34، 6 غشت 2021 (+01)

خاي @Reda benkhadra:. هادي فيكرة واعرة لي درتي ديال تعطي أمتيلا، باش يكونو لحالات واضحين، ؤ نقدرو نّاقشوهوم بشكل عملي. غادي نعطي تّعليق ديالي علا كولا حالة:

• كاس لعرش (2015) ؤ كاس لعرش (2017) : يلا كانو هاد نّتايج متوفرين ف سيتات خرين ؤلا ف مقالات د جورنال، ماكانشوفش لاش نخدمو بلوڭ هنا. يلا ل شي سبب ماكانوش موجودين، ؤلا لكتاتبي مالقاش عين مزيانة ل دوك لمعلومات، كانضن يا ماتداروش ف لارتيكل أصلا، يا يتزاد طّاڭ ديال موضيل:خاص شي مصدر لهادشي ف لبلاصة لمناسبة.
• نضرية د تطور ؤ باكتيرية : هنا لقضية باينة. ماخاصش ڭاع يتخدم لبلوڭ كا عين د لكلام ف لمواضيع د صّيونص. يلا لكتاتبي خدم لارتيكل د لبلوڭ باش يفهم شي تويشية، ماشي موشكيل، ولاكين يقلب علا شي عين وحداخرة علا ود لموتوقية.
• إدي پايسر : هنا كانضن لبلوڭ خاصو يكون غير ف لمزاود، ؤلا باش يعطي لآراء ديال شّخص. لمعلومات علا حياتو خاصهوم شي عين خرة.
• النادي المكناسي : مابانش ليا ب صراحة فين مخدم بلوڭ هنا.
• قبيلة الشرفاء اولاد ابي السباع : هاد لمقال أصلا خاصو يتّحدف كانضن. مكتوب كاملو ب لعربية، ؤ مولاه خاصو يتبانا يلا عاود نفس لحاجة. كنت عطيتو إندار باش يقاد لارتيكل ب دّاريجة ؤ ماشافوش ؤلا تجاهلو. -- Ideophagous (نقاش) 15:48، 6 غشت 2021 (+01)

وا هي حريرة الصراحة خاي @Ideophagous:، فوقاش ما بغيتو نهضرو فيها مرحبا. خاي @Reda benkhadra: لمقالة د قبيلة الشرفاء اولاد ابي السباع راه خصها تمسح حيتاش كولها مكتوبة بلعربية لفوصحى وشلّا معلومات بلا مصادر. --سمير تامر (نقاش) 15:49، 6 غشت 2021 (+01)

@Ideophagous: بالنسبة ل النادي المكناسي لبلوݣ كاين فلقالب د لمعلومات.--سمير تامر (نقاش) 15:50، 6 غشت 2021 (+01)

سلام دراري، متافق لبلوڭ ماشي موتوق ولايني شي مرات كايولي هوا لمرجع لوحداني فلحالة ديال التخدام ديال شي كلمة بالداريجة حيت أصلا الداريجة ماغاتلقاهاش فحتا كتاب رسمي، وهادشي طرا فلبلوڭ ديال قاموس دالسبيطار "باكتيرية" وكايبان ليا عندو واحد الدرجة من لحق وماغاديش يأتر على التيقة ديال النص حيت ماكايعطي حتا معلومة عيلمية غير كايطرجم ليك كلمة من الدارجة لفرونسي، فهاد لحالة شنوهوا لحل اللي خاصنا نتبعو ؟ شنو هوا كونط تقاشر بعدا؟ OussamaOuh (نقاش) 12:58، 7 غشت 2021 (+01)

لكلمات يلا لقيتيهوم ف بلوڭ ؤ جاوك مناسبين خدّمهوم نيشان.

لعيون كيتزادو ل جوج غراض: باش توتّق لمعلومات ف لارتيكل ؤ تبين بلي عندهوم قيمة ؤ ماشي جابهوم شي حد من راسو، ؤ باش يلا شي حد بغا يزيد يقرا علا لموضوع ف كتاب ؤلا مقال عندو قيمة ؤ موتوقية. زّيادة د بلوڭ كا عين ماكاتخدمش هاد لغراض، ؤ ڭاع تقدر تخلي شي بعضين يعتاقدو بلي لمعلومات موخودين من عيون ماعندهاش قيمة، ضونك ديك لمعلومات براسها ماعندهاش قيمة، حيت أغلبية د نّاس ماعندهومش لوقت باش يقلبو ف كولا ليان.

يلا كان عتيراض علا شي كلمة تخادت من بلوڭ، غادي نّاقشوها بحال أي كلمة جديدة، ؤ تقدر تجبد لبلوڭ ف نّيقاش يلا بغيتي، ولاكين ماشي ف لارتيكل براسو.

كونط تقشيرة: كونط ب زّايد كيديرو شي حد باش يبدل ف ويكيپيديا ؤ يبين بحال يلا كاينين جوج ؤلا جماعة د نّاس متافقين علا شي حاجة، ؤلا باش يفانتي شي قواعد بحال ديال لمطايفة ف لكتابة، ولاكين كيكون غير شخص واحد لي داير داكشي. تّعبير ديال "كونط تقشيرة" جاي من سّكيتشات ديال فنانين د ضّحك لي كيلبسو تقشيرة ؤلا شي حاجة بحالها ف يدهوم، ؤ كيديرو بحال يلا كيهضرو معاها، ؤ هوّا نيت لفنان كيكون كيهضر ب شكل باين ؤلا مخبي (من كرشو). شوف متلا هاد لڤيديو. -- Ideophagous (نقاش) 14:42، 7 غشت 2021 (+01)

خاي @سمير تامر:، صافي بان ليا فين كاين داك لبلوڭ. كانضن ماشي موشكيل ف هاد لحالة يلا كان محطوط غير كا سيت رسمي. ولاكين كا عين د لمعلومات، كاتجيني شوية ماشي هيا هاديك، مي نقدرو نديرو ستيتناء ف بحال هاد لحالات، سيرتو يلا كانو معلومات علا نّادي ماكانينش ف بلاصة خرة. -- Ideophagous (نقاش) 14:59، 7 غشت 2021 (+01)

تعليق أمغاري: سلام أ دّراري @Reda benkhadra, Anass Sedrati, سمير تامر, OussamaOuh, AyourAchtouk, Mohamed.mdb, و Samira Seddik:. زدت نّقطة ديال لبلوڭات ؤ درت ستيتنا ب نّسبة ل لبلوڭات رّسمية. شوفو عافاكوم واش داكشي مكتوب مقاد ؤلا خاصو يتعدّل مرة خرة. --Ideophagous (نقاش) 12:52، 16 أكتوبر 2021 (+01)

صّفحة د لبحت ف ڭوڭل

سلام أ دّراري @Anass Sedrati, Reda benkhadra, و Omarboulma1926:. كانضن بلي صّفحة د لبحت د ڭوڭل (متلاً هادي)، بشكل عام ماخاصهاش تّعتابر عين موتوقة، حيت راه بحال يلا كاتحوّل لمسؤولية ل لقاري باش يقلّب رّاسو ف لموضوع، بلاصت ماتجيب ليه عين موتوقة ؤ منشورة د بصّح (كتاب ؤلا مقال متلاً). لحالة سّتيتنائية هيا يلا كانت صّفحة د لبحت براسها فيها شي معلومة خاصها تّوتّق، بحال شحال د صّفحات كيطلعو يلا قلّب لواحد على شي موضوع، ؤ حتا ف هاد لميتال، هاد لمعلومة تقدر تّبدّل معا لوقت. ناقشو ؤ ڤوطيو عافاكوم.--Ideophagous (نقاش) 09:02، 3 مارس 2022 (+01)

مرديتش ليها لبال، شكرًا على النصيحة. Omarboulma1926 (نقاش) 10:10، 3 مارس 2022 (+01)