باكتيرية

مقالة ؤلا فقرة خاصها تّقاد. هاد لمقالة ؤلا هاد لفقرة مرونة شوية، خاصّها تّقاد ؤ تزيد تّنضّم. مشاكيل: خاص لأسلوب ديالها يعاود يتقاد بشكل موسوعي ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط!

باكتيرية
معلومات عامة
سمية لعيلمية	Bacteria (كارل ووز، 2024)
لخاصية د ترتاب	ضومين (بيولوجيا)
تابع ل	حيويات
لعيشة
عايش فلفترة	3,500 مليون عام قبل لميلاد
معلومات خرين
فعايلو	شلا مراضي و كايتسماو بعفاين باكتيريين (بحال مينانجيطة، طاعون، السل،نوّار ، التيفوس...)

لباكتيرية (كلمة مدّاولة أصلها يوناني βακτηριον (باكتيريون)، بلمغريبية: عكيكيز (حرفية)، بلأمازيغية لمعيارية لمغريبية: ⵜⴰⴱⴰⵢⵕⴰⵔⵜ (تبايرارت)، بلعربية: بكتيريا) هيا واحد لخليقة حية ؤ وحدوخلوية و صغيوّرة (غادية من 1 حتال 10 ميكروميتر). هاد لكاين ميكروسكوپي وماكايتشافش بلعين لمجرّدة.

لباكتيرية عندها ميازي د لقبلوعلايف وكانعنيو بيهوم دوك لخلايق اللي ماعندهومش لعلفة ؤ اللي ناقصينهوم حتا التواشي لخلوية (بحال لميطوكوندريا، و الشبكة الداخلوپلازمية سوا لحرشة ولا لملسة). ضاهر باللي كاينين بعض لباكتيريات كايمرّضو بنادم ؤ كايديرو ليه مشاكل د ف صحتو وشي بعضين تاني لا، غي هو بعض لمرات راه لعفاين لباكتيرية تقدر تقتل - سيرتو للناس مالين مناعة على قد لحال.

لقراية عليهوم كاتسما باكتيريولوجيا، وهادي شقفة من صيونص واسعة سميتها ميكروبيولوجيا.

تاريخ

•  مقالة متعمقة: زكير معا لؤونتيبيوتيك

لباكتيريات معا هوما خلايق صغيوّرين (خلايق ميكروسكوپية) ماكانوش معروفين من واهلي، داكشي علاش سوقهوم ما تحلّو بيبانو حتال بدية دلقرن تمنطاش فاش أنطونيو فان لييوينهاويك لهولاندي (1632-1723) صاوب لميكروسكوپ لعدسي. ولايني فلقرن تسعطاش غاطّرا واحد لبلبالة عضيمة فهاد الضومين و ماليها هوما لويس پاستور و روبيرط كوخّ، اللول كشف علا لخدمة دلباكتيريات فالتخمار و فالتدواز دلمراضي، الجاوج كتاشف لعكيكيزة مولات السّل اللي تسمات باقي على سميتو "عكيكيزة ديال كوخّ" و لباكتيرية مولات بوݣليب.

پورطري ديال روبيرت كوخ، كشاشفي ديال كوخّ باكتير (لباكتيرية مولات السل)

بلبالة خرا ماكاتقلش قيمة علا ماقبل منها غاتنوض فلقرن عشرين وهيا لملاݣية دلۇنتيبيوتيك. دابا، حتال حدود لبدية دلقرن عشرين ماكان حتاشي دوا كايبرّي لمراضي اللي سبابها باكتيرية و ف 1903م پول هيرليش غادي يلقا دوا "طريپان روض" اللي كايتعتابر لۇنتيبيوتيك اللول كونطرموبرزيط(بلعربية: ضد الطفيليات). نفس لعاليم ست سنين منبعد غايضبّر عاوتاني علا واحد ل كونطرنوّاري (دوا ضد النوار) مجهد، هادشي كان غير لفتيلة اللولة واللي غاتزيد تزند ف1928م معا لمجية دليكسانضر فليمينݣ اللي دا شنعتو بلكشيف على لخدمة ديال واحد لفطريةدرويشة ملّݣنس دلپينيسيليوم فالنتجان ديال لپينيسيلين، هاد لكتيشاف غايتعاتبر "الربحة لعضيمة فالتاريخ ضد لمرضة" ويادلّي غايستاهل عليها لجايزة ديال نوبل.

تنبر ديال بلاد مولدوڤا كايكرّم فليمينݣ

بلاسف، لفرحة ماغاطّولش بزاف و لبشرية غادي تفيق علا موصيبة كبيرة اللي غاتهدد لكينونة ديالها واللي هيا لمقاومة لباكتيريّة. وبهاكا طبقات بلحرف لمتلة لمغريبية ديال "بوصولو بحصولو". دابا، معا لمساݣرة أولا لفعالية ديال هاد الدويان خلات لغاشي يخدمهوم كتر ملّقياس و بمانيرة معاودة و بسباب هادشي فعام 1942م غاتبان لمقاومة اللولة ضد لپينيسيلين نيت و مولاتها واحد لباكتيرية سميتها "ستافيلوكوكّوسة مدهّبة" يعني داك لپينيسيلين مابقا كايسوݣر والو ضد هاد لباكتيريات. ومن موراها غايبانو سناسل طوال من هاد لمقاومات.

لمقادّة و تشريح

طّاي و لقلدة

فاش كانسمعو بميكروب عقلنا كايمشي نيشان لشي خلايق حيين بعايدهوم صغيرة بزاف ماكانشوفوهومش بعينينا و بلعقلاني ماغايتشافوش بشي حاجة خرا من غير بلميكروسكوپ لاحقاش طايتهوم ماكتفوتش 750 ميكروميط فالطولة. كانقشعو شلا فورمات عند هاد لخلايق، كاينين ݣنوسا دلباكتيريات مكوّرين كايتسماو بلكوكّوسة (طرجامة من Kôkkos بليونانية و كاتعني زرّيعة) شي ݣنوسا خرين مجبّدين عليهوم و عندهوم فورمة ديال عكيكّيزة (حيتاش طولتهوم فايتة عرضهوم، وهي طرجامة من اللاتينية هاد لخطرة: Bacilus ومعنيتها: عصا، زرواطة) بيدما شي بعضين عندهوم سيفة ديال بيضة ماهوما مكورين ؤ ماهوما مجبدين داكشي علاش سميتهوم "عكيكزوكوكوسة" ، فوق من هادشي (واخا بواحد لقد قليل) كاينين ݣنوسا خرين فورمتهوم دايرة كي الضّمة (كايكونو محنيين ؤ مبوقلين فلخر ديالهوم) بحال لباكتيرية مولات بوݣليب ويقدرو يتسماو "بوضمة"، شي وحدين خرين قامتهوم ملوية كايتسماو بالداريجة "بولوّاية" ؤ مزوارتهوم أولا لموهيمة فيهوم هيا مولانوار باكتير. هاد التنويعة فلفورمات سبابها هوا لمقادة ديال السيتوسكوليطة و لحيط لخلوي اللي عندها دور كبير فلعيشة دلباكتيرية.

شوف تنويعة دلفورمات لباكتيريّة

لمة د لباكتيرية

ف لغالب لباكتيريات كايتجمعو معا بعضياتهوم فواحد لمة كاتسما ب لف (بالنݣليزية: colony وكاتعني مستعمارة)، وسميتها هكاك لاحقاش لباكتيريات كايدكسو فواحد لمجموعة و اللي فيها كايتشاركو معا بعضياتهوم فواحد طريقة دلمعيشة و زيد عليها تقدر تعاونهوم حتا ف لحماية و ف لمقاومة. جات السمية د اللف فالداريجة من ديك لمحالفة دلقبايل فلحرب ضد نفس لعدو ولا لنفس لموراد.

التدكاس دلباكتيريات ولا اللف لباكتيري عندو فورمات على حساب الطاسيلة دلباكتيرية، بالنسبة للكواكس الرايجة يقدرو يتجمعو فهاد الشكال:

• 
  تصويرة دلف تاع سنيسلوكوكّوسة كايبين باكتيريات ملمومين على سيفة ديال سنيسلة.
• 
  تصويرة (تكبار ×20000) دلف تاع ستافيلوكوكوسة كايبين كوكّوسات مدكسين (كايشبه ل عرش دلعنب).
• 
  تصويرة دلف تاع پنوموكوكوسة ملمومين على سيفة ديال ضوبلوكوكّوسة (جويجة)
• 
  تصويرة دلف دلݣونوكوكوسة ملمومين على سيفة ديال زريعة دلقهوة.

سيتولوجيا

قلدة عامة دلخلية

كيما ياد تدكر فلفايت، لباكتيريات كايدخلو فلماركة د لقبلوعلوف هادشي كايعني باللي عندهوم لخصايص التاليين:

• عندهوم واحد لخلية صافي و تجريداتها صغيورة على التجريدة دلخلية اللي بلعلفة.
• كروموزومهوم مامفرقش على السيتوپلازم بشي غشا (لعلفة مكايناش) و لهيستونات ماعمرهوم كايكونو.
• ماكاتكونش حتا ميطوزة ولا ميوزة ولايني لمناسلة ديالهوم كاتكون بلمفارقة.
• التواشي دلخلية بحال لميطوكوندرية و لجيهاز ديال ݣولجي ماكاينينش.
• الريبوزوم صغيكرون.
• تقدر تكون عندهوم قزيزيبة و لا كاپسولة.
• فاش كايكون عندهوم لحيط كايصدق مصاوب ملّ پيپتيدوݣليكان ولايني عمرو مامصاوب من السيليلوز.

حوايج ضارورية عند ݣاع لباكتيريات

• لحيط لخلوي: غلاف صحيح كايضور بلباكتيريا و كاين عند ݣاع لباكتيريات من غير لميكوپلازم، كايدير علاين 20% من التقل ديالها و فيه واحد لپوليمير موهيم سميتو ل پيپتيدوݣليكان. لقيمة دلحيط لخلوي كبيرة يلا ماتّعتابر هوا كولشي. كايحدد لفورمة دلباكتيريا و كايعاون فالسباغة وحتا فالتقلاع ديال الطاسيلة دلباكتيريا (واش ݣرام يجابي ولا ݣرام سلبي) و زيد فلحماية و فزكير لباكتيري ضد لؤونتيبيوتيك. بلا حيط خلوي لباكتيرية غادي تموت بالسيف عليها، فهاد لقيبال نيت لحيط لخلوي هوا النيش ديال واحد لݣنس دلونتيبيوتيك سميتو لبيطالاكطامين و اللي كايحبس لمصاوبة لمتوّلة دلحيط لخلوي. هادشي هو اللي كايسبب التفرشيخ دلباكتيريا و موتها.
• لغشا السيتوپلازمي: فيه جوج طبقات فوصفودهنية معا پروتينات و مديور بلا كوليسطيرول.
• سيتوپلازم
• ريبوزوم، كتار من 15.000 فباكتيرية وحدة، مصاوب من جوج ديال تحت-عبرات: 30 س و 50 س
• كروموزوم كاين فواحد لبلاصة سميتها لعلفويد، فلغالب على سيفة ديال خويّط دايري و عندو جوج كوابل فوق-مدوّرين. ملاصقين معاه شي ؤنزيمات ضاروريين باش يدير خدمتو.

حوايج ماكايكونوش ديما

• كاپسولة.
• زغيبة (زغيبات شايعين و زغيبات نسليين).
• قزيزيبة.
• پلاسميد.
• لبواغ.

السباغة

• باش تشاف لباكتيرية فلميكروسكوپ الشوفي خاص ضاروري تسبغ، و السباغة دلباكتيرية وحدا من جوج پاراميطرات (مورا لفورمة) اللي كايتعول عليهوم باش تتقلّع الطاسيلة دلباكتيرية وهادشي كايعاون بزاف فلمعرفة دلباكتيرية، سباب لمرضة و لؤونتيبيوتيك اللي كايفاري معاها.
• منحݣل ݣاع لباكتيريات يقدرو يتسبغو لاحقاش عندهوم حيط سيتوپلازمي (من غير لميكوپلازم اللي ماعندوش هاد لحيط وبهاكا مايقدرش يتصبغ).
• السباغة لمسݣمة لهاد لقيبال واللي كاتخدم كتر هيا السباغة ديال "ݣرام" اللي مومكين تعطي جوج داللوان على حساب آشمن ݣرام عندها: سوا لغوزي يلا كانت لباكتيرية ݣرام سلبية ولا لمدادي يلا كانت ݣرام يجابية، ؤ فحوايل خاصة كايتخدمو سباغي خرين بحال سباغة ديال "تزيل نييلسن" باش نسبغو لميكوباكتيريات BAAR (بحال ميكوباكتيريوم بو سّل) ؤلا ديال "فاكو" للسباغة د مولانوار باكتير.

الشوروط لفيزيوشيمية دلكبورية

لمعرفة ديال الشوروط دلكبورية دلباكتيريا كاتنفع بزاف فزريعها، يعني واش هاد لباكتيرية غاتزرع فبلاصة عادية ولا فشي بلاصة فشكل:

لفعلة د سخونية

كاينين شلا نواع و نقدرو نكلاصيوهوم على حساب السخونية لمخيّرة دلكبورية:

• باكتيريات وسطوباغية (بحال شّيرشيا كولي): واحد لخليقة اللي السخونية لمخيّرة ديالها مابين 20°س حتال 45°س، و بمانيرة خرا تقدر تكتار مزيان فلداخل دلكسدة 37°س.
• باكتيريات صهدوباغية (بحال طيرموس أكواتيكوس): السخونية لمزيانة مابين 45 حتال 70 سيليسيوس.
• باكتيريات صميقلوباغية (بحال: لّيستيريا واحدولّادة): كاتزرع فجوايه 4°س د سخونية.

لفعلة دلقدرة لهيدروجينية

لقيمة لمزيانة دلقدرة لهيدروجينية دلبلاصة كاتكون مابين 0.5 و 10.5 (pH)، و معروف باللي لباكتيريات لمرّاضة ولا اللي مرتابطة بلبنادم كاتكون فلغالب سوا محايدة ولا قاعيدية شوية. ل"پسودوموناس" و "بوضمّة مول بوݣليب" كايبغيو لبلايص لقاعيدية.

كاينة واحد لحالة بوحدها ديال واحد لباكتيرية مرّاضة للمعدة و كادير واحد لمرضة سميتها لحريق دلمعدة و هاد لباكتيرية كاتصبر لتاحيماضيت دلمعدة ؤكاتسما بلهيليكوباكتير پيلوري.

لفعلة دلملحة

حݣا، كاينين شي باكتيريات ملحوباغية كايحتاجو لملحة (NaCl) ضاروري باش يكبرو، و كاينين وحدين خرين كايتسماو بل ملحوهانية كايقبلو واحد التاكونصونطريت معتادلة دلملحة و يقدرو يكبرو بلا بيها كيف الستافيلوكوكوسة لمدهّبة.

لبلاصة د زريع

لبلاصة د زريع مديورة من خيلوطة دلماواد لماكلية (حمايض أمينية، پيپتيدات،سكار...)

تقدر تزيد شوف بزاف د تّصاور و لمعلومات ديال Bacteria ف ويكيميديا كومنز.