لمداكرة د ويكيپيديا:كيفاش نزيدو كلمات جداد

عافاكوم قراو لمقال ؤ عطيو رّي ؤ لنتيقادات ديالكوم. @Anass Sedrati, Reda benkhadra, سمير تامر, OussamaOuh, Abdeaitali, Ayour2002, و Elmerrakchi:

--Ideophagous (نقاش) 11:53، 16 يوليوز 2021 (+02)

معا كيفما كان هادي ويكي ديال الداريجة، يعني أي حاجة فهاد اللوغة من ݣاع اللهجات ديالها خاص يتخدّم. شكرا ليك خاي @Ideophagous:. --سمير تامر (نقاش) 13:37، 16 يوليوز 2021 (+01)

@Ideophagous:.-- معا ولايني كاينين شلا قواعْد خاص يتحتارمو.--OussamaOuh (نقاش)

متافق --Reda benkhadra (نقاش) 00:10، 17 يوليوز 2021 (+01)

متافق غير قبل ماتزاد لكلمة خاص نتأكدو بلي ماكايناش ف الدارجة. نقدرو نديرو شي صفحة ديال التنسيق غير لهاد لقاضية --Abdeaitali (نقاش) 09:37، 20 يوليوز 2021 (+01)

لقضية ماشي ساهلة، حيت غادي يخصنا شي مرجع نخدمو بيه. داكشي علاش ب تّوازي معا ويكيپيديا، خاصنا نطورو لويقاموس د دّاريجة، ؤ نجمعو لكلمات من عيون ؤ مصادر مختالفين. -- Ideophagous (نقاش) 15:27، 20 يوليوز 2021 (+01)

متافق -- ولكن كيبانلي مهم نجيبو ناس من بلايص خرا د لمغريب (الشمال، الشرق) باش يعاونونا نعرفو واش عندهوم شي كلمات حنا ما عارفينش، حيت ما زال عندنا نقص ف التنوع. -- Anass Sedrati (نقاش) 09:27، 21 يوليوز 2021 (+01)

متافق --Elmerrakchi

على تادراجت :

@Anass Sedrati, Reda benkhadra, سمير تامر, Ideophagous, Abdeaitali, Ayour2002, و Elmerrakchi: كايبان ليا باللي خاصنا نردو منو لبال كتر هوا تادرّاجت. حيت شي مرات لعقل كايعڭز ومايقدرش لكتاتبي يعصر دماغو(ياد عندو موضوع مزوار خاصو يفكر فيه) وكايصدق واخد لكليمة كيما هيا بلا مايديها فلمصاوتة(فونيتيك)، يادلّي كولّا لوغة عندها الصوات ديالها ؤ لوسلوب(السلوب؟) دلكتابة ديالها غير تاني هاد لوسلوب(السلّوب؟) ، فيه ؤ فيه كاين لمليح ؤ كاين لعيّان( لفلان كاياخد شي كليمة بلاما يوزنها بلسان لوغتو).

فالدارجة على حساب ما لاحطّ(ض+ت=ط)/عاينت من كترت ما ولفت نكتب بيها باللي باش تكون لكلمة داريجية سليمة ماخاصهاش يكونو فيها بزاف د syllabes كيما عند لعربية لفصحى . نعطي متايل :

- إي شكا لي ية=> مش كالة.

-حا يا وا نات => بها يم.

-مون ضا مة=> مناض مة.

-إين تي قا دات=>نتي قا دات=> مناق دات

-قا عي دة=> قاع دة=>قع دة.

-إيج تي ما عية=> مج ما عية.

-مس ألة=>مسالة

-مو عا يا نة=> مْعايْ نة

ماعنديش مْعرفة عْميقة بهاد الضومين ولايني هادو قيسو عليهوم ؤ شوفو نتوما اللي مسلكّوم فاش غاتدرجو لكليمات دلعربية ؤ حتا لفرانساوية، ملّحسن حاولو تفاداو ماقديتو كترت syllabes فلكلام(ياد فالداريجة كانسكنو كولشي وهاد لميزة مامقبولاش فلعربية). شنوهوا ريّكوم فهادشي ؟ OussamaOuh (نقاش) 21:13، 16 يوليوز 2021 (+01)

هادشي لّي ڭلتي متافق معاك فيه يلا لقضية كاتعلق ب مصطلح جديد بشكل كامل (ؤ هادشي علاياش كيهضر لمقال). أما لكلمات لّي متداولة ديجا، غادي غير نضيعو وقتنا يلا حاولنا نبدلو نّوطق ديالها، ؤ نخسرو بزاف د لموتابعين لّي يقدرو يكونو مساندين لفيكرة د ويكيپيديا ب دّاريجة، حيت غادي يبان ليهوم عندنا تحيز إيديولوجي ؤلا باغيين نديرو لوغة جديدة ماكايناش (ؤ كانأكد بلي كانهضر علا ناس مساندين لپروجي، لّي مامساندينش ڭاعما مسوق ل رّي ديالهوم). لأصل ف لكتبة ب دّاريجة هوّا تسهيل لفهامة علا لمغاربة باش توصلهوم لمعلومة ؤ لمافاهيم لّي يقدرو يجيوهوم صعاب ب لوغات خرين. علاش غادي نختارعو "سلّوب" ؤ لمغاربة كيفهمو "ؤسلوب"؟ لاش نصعبو لفهامة ؤ حنا نقدرو نسهلوها؟ علاش نحطو مجهود باش نبدلو كلمات ديجا معروفة، ؤ حنا قدامنا مياوات ؤ آلاف ديال ضّومينات لي ناقصينهوم مصطلحات؟ يلا ڭلتي نخدّمو كلمات مدرّجة بلاصت وحدين مامدرجينش مزيان، متلا "تخدام" بلاصت "ستيعمال"، متافق معاك، ولايني ماتانشوفش لفايدة ديال تبدال نّوطق د كلمات باينين ؤ مفهومين. ب هاد طّاريقة غادي نخلقو عديان ؤ نخسرو صحاب لي يقدرو يعاونونا، ؤ هادشي ؤ دّاريجة باقة ماواڭفاش علا رجليها كا لوغة د لكتابة. لموهيم، هادا ري ديالي، ؤ نشوفو شنو يڭولو لوخرين. --Ideophagous (نقاش) 00:50، 17 يوليوز 2021 (+02)

ؤ باش نزيد نوضّح، راه "ؤسلوب"، "جتيماعية"، "مسألة"، "قاعيدة"، "نتيقاد"، ؤ غيرهوم هوما كلمات ديجا داخلين ف لّوغة ليومية د لمغاربة فاش كيهضرو دّرايجة، ماشي كلمات جداد بحال لّي كيهضر عليهوم لارتيكل، وخا ب طبيعة لحال دخلو غير ف لعقود لّخرة ب سباب سّياسة د تّعريب. نقدرو مانتافقوش معا هاد سّياسة ؤ نّتايج ديالها، ولايني مايمكنش نمشيو ضد ف لمجتمع ؤ نبداو نبدلو ف كلمات متداولة بحيت ماتبقاش مفهومة (متلا "قعدة" عندها معنى أخور ديجا كاين، "مناقدة" ؤ "مناضمة" حتا حد ماغادي يفهمهوم يلا ماشرحتيهومش)، مي نقدرو بلاصت من هادشي ندفعو ب دّاريجة ف تّيجاه لّي يخليها لوغة كاتستوعب مافاهيم ف صّيونص ؤ لفلسفة ؤ مجالات خرين.--Ideophagous (نقاش) 01:03، 17 يوليوز 2021 (+02)

@Ideophagous:راه ياد شرحتي ليا وانا متافق معاك ماخاصناش نخرجو على لموجة واخا ماشي فكلشي غانشرح ليك لمسالة كيدايرة: فلقديم هادشي اللي كان الدارجة فاش كاتجاب منها كلمة بلوغة خرا كيما كانت كانو كايدرجوها بمعنى لكلمة باش تجي معا لسانهوم ( متال : سليمة ماغاديش تبدل من غير الزيادة د السكون حيت ياد جاية معا اللسان لمغريبي ، ولايني أفعال غاتولي فعايل، العوم غاتولي عومان، الأساس غاتولي السّاس،أعداء غاتولي عديان-لاش هوما غايحاولو يديرو هاكا يخليوها نيت أساس ولا أفعال- ،بلفلّاني(شخصيا) فاش غانكتب حاياوانات ؤ جتيماعية غادي ندّيرونجا : مانتا كاتب بلعربية لفصيحة ؤ مانتا كاتب باللسان لمغريبي وهنا هوا السّاس دلمسالة ؤ هنا فاش غايشدوك دوك لعديان ،...) دابا بسباب لقراية هادشي مابقاش فاش كاتجاب شي كلمة من شي لوغة خرا كاتبقا هياهيا ماكايدار حتا مجهود ؤبلا مايراعيو للسان لمغريبي ؤ فلخايبة كاتشوف التخلاط ديال جملات دلوغات خرين بالداريجة(متال : بنادم كايهضر النصاصة ديال كلامو بلفرانساوية ؤ النصاصة بالدارجة..) وهاكا هيا غادية و كاتخسر داك لمعنى ديالها... هاد لمحاولة ديال تخراج كلمات كايجيو معا لسانّا ماشي ضد فلموجة ؤلا غير رشقات ليا ولايني مدافعة على هاد لوغة اللي تقدر تموت قبل ڭاع ماتحيا ماعرفتش واش فهمتي تخميمتي ولا لا. -- OussamaOuh (نقاش)

سلام خاي @OussamaOuh:. لحاجة لّولة، باش مايوقعش سوء تفاهم، أنا ماشي ضدك ؤلا ضد داكشي لي كادير. ب لعكس، ضاروري خاصنا نستافدو من دّاريجة لقديمة ؤ لأساليب ديالها، ؤ ضاروري نبدعو ف لكتبة ؤ تّعابير ؤ لكلمات. لي مامتافقينش عليه هوّا لكونطيكست ديال هاد لإبداع ؤ دّرجة ديالو. ويكيپيديا ماشي بلاصة مناسبة ل بحال هاد لمجهودات ديال تطوير لّوغة ب هاد شّكل. ماعرفتش واش كنتي ديجا خدمتي ف ويكيپيديات خرين، ولاكين ب شكل عام لوسلوب ديال ويكيپيديا كيكون ناشف ؤ قريب ل لوسلوب لأكاديمي لواقيعي، حيت خاصو يركز علا توصيل لمعلومة، ماشي علا لجمالية د لّوغة، لي كاتعتابر مسألة تانوية. من ناحية خرة، كانضن بلي خاصنا نرضاو ب لواقع ؤ نبنيو عليه، ماشي نحاربوه. كون كانت دّاريجة ترسمات قبل لستيعمار، كون تطورات بشكل أخور، يمكن كيفما وصفتي، ؤ ديك سّاعة تّاريخ كان غادي ياخد مسار أخور. ولاكين لواقع هوّا هادشي ماطراش ؤ تعرضنا ل لستيعمار ؤ دخلو كلمات د لفرانساوية ل دّاريجة، ؤ موراها تّيار سّياسي لّي كان غادي معا لقومية لعربية هوّا لي غلب ؤ فرض لختيارات ديالو. دّاريجة كاتحمل تأتير ديال هاد لأحدات تّاريخية كاملين، ؤ علا لمستوى لعام هادي ماشي حاجة خايبة، بل كاتعطيها دينامية كبيرة ؤ قدرة علا متيصاص لأفكار ؤ تّعابير ؤ لكلمات باش تساير تّطور د لمجتمع، حيت كيوليو بزاف د طّرقان ديال لشتيقاق ؤ لمصاوبة د كلمات (من لعربية ؤ لأمازيغية ؤ لفرانساوية) لّي كيعطيو حلول ؤ إمكانيات جداد. يلا بغينا عاوتان كولشي نجبدوه من دّاريجة، غادي نكونو مشينا معا تيار متطرف لي باغي دّاريجة ؤ تّقافة لمغريبية تّقوقع ؤ تسد علا راسها، ؤ هادشي ماشي ف صالحها. ؤ ماكاينش فرق مابين نديرو هاكا، ؤ مابين نمشيو معا تّعريبيين لّي، يلا قبلو علا دّاريجة، باغيين يكبو لموعجام ديال لعربية كاملو ف دّاريجة، ؤلا لّي باغيين دّاريجة تّفرنس. ضونك، كيبان ليا بلي خاصنا نتريطيو كولا حالة بوحدها، ؤ نخليو لحلول ديما مفتوحين، سوا لشتيقاق من دّاريجة ؤلا ناخدو كلمة من لوغة خرة، علا حساب شنو لي مناسب (هادشي ب فتيراض بلي ماكايناش كلمة قديمة ؤلا حالية ف دّاريجة لّي كاتفيد داك لمعنى).

نجيو ل لمسألة د لنتيقادات. كاينين جوج د نواع د نّاس لي كينتاقدو: كاينين لي ضد لمبدأ د لكتابة د دّاريجة من سّاس، ؤ خاصهوم يشدو ف أي حاجة. هادو كيفما كتبت قبل خاصنا نتجاهلوهوم، حيت ماباغينش نّجاح د لپروجي ديال ويكيپيديا، ؤ كايقلبو علا أي سبة. ب لموقابيل كاينين ناس لي معا لكتابة ؤ تّطوير د دّاريجة ؤلا علّاقل مامعارضينهاش، ولاكين عندهوم نتيقادات ف شي تويشيات، ؤ هادو خاصنا نسمعولهوم، حيت راه علا ودهوم، ؤ علا ود لأجيال جّاية د لمغاربا لاش كانديرو هاد لخدمة تّطوعية. لقضية ديال زّيادة د لكلمات راه فيها إشكالية أصلا، ؤ كيجيو نتيقدات شي مرات ل شي ختيارات حتا فاش ماكيكونش بديل من غير ختيراع كلمة جديدة، بحال "كريپطوعوملة" لي كنت هضرت عليها قبل. فا نتا يلا جيتي تبدل كلمات ديجا كاينين ؤ متداولين كيفما كان لأصل ديالهوم، فا ماتسنا غير لنتيقاد، ؤ يلا خدّمتي بحال هاد لكلمات بزاف، بنادم غالبا ماغاديش يبغي يقرا لمقال أصلا. غادي يڭول هاد نّاس غير كيخربقو ؤ كيعوجو ف لهضرة ؤ يزيد فحالو. زيد علا هادشي لمشروع باقي ف لبدية ديالو. لكتوبا ديال سّيرية د ڭيم ؤف ثرونز فيهوم علاين 3 د لمرات عاداد د لكلمات لي كتبنا ل حد سّاعة ف ويكيپيديا ب دّاريجة (كتر من 660,000 كلمة موقابيل شي 1,700,000 كلمة). راه باقي مادرنا والو حتال دابا، ؤ ماعندنا لا سلطة باش نفرضو لكلمات ؤ لقواعيد د لّوغة والا كاريسما لّي تخلي لپروجي عندو حتيرام كبير مابين لمغاربا. هادشي يقدر يجي من بعد، ولايني ماغادي يجي غير يلا حطينا سّاس ديال دّاريجة كا لوغة مكتوبة ؤ ولاو لمغاربا مولفين بيها. ف هاد لمرحلة لنتيقالية، ضاروري ماتساير لمجتمع ف طّاريقة باش كيهضر، ماشي تحاول تغيرها.

تّخلاط ديال لهضرة معا لعربية ؤ لفرانساوية بلا معنى، تانا متافق معاك بلي مامزيانش. خاص أي كلمة دخلات ل دّاريجة تدرّج علا قدر ليمكان. مي لكلمات لمتداولين راهوم متداولين، مايمكنش تبدّل هاد لواقع ؤلا تهرب منو. حتا لكلمات لي فيهوم پا ؤلا ڤا راهوم داخلين قل من 100 عام هادي، واش نحيدوهوم ؤلا نردو لڤا فا ؤ لپا با؟ لمجهود لي غانديروه باش نحيدو عشرات ؤلا مياوات د لكلمات لمتداولين ؤ نخلقو صراع علا والو، نقدرو نديروه باش نطورو دّاريجة ف لمجالات د لفلسفة ؤ صّيونص ؤ لإدارة ؤ لقتيصاد. حنا غير نحاولو نعاونو ف تأسيس ل دّاريجة كا لوغة مكتوبة، و خلي لأجيال جّاية تّكلف ب تّطوير ديال لّوغة ل مستويات خرين.

لموهيم، أنا غير كتاتبي هنا بحالك، ؤ هادشي كيبقا ري ديالي شخصي. نتمنا دراري خرين يدخلو معانا ف نّيقاش باش نوصلو ل شي نتيجة. -- Ideophagous (نقاش) 15:24، 20 يوليوز 2021 (+01)

خاي منير@Ideophagous:، واضح باللي الداريجة ماكاينينش مصادر علمية كاتكتب بيها وحتا الدولة مادايراش مجهود باش طورها بلمعقول ، متلا لأخبار براصهوم مديورين بلعربية لفصحى ماشي بالداريجة واقيلا عاد دابا يالاه بدا كايبان شوية دلباكور.

لحاجة التانية هيا لغة ماواقفاش على داتها ؤ ولات كاتعتامد بشكل كبير بزاف على لعربية لفصحى ، الدارجة ديال شحال هادي واخا كاتعتامد بلبيان على لعربية(ماعنديش مشكل فهاد النقطة) ولايني كانت دارجة نقية محتارمة اللسان ديال لمغاربة و فاش كاتسمعها كاتحس باللي بصاح كاتسمع للداريجة...

لمصاوبة دلكلمات متافق باللي ماخاصش تكون معيقة ولا فايتة لقياس ولا برا دلقيبال.

نعطيو تقديرة ديال 75% دلمغاربة اللي كايعرفو "يقراو" راه عندهوم مستوى مزيان فلعربية لفصحى و فوق من هادشي صغرنا دوزناه معا لعربية لفصحى كتر من الداريجة (سيرتو جيل التسعينات و لبدية دلألفين معا سبايستون ) يعني أصلا راه ويكيبيديا بلعربية حاجة كافية ليهوم و فوق من هادشي مفصلة كتر حيت قديمة هنا و فيها بزاف دلكتاتبيا بلمقارنة معا ويكيپيديا بالداريجة اللي كاتبقا حاليا بغينا ولا كرهنا خضرة فوق الطعام فا منين نتا كاتكتب النص بالدارجة

وجايب 90% من لمصطلحات بلعربية لفصحى بلا ماتراعي للسان و بلا ماتشوف باللي كاين لبديل بالدارجة حسن منو وزيد عليها كاتكتب بأسلوب أكاديمي راه مكاتقدم حتا إضافة للناس ، الناس فاش كاتجي للدارجة ماشي باش تستافد فالدرجة اللولة ولايني باغا تقرا شي حاجة اللي تقيسها و قريبة ليها و تحسسها بالصاح باللي عندهوم لوغة متميزة يقدرو يبدعو فيها وهاكا باش غاتجيب لغاشي باش يهتم بهاد لمحتوى ، متافق معاك ويكيپيديا كموسوعة خاص تكتب بأسلوب أكاديمي ولايني هاد لأسلوب كايصدق غير معا لوغات واقفين على داتهوم ماشي لوغة يالاه كاتقلب تفرض راصها فهاد ليبّان بحال الداريجة. OussamaOuh (نقاش)

@Elmerrakchi:

أنا ما متافقش معاكم بجوج ... مثلا : واحد تيقول "سلّوب" ولاخر " أسلوب" ... سلّوب مافهمتش كيفاش نفهمها ويمكن تخلط ليا مع معنى "سلبتيني" ولّ "سلبوك" ... وأسلوب كلمة فصحى ما عندهاش معنى فالدارجة يعني خارج المعنى لي فالقراية ول لي فالمدرسة ماتنعرفش ليها شي معنى آخر من غير دال الفصحى... أنا بعدا ملي تنقلب على الكلمة خص نجيبها من شي معنى موجود فالدارجة فشي ضومين ولّ جنان من الجنانات وتندخلها لضومين آخر باش نزيد ليها تفسير آخر... مثلا غادي نقول لأسلوب "الطريق" ولّ "الستيل" ولّ "التجريدة" .... Elmerrakchi