لحسين السلاوي
لحسين بن بوشعيب ( تولد و مات ف سلا، 4 أبريل 1921 - 16 أبريل 1951)، لمعروف بسميت لحسين السلاوي كان مغني و ملحن مغريبي، من لمغنيين اللوالا اللي تسجلو و أتروا ف لموسيقى الشعبية د لبلاد. السلاوي كان من بين لمغنيين اللوالا اللي دخّلو آلات جديدة للموسيقى د لمغريب، بحال لعود و لكامانجا، اللي جابهم حيت كان مبلي بلأغاني لمصرية ديال محمد عبد الوهاب. السلاوي كان هو أول مغني مغريبي سجل مع ستوديو دولي، و أول واحد دخل لمونولوݣ و لموّال ف لغنا.[1]
لحسين السلاوي
| ||
| ||
| معلومات عامة | ||
| زيادة | 4 أبريل 1921 سلا | |
| لموت | 16 أبريل 1951 (30 عام) سلا | |
| طريقة دلموت | موتة طبيعية | |
| سباب لموت | سل | |
| لجنسية | لمغريب | |
| لحرفة | مغني، ملحّين، عازف آلة وترية و كتاتبي د لأغاني | |
| لّوغات لي كيعرف | عربية | |
| معلومات خرى | ||
| ستيل | شعبي مغريبي | |
| لألة | صوت | |
 
| ||
مات لحسين السلاوي ف عام 1951، و كانت عندو يا الله 30 عام. السباب ديال لموت ديالو ما معروفش، كاين اللي تيقول باللي مات بلمرض ديال السل، و كاين اللي تيقول باللي مات بالسم.[2]
حياتو بدل
تولد لحسين السلاوي ف 1921 ف سلا، و ماتليه بّاه ف 1923، ملّي كانت عندو غي عاماين. دوّز صغر صعيب و كانت عائلتو ما عندهاش. خوه لكبير عبد الله مات ملّي كانت عندو 14 لعام ملّي شارك ف مظاهرة د لوطنيين لمغاربة ف وقت لإستعمار لفرانساوي. بقا لحسين مع مّو (عيشة الرباطية) وخواتاتو التلاتة زهرة وفاطمة و أمنية. كان لغنا عزيز على لحسين من صغرو، و جرا عليه لفقيه من لمسيد حيت كان تيغني لقرآن بلاصة ما يجودو. دخّلاتو مّو لعند معلّم ديال لخياطة، ولكن تا هو جرا عليه ملّي حصّلو تيسرق لبرشمان وتيدير بيه خيوطا للوتار اللي كان تيغنّي بيه.
بدا لحسين السلاوي لغنا د الصح مع لحلايقية د سلا، و كان ديما تيتفرج ف لحلاقي د بوجمعة لفروج ف باب لخميس، و لحلاقي د مولاي بّيه ف الرباط. ملّي دار 17 لعام، دار لفرقة ديالو و بدا تا هو تيدير لحلاقي ديالو. ف اللول ما كانش هادشي عاجب مّو، اللي كانت باغياه يولّي فقي، ولكن ملّي صيفطليها لفلوس اللي ولاّ تيدخل رضات عليه وشجعاتو يكمّل ف لغنا.
ملّي بدا تيتعرف، رحل لحسين للدار لبيضا و دار حلقة ف ساحة لبلدية. تمّا تلاقا مع مراتو، اللي كانت بنت واحد لحلايقية تاتڭلس حداه.[3] من بعد الدرا لبيضا بدا تيمشي من مدينة لمدينة، منهم مراكش و مكناس و لعرايش، تا وصل لطنجة وتلاقا فيها حمد بودروة، لممتل د الشركة د "پاطي ماركوني"، اللي كاتسجل لأغاني و لڤيديوهات. بودروة عجبو لغنا د لحسين، ومشا عندو لسلا، فين سجّلو أول أغنية ديالو، اللي هي "ها هو تاني" ف 1941. مورا هاد التسجيل ولاّ لحسين السلاوي هو أول مغني مغريبي تيسجّل مع لأسطوانات د "پاطي" لعالمية.[4]
ف 1942 مشا لفرانسا، و تما بدا تيسجّل لأغاني ديالو وتعرف كتر.[5] من 1948 ل 1951 تعرّف على مرا فرانساوية، و مادخلش ڭاع لبلادو باش يبقا معاها واخا كان مجوج.[6] ملّي تزاد عليه لحال بزاف، رجع للمغريب و مات ف مدينتو. آخر أغنية غناها كانت هي "يا غريب ليك الله". تدفن ف لمقبرة د سيدي بلعباس ف سلا. لقبر ديالو ما معروفش.
لحسين السلاوي خلاّ ولد واحد سميتو محمد السلاوي، مات ف 2013 ف باريز.
لأغاني ديالو بدل
لحسين السلاوي عندو 45 لأغنية اللي كلها معروفا بزاف عند لمغاربة، و بزاف د الناس حافضينهم. من هاد لأغاني كاين:
- يا موجة غني
- لماريكان
- سمرا و خمورية
- حضي راسك
- طنجة يا لعالية
عيون لكلام بدل
- ^ "الحسين السلاوي - الفنان الذي غنى عن هموم المواطنين ومشاكلهم - لإتحاد لإشتراكي (2013)". مأرشيڤي من لأصل ف 2021-11-08. تطّالع عليه ب تاريخ 2021-11-08.
- ^ "ابن الحسين السلاوي يتذكر تفاصيل اغتيال والده بالسم - المساء (2009)". مأرشيڤي من لأصل ف 2022-01-24. تطّالع عليه ب تاريخ 2022-01-24.
- ^ "الحسين السلاوي يتنبأ بمصيره في «ياغريب ليك الله» - لأخبار (2020)". مأرشيڤي من لأصل ف 2022-01-24. تطّالع عليه ب تاريخ 2022-01-24.
- ^ "ترك رصيد اغنائيا خالدا - 70 سنة مرت على رحيل فنان الشعب الحسين السلاوي - لإتحاد لإشتراكي (2021)". مأرشيڤي من لأصل ف 2022-01-24. تطّالع عليه ب تاريخ 2022-01-24.
- ^ "فنّان الشّعب المغربيّ المرحوم الحسين السلاوي في ذكرى رحيله السبعينيّة - جواك (2021)". مأرشيڤي من لأصل ف 2021-11-08. تطّالع عليه ب تاريخ 2021-11-08.
- ^ "في الذاكرة - الحسين السلاوي من مجد العطاء إلى محنة الهلاك في ريعان الشباب - الجديد (2020)". مأرشيڤي من لأصل ف 2023-02-06. تطّالع عليه ب تاريخ 2022-01-24.