ويكيپيديا

كارنيڤورات

كارنيڤورات، هي تنضيمة ديال لبزوليات لمشيميين لي تخصصو ب شكل لولاني ف ماكلة اللحم، التنضيمة د لكارنيڤورات هي خامس أكبر تنضيمة ديال لبزوليات، كاتجمع عل لاقل 279 نوع حيواني كايعيشو ف ݣاع قنات د لعالم وسط موايل مبدلين على بعضياتهم، من لبلايص لقطبيين لباردين ل لبلايص لقاحلين د الصحرا لكبرى ل لبحور لمحلولة. هاد لبزوليات كايجيو ف مجموعة كبيرة من لفورمات لمبدلين د لكسدة معا تنواع كبير ف الشكال و لقدود.

كارنيڤورات
معلومات عامة
سمية لعيلمية Carnivora
(Thomas Edward Bowdich، 1821)
لخاصية د ترتاب تنضيمة
تابع ل Carnivoraformes، مشيميات، بزوليات و لوراسيات
لعيشة
عايش فلفترة 42 ملاين دالسنين قبل لميلاد


التنضيمة كارنيڤورات كاتقسم ل جوج تنضيمات تحتانيين، سنوريات الشكل، لي كاتجمع السنوريات لحقيقيين، و بزاف د لحيوانات لي "كايشبهو ل لقط"؛ و كلبيات الشكل، لي كاتجمع لكلبيات لحقيقيين، و بزاف د لحيوانات لي "كايشبهو ل لكلب". سنوريات الشكل فيها لفاميلات د السنوريات، الزباديات، الضبعيات، و النمسيات، لاغلبية د هاد لحيوانات كايعيشو ف لعالم لقديم؛ إلاّ لقطوط، لي كايعيشو ف لعالم لقديم و الجديد، دخلو ل لامريكيتين من لقنطرة لارضية بيرين. أما كلبيات الشكل فيها لكلبيات، الراكونيات، الدبيات، لعرسيات، الضربانيات، و لفقميات لي عايشين ف ݣاع قنات لعالم ب تنواع عريض ف لمرفولوجية، الريجيم و السلوك نتاعهوم.

لأصل د لكلمة

بدل

كلمة كارنيڤور مشتقة من لكلمة اللاتينية كارو - carō من (الجدر كارن - carn) لي كاتعني 'لحم' و كلمة ڤوراري - vorāre لي كاتعني 'كلا'، 'كونصوما'، و كاتعود على أي أورݣانيزم كاياكل اللحم.

لفيلوجينيا

بدل

أقدم شبيه د لكارنيڤور تعرف (شباه لكارنيڤورات - carnivomorpha) بان ف أمريكا الشمالية هادي 6 مليون عام من مورا واقعة نقيراض لعصر الطاباشيري-لپاليوجيني.[1][2] هاد الجدود اللولانيين ديال لكارنيڤورات كانو بزوليات كايشبهو ل شي بن عرس صغير ف لقد ولا شي زردي، شادين هيت ليلي ف لوطا د لغابة ولا ف الشجر، ف لوقيتة لي ݣروپات خرين من لبزوليات بحال لمزنيقيات و بعدهوم لكرييوضونات شدو النيش د لحيوانات لعملاقين اللحايميين. غير هو، مورا النقيراض د لمزنيقيات و لكرييوضونات-الضبعيات لماضيين ف اللخر د عصر لإيوصين، لكارنيڤورات خداو هاد النيش، ب فورمات بحال النمراڤيدات لي كايوليو لمفتارسات د لمكيدة ب كسدة كبيرة لي مسيطرين ف عصر لأوليݣوصين هوما و لكرييوضونات - ضبعيات السنان. غير بان عصر لمييوصين، جل النسولة لكبار و لفاميلات د لكارنيڤورات يلا ما قلناش كلهم، تنوعو و ولاو أكتر ݣروپ د لمفتارسات لارضيين لكبار مسيطر ف أوراسيا و أمريكا الشمالية، ب بزاف د النسولة (lineages) نجحو ف النيشات د لحيوانات لعملاقين اللحايميين ف وقيتات زمانيين مبدلين، ف عصر لمييوصين و لعصور لي موراهم.

السيسطيماتيكات

بدل

التاطوور

بدل
 
معاودة د مصايبة حية د طاپوسيون روبوستوس، نوع من لمياسيدات

لكارنيڤورات تنضيمة من واحد لݣروپ د لبزوليات معروف ب سمية اللوراسيات، لي كاتجمع ݣروپات خرين بحال لخفافش (سحت الليل) و لحوافر.[3][4] ف وسط هاد لݣروپ لكارنيڤورات محطوطين ف التقسيمة ديال لوحشيات (ferae). التقسيمة د لوحشيات فيها أقرب حيوان ل لكارنيڤورات باقي، لپانݣولان، هو و بزاف د لݣروپات لمنقارضين لاغلابية فيهوم مشيميات لحايميين من لعصر لپاليوجيني بحال لكرييوضونات، لآركطوسيونات و لمزنيقيات.[5] لكرييوضونات تشافو ف لأصل كا ݣروپ خت ل كارنيڤورات، يمكن ݣروپ جد ݣاع، هادشي مبازي على لحضور د السنان اللحايميين (carnassial).[6] و لايني الطبيعة د السنان اللحايميين مبدلة بينات لݣروپات ب جوج. ف لكارنيڤورات، السنان اللحايميين مبلاصيين حدا قبالة الصف د الضراس، أما عند لكرييوضونات، مبلاصيين حدا اللور د الصف د الضراس[7]، و هادشي كايعطي تاريخ تاطووري مبدل بينات الجوج و تفراز بينات نيڤوات الترتاب.[8] زيد على هادشي، آخر التحاليل لفيلوجينيين كايعطيو بلي لكرييوضونات قراب كتر ل لپانݣولان ف لوقيتة لي لمزنيقيات يقدرو يكونو ݣروپ خت ل لكارنيڤورات و قرابهوم.[5]

أقرب كارنيڤور من نفس الجدع هوما لمياكويدات. لمياكويدات فيها فاميلات د جدود الزباديات و لمياسيدات، و ب جوج بيهوم زيد لكارنيڤورات و لمياكويدات كايكوْنو التقسيمة-الجدع شباه لكارنيڤورات. لمياكويدات كانو حيوانات كايشبهو ل شي زردي لي شادين بزاف د النيشات لمنوعين بحال لموايل لأرضيين و الشجريين. آخر الديراسات وراو واحد لكمية د لبراهن لمدعومين بلي لمياكويدات هي واحد لݣراض تاطووري د شباه لكارنيڤورات، ف لوقيتة لي جدود الزباديات هي ݣروب جاية من عرش واحد قاعدي، لمياسيدات هي ݣروب ب عروشا كتار (كيف ما كايبان ف لفيلوجيني لتحت).[9][10]

شباه لكارنيڤورات بداو يبانو ف أمريكا الشمالية ف عصر لپاليوجين تقريبا 60 مليون عام هادي.[2] لكارنيڤورات لفوقانيين بانو أول خطرة هادي 42 مليون عام ف وسط لإيوصين.[11] لفيلوجيني د الجوزيئات كاتبين بلي لكارنيڤورات لباقيين هوما ݣروپ وحداني لعرش، لݣروپ لفوقاني من شباه لكارنيڤورات.[12] من هنا لكارنيڤورات تفرّقو ل جوج تقسيمات مبازيين على لبنية لعضمية لي ضايرة ب لوسط د لودن ف الجمجومة، هاد الجوج تقسيمات هي سنوريات الشكل لي كايديو ل لقطوط، و كلبيات الشكل لي كايديو ل لكلاب.[13] ف سنوريات الشكل، لبواقة السمعية (Auditory bullae) مدوبلة-لبيوت، مكونة من جوج لعضام و باريير كاتلاقي بيناتهم. كلبيات الشكل عندهوم بواقة سمعية وحدانية-لبيت ولا مفرقة جوزئيا، مكونة من عضم واحد.[14] ف لبدية، لمومتيلين اللولانيين د لكارنيڤورات كانو صغار بحال لكرييوضونات (ب لاخص، الضبعيات لماضيين) و لمزنيقيات، هاد الجوج حكمو النيشات د لمفتارسات لفوقانيين ف لوقيتة د عصر لإيوصين، و لاكين ف عصر لأوليݣوصين، النمراڤيدات هوما لي ولاو لمفتارسات لفوقانيين من لكارنيڤورات، و معا جا عصر لميوصين جل لفاميلات د لكارنيڤورات بداو كايتنوعو و ولاو لمفتارسات لأرضيين الرئيسيين ف النص الشمالي د لكورة لأرضية.

لكلاصاج د لكارنيڤورات د دابا

بدل

ف 1758، لبوطانيست السويدي كارل لينيوس بلاصا ݣاع لكارنيڤورات لي كانت معروفة ف ديك لوقت وسط ݣروپ د لوحشيات (Ferae) (مايتغتالطش ليك معا لكونصيپط لعصري د لوحشيات لي كايحط حتى لپانݣولان ف هاد لݣروپ) ف النسخة لعاشرة ديال كتابو النضام الطابيعي - Systema Naturae. عتارف ب ستة د لݣنوسا: كانيس (لكلبيات و الضبعيات)، فوكا (زعانفيات الرجلين)، لقط (السنوريات)، ڤيڤيرا (الزباديات، النمسيات، و الضربانيات)، موسطيلا (لعرسيات آپار من غرير لعسل) و الدب (الدبيات، النواع لكبيرة من لعرسيات، و الراكونيات).[15] هاد لكلاصاج بقى حتى ل 1821 فين لكتاتبي لميريكاني و الرحالة طوماس إيدوارد باوديتش عطى ل لݣروپ السمية لمقبولة د دابا.[16]

ف لبدو، لكونصيپط لعصري ديال لكارنيڤورات كان مقسوم ل جوج تنضيمات تحتانيين: لفيسيپيدات (مقسومات الرجلين) لارضيين، و لپينيپيدات (زعانفيات الرجلين) النص بحريين.[17] لتحت كاين لكلاصاج كيفاش لفاميلات د دابا عندها علاقة معا بعضياتها مورا التستيفة د عالم لموستاحتات دجوردج ݣايلورد سيمپسن ف 1945.[17]

  • تنضيمة كارنيڤورات باوديتش، 1821
    • تنضيمة تحتانية مقسومات الرجلين بلومينباخ، 1971
      • فاميلة فوقانية كلبيات الشكل د.فيشر دي ڤالدهايم، 1817
        • فاميلة كلبيات د.فيشر دي ڤالدهايم، 1817 - كلاب
        • فاميلة دبيات د.فيشر دي ڤالدهايم، 1917 - الدبوبا
        • فاميلة راكونيات بوناپاغط، 1850 - راكون و پانضا
        • فاميلة عرسيات د.فيشر دي ڤالدهايم، 1817 - ضربان، غرير لعسل، قضاعة، و بن عرس.
      • فاميلة فوقانية سنوريات الشكل د.فيشر دي ڤالدهايم، 1817
        • فاميلة زباديات ج. إ. ݣراي، 1821 - الزباد و النمس
        • فاميلة ضبعيات ج. إ. ݣراي، 1821 - الضبوعة
        • فاميلة سنوريات ج. إ. ݣراي، 1821 - لقطوط
    • تنضيمة تحتانية زعانفيات الرجلين إليݣر، 1811
      • فاميلة عجليات لبحر ح. إ. ݣراي، 1825 - لفقمات ب لودن
      • فاميلة فضيات ج. آ. آلن، 1880 - لفض
      • فاميلة فقميات ج. إ. ݣراي، 1821 - لفقمات بلا ودن

من تما، وخا هاكاك، لميطودات لي خدمو لعولاما د لبزوليات ف تقدار لعالاقات لفيلوجينيين بينات لفاميلات د لكارنيڤورات تطووْرو ب تخدام موقاربات معقدين بحال، الجينات، لمرفولوجية، و التسجالات لفوصيليين. لبحات ف لفيلوجيني د لكارنيڤورات من عام 1945 تبتو بلي مقسومات الرجلين هي ف لحقيقة ݣروپ وحداني لعرش،[18] ف لوقيتة لي زعانفيات الرجلين عندهوم علاقة يا ما معا الدبوبا ولا بني عرس.[19][20][21][22][23] زيد على هادشي، تتبت بلي فاميلات لكارنيڤورات بحال الزباديات، الراكونيات، و لعرسيات هي فاميلات متعددة لعروش (الشعبة):

  • تلقى بلي النموسا و شي نواع مأصلين ف مادغشقر ف تقسيمة وحدة معا الضبوعا، أما النواع لملغاشية ب فاميلة بوحديتها، لفلنوكيات.[24][25]
  • زباد النخل لإفريقي هو كارنيڤور بيدائي كايدي ل لقط.[26]
  • اللينسانݣ أقرب نوع ل السنوريات.[27]
  • لپانضات ماشي من الراكونيات ولا حتى ݣروپ طابيعي مستاقل ب راسو.[28] لپانضا لعملاقة هو دب د بصح.[29][30] ف لوقيتة لي لپانضا لحمر، فاميلة مفرزة.[31]
  • الضرابن و غريرات الريحة تبلاصاو ف فاميلة ديالهوم بوحدهوم، و هاد لفاميلة ݣروپ خت ل واحد التقسيمة كاتجمع فاميلات د لإيلوريدات (لپانضا لحمر)، الراكونيات، و لعرسيات ب شكل قطعي.[31][32]

التنضيمة كارنيڤورات كاتكون من 292 نوع باقي، كاينتاميو ل 131 ݣنس و حتى لݣنوسا لمنقارضين بحال الدوسيسيون، لي فيه 2 نواع منقارضين، و 4 د النواع خرين منقارضين، لي هوما لكارنيڤور لوحيد لي نقارض من لوقيتة د ما قبل التاريخ. هادشي ماكايشملش نواع مكروزين (بحال لكلاب لمديبين و الليݣور) ولا النواع لمنقارضين قبل التاريخ. الديراسات لجوزيئيين لعصريين كايلمحو بلي هاد ل 131 ݣنس يقدرو يترتبو ف 16 لفاميلة، مفروقين بين التقسيمات د كلبيات الشكل و سنوريات الشكل، و بزاف من هاد لفاميلات تقسمو ل فاميلات تحتانيين. تلاتة د لفاميلات من لحيوانات النص بحريين، لفضيات، عجليات لبحر، و لفقميات، مجموعين ف التقسيمة د زعانفيات الرجلين.

تنضيمة تحتانية كلبيات الشكل

  • فاميلة إلوريدات
    • فاميلة تحتانية إلورينات (لپانضات لحمرين): 1 ݣنس، 2 نواع
  • فاميلة كلبيات
    • فاميلة تحتانية كلييْبيات (الدياب و التعالب): 14 لݣنس (1 نقارض)، 39 نوع (2 نقارضو)
  • فاميلة ضربانيات (الضرابن و غريرات الريحة): 4 ݣنوس، 12 نوع
  • فاميلة عرسيات
    • فاميلة تحتانية لمهاوشيات (لخز و لمهاوش): 4 ݣنوس، 9 نواع
    • فاميلة تحتانية غريريات عرسيين (غريرات عرسيين): 1 ݣنس، 5 نواع
    • فاميلة تحتانية إيكطونيشينات (دلق إفريقي و لݣريزونات): 5 ݣنوس، 7 نواع
    • فاميلة تحتانية قضاعيات (لقضاعات): 7 ݣنوس، 14 نوع (1 نقارض)
    • فاميلة تحتانية غريريات أوراسيويين (غريرات أوراسيويين): 2 ݣنوس، 6 نواع
    • فاميلة تحتانية غريريات لعسل (غرير لعسل): 1 ݣنس، 1 نوع
    • فاميلة تحتانية عريسيات (بني عرس و لمينك): 2 ݣنوس، 20 نوع (1 نقارض)
    • فاميلة تحتانية غريريات أمريكيين (غرير أمريكي): 1 ݣنس، 1 نوع
  • تقسيمة زعانفيات الرجلين
    • فاميلة فضيات (لفض): 1 ݣنس، 1 نوع
    • فاميلة عجليات لبحر (لفقمات ب لودن): 7 ݣنوس، 16 نوع (1 نقارض)
    • فاميلة فقميات (لفقمات لحقيقيين/بلا ودن): 14 ݣنس، 19 نوع (1 نقارض)
  • فاميلة راكونيات (الراكون، لكواتي، لأولينݣو، كينكاجو): 6 ݣنوس، 14 نوع
  • فاميلة دبيات
    • فاميلة تحتانية پانضيات (لپانضا): 1 ݣنس، 1 نوع
    • فاميلة تحتانية طريماركتينات (الدب قصير لوجه): 1 ݣنس، 1 نوع
    • فاميلة تحتانية دبدوبيات (الدبوبا): 3 ݣنوس، 6 نواع

تنضيمة تحتانية سنوريات الشكل

  • فاميلة فلنوكيات
    • فاميلة تحتانية فلنوكيات مدغشقر (لفلنوكيات لي كايشبهو الزباد): 3 ݣنوس، 4 نواع
    • فاميلة تحتانية ݣاليدينيات (لفلنوكيات لي كايشبهو النمس): 4 ݣنوس، 6 نواع
  • فاميلة سنوريات
    • فاميلة تحتانية سنيوريات (لقطوط صغيرة و متوسطة لقد): 12 ݣنس، 34 نوع
    • فاميلة تحتانية نمريات (لقطوط كبيرة لقد): 2 ݣنوس، 7 نواع
  • فاميلة نمسيات
    • فاميلة تحتانية نميسيات (النموسا لوروپيين/آسيويين): 9 ݣنوس، 23 نوع
    • فاميلة تحتانية منݣوسيات (النموسا ليفريقيين): 6 ݣنوس، 11 نوع
  • فاميلة ضبعيات (الضبوعا): 3 ݣنوس، 4 نواع
  • فاميلة زباديات النخل ليفريقيين (زباد النخل لإفريقي): 1 ݣنس، 1 نوع
  • فاميلة لينسانݣيات (اللينسانݣات لآسيويين): 1 ݣنس، 2 نواع
  • فاميلة زباديات
    • فاميلة تحتانية زرديات (الزردي): 2 ݣنوس، 16 نوع
    • فاميلة تحتانية هيميݣالينات (الزبادات الجنوب شرق آسيويين): 4 ݣنوس، 4 نواع
    • فاميلة تحتانية پاراضوكسورينات (الزبادات لآسيويين): 5 ݣنوس، 7 نواع
    • فاميلة تحتانية زبيديات (الزبادات): 3 ݣنوس، 6 نواع

لآناطوميا

بدل

جمجومة

بدل
 
جمجومة لفوصّا (كريپطوپروكطا فيروكس) قشع النياب ببوشيين الشكل و لكبار و السنان اللحايميين لي شايعين عند سنوريات الشكل

النياب عند لكارنيڤورات ف لعادة كبار، ببوشيين ف الشكل (مخروطيين)، سميكين و كايريزيسطيو الصدمات. ݣاع النواع لأرضيين من لكارنيڤورات عندهم 3 لقواطع ف كل جنب د كل فك (الستيتناء هو قضاعة لبحر، لي عندها غير جوج قواطع ف لفك التحتاني).[33] الضرسة التالتة ترزات. السنان اللحايميين (carnassial) كاينين ف الضراس- اللولانيين (Premolar) لفوقانيين الرابعين و ف الضراس التحتانيين اللولين. بحال جل لبزوليات، النواع د هاد التنضيمة عندهم تسنينة مبدلة لقد و الشكل (heterodont)، غير هو ف شي نواع، بحال ضبع لرض (proteles cristata)، السنان عندو صغارو بزاف و السنان د لحنك عندو ولاو متخصصين ف ماكلة لحشرات. عند زعانفيات الرجلين، السنان عندهوم ف نفس لقد و الشكل (homodont) حيت تطورو باش يشقمو ولا يقبطو لحوت، و السنان د لحنك عندهوم مابقاوش ف لغالب.[34] السنان اللحايميين عند الدبوبا و الراكونات، صغارو ب شكل تانوي.[34] جمجومة لكارنيڤورات مدعومة ب شكل كبير ب تقواس وجني مجهد. لعرف السهمي ديما كايكون حاضر، شي مرات كايبان بارز ف النواع لي عندهم الديمورفية لجنسية بحال عجول لبحر و لفقمات لفرويين، وخا هاكاك ف شي نواع د لكارنيڤورات الصغار هاد لعرف السهمي صغار ب شكل كبير.[34] صندوق لمخ (Neurocranium) مكبر ب سباب لعضمة لحيطية لقدامية (Frontoparietal) ف لقدام د لوجه. ف كلبيات الشكل، الروسطروم (Rostrum-قنوفة) كايكون ف لعادة طويل معا بزاف د السنان، أما ف سنوريات الشكل كايكون قصر معا سنان قل. لمحارات النيفيين كايكونو كبار و معقدين ب لموقارنة معا لبزوليات لخرين، هادشي كايخلي بلاصة كبيرة ل الريسيپطورات الشميين.[34]

لبلايص لمورا جمجومية

بدل
 
بن آوى كحل الضهر (لوپوليلا ميسوميلاس) كايحاول يفرس فقمة لفرو لقهوية (آركطوسيفالوس پوسيلوس) هاد الجوج نواع كايوريو التنواع ف لكسدة لي هي خصلة شايعة ف لكارنيڤورات، ب لآخص بين زعانفيات الرجلين و قرابهوم لرضيين.

آپار من التكداس د لخصايل لمشروكين بينات لكارنيڤورات ف السنان و الجمجومة، ماكاينينش بزاف د لحوايج لي كايوحدوهوم كا ݣروپ.[33] ݣاع النواع من لكارنيڤورات رباعيين لمشية و جلهوم عندهوم 5 د الصبعان ف الرجلين لقداميين و 4 ف الرجلين اللورانيين. عند لكارنيڤورات لرضيين، الرجلين يقدرو يكونو يا صبعيين لمشية (Digitigrade) كيف ما لمشاش، الضبوعا، و لكلاب ولا كفّيين لمشية (Plantigrade) كيف ما الدبوبا، الضرابن، الراكونات، بني عرس، الزبادات و النموسا. ف زعانفيات الرجلين، الدرعان تموديفياو ل مجادف.

 
لعضاء ف التنضيمة كارنيفورات بحال لببر، عندهوم كفوف مبطنين.

على عكس لبالينيات و السيرينيات، لي حتى هوما بزوليات عندهوم قزازب وضايفيين كاملين لي كايعاونوهوم باش يعومو، زعانفيات الرجلين كايخدمو الدرعان ديالهوم تحت لما ف لعومان. لفقمات لحقيقيين (بلا ودن) كايخدمو لمجادف اللورانيين ف لعومان؛ عجول لبحر و فقمات لفرو كايخدمو لمجادف لقداميين ف لعومان، لفض كايخدم لمجادف دياولو ب ربعة. لحاصول، زعانفيات الرجلين عندهوم قزازب قل من لكارنيڤورات لخرين ب شكل كبير.

آپار من زعانفيات الرجلين، لكلاب، الدبوبا، الضبوعا، و لقطوط كاملين عندهوم شكال مفرزين على بعضياتهم و تقدر تعرفهوم دغيا. لكلاب ف لعادة من لبزوليات الجرايا و كايبانو رشيقين من الشوفة، دايماً كايعولو على سنانهوم ف قبيط لفرايس؛ الدبوبا كبر من لكلاب ف لقد و كايعولو على الجهد د لكسدة ديالهوم ف التقلاب على لماكلة. ب لموقارنة معا لكلاب و الدبوبا، الطراف لقداميين د لقطوط طول و صح، و مسلحين ب مخالب كايتطواو مخصصين ف قبيط لفريسة. الضبوعا من سنوريات الشكل لي كايشبهو ل لكلب عندهوم ضهر محدب حيت رجليهوم لقداميين طول من اللورانيين. لفاميلة د الراكون و لپانضا لحمر كارنيڤورات صغار لقد كايديو ل الدب ب قزازب طوال. لفاميلات لخرين ديال لكارنيڤورات الصغار بحال الزباديات، النمسيات، لعرسيات، لغريريات، الضربانيات ،ب سباب التطوور التقاربي خلاو الشكل الصغير، لي كان عند جدودهم لميياكويدات، غير هو كاينين شي تنوعات شكليين بحال الشكل الصليب و لمدكس لي عند لغريرات و لمهاوشين (Gulo Gulo).[33]

تقريباً ݣاع النواع ديال لكارنيڤورات عندهم موسم لمجاوجة ف وقيتة وحدة. الدكور د لكارنيڤورات عندهوم ف لعادة عضمة ف قضيبهم (bacula)، لي غايبة عند الضبوعا و لبينتورونݣات.

الطول و لعمورية د لفرو كاتبدل على حساب لبيئة فين كايعيش النوع. ف النواع لي كايعيشو ف الجو الدافي، لفرو ديالهوم ف لغالب كايكون قصير ف الطول و لعمورية. ف النواع د الجو لبارد، لفرو عندهوم كايكون يا عامر يا طويل، و فنفس لوقت معاه واحد لمادة مزيتة لي كاتعاون ف لحفيض د لحرارة د كسدتهوم. اللوان د فروهم كايكونو مبدلين على حساب النوع، ف لغالب ب لكحل، لبيض، الليموني، الصفر، لحمر و بزاف الطبقات من الرمادي و لقهوي. شي نواع كايكونو مخططين، منقطين، مطاشيين، ولا منقوشين ب نماط مخلطين. كايبان بلي كاين واحد لعالاقة ما بين لموؤل و النمط د اللون؛ متلاً، النواع لمخططين و لمنقطين كايميلو باش يتلقاو ب شكل تقيل ف لبيئات لغابويين.[33] شي نواع بحال الديب الرمادي پوليمورفيك (متعدد ف نماط اللوان)، لفراد من هاد النوع كايكون عندهوم لوان مبدلين على بعضياتهم. التعلب لقطبي و لقاقم ، عندهوم فرو لي كايتبدل من بيض و عامر ف الشتا، ل قهوي و خاوي ف الصيف. ف زعانفيات الرجلين و الدبوبا لقطبيين، عندهوم واحد الطبقة عازلة و سميكة د الشحمة لي كاتعاونهوم يحافضو على درجة لحرارة د لكسدة نتاعهوم.

الديمورفية الجنسية

بدل
 
عند زعانفيات الرجلين، ب الضبط فيل لبحر، الديمورفية الجنسية عندو هي لبارزة ݣاع بينات لكارنيڤورات كاملين
 
الديمورفية الجنسية عند السبوعا هي لبارزة ݣاع بين السنوريات

الديمورفية الجنسية هي لحالة فين الجناس من نفس النوع كايوريو خصايل مرفولوجيين مبدلين على بعضياتهم، هاد لخصايل ماشي خصهوم ب الضارورة يكونو عندهم علاقة ب لمجاوجة.[35] الديمورفية الجنسية ف لكارنيڤورات، فين الدكر كبر من النتوا شايعة. دايماً كايتستشهد ب لعزيلة الجنسية كا سباب ف التبدالات لي ف وسط النوع ف لكتلة د لكسدة و لمرفولوجية د الجمجومة و لفك بينات النواع لي ف التنضيمة د لكارنيڤورات.[36][37] من لموْقّع بلي لحيوانات لي عندهوم سيسطيمات د التاعدود الزوجات و نيڤوات زايدين ف لحدودية (territoriality) و السلوك لخلوي كايوريو أزيد النيڤوات ف الديمورفية الجنسية ديال لقد. زعانفيات الرجلين أحسن برهان على هادشي.

عيون لكلام

بدل
  1. ^ Hunter, L. (2018). Field Guide to Carnivores of the World. Bloomsbury Wildlife. pp. 1–271.
  2. ^ a b "EARLIEST KNOWN CARNIVORAN AUDITORY BULLA AND SUPPORT FOR A RECENT ORIGIN OF CROWN-GROUP CARNIVORA (EUTHERIA, MAMMALIA)".
  3. ^ ""Towards Resolving the Interordinal Relationships of Placental Mammals"".
  4. ^ ""Phylogenomic analyses elucidate the evolutionary relationships of bats"".
  5. ^ a b "Resolving the relationships of Paleocene placental mammals".
  6. ^ McKenna, M. C. (1975). "Toward a phylogenetic classification of the Mammalia". In Luckett, W. P.; Szalay, F. S. (eds.). Phylogeny of the Primates. New York: Plenum. pp. 21–46.
  7. ^ "Mammalogy: Adaptation, Diversity, Ecology".
  8. ^ Turner, Alan; Antón, Mauricio (2004). Evolving Eden: An Illustrated Guide to the Evolution of the African Large-Mammal Fauna. New York: Columbia University Press. p. 77.
  9. ^ Bryant, H.N., and M. Wolson (2004) “Phylogenetic Nomenclature of Carnivoran Mammals.” First International Phylogenetic Nomenclature Meeting. Paris, Museum National d’Histoire Naturelle
  10. ^ "Carnivoran evolution. New views on phylogeny, form and function".
  11. ^ Heinrich, R.E.; Strait, S.G.; Houde, P. (January 2008). "Earliest Eocene Miacidae (Mammalia: Carnivora) from northwestern Wyoming". Journal of Paleontology. 82 (1): 154–162.
  12. ^ "Pattern and timing of diversification of the mammalian order Carnivora inferred from multiple nuclear gene sequences".
  13. ^ Dogs: Their Fossil Relatives and Evolutionary History. New York: Columbia University Press. pp. 1–232
  14. ^ "The Carnivores".
  15. ^ Linnaeus, C. (1758). Sistema naturae per regna tria Naturae, secundum classes, ordines, genera, species, cum characteribus differentiis, synonimis locis. Tomus I. Impensis direct. Laurentii Salvii, Holmia. pp. 20–32.
  16. ^ 2] Bowditch, T. E. 1821. An analysis of the natural classifications of Mammalia for the use of students and travelers J. Smith Paris. 115. (refer pages 24, 33)
  17. ^ a b Simpson, G.G. (1945). "The principles of classification and a classification of mammals". Bulletin of the AMNH. 85: 1–350.
  18. ^ Arnason, U.; Gullberg, A.; Janke, A.; Kullberg, M. (2007). "Mitogenomic analyses of caniform relationships". Molecular Phylogenetics and Evolution. 45 (3): 863–74.
  19. ^ Lento, G. M.; Hickson, R. E.; Chambers, G. K.; Penny, D. (1995). "Use of spectral analysis to test hypotheses on the origin of pinnipeds". Molecular Biology and Evolution. 12 (1): 28–52
  20. ^ {{مرجع ويب | url = https://archive.org/details/cbarchive_36692_basicranialevidenceforursidaff1990/page/n1/mode/1up | title = "Basicranial evidence for ursid affinity of the oldest
  21. ^ {{مرجع ويب | url = https://www.ncbi.nlm.nih.gov/pmc/articles/PMC2245807/ | title = "Phylogeny and divergence of the pinnipeds (Carnivora: Mammalia) assessed using a multigene dataset"
  22. ^ Sato, J. J.; Wolsan, M.; Suzuki, H.; Hosoda, T.; Yamaguchi, Y.; Hiyama, K.; Kobayashi, M.; Minami, S. (2006). "Evidence from nuclear DNA sequences sheds light on the phylogenetic relationships of Pinnipedia: Single origin with affinity to Musteloidea". Zoological Science. 23 (2): 125–46.
  23. ^ {{مرجع ويب | url = https://academic.oup.com/sysbio/article/54/2/317/2842927?login=false | title = "Molecular phylogeny of the Carnivora (Mammalia): Assessing the impact of increased sampling on resolving enigmatic relationships".
  24. ^ Anne D. Yoder and John JBarycka, E. (2007). "Evolution and systematics of the feliform Carnivora". Mammalian Biology. 72 . Flynn 2003: Origin of Malagasy Carnivora.
  25. ^ Philippe Gaubert, W. Chris Wozencraft, Pedro Cordeiro-Estrela and Géraldine Veron. 2005 – Mosaics of Convergences and Noise in Morphological Phylogenies: What's in a Viverrid-Like Carnivoran?
  26. ^ {{مرجع ويب | url = https://www.ncbi.nlm.nih.gov/pmc/articles/PMC7034395/ | title = "Pattern and timing of diversification of the mammalian order Carnivora inferred from multiple nuclear gene sequences". 56 (1): 49-63
  27. ^ Gaubert, P. (2009). "Family Prionodontidae (Linsangs)". In Wilson, D.E.; Mittermeier, R.A. (eds.). Handbook of the Mammals of the World – Volume 1. Barcelona: Lynx Ediciones. pp. 170–173.
  28. ^ Salesa, M.; M. Antón; S. Peigné; J. Morales (2006). "Evidence of a false thumb in a fossil carnivore clarifies the evolution of pandas". Proceedings of the National Academy of Sciences. 103 (2): 379–382.
  29. ^ Yu, Li; Li, Yi-Wei; Ryder, Oliver A.; Zhang, Ya-Ping (2007). "Analysis of complete mitochondrial genome sequences increases phylogenetic resolution of bears (Ursidae), a mammalian family that experienced rapid speciation". BMC Evolutionary Biology. 7 (198): 198.
  30. ^ {{مرجع ويب | url = https://www.ncbi.nlm.nih.gov/pmc/articles/PMC2518930/ | title = "Mitochondrial genomes reveal an explosive radiation of extinct and extant bears near the Miocene-Pliocene boundary".
  31. ^ a b Mehta, R. S.; Slater, G. J.; Law, C. J. (2018). "Lineage Diversity and Size Disparity in Musteloidea: Testing Patterns of Adaptive Radiation Using Molecular and Fossil-Based Methods". Systematic Biology. 67 (1): 127–144.
  32. ^ Koepfli KP, Deere KA, Slater GJ, et al. (2008). "Multigene phylogeny of the Mustelidae: Resolving relationships, tempo and biogeographic history of a mammalian adaptive radiation". BMC Biol. 6: 4–5
  33. ^ a b c d Nowak, R. M. (2005). Walker's Carnivores of the World. Baltimore, Maryland: Johns Hopkins University Press. pp. 1–328.
  34. ^ a b c d Vaughan, T. A.; Ryan, J. M.; Czaplewski, N. J. (2013). Mammalogy. Burlington, Massachusetts: Jones & Bartlett Learning. pp. 1–750.
  35. ^ Encyclopedia of Animal Behaviour. Vol. 2. Academic Press. 21 January 2019. p. 7.
  36. ^ Gittleman, J. L.; Valkenburgh, B. Van (May 1997). "Sexual dimorphism in the canines and skulls of carnivores: effects of size, phylogency, and behavioural ecology". Journal of Zoology. 242 (1): 97–117
  37. ^ Sylvia Brunner, Michael M Bryden, Peter D. Shaughnessy (September 2004). "Cranial ontogeny of otariid seals". Systematics and Biodiversity. 2 (1): 83–110.
مرجّعة من "https://ary.wikipedia.org/w/index.php?title=كارنيڤورات&oldid=377570"