قصبة أݣادير أوفلا

قصبة أݣادير أوفلا


معلومات عامة
نوع	قصبة، قلعة و تراث
لبلاد	لمغريب
لموضع	أڭادير
تاريخ د لبني	1540
تصنيف تراتي	تراث التأثير البرتغالي و ترات تقافي ديال لمغريب

قصبة أݣادير أوفلا هي معلمة تاريخية كاينة ف مدينة أݣادير كانت فيها المدينة القديمة. و هي لأصل والبداية ديال مدينة أݣادير، جزء كبير منها تخرب بسبب الزلزال ديال 1960 لي ضرب لمدينة، و بعد الترميم ديالها، تأتّرات تا ب زلزال لحوز 2023.

سميتها

سمية قصبة أݣادير المحلية هي أݣادير أوفلا. كلمة "أݣادير" كاتعني بالأمازيغية "حصن" و"أوفلا" كاتعني "الفوق". هذا علاش التسمية كاتشير للحصن الموجود فوق الجبل.

شعار المغرب (الله الوطن الملك) منقوش على الجبل الي كاينة فيه قصبة أݣادير أوفلا ويمكن يتشاف حسن من مارينا أݣادير

تاريخ

تأسسات قصبة أݣادير أوفلا عام 1540 على يد السلطان محمد الشيخ السعدي بغرض التحكم ف ضرب البرتغاليين اللي إستقروا تحت الجبل عام 1470 فاش كانو تايقلبو عن طريق للهند، بناو فالساحل قرب عين فونتي حصن، و بناو على سفح الجبل برج آخر باش يحضيوه، الشيئ لي دفع السعديين يبنيو قصبة على قمة نفس الجبل.

كيفاش تبنات القصبة

تبنات القصبة بشكل أساسي لأسباب عسكرية باش تحمي لمدينة و المرسة ديالها من الهجومات الأجنبية لمحتاملة.

1505: لقبطان لبرطقيزي جواو لوپيز دي سيكويرا حطّ الأحجار اللولة ل لبني ديال القلعة الصغيرة باش يحمي مصدر الما لحلو.^[1]
1511: هجمات قبايل سوس لهجوم اللول على لبرتغاليين لي ستاقرو ف أݣادير.
1513: شرا ملك البرتغال مانويل اللول هاد الحصن الصغير و سماه سانطاكروز دي كيپ دي جير ("سانتا كروز دو كابو دي أجوير").
1536: علن السلطان القائم بأمر الله السعدي الحرب على الغزاة تال نهار ستولى ولدو محمد الشيخ المهدي أخيرا على المدينة.
1540: رجع محمد الشيخ هو الحاكم، و بنا القصبة و دور عليها الابراج باش تحصنها، و خصص بين 40 و 50 موكحلة للدفاع على المدينة.

حيت القصبة تبنات فوق قمة نفس السفح ديال الجبل، مكناتهم يلقاو موقع ستراتيجي ل قصف البنايات البرتغالية بالمدفعية عام 1541 و تحرير مدينة أݣادير لمعروفة ب سانطاكروز من الإحتلال البرتغالي. تقلصات أهمية الحصن بعد ما جراو على البرتغاليين تال نهار عاود بناه عبد الله الغالب بالله.

تأثير الزلازل

تدمرت القصبة لمرة اللولة ف 1755 بسبب زلزال لشبونة. و المرة الثانية ف زلزال أݣادير 1960.

القصبة قبل ما تتدمر

بلاصتها

كاينة القصبة ف قمة الجبل ف علو ديال 236 مترً تقريبا فوق مستوى سطح البحر ف الجهة الشمالية ديال مدينة أݣادير حدا الميناء ديال دابا.

شنو فيها

عاون الموقع الستراتيجي د لقصبة على قصف الأحياء دالبرتغال بالمدافع، عام 1541م تحرر الحصن البرتغالي لي سميتو "سانطاكروز" وبالتالي نقصات الأهمية ديال الحصن تا لنهار عاود بناه الغالب بالله السعدي. و كان هاد الحصن قبل الزلزال كايتكون من:

سور ديال برا مزود ب لأبراج و عندو باب مصمم بشكل ملوي بغرض الدفاع
جامع كبير
سبيطار
البنكة والبوسطة
ديور و زناقي و ساحات صغار
لملاح، و هو حي خاص بليهود
أضرحة بحال ضريح سيدي بوجمعة أݣناو الخاص بطائفة ݣناوة وضريح لالة يامنة

القصبة اليوم

لكسايد

عام 2019، قرر المخزن ديال أݣادير يسد قصبة أݣادير أوفلا على الطوموبيلات و لماطر، حيت المنطقة عرفات بزاف د لكسايد الخطيرة فالرومپوان لي تايدي لقصبة أݣادير أوفلا. و خلا غير الطوبيسات والطاكسيات لي عندهم الحق يدخلو ليها.

إصلاح القصبة

مشروع إصلاح قصبة أݣادير أوفلا هو مشروع نطالق عام 2020، وتايهدف باش يصلح و يأهل السوار دالقصبة و يزوقها من الداخل، و يحيد أي حاجة مصايبة بالسيمة، و يوفرو خدمات كثر، و يصلحو الأضرحة و يصايبو واحد التمثال، و يعْلمو الطرقان، لي فالقصبة و لي كاتجيب ليها، عاد باش غايديرو مشاريع سياحية بحال لقهاوي و البيرو ديال الإرشاد السياحي، و البازارات، و لمتاحف، و لباركينڭات و غيرها. هاد المشروع هو جزء من برنامج التنمية الحضرية د أݣادير 2020 - 2024 اللي عطى لإنطلاقة ديالو الملك محمد السادس.