ويكيپيديا

طيكنولوجيا خط لݣول

طيكنولوجيا خط لݣول أولا سيستيم تقرير لݣول[1] (بالنݣليزية: Goal-line technology) هي التخدام ديال لمعاونة د طيكنولوجيا فلميطشان د كورة باش يبان واش تماركا شي بيت أولّا لا. بالتفصيل، هي طريقة اللي بيها كايتّعرف واش لبالون فات خط لݣول اللي مابين الرجلين وتحت لعاريضة د لݣول بلمعاونة ديال ماكينات وكاتعاون لحكم باش يعطي لبيت أولّا لا. الدور ديال هاد الطيكنولوجيا ماشي هو تبدّل لحكام، ولكن تعاونهوم فلقرارات ديالهوم. خاص طيكنولوجيا خط لݣول تنتع بشكل واضح واش لكورة فاتت خط لݣول ولّا لا، وهاد لمعلومة كاتعاون لحكم باش يعطي لقرار ديالو اللخر.[2]

ميتال ديال التخدام د بزاف دلكاميرات فطيكنولوجيا خط لݣول بالسيستيم ديال "ݣول كونطرول".

بلمقارنة معا طيكنولوجيات خرين فرياضات خرين، طيكنولوجيا خط لݣول هي شي حاجة اللي جديدة فكورة، وبزاف ديال السلطات اللي واقفين على هاد الرياضة كانو ضدها. فيوليوز ديال 2012 قبلات IFAB لستيعمال ديالها، وبدّلات لقواعد د اللعبة باش يولّي التخدام ديالها مومكين (ولاكين ماشي مفروض). كاتخدّم طيكنولوجيا خط لݣول غير فلميطشان، لبوطولات والتورنوات لكبار حيتاش غالية بزاف. هاد الطيكنولوجيا دابا كاينة فلبوطولات لكبار ديال ؤروپا، ومن 2014 ولّات كاتخدّم فالنوسخة ديال الرجال ولعيالات فكاس لعالم.[3][4][5][6]

خلفية بدل

فالرياضة د كورة، ماكايكونش لبيت صحيح حتى كايكون لبالون فات خط لݣول اللي مابين الرجلين وتحت لعاريضة د لݣول. غاليبا فاش كايكون تماركا شي بيت كايكون هادشي باين (الشبكة اللي فلݣول هي طريقة اللي عندها طيكنولوجيا قليلة ورخيصة، واللي كاتبين هادشي). واخّا هكّاك كايكونو حالات اللي كايولّي صعيب على لحكام وحتى لمعاونين اللي معاهوم باش يقررو واش لبيت تماركا قبل "مايعتقها" لحارس من قبالة لمينطاقة د لݣول ديالو.

لقواعد د اللعبة بدل

من 2012 ولّات طيكنولوجيا خط لݣول مقبولة فلميطشان د كورة. النصوص اللي كاتدكرها كاينين فربعة ديال لقوانين فلقواعد د اللعبة:

  • لقانون 1 (التيران د اللعب): لكادر ديال لݣول يمكن يتبدّل فيه باش يتركّب فيه السيستيم.
  • لقانون 2 (لكورة): ولّا مسموح بكورات اللي فيهوم هاد الطيكنولوجيا فلداخل.
  • لقانون 5 (لحكام): ولّا مفروض عليهوم يقلّبو السيستيم واش خدام قبل مايبدا لماطش، ومايخدّموهش إلا كان فيه شي موشكيل أولا خاسر.
  • لفانون 10 (التحديد د النتيجة د كورة): الطيكنولوجيا ولّات مسموح باش التأكود من الصحة ديال لبيت تولّي مومكينة.

لقواعد داللعبة ماكايفصّلوش فالنوع ديال السيستيم اللي مومكين يتخدّم فالطيكنولوجيا د خط لݣول، ولاكين كاينين وتائق اللي مبازية عليهوم لقواعد واللي كايعطيو تفاصيل كتار. لكتيّب د لبرنامج ديال لجودة د لفيفا تاع التجريب د طيكنولوجيا خط لݣول[7] كايشرح بالتفصيل شنو اللي مطلوب من السيستيم. كاينين ربعة ديال لحوايج اللي ضروري خاص يكونو فسيستيم ديال طيكنولوجيا خط لݣول:

  • خاص السيستيم يتكلّف غير بلحالات ديال واش تماركا لبيت ولّا لا وصافي؛
  • خاص السيستيم تكون فيه الدقة فلخدمة ديالو؛
  • خاص السيستيم دغيا يأكّد باللي شي بيت تماركا، فمدّة اللي قل من تانية وحدة؛
  • خاص السيستيم يعطي لمعلومات ديالو للحكّام بوحدهوم (إما بلڤيبرور أولا شي ضو فلماݣانة ديالهوم).

لفيفا عندها سيستيم اللي كاتجرّب بيه لمواكن ديال هاد الطيكنولوجيا من الشركات اللي كايصاوبوهوم قبل ماتعطيهوم رخصة باش يبداو ينتجوه. من بعد لفيفا كاتدوز "متيحان لخراني د لانصطالاصيو" قبل ما يتخدّم السيستيم فالتيران. لحكام خاصهوم يقلّبو السيستيم مزيان واش خدّام قبل مايبدا شي ماطش.[8][9]

كريتيك بدل

واخا كاينة ناس اللي معا هاد الطيكنولوجيا وكاتݣول باللي كاتعاون تنقص لغلاط ديال التحكيم، كاينة ناس أوخرة اللي كاتنتاقدها. بزاف ديال لكريتيك كان جا من عند لفيفا براسها، ومابيناتهوم سيپ بلاتر، الرايس لقديم ديال هاد لمنضّامة. بزاف ديال الناس ݣالو باللي ليستيعمال ديال هاد الطيكنولوجيا كايحيّد لفراجة اللي كاتجي فاش لكوايرية ولحكّام كايتناقشو على الصحة ديال شي بيت.[10] سيپ بلاتر كان ݣال باللي "بزاف ديال الرياضات كايبدلو لقواعد ديال اللعب باش يتأضابطاو معا الطيكنولوجيات الجداد. [...] حنا ماكانديروش هادشي وهادشي علاش لكورة رياضة اللي مشهورة بزاف".[11]

كاينين نتيقادات على التمن لغالي ديال هاد الطيكنولوجيا. فأبريل 2013 ݣال ضون ݣاربر، لمفوّض على الدوري ديال لميريكان، باللي لبوطولة ديالو ماغاديش تخدّمها، وݣال باللي لغلا ديالها سبب من لاسباب لكتار. التركيب ديال طيكنولوجيا خط لݣول كايسوى 260 ألف دولار (تقريبا 2.32 مليون درهم) لكولّا تيران، وكولّا ماطش خاص يتفوّت فيها 3900 دولار (تقريبا 35 ألف درهم).[12] فاللول ديال 2014 لأغلبية ديال لفراقي فلبوطولة اللولة والتانية ديال ألمانيا صوتو ضد هاد الطيكنولوجيا بسباب لغلا ديالها. التمن لكولّا فرقة كايوصل ل 250 ألف أورو (2.64 مليون درهم) لكورة مجهزة حتال 500 ألف أورو (5.30 مليون درهم) لسيستيم كامل. يورݣ شماتك، لمدريب ديال فرقة 1 كولن إف سي، قصّر لهضرة الطويلة وݣال "التمن ديال طيكنولوجيا خط لݣول غالي بزاف، هادشي كايخلي ليستيعمال ديال هاد الطيكنولوجياشي حاجة مامقبولاش".[13]

كاين كريتيك حتى على بزاف دلمرّات اللي خسرات فيهوم طيكنولوجيا خط لݣول، واللي بسبابها تضيّعو بيوتة حيتاش ماعلناتش عليهوم.[14][15] قررات لبوطولة ديال فرانسا تحبسها مؤقتا[16] حيتاش خسرات فالشوط التاني ديال ماطش ف كاس لبوطولة د 2017-2018.[17]

عيون لكلام بدل

  1. ^ "Wenger praise for Goal Decision System". PremierLeague.com. 8 غشت 2013. مأرشيڤي من لأصل ف 2015-01-08. تطّالع عليه ب تاريخ 10 غشت 2013.
  2. ^ FIFA (2012). "Testing Manual" (PDF). FIFA Quality Programme for Goal Line Technology. مأرشيڤي (PDF) من لأصل ف 2019-12-12. تطّالع عليه ب تاريخ 2021-09-01.
  3. ^ Thomas، K. (2014). "Keeping an eye on the ball". SPIE Newsroom. doi:10.1117/2.2201406.01.
  4. ^ FIFA.com (1 أبريل 2014). "Goal-line technology set up ahead of FIFA World Cup". مأرشيڤي من لأصل ف 2018-05-09. تطّالع عليه ب تاريخ 2021-09-01.
  5. ^ https://football-technology.fifa.com/en/blog/hidden-technologies-at--2018-fwc/
  6. ^ "Hawk-Eye confirmed as goal-line technology provider for Canada 2015". FIFA. 31 مارس 2015. مأرشيڤي من لأصل ف 2018-06-19. تطّالع عليه ب تاريخ 2 يونيو 2015.
  7. ^ "Updated goal-line technology testing manual published - FIFA Quality Programme". مأرشيڤي من لأصل ف 15 ماي 2015.
  8. ^ "TESTING MANUAL 2014 version 2.0" (PDF). FIFA.com. FIFA Quality Programme for Goal-Line Technology. 2014. مأرشيڤي (PDF) من لأصل ف 2018-07-13. تطّالع عليه ب تاريخ 2021-09-01.
  9. ^ "Final installation test - FIFA Quality Programme". مأرشيڤي من لأصل ف 6 يوليوز 2015.
  10. ^ Kelso، Paul (27 يونيو 2010). "England v Germany: Frank Lampard's 'goal' reignites goal-line technology debate". The Telegraph. London. مأرشيڤي من لأصل ف 30 يونيو 2010. تطّالع عليه ب تاريخ 28 يونيو 2010.
  11. ^ CBC Sports (8 مارس 2008). "FIFA halts instant replay experiment". Cbc.ca. مأرشيڤي من لأصل ف 2 شتنبر 2013. تطّالع عليه ب تاريخ 28 مارس 2010.
  12. ^ "mlssoccer.com - MLS Commissioner Don Garber says league won't adopt goal-line technology by 2014". مأرشيڤي من لأصل ف 2015-09-19. تطّالع عليه ب تاريخ 2021-09-01.
  13. ^ Fußball: Bundesliga verzichtet auf Torlinientechnik, Spiegel Online, 2014-03-24.
  14. ^ "Sheffield United fume after being denied goal on Premier League return". The Independent (ب نڭليزية). 2020-06-17. مأرشيڤي من لأصل ف 2023-04-18. تطّالع عليه ب تاريخ 2020-06-18.
  15. ^ "MW30 VAR review: Why Sheff Utd were denied a goal". Premier League. 2020-06-18. مأرشيڤي من لأصل ف 2023-04-09. تطّالع عليه ب تاريخ 2021-01-21.
  16. ^ "French league suspends goal-line technology after errors". Reuters (ب نڭليزية). 2018-01-12. مأرشيڤي من لأصل ف 2023-04-09. تطّالع عليه ب تاريخ 2020-06-19.
  17. ^ "French league suspends goalline technology after cup errors". BBC Sport (ب نڭليزية). 2018-01-11. مأرشيڤي من لأصل ف 2023-04-17. تطّالع عليه ب تاريخ 2020-06-19.
  تقدر تزيد شوف بزاف د تّصاور و لمعلومات ديال Goal-line technology ف ويكيميديا كومنز.
  تقدر تزيد شوف بزاف د تّصاور و لمعلومات ديال Goal-line technology ف ويكيميديا كومنز.
مرجّعة من "https://ary.wikipedia.org/w/index.php?title=طيكنولوجيا_خط_لݣول&oldid=324644"