رحلة فضائية

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

رحلة فضائية ولا تسافيرة للفضاء هي واحد الرحلة پالستية لـلفضاء البراني. وكاين منها زوج ديال نواع؛ لعامرة، ولي ماشي عامرة. وكيتعتابر يوري جاجارين من لإتيحاد سوڤياتي أول إنسان فتاريخ كيدير رحلة فضائية. ومن بين الرحلات لفضائية لعامرة كاين؛ برنامج أپولو لميريكاني دلهبوط على لقمر، ولبرامج ديال رحلات لمكوك لفضائي، وبرنامج سايوز الروسي درحلات لفضا، وعاد زيد عليهم محطة لفضاء دولية دبا. أما بالنسبة للرحلات لفضائية لي ماشي عامرين، كاين لمسابر لفضائية لي كتخرج على لارض، وكاين لأقمار صطيناعية لي كدور على لارض. وكتساڭ رحلات لفضائية اما بـ"طيلي روبوتيكس" ولا كتكون مستاقلة كاملة.

الصاروخ پروتون غادي لمحطة ديال لفضاء الدولية.

الرحلات دلفضاء كتستعمل فالتقلاب الفضائي، وفنشاطات دالتجارة، وحتا السياحة لفضائية، ولأقمار صطيناعية، وحتا فلأرصاد الفضائية، وفتجسس، ورصد ديال لارض.

فلعادة كتبدا الرحلة لفضائية بطليق ديال الصاروخ، الشي لي كيعطي للرحلة دفعة أولية باش تغلب لقوة دلجاذبية دلارض. فاش كتوصل لمركبة للفضاء كتبقى فلبلاصة ديال دراسة، شي مركبات كيبقاو فلفضا لوقيتا ماشي محددة، وكيتهرسو شي وحدين فرحلة درجوع فاش كيدخلو فلغلاف دلجو، وكيصطادمو شي وحدين اخرين بشي سطح قمري ولا كوكبي.

التاريخ

كيتعتابر لعالم روسي قسطنطين تسيولكوڤسكي اول واحد نظر فلواقيع للفكرة ديال تسافيرة للفضاء، فاش لاح كتابو فعام 1903، وسماه (الاستكشاف دالفضاء بلماكينات ديال رد الفعل). ولكن أفكارو مانتاشراتش برا روسيا. ومنبعد ولات تسافيرة فلفضاء ممكنة فلهندسة مور مانشر لعالم روبرت جوددارد فعام 1919 ورقة علمية وسماها "الطرق دلوصول لعلوات طالعة" وناقش فيها لفيكرة ديال لاستيعمال دصاروخ بلفيول سايل. وحتا تبت فلمعمل بلي هاد صاروخ غادي يقدر يخدم فلفضاء عادي، ولكن لغالبية دلعولما متيقوهش فديك لوقيتة. وساهمات الابحات ديالو بزاف فالرحلات دلفضاء. وفعام 1944 قدر أول صاروخ يوصل للفضاء ولي كان هو صاروخ لالماني فاو-2. وفعام 1957 سيفط لإتيحاد سوڤياتي أول قمر صطيناعي سپوتنك 1 وكيتعتابر أول جسم كيتسيفط للفضاء، وفعام 1961 قدرو السوڤياتيين يسيفطو أول راجل للفضاء ولي كان هو يوري جاجارين. وحتا لدابا كتعتابر الصوارخ هي لوساىل ديال لمسيفطة للفضاء، فلوقيتة لي ماقدراتش الطيارات مولات الماطر النفاتة توصل ليه.

لمراحل

الطلقان

الصاروخ ساتورن على لمنصة ديال طلقان.

كتعتابر الصوارخ هي لوساىل لوحيدة ديال لمسيفطة للفضاء لي كاينة دابا، وماتبناتش لحد الساعة شي وساىل اخرة من غيرها. فلعادة كتبدا لعملية دطلقان من لمرسا لفضائي (كوسمودروم). لي فيه لمعدات ديال عملية طلقان لعمودية، ومن مدرجات ديال تقلاع ولهبوط ديال طيارات. وكتواجد هاد لمراسي فلبلايص لي بعيدة على الناس على ود الصداع والسلامة.

منصة طلقان، كتكون عبارة على هيكل تابت مديور بلش يطلق لمركبات لمجوقلة، وكيتكون من برج دطلقان وخندق دلعافية، وكتكون دايرة بيهم حتا لمعدات لي تيستعملوها فعملية الطلقان باش يخليو الصاروخ واقف، ويزيدو ليه لفيول، ويصلحوه. ويقدر يوصل لوزن ديال صاروخ قبل لعملية دطلقان لمئات دلأطنان، ووصل لوزن ديال لمكوك دلفضا تاع كولومبيا فرحلة الطلقان ديالو (STS-1) لـ2030 طن (4480000 رطل).

لوصول للفضاء

كيتعتابر لفضاء لبراني هو أي حاجة فاتت لخط ديال كارمان، لي بعيد على سطح دلارض بـ100 كيلوميتر. اما لولايات لمتاحدة كتقول بلي لفضاء لبراني هو اي حاجة فاتت 80 كيلوميتر على سطح ديال لارض.

وكتعتابر الصوارخ هي لوساىل لوحيدة باش توصل للفضا. فلوقيت لي مكيقدرش فيه لماطر ديال الطيارات يوصلو للفضاء بسباب نقص ديال لوكسجين.

دوز على لمدار

باش تمشي للرحلات لقمرية ولا لكوكبية ماشي ضروري تدوز على شي مدار. بحال لمركبات روسية لي كانت كتعلي بزاف وبلا ماتدوز على حتا مدار. وحتا نازا كانت فلول كتسيفط رحلاتها للقمر نيشان بلا ميدوزو على حتا شي مدار، ولكن فاش لقات بلي هاد الطريقة كتاكل الفيول بزاف، قررات تبقا تخلي رحلاتها يدخلو فشي مدار فلول وموراها يعوجو ويمشيو للقمر.

الاسطروديناميك

الديناميك دلفضا ولا الاسطرودايناميك هي لقراية ديال طرقان لي كتمشي فيها لمركبات لفضائية، ولعلاقة ديالها بلجادبية والدفيع. ولمعريفة دلقواعد تاعها كتعاون بزاف لمركبات باش توصل للهدف ديالها فوقت قليل ومحدد، وحتا تاكل غير شوية ديال لفيول.