بيت لغرس

بيت لغرس ؤلا بيت الجاج (النݣليزية: Greenhouse ؤلا Glasshouse) (الفرانساوية: Serre) (لعربية: الدفيئة) هي واحد لبنية للي لحيوط ؤ السقف ديالوها مصاوبين ب لاساس من مواد شفافة بحال الجاج ؤ للي كا يكبر فيه لغرس للي كا يحتاج ضروف مناخية مضبوطة. هاد البنيات ممكن الكبر ديالها يتراوح من برارك صغار ل صروحا صناعيين عملاقين. الداخل د بيت الغرس كا يولي دافي على لخارج ديالو فاش كا يتعرض ل الشعا تاع الشمش ؤ بالتالي كايحمي الغرس للي من وسطو من لبرد ف وقيتة الليالي.

نبتة ڤيكطوريا أمازونيكا ف وسط من بيت غرس عملاق ف الجردة البستانية د سانت پيطرسبورݣ

شتلات د ماطيشة صالحين ل لغرس ف بيت غرس صناعي كبير ف هولاندا

بزاف د بيوت لغرس عبارة على مجمعات صناعية هاي طيك ل لينتاج تاع الخضرة، الورد، ؤ الديسير. بيوت لغرس تاع الجاج كا تكون عامرة ب لماطيريل تاع التسخان، التبراد، الشعا، ؤ ممكن تكون مونيطوري ب لورديناطور باش تؤپتيميزي الضروف د النمو د لغرس. بزاف د التقنيات كاتخدّم باش تمانادجي الضروف د النمو د الغرس. من بينها: درجة الحرارة د الهوا، الروطوبة النسبية، ؤ البعد على الضغط د التبخّور. هادشي كامل باش توفر أحسن مناخ ممكن للتربية د شي غرسة.

التاريخ

لخيار مدلي من لقرمود د بيت د لغرس ف ريتشفيلد، مينيصوطا فين لفلاحا كانو كا يزرعو عدد كبير د لخيرات لفيلاحية موجهة ل لبيع ف السوق د مينياپوليس، 1910م.

ؤرونجري ف قصر د ڤيرساي ف فرانسا

بيت د لغرس معزول ب لميكة ف نيوزيلاندا

لفيكرة د غرس نبتات ف وسط محكوم كانت موجودة من يامات الرومان. ليمراطور الروماني تيبيروس كان كاياكل لفݣوس يوميا. الجرادنية الرومانيين كانو كايخدّمو طرقان صناعية (كاتشبه لبيت لغرس) باش يوفروه ليه على طول العام. الفݣوس كان كاينزرع ف كرارس ب الروايض للي كانو كا يعرضوها للشمش ب نهار ؤ كا يدخلوها ب ل الداخل ب الليل باش تبقى دافية.

لقرن 19م

بيوت لغرس لملكية د لايكن، بروكسيل، بلجيكا، مثال على لمعمار د بيوت لغرس ف لقرن 19م.

لعاصر الدهبي د بيوت لغرس كان ف النݣليز ف لفترة لڤيكطورية فين أكبر بيوت لغرس ݣاع تبناو؛ هاد بيوت لغرس ب قوة ما كانو عاليين كان ممكن تخشي من وسطهم شجر عالي ل درجة تسماو ب بيوت النخيل.