ويكيپيديا:نصايح ل لمرشحين ل تامغاريت
لپروصي باش لواحد كيولي أمغار (إداري) غادي تلقى الشرح ديالو ف الراس ديال الصفحة د طلب صلاحيات أمغار براسها.
أي خدايمي عندو كونط ف ويكيپيديا ب الداريجة يقدر، مبدئيا، يولّي أمغار. لقرار كيرجع ديما ل الجماعة د لكتاتبيا ديال ويكيپيديا باش يوافقو باش يتّعطاو الصلاحيات د أمغار ل شي خدايمي ؤلا لا. ف لوقت لحالي ماكاينينش قواعد مضبوطين ل هاد لپروصي (متلاً عدد محدد ديال التبديلات، لمقالات و الصفحات لي تصاوبو، مدة من فاش صاوب لكونط، و زيد و زيد). وخا داكشي كاينين توجيهات عامة لي لكتاتبيا كيستعملوها باش يقررو واش يديرو التقة ف شي واحد منهوم باش يكون أمغار ؤلا لا:
- خاصو يكون خدم مدة كافية ف لويكي، و دار واحد لمقدار مابيهش ديال الصفاحي و التبديلات لي كيخليوه يكون فاهم مزيان لأساليب لمقبولة د لكتابة، و تعرّف على لكتاتبيا لخرين و تفاهم معاهوم. لحتيمال باش شي حد جديد ب ميكتو ماعمّرو دار تبديل ف ويكيپيديا ب الداريجة ولّا عندو تبديلات قليلة، ياخد صلاحيات أمغار، قريب ل زيرو.
- خاص يكون عندو فهم مقبول ديال لحكام د لويكي، و علاش مديورين و كيفاش يقدرو يتطورو و يتبدّلو. هادشي كيبان من لمداكرات و التواصل معا لكتاتبيا.
- خاص يكون لهدف لاش باغي تامغاريت هوّ تطوير لموسوعة على حساب لحكام لأساسية ديال ويكيپيديا، ماشي شي هدف أخور شخصي متلاً.
- على حساب علاياش باغي يركّز ف لخدمة د تامغاريت، خاصو يكون ضابط لمعارف التقنية و د لحكام لي متعلقة بيها (متلاً أمغار مكلف ب لفيشيات خاصو يكون فاهم مزيان لقوانين ديال لحقوق د النشر ؤلا عندو قدرة باش يلقى لمعلومات لي خاصو بشكل سريع).
- خاصو يكون مشهود ليه بشكل عام ب لحيادية ف لكتابة، يعني ماكيحاولش بلعاني يحط معلومات من مصادر معروف بلي مشبوهة، ؤلا كيغّلب ريّ على ريّ أخور بدون دليل، و يكون كيسمع ل لأراء لمختالفة و كيتقبل لوجود و الزيادة ديالها ف لمقالات، طالمّا جات من مصادر موتوقة، و خا مايكونش متافق معاها.
- خاصو يكون مشهود ليه بلي ماكيجبدش الصداع ؤلا كيدير التخريب ف لويكي، و كيحاول يهدّي لوضعية يلا كانت شي مناڭرة بين جوج كتاتبيا ؤلا كتر، ماشي يزيد يشعل لقضية.
- خاص يكون عندو فهم ديال شنو هيّ تامغاريت، و تكون عندو شوفة مستقبلية واضحة على شنو باغي يدير ب الصلاحيات (متلاً تحياد التبديلات التخريبية، تطبيق لحكام و تطويرها، و غيرها)