وليد الرݣراݣي

مقالة ؤلا فقرة خاصها تّقاد. هاد لمقالة ؤلا هاد لفقرة مرونة شوية، خاصّها تّقاد ؤ تزيد تّنضّم. ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط!

وليد الرݣراݣي
معلومات عامة
زيادة	23 شتنبر 1975 (49 عام) كوربيل إيسون
لجنسية	لمغريب فرانصا
لحرفة	كوايري و مدريب د لكورة
لّوغات لي كيعرف	لفرانساوية
لكاريير ديال الشخص
شارك ف	كاس إفريقيا د لكورة 2004 كاس إفريقيا د لكورة 2006 كاس لعالم 2022
رياضة
رياضة	كورة
پوسط	ديفونسور
لجنسية رّياضية	لمغريب
لفراقي
أعوام	فرقة	ماتشات	بيوتا
1998–1999	راسينغ كولومب	17	(3)
1999–2001	نادي تولوز	37	(3)
2001–2004	نادي أجاكسيو	72	(3)
2004–2007	راسينغ سانتاندير		-
2007–2007	نادي ديجون	10	(0)
شتنبر 2007–يونيو 2009	نادي غرونوبل	39	(0)
لمونتخاب لوطني
2001–2009	لمنتخب لوطني لمغريبي د لكورة	52	(1)
لجوايز	(20 دجنبر 2022)  وسام لعرش ب ڭراض كوماندان (21 غشت 2016)  لوسام د لمكافأة لوطنية من الدرجة د قايد (14 فبراير 2004)  وسام لمكافأة لوطنية ب ڭراض ديال ؤفيسيي

وليد الرڭراڭي (تولد ف 23 شتنبر 1975 ف نّواحي د باريز، ف فرانسا) كان كوايري مغريبي محتارف تيلعب ف الدفاع. هو لمدريب د لمنتخب د لمغريب د لكورة من نهار 31 غشت 2022. رڭراڭي لعب مع لمنتخب د لمغريب من 2001 ل 2009. ربح جائزة ديال  ثالث أفضل مدرب ف العالم حسب الهيئة العالمية الكروية للأرقام و التاريخ IFFHS.

لكاريير

كا كوايري

الرڭراڭي كان كيلعب ف أغلب الوقت كأريير دروا، البداية كانت مع فرقة فرانس 92، اللي لعب معاهم عام، و من بعد مشا ل تولوز اللي دوز معاهم عامين، و من بعد شد الرحيل مرة ثالثة و هاد المرة لفرقة أجاكسيو اللي بقا معاهم ثلث سنين، و قدر يطلعهم من دوزيام سيري للدرجة لولى ف انجاز تاريخي.

بعد هاد النجاح الكبير، الرڭراڭي ف لعمر ديال 29 بغا يبدل الشومپيونا، و مشا ل الصبليون عند راسينڭ سانتاندير، و هي التجربة اللي غادي تشهرو و خلاتو يلعب كاس إفريقيا مع المونتخاب ف 2004.

من بعد ثلث سنين ف الصبليون، الرڭراڭي أيرجع لفرنسا ف سن 32 باش ينهي مسيرتو، ستامر ربع سنين ف فرنسا و لعب لثلاثة د لفراقي، مع ديجون 3 سنين و من بعد مع ڭرونوبل و سالا مسيرتو الكروية مع فرقة فلوري ميروجي.

الرڭراڭي عندو جوج جنسيات المغربية و الفرانساوية، و لكن ختار يمثل منتخب بلادو المغرب بزربة، مع المونتخاب الرڭراڭي وصل لفينال كاس إفريقيا ف عام 2004، و لعب ف كأس افريقيا ديال 2006 و تصفيات كأس العالم، ف المجموع لعب 45 ماتش مع المونتخاب و اعتزل دوليا ف عام 2009 و سجل هدف واحد.

كا مودريب

بعدما عتازل ككوايري ف سن ال36، عام 2011، قلبها تدريب و بدا ف اللول مع الفئات السنية و لكن دخل بزربة للإدارة التقنية ف الجامعة الملكية د كورة، كمساعد مدريب ل رشيد الطاوسي ف 2012 و 2013، اللي كان فديك الوقت مدرب د لمنتخب. تجربة دامت عامين قبل ما يبدل الرڭراڭي البلاصة ل لفتح الرباطي المغربي كمدرب رئيسي، ف أول تجربة ليه، تجربة بقا فيها الرڭراڭي 6 سنين و قدر يربح بطولة د المغرب، كأس العرش، جوج مرات نصف نهائي كأس الكاف، درب الفتح ف 168 ماتش، ربح 68، تعادل 55 و خسر 44،  من بعد الفتح الرڭراڭي مشا ف أول تجربة ليه برا المغرب ، و درب الدحيل القطري اللي ف 18 ماتش و ربح بطولة قطر قبل ما تتم اقالته، من بعد تجربة قطر، الرڭراڭي قرر ياخوذ عام راحة، باش يرجع ف التدريب عام 2021 مع الوداد الرياضي البيضاوي المغربي، ف تجربة كانت ناجحة بكل المقاييس، حقق فيها الرڭراڭي دوبلي البطولة ديال المغرب و دوري أبطال إفريقيا و فينال كأس العرش، تجربة الوداد سالات ف صيف 2022، بعد نهاية عقد الرڭراڭي مع الوداد، قرر يرحل و يوقع عقد مع الجامعة الملكية لكرة القدم و يصبح مدرب للمنتخب المغربي قبل أشهر قليلة من بداية كأس العالم قطر 2022،

مع المونتخاب و وخا انه شد المغرب قبل أربعة شهور فقط، قدر يدير واحدة من أكبر انجازات الكرة العالمية بالوصول لنصف نهاية كأس العالم ، و رباحات ضد اسبانيا، البرتغال، بلجيكا، كندا، و بعد كأس العالم المغرب مع الرڭراڭي قدر يربحوا حتى المنتخب البرازيلي ف ماتش ودي بطنجة.

حياتو

لولادة، شباب و لبدية لحتيرافية

تولد الرڭراڭي و كبر ف بلاصة سميتها كوربيل ايسون، ف نواحي باريز، ف منقطة كانت معروفة بأنها صعيبة اقتصاديا، من عائلة من أصول مغربية و بالضبط من بلاصة ف المغرب سميتها مصمودة، الرڭراڭي اصلو من قبيلة مصمودة " الرگراكا "، و هو الخو الثالث من عائلة ديال ستة دالخوت، الواليد ديال الرڭراڭي، " محمد عبد السلام الركراكي " كان كيديه ديما لفنيدق باش يشوف فين كانت كتسكن عائلتو، كيقول الرڭراڭي "كل عام، كنا كرجعوا للبلاد لشهرين، كانت حاجة ضرورية لينا، هادشي علاش قدرت ندير بزاف ديال الصحاب". الرڭراڭي قدر يجمع بين اللعب ف الدرب و القراية، و نجح ياخوذ باك علمي و ديبلوم جامعي عام ف التخصص ديال الاقتصاد و الاجتماع. ف الدرب ديالهم و بالضبط ف مون كونسيي، الرڭراڭي كان كيقصر كورة مع عشرانو و كيلعب تورنوات ف الويكاند ضد دروبة اخرين، و هادشي خلى يكون عندو حس ديال التنافس كبير، و الجائزة اللي كانوا كياخذو هي بيتزا إلى ربحوا، الرڭراڭي ف صغرو كانت عزيزة عليه الميلان، بملاعبية ديالها الهولنديين فحال غوليت، فان باستن، ريكارد، و هادشي علاش ديما كان كيلعب بتوني الميلان ف الدرب، اذا بغينا رجعوا للبدايات ديالو. اللولة كاع، الرڭراڭي بدا صغير ف فرقة كوربي ايسون، و دغيا عجب المدرب المشهور رودي غارسيا، اللي كان فديك الوقت شاد الفريق اللول، كيقول واحد مصاحبي قديم ديال الركراكي: «كنا كندوزوا السبت نلعبوا ماتشات ديال التورنوات، و الاحد مع فرقة كوربيل، كنا كنلعبوا لثلاثة ولا أربعة سوايع، كنا كنتعلمو الكرة و و زيد على هادشي القيم. الرڭراڭي د كان ديما كيقدر يخلق واحد المجموعة و الجو ضد الحي العدو ديالنا».

«واحد النهار، بزهر، مشيت نشوف الجونيور، و شفت هاد اللعاب الرقيق، الجراي، لي كيلعب برجلو مزيان، بشخصية قاصحة، و كنت كنقول شنو كيدير هنا مع البراهش... و قررت نطلعوا للفرقا لولا ، و من بعد ما عمرو عاود هبط، لعب معانا عامين و مشا طاير» – رودي ڭارسيا ف حوار مع " ليبراسيون " ف 2005.

	كان عندي 18 عام و هو 20، كنت جالس فواحد الفوطوي بلون مارون، نتسنا وليد يكرط اللحية، كنا كنمشيو لكارفور ديال زنقة ڤيلابيؤ غير حدانا، كان البريوش دوري ساوي عشرة فرانك، مكانش عند كل واحد فينا عشرة كاملة، داكشي علاش كنا كنتشاركو، و كنقسموا الماكلة و كنت كناخوذ عصير د ليمون، كنت ديما كنقول ليه أتكون لعاب كبير، و هو كيقوليا لا لا نتا اللي أتكون.
—جورج كولونيطي، عشير وليد ديك الوقت ف فرقة كوربيل ايزون، ف 9 ديسمبر 2022، ف مايك RMC sport بخصوص طفولته مع وليد،

ف أول عام ليه الرڭراڭي لعب ف الهواة مع Rc France ، ف 1999 يوليوز أيسني مع تولوز إفسي اللي كان كيدربها آنذاك الان جيريس، ف 31 يوليوز 1999، لعب اول ماتش حترافي ليه ف دوزيام سيري الفرنسية ضد فريق كان ( و خسروا واحد زيرو )، ف 21 غشت 1999، ماركا الرڭراڭي اول بيت ليه ضد غيون ف رباح ديال جوج لزيرو، سالا العالم ديالو و هو لاعب واحد و عشرين ماتش و ماركا جوج بيوتا، فاش طلع الرڭراڭي مع تولوز للبروميير سيري ف عام 2000-2021، لعب الرڭراڭي 16 ماتش، ماركا واحد و عطا باص ديال البيت، و لعب ف كأس ديال فرانسا ماتش، لكن فرقتو تولوز هبطو بزربة،  الفرقا ديالو كانت كتعيش مشاكل ديال لفلوس كبيرة و جراو عليه بفسخ الكونطرا، و الرڭراڭي بعد هذا بقا شوماج ستة أشهر.

ف 2001 نوڤمبر، سينا ليبر مع أجاكسيو، فرقا كانت فديك الوقت ف دوزيام سيري، ف ثمنية و عشرين نونبر 2001، لعب اول ماتش ليه اساسي معاهم ضد نيم الاولمبيك و ربحو بثلاثة واحد، سالا العام معاهم و هو لاعب ب16 ماتش، و بلا ما يماركي اي بيت، و لكن قدر يحقق معاهم نجاح تاريخي بالصعود للدرجة لولة،  ف سبعة نونبر 2002، ماركا اول بيت ليه معاهم و لكن هو بيت رباح، بعدما ولا عنصر مهم بزاف ف فرقة اجاكسيو ، قدر يلعب اثنين و ثلاثة وعشرين ماتش العام اللي من بعد ف بروميار سيري ديال فرانسا،  ف 11 يناير من 2003، خذا اول حمرا ليه ف الكاريير ديالو ضد باريس سان جيرمان.

مواسم ف ليڭا و لإصابات (2004-2007)

ف 29 ماي 2004، بعد ما قصر مع المونتخاب ف كاس أفريقيا 2004، و اللي وصلوا فيها لأسود للفينال، الأداء ديالو الجيد خلاه يمشي للصبليون، مع فرقة راسينڭ سان تانتاندر، اللي كانو كيلعبوا فديك الوقت ف ليڭا سبليونية، 15 يوم قبل بدية الشوموبيونا، الرڭراڭي أيتهرس ف ماتش أميكال، و غايريح نص العام.

ف 22 يناير 2005، الرڭراڭي أيرجع لتيران بعد الإصابة، و يلعب أول ماتش ليه كتيتيلير ضد البارسا ديال رونالدينهو، و خسرات فرقتو بثلاثة لزيرو، ف 6 من شهر جوج، أياخوذ حمرا ضد فياريال، و ف عشرين من شهر جوج أيربح أول ماتش ليه ف ليجا ضد فالنسيا بواحد لزيرو، ف المجموع أيلعب 17 ماتش داك العام و فرقتو أتفك من الهبوط ف أخر الدورات بزز.

ف العام اللي موراه، نفس السيناريو ديال العام الليفات أيتعاود، بضربات و إصابات كتعاود خلاتو ميلعبش بزاف، و أصبح رومبلاسون.

رجوع ل فرانسا (2007-2009)

ف 1 من شهر جوج ديال 2007، الكونطرا ديال الرڭراڭي ف السبليون سالات و قرر يرجع لفرانسا، و هاد المرة مع فرقة ف دوزيام سيري.

الرڭراڭي و المونتخاب

ف 31 من شهر تمنية 2022، تم تقديم الرڭراڭي كمدريب للمنتخب المغربي من عند الجامعة الملكية د كورة على طريق رئيسها فوزي لقجع، ف موركاب محمد السادس، و خلف المدرب المقال وحيد خاليلويزتش، السطاف تكنيك ديال الرڭراڭي كان فيه رشيد بن محمود كمساعد مدرب، غريب امزين، محمد حراك كمدرب حراس، هاري كينغستون مسوول على الاداء، موسى حبشي محلل تكتيكي.

في طناش من 2022، الرڭراڭي أيعلن على أول ليسطا ليه للمنتخب و بدون ما يدير تغييرات كبيرة، لاعبين جداد أيبانو مثل حمزة الموساوي و عبد الحميد صابيري، و الرڭراڭي الشديرة من طاليان، و عبد الصمد الزلزولي، و هاد الثلاثة لآخرين كاملين ايلعبوا اول ماتش ليهم مع الموونتخاب ضد الشيلي في 23 شتنبر من 2022، الرڭراڭي كذلك ايدافع على النصيري مهاجم الموونتخاب اللي كان كيتعرض لانتقادات كبيرة و ايصرح انه ايكون اول لعاب في ليسطا ديالو للمونديال حيث ثايق فيه، أول ماتش ليه ودي سالا برباح جوج لزيرو ضد الشيلي. و لماتش كان سالا بهبوط الجمهور لتيران.

من اشهر تصريحات وليد الرڭراڭي:

"قلت ليكم ديرو النية را تضرب ف بوطو و تخرج، انا قبل كأس العالم قلت مغنلعبوش 3 لماتشات و نرجعو ، خلينا نحلمو علاش منحلموش "

لإنجازات ديالو

دار الرڭراڭي بزاف د لإنجازات مع لفراقي اللي درّب، منها:

• كاس لعرش 2014 مع لفتح رباطي
• لبطولة د لمغريب ف 2016 مع لفتح رّباطي
• لبطولة د قطر ف 2020 مع الدحيل
• لبطولة د لمغريب ف 2022 مع لوداد لبيضاوي
• دوري أبطال إفريقيا 2022 مع لوداد لبيضاوي
• لمركز الرابع ف كاس لعالم 2022 مع لمنتخب لوطني لمغريبي د لكورة.

الإنجازات ديالو الفردية

• ^{أول مدريب عربي و أفريقي كيوصل لنصف نهاية كأس العالم}
• ^{أول مدريب عربي و أفريقي كيحقق ربعات رباحات ف كأس العالم}
• ^{أول مدريب عربي و أفريقي كيحقق ترتيب من أفضل ثلاثإ أفضل المدربين ف العالم}
• ^{أفضل مدرب ف أفريقيا عام 2022}
• ^{أفضل مدرب ف المغرب عام 2022}
• ^{أفضل مدرب عربي ف عام 2023}
• ^{أفضل مدرب أفريقي ف عام 2023}
• ^{مارس دور 2014}

عيون لكلام

1. Par Laurent Pruneta, « https://www.leparisien.fr/sports/football/de-corbeil-essonnes-au-mondial-au-qatar-sur-les-traces-de-walid-regragui-nouveau-selectionneur-du-maroc-13-08-2022-A7Z5LU6AUZFWJEA4BKE6KUZEZU.php », sur leparisien.fr, 13 août 2022
2. « » أب وليد الرڭراڭي يحث ابنه على تأهيل المنتخب لنهائي كأس العالم و يطلب من المغاربة الدعاء معه [Le père de Walid Regragui exhorte son fils à qualifier l'équipe nationale pour la finale de la Coupe du monde et demande aux Marocains de prier avec lui], sur YouTube, 28 novembre 2022
3. ↑ «https://www.lecourrierdelatlas.com/walid-regragui-le-selectionneur-qui-tombe-a-pic/ » Le Courrier de l'Atlas, 6 décembre 2022
4. «https://www.lavieeco.com/au-royaume/walid-regragui-le-footballeur-intello-6309/ » https://www.lavieeco.com//
5. https://rmcsport.bfmtv.com/football/coupe-du-monde/maroc-portugal-walid-regragui-la-fierte-de-corbeil-essonnes_AV-202212090346.html sur RMC SPORT
6. https://www.liberation.fr/sports/2005/08/26/walid-regragui-de-la-cite-aux-etoiles_530330/
7. https://lematin.ma/journal/2004/Joueur-du-Onze-national--Walid-Regragui-au-Racing-Santander/41162.html
8. https://www.sofoot.com/regragui-file-au-qatar-479262.html
9. https://www.francefootball.fr/news/Walid-regragui-et-le-fus-rabat-sacres-champion-du-maroc/689860
10. https://www.footmercato.net/a5584088522043556748-maroc-un-contrat-de-3-ans-pour-walid-regragui
11. https://sport.le360.ma//maroc/officiel-la-premiere-liste-de-walid-regragui-est-tombee-avec-hakim-ziyech-97696
12. https://www.onzemondial.com/selections/maroc-la-premiere-liste-de-regragui-grands-retours-de-ziyech-et-belhanda-796098
13. https://site.frmf.ma/fr/%D9%88%D9%84%D9%8A%D8%AF-%D8%A7%D9%84%D8%B1%D9%83%D8%B1%D8%A7%D9%83%D9%8A-%D9%85%D8%AF%D8%B1%D8%A8%D8%A7-%D9%84%D9%84%D9%85%D9%86%D8%AA%D8%AE%D8%A8-%D8%A7%D9%84%D9%88%D8%B7%D9%86%D9%8A/
14. https://www.footmercato.net/a4735800785829509763-amicaux-le-maroc-surclasse-le-chili-lalgerie-domine-la-guinee
15. https://www.rtl.be/sport/football/football-etranger/les-diables-sont-prevenus-les-marocains-sont-chauds-des-centaines-de-supporters-envahissent-le-terrain-apres-une-victoire-en-amical-video--1404527.aspx

تقدر تزيد شوف بزاف د تّصاور و لمعلومات ديال Walid Regragui ف ويكيميديا كومنز.